Додгоҳи ноҳияи Лахш пас аз яку ним сол ҳукми ду сокини ноҳияи Рашт Мавҷигул Ғарибова ва Худоёрова Мадина – модар ва хоҳари Ҷунайдуллоҳ ва Фарҳод Худоёровҳоро содир кард.
Гуфта мешавад, додрас Исроилзода Исроил Исмоил ин ду сокини ноҳияи Раштро бар асоси даъвои Судобаи Сикандар, яке аз ҳамдеҳагони Худоёровҳо, ки гӯё пиразани 66-сола ва духтараш ӯ, модар ва духтари ноболиғашро латтукӯб карда бошанд, ба ҷавобгарӣ кашидааст.
“Судшавандагон Ғарибова М. ва Худоёрова М.А. рӯзи 10 апрели соли 2022, соати 11:00 дақиқа ҳангоми дар назди манзили истиқоматии шаҳрванд Назриев Ё.Н. воқеъ дар ноҳияи Рашт, Ҷамоати деҳоти Б.Раҳимзода, деҳаи Яшм қарор доштанашон, аз рӯи хусумати қаблан доштаашон бе ягон сабаб ба шаҳрвандон Ҷураева Маърифат Муборакшоевна, Судобаи Сикандар ва ноболиғ Марямбибии Сикандар дарафтода, нисбати онхо бо афлози қабеҳ сухан гуфта, ҷангу ҷангҷол бархезонидаанд” – омадааст дар ҳукми Додгоҳ.
Тибқи ҳукми Додгоҳи ноҳияи Лахш, ки он рӯзи 10-уми ноябри соли ҷорӣ содир шудааст ва нусхаи он ду рӯзи пеш ба дасти Azda.tv расид, Мавҷигул Ғарибова барои се сол ҳабси хонагӣ ва Худоёрова Мадина 6 ҳазору 400 сомонӣ ҷарима шудаанд.
То ҳол назари мақомот дар ин бора дастраси расонаҳо нест.
Аммо, моҳи декабри соли 2022 Радиои Озодӣ дар истинод ба манбааш аз додгоҳи ноҳияи Рашт хабар дода буд, ки рӯзи 2-юми декабр Судобаи Сикандар ва модараш Маърифати Муборакшо, сокинони деҳаи Яшмро бо ҷурми “авбошӣ” ба андозаи 64 ҳазор сомонӣ дар маҷмӯъ баробар ба 128 ҳазор сомонӣ ҷарима кардаанд.
Ин манбаъ гуфт, онҳо бар асоси аризаи шикоятии Мавҷигул Ғарибоваи 66-сола айбдор шудаанд. Ҳарду дар моҳи апрели соли 2022 дар кӯча ӯро латтукӯб намуда, телефони ҳамроҳашро гирифтаанд. Назари модару духтари муттаҳам ба авбошӣ ба ҳукм ва қазия дастрас нест.
Фарҳод Худоёров, фарзанди Мавҷигул Ғарибова дар суҳбат бо Azda tv аз ҳукми додгоҳ изҳори норозигӣ карда, гуфт, ки он фармоишӣ аст ва ҳукм одилона содир нашудааст. Инчунин ӯ таъкид кард, ки ҳадди ақал се шоҳид ба фоидаи модарашу хоҳараш дар додгоҳ шоҳидӣ додаанд.
Худоёров мегӯяд, ки чун ҳукми додгоҳ дер ба дасти хонаводаашон расид, натавонистаанд аз болои он шикоят кунанд.
Ин бори аввал нест, ки номи ин хонавода расонаӣ мешавад. Пештар аз ин низ, Додгоҳи ноҳияи Лахш 1-уми июни соли 2022 Мавҷигул Ғарибова, сокини ноҳияи Рашт ва модари Ҷунайдуллоҳ ва Фарҳод Худоёровҳоро ба ду соли ҳабси хонагӣ маҳкум карда буд.
Додгоҳи ноҳияи Лахш ин сокини ноҳияи Раштро бар асоси даъвои Алишери Насриддин, яке аз ҳамдеҳагони Худоёровҳо, ки гӯё пиразани 66-сола ӯро латткӯб карда бошад, ва тибқи моддаи 237 Қисми 3-и КҶ Ҷумҳурии Тоҷикистон гунаҳкор дониста, ҳукм содир карда буд.
Инчунин яке аз фарзандони ин оила Ҷунайдулло Худоёров дар Русия дар боздошт қарор дорад ва хатари истирдод ба Тоҷикистон ба ӯ таҳдид мекунад.
Фарҳод Худоёров бародари Ҷунайдулло дар суҳбат бо Azda.tv гуфт, ки дар боз шудани парванда нисбати бародараш дар Тоҷикистон додситони ноҳияи Рашт Кишварзода Абдурашид, раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода даст доранд. Алишери Насриддин, яке аз нафароне, ки дар қатли Алиризо даст доштаасту дар озодӣ қарор дорад, аз болои Ҷунайдулло ба мақомот шикоят бурдааст.
Ичнунин ба гуфтаи Фарҳод Худоёров, хонаводаи Азимовҳо, ки аз пайвандони Маҳмадтоҳир Зокирзода, раиси Маҷлиси намояндагони Тоҷикистон ҳастанд, борҳо алайҳи хонаводаи онҳо зулму зӯрӣ кардаанд ва ҳатто соли 2021 бародарзодааш Алиризо Худоёрови 20-соларо ин хонавода ба қатл расондаанд.
Гуфта мешавад, Ҷунайдулло Худоёров соли 2018 бо иттиҳоми пайравӣ аз ҷараёни дар Тоҷикистон мамнуи “Салафия” ба панҷ сол зиндон маҳкум шуда буд ва соли 2019 бар асоси қонуни афв озод гашт. Вай он замон гуфта буд, ки бегуноҳ маҳкум шудааст ва парвандаро супоришӣ дониста буд.
