Бархе аз сокинони Ғазза ба расонаҳо гуфтаанд, аз шиддати бомборонҳои Исроил чунон вазъият ҳавлнок шуд, ки гумон кардем қиёмат барпо шудааст.
Ҳамчунин яке аз фаъолони ҷомеаи мадании Ғазза дар шабакаи Х навишта, ки “Мо дар Хон-Юнус давоми беш аз ним соат аз даҳшатҳои рӯзи қиёматро ба тамоми маъно таҷриба кардем. Тамоми анвоъи ҳавопаймоҳо ва бомборонҳои сахттарин вуҷуд дошт.”
Сокинони Ғазза дар ҳоле аз вазъияти тарсноки ин борика нақл кардаанд, ки Исроил давоми ду-се рӯзи гузашта, бахусус сухбҳи рӯзи душанбе шаҳри Хон-Юнуси Ғаззаро мавриди ҳамлаи ҳавоии шадиде қарор дода, беш аз 30 нуқоти онро ба шиддат бомборон кард.
Дар пайи ин ҳамлаҳои сахт наздики 150 зану кӯдаки бегуноҳи аҳолии ин борика кушта шуда, захмиёни зиёде ба бемористонҳои аз фаъолият бозмонда муроҷиат кардаанд.
Ҳамчунин расонаҳои исроилӣ аз мақомҳои низомии ин кишвар хабар медиҳанд, ки артиш амалиёти шадидро барои озодии гаравгонҳо оғоз карда, ҳатто бо либосҳои занона дар байни аҳолии Хон-Юнус ворид шуданд, аммо натиҷа надод.
Манбаъ гуфта, ки нерӯҳои исроилӣ мехостанд бо анҷоми ин амалиёт яке аз фармондеҳони гурӯҳи Қассом – шохаи низомии ҲАМОС-ро боздошт кунанд ва гаравгонҳоро озод созанд, аммо ҳангоми амалиёт маълум шуда, ки онҷо на фармодеҳи ҲАМОС вуҷуд дошта ва на гаравгоне.
Гуфта мешавад, ки имрӯз мақомҳои артиши Исроил фаромни кӯчондани иҷбории мардуми Хон-Юнусро содир кардаанд. Ҳоло нерӯҳои артиш аҳолиро маҷбур доранд, ин минтақаро тарк кунанд.
Ба иттилои расонаҳои исроилӣ, рӯзҳои ахир артиши ин кишвар амалиёти махсусеро дар Ғазза роҳандозӣ кардааст. Хусусан ин амалиёт пас аз сафари Трамп ба кишварҳои арабӣ ва гуфтушунидҳо дар мавриди созиши Исроил бо ҲАМОС афзоиш ёфтааст.
Ба гузориши шабакаи 12-и Исроил, музокироте, ки пас аз сафари Трамп дар Доҳаи Қатар барои расидан ба оташбас ва озодсозии гаравгонон оғоз шуда буд, ба бунбасти комил расидааст. Яке аз мақоми расмии исроилӣ дар суҳбат бо ин расона изҳор дошта, ки “музокирот ба бунбаст расидааст. Исроил омода нест ҳеч замонате барои поён додани ҷанг ба ҲАМОС бидиҳад. Аммо ҲАМОС ба масъалаи поён додани ҷанг ва хуруҷи комили нерӯҳои исроилӣ аз Ғазза пофишорӣ дорад.”
Ин изҳорот дар ҳолест, ки фишорҳои байналмилалӣ барои расидан ба тавофуқ ва қатъи даргириҳо дар Ғазза ҳамчунон идома дорад. Дар паҳлуи ин талошҳо, нигарониҳо дар бораи буҳрони инсонӣ дар Ғазза низ ба таври шадид афзоиш ёфтааст.
Ба назари коршиносон, ба бунбаст рӯбарӯ шудани музокирот раванди миёнҷигариеро, ки бо пуштибонии Миср, Қатар ва Иёлоти Муттаҳида пайгирӣ мешавад, норӯшан карда, эҳтимоли расидан ба оташбас ва тавофуқи қатъи фаврии ҷангро коҳиш додааст.
Ёдовар мешавем, ки Вазорати беҳдошти Ғазза зимни эълони имрӯзааш гуфт, давоми 24 соати гузашта дар пайи бомборонҳои шадиди Исроил 148 нафар кушта шуда, беш аз 200 каси дигар захмӣ шудааст. Ба гуфтаи ин ниҳод ҷасадҳое зери овораҳо вуҷуд дорад, ки омори дақиқи он маълум нест.
Ба гузориши ин ниҳод, аз оғози ҳамлаҳои бераҳмонаи Исроил ба Ғазза то имрӯз 53 ҳазору 339 нафар кушта шудаанд, ки беш аз 70% онҳоро занону кӯдакон ташкил медиҳанд. Инчунин то ин муддат омори захмиён марзи 121 ҳазорро гузаштааст. Ин ҳам дар ҳолест, ки ба гуфтаи созмонҳои байналмилалӣ, дар Ғазза қариб ки дигар беморхонае барои табобати захмиёну беморон вуҷуд надорад.
