Вазорати корҳои хории Украина аз шаҳрвандони ин кишвар хоста, ки аз ҳар гуна сафар ба Русия худдорӣ кунанд ва онҳое, ки дар хоки Русия ҳастанд, фавран қаламрави он кишварро тарк кунанд.
Вазорати корҳои хориҷии Украина бо нашри як баёния ба расмият шинохтани Ҷумҳурии мардуми Луганск ва Ҷумҳурии мардумии Донетск, ду минтақаи ҷудоихоҳон дар шарқи он кишварро таҷовузи “Русия алайҳи Украина” хонда, гуфтааст, ки ин амр метавонад боиси маҳдудиятҳои ҷиддии расонидани кумакҳои консулӣ дар Федератсияи Русия шавад.”
Вазорати корҳои хориҷии Украина ба шаҳрвандони худ таъкид карда гуфтааст: “нодида гирифтани ин тавсияҳо таъмини ҳифзи дурусти шаҳрвандони Украина дар Федератсияи Русияро хеле мушкилтар мекунад.”
Пеш аз ин Украина эълон карда буд, ки масъалаи қатъи равобити дипломатӣ бо Русияро баррасӣ мекунад, аммо дишаб Влдамири Путин дар суҳбат бо расонаҳо гуфт, ки Русия қасди қатъи равобити дипломатӣ бо Украинаро надорад.
Аммо ин бо ҳол, ҳамоно набардҳои иттилоотӣ ҳар ду кишвар ва шарикони онҳо идома дорад. Амрико ва Иттиҳоди Аврупо, ки Украинаро дар блоки худ дидан мехоҳанд, тайи ду рӯзи ахир таҳримҳои ҷадидеро алайҳи Русия эълон кардаанд.
Шоми рӯзи 21-уми феврал Раисҷумҳури Русия Владимир Путин ду ҷумҳурии ҷудоихоҳи Луганск ва Донетск дар шарқи Украинаро ба расмият шинохт.
Дар пайи ин иқдоми Русия Президенти Украина Владимир Зеленски ин иқдомро ҳамла ба тамомияти арзии худ хонд ва ҷамъе аз давлатҳои Аврупо ва кишварҳои узви НАТО низ ҳамбастагии худро бо Укроин эълом карданд.
Тоҷикистон ва дигар кишварҳои узви Иттиҳоди кишварҳои муштаракулманофеъ, ки собиқ кишварҳои Шӯравӣ ва алъон ҳам зери чатри Русия қарор доранд, ҳар чанд Укроинро шарики худ медонанд, вале то кунун дар бораи ин иқдоми Русия расман вокуниш накардаанд.
