Ба гузориши расонаҳо шаби 12 ба 13-уми сентябр дар марзи Арманистон ва Озарбойҷон миёни нерӯҳои ду кишвар даргириҳои мусаллаҳона аз нав сар зад.
Вазорати дифои Арманистон субҳи рӯзи сешанбе хабар дод, ки нерӯҳои низомии Озарбойҷон мавзеъҳои низомӣ ва ғайринизомии шаҳрҳои наздимарзии Варденис, Сотк, Артаниш, Ишханасар, Горис ва Капанро бо тупхона, паҳпод ва силоҳҳои вазнин мавриди ҳамла қарор додааст.
Дар вокуниш ба ин хабар ҷониби Озарбойҷон дар сарзадани даргирии имрӯза ҷониби Арманистонро гунаҳкор медонад ва Вазорати дифои ин кишвар хабар дод, ки ҳамлаҳои низомияшро дар вокуниш ба ҳузури низомии Арманистон дар Қарабоғи Кӯҳӣ гирифтааст.
Вазорати дифои Озарбойҷон хабар дод, ки ин ҳмлаҳо дар посух ба ҳамлаҳои як моҳи ахири Арманистон ба мавзеҳои Калбаҷару Лочин, Дашкасан ва Гадабой, ки ба артиши Озарбойҷон тааллуқ доранд, гирифта шудааст.
Дар ҳамин ҳол Энтони Блинкен, вазири корҳои хориҷаи Амрико субҳи рӯзи сешанбе бо интишори баёнияе хостори таваққуфи фаврии даргиҳои мусаллаҳона байни Арманистон ва Озарбойҷон шуд.
The United States is deeply concerned about reports of active hostilities between Armenia and Azerbaijan. We urge an end to military hostilities immediately. There is no military solution to the conflict. https://t.co/cGeWXpbzKS
— Secretary Antony Blinken (@SecBlinken) September 13, 2022
Вазорати хориҷаи Туркия низ аз ҷонибҳо дархост карда, ки “аз амалҳои таҳрикомез” даст кашанд ва мушкилоти марзиро бо роҳи гуфтугӯ ва музокира ҳал кунанд.
Ёдовар мешавем, ки даргириҳои мусаллаҳои ахири ин ду кишвар аз 27-уми сентябри соли 2020 бар сари Қарабоғи Кӯҳӣ сурат гирифта буд. Ҷанг байни нерӯҳои ду кишвар аз як моҳ бештар давом кард ва дар натиҷа бо миёнҷигарии Русия он хотима ёфт.
