Дар марзи Тоҷикистон бо Афғонистон як қочоқбари маводи мухаддир кушта ва даҳҳо кг ҳашиш мусодира шудааст.
Бино ба иттилои расонаҳои ҳукуматӣ, гурӯҳи фаврии Раёсати КДАМ дар вилояти Хатлон дар якҷоягӣ бо сарбозони дидбонгоҳи сарҳадии 9-уми “Панҷоб” дар минтақаи наздисарҳадии деҳаи Сайроби Ҷамоати деҳоти Панҷоби ноҳияи Мир Саид Алии Ҳамадонӣ убури ғайриқонунии сарҳади давлатӣ аз тарафи як гурӯҳи чорнафараи қочоқбари мусаллаҳи шаҳрвандони Афғонистон ошкор ва пешгирӣ гардид.
Ҳангоми кӯшиши боздошт, қочоқбарон ба амри кормандони мақомоти амният ва сарҳадбонон итоат накарда, муқовимати мусаллаҳона нишон доданд. Дар натиҷа миёни нерӯҳои қудратии Тоҷикистон ва қочоқбарон задухӯрд сар зада, роҳбари ин гурӯҳи қочоқбар Маҳмадҳошим валади Миракбари 50-солаи сокини деҳаи Навободи вулусволии Янгиқалъаи вилояти Тахори Афғонистон кушта шула, се узви боқимондаи гурӯҳ ба Афғонистон фирор карданд.
Дар натиҷаи кофтуков дар ҷои ҳодиса 71 киллову 929 грамм ҳашиш, як автомати Калашникови АК-74, се тирдон ва 87 дона тирҳои калибри 7,62 мм мусодира гардиданд.
Гурӯҳи фаврии Раёсати КДАМ дар вилояти Хатлон тибқи моддаҳои 200 қисми 4 банди “д”, 289 қисми 3, 335 қисми 2 ва 195 қисми 2, банди “б”-и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, тафтишоти пешакӣ идома дорад.
Задухӯрди нерӯҳои қудратии Тоҷикистон бо қочоқбарон дар марз бо Афғонистон дар ҳолест, ки Тоҷикистон борҳо шикоят карда буд, ки аз ҷониби кишвари ҳамсоя маводи мухаддир ба таври васеъ қочоқ мешавад. Аммо Толибон кишварҳои ҳамсояро муттаҳам мекунанд, ки қочоқи ин мавод аз ҷониби онҳо низ зиёд сурат мегирад.
