Оё Э.Раҳмон муҷозот мешавад? Ба ҷуз ӯ боз парвандаи киҳо ба ДБҶ рафт?

-

15/04/2025

Раёсати Вазорати корҳои дохилӣ дар шаҳри Душанбе 14-уми апрел аз боздошти ҷавоне бо иттиҳоми фиреби мардум хабар дод.

Дар иттилоияи ин ниҳод омада, ки Ҳасанов Аҳмадҷон ҷавони 28-солаи сокини шаҳри Душанбе, ки алайҳи ӯ парвандаи ҷиноятӣ бо иттиҳоми “қаллобӣ дар ҳаҷми калон” боз шуда буду дар ҷустуҷӯ қарор дошт, аз ҷониби кормандони ШВКД-1 дар ноҳияи Шоҳмансури пойтахт дастгир шудааст.

Аммо дар хабари ВКД-и шаҳри Душанбе гуфта нашудааст, ки ин ҷавон дақиқан кадом рӯз боздошт ва алайҳи ӯ кай парванда боз карда шудааст.

ВКД мегӯяд, тафтишот муайян карда, ки “гумонбаршаванда шаҳрвандонро фиреб дода, бо ваъдаи ба Амрико фиристодан аз ҳар кадоме беш аз 20-ҳазор долларӣ гирифта, ба манфиати худ сарф намудааст.”

Аммо дар бораи ин ки чанд нафар ба доми фиреби ин ҷавон афтодаву дар умум чанд ҳазор доллари мардумро бо роҳи фиреб гирифтааст, чизе гуфта намешавад.

Ин ниҳод хабар дода, ки “айни замон Ҳасанов А. дар ҳабси пешакӣ қарор дошта, оид ба кирдорҳои қаллобонаи ӯ тафтишот идома дорад.”

То ба ҳол назари худи боздоштшуда ва ё наздикони ӯ дастрас нест. Ва ҳамзамон шикояти ҳеч ҷабридаде дар расонаҳо нашр нашудааст.

Боздошти ин ҷавон дар ҳолест, ки пас аз фишору ихроҷи зиёди муҳоҷирон аз Русия, аксари муҳоҷирони кории тоҷик кишварҳои дигарро барои ёфтани луқмаи нон ҷустуҷӯ доранд. Аксари онҳо талош доранд ба Куриёи Ҷанубӣ, кишварҳои аврупоӣ ва Амрико барои кор сафар кунанд, вале мутаассифона дар ин миён қаллобон ва фиребгароне пайдо шудаанд, ки бо ваъдаи таъмини ҷои кори хуб онҳоро фиреб медиҳанд.

Ҳукумати кишвар ҳам дар ростои таъмини ҷойҳои корӣ дар дохили Ватан чандон талоше надорад ва баракс, дида мешавад, ки бо кишварҳои хориҷӣ барои фиристодани муҳоҷирон шартномаҳои нав мебандад.

Мақомот барои гузоштани “лайк” дигар касеро зиндонӣ намекунад?

Аз ҷониби

-

14/04/2025

Беш аз 1,5 ҳазор нафар бо иттиҳоми гузоштани “лайк” дар зери навору гузоришҳои ба гуфтаи мақомот “мамнуъ”, дар зиндонҳои Тоҷикистон қарор доранд.

Ин эътироф бори аввал аз забони Умед Каримзода, муовини аввали додситони кул рӯзи 10-уми апрел замоне ки тарҳи ислоҳ ба ду банди Кодекси ҷиноиро ба вакилони парлумони Тоҷикистон пешниҳод кард, садо дод.

Каримзода дар тарҳи пешниҳод кардааш аз вакилон хост, ки ба моддаҳои 179 (терроризм) ва 307 (ифротгароӣ)-и Кодекси ҷиноӣ тағйиру иловаҳо ворид намоянд ва “ҷавобгарии ҷиноӣ барои гузоштани “лайк” дар навору гузоришҳо” пурра бардошта шавад.

Гуфта мешавад, ин тарҳ аз ҷониби ҳарду палатаи парлумон ба тасвиб расида, ҳоло онро бояд президент имзо кунад ва пас аз нашр мавриди амал қарор мегирад.

Қабули тағйиру иловаҳо ба ин моддаҳои Кодекси ҷиноӣ дар ҳолест, ки раисҷумҳури худкомаи Тоҷикистон Эмомалӣ Раҳмон рӯзи 29-уми октябри соли 2024 зимни чорабиние дар шаҳри Душанбе эътироф карда буд, ки муҷозоти шаҳрвандон ба хотири “лайк” гузоштан зери навору гузоришҳо дар шабакаҳои иҷтимоӣ беасос аст.

Ӯ ҳамзамон таъкид карда буд, ки баъзе намояндагони мақомоти ҳифзи ҳуқуқ барои “лайк” гузоштани шаҳрвандон зери маводҳо дар интернет бар алайҳи онҳо парвандаи ҷиноӣ боз мекунанд ва бояд ба ин амал хотима дода шавад.

Ҳоло маълум нест, ки пас аз қабули ин тарҳ нафарони зиндонишуда ба хотири “лайк”-у бознашр, ки миёни онҳо рӯзноманигору фаъолон ва ҳатто занон ҳастанд ва аксарашон барои гузоштани шарҳу “лайк” дар зери навору навиштаҳои мухолифону расонаҳои дар табъид қарор дошта зиндонӣ шудаанд, бегуноҳ дониста мешаванд ё хайр?

Бояд гуфт, Тоҷикситон борҳо аз сӯи созмонҳои ҷаҳонии ҳомии ҳуқуқ барои муҷозот намудани шаҳрвандон ба хотири “писандидану ба дигарон фиристодани наворҳо дар интернет” танқид шудааст.

Фавтидани як зодаи Тоҷикистон дар пайи ташдиди “рейдҳо” дар Русия

Аз ҷониби

Azda TV

-

14/04/2025

Давоми чанд рӯзи гузашта мақомоти амниятии Русия болои муҳоҷирони корӣ тафтишу бозҷӯиҳои сахтеро анҷом дод.

Ба гуфтаи расонаҳо, ин “рейдҳо”-ҳои мақомоти Русия чанд фоҷеа, аз ҷумла таҳқиру латтукӯби муҳоҷирони дар ҳаммомбуда ва марги як шаҳрванди Тоҷикистонро ба дунбол дошт.

Сомонаҳои хабарӣ бо нашри наворе гузориш медиҳанд, ки 11-уми апрели имсол мақомоти амниятии Русия бо қасди тафтиши муҳоҷирон ба як ҳаммоми умумие бо номи “Бодрость” дар шаҳри Маскав, ки муҳоҷирон дар он қарор доштанд, даромада, беш аз 20 нафарро дастгир карданд.

Мақомоти Русия мегӯянд, баъд аз тафтишу бозҷӯии муҳоҷирон маълум гашта, ки 4 нафари боздоштшудаҳо будубошашон ғайриқонунӣ буда ва бояд аз ин кишвар ихроҷ шаванд.

Шоҳидони айнӣ мегӯянд муҳоҷирон, ки аксар шаҳрвандони Қирғизистон будаанд дар ин тафтишот мавриди латтукӯб ва таҳқири маъмурони амниятии Русия қарор гирифтанд.

Вазорати умури хориҷии Қирғизистон гуфта буд, ки ин қазияро баррасӣ мекунад ва дертар ин ниҳод дар робита ба ин масъала ба Русия эътироз кардааст.

То ҳанӯз маълум нест, дар байни ин муҳоҷирони боздоштшуда, ки тавассути маъмурони амниятӣ мавриди таҳқир ва латтукӯб қарор гирифтанд, чанд нафарашон шаҳрвандони Тоҷикистонанд.

Аммо шабакаи “Pamir Inside”, ки ахбори Вилояти Мӯхтори Кӯҳистони Бадахшонро пӯшиш медиҳад, бо пахши наворе дар шабакаи фейсбукии худ гузориш дод, ки Гулзор Шикорова, як шаҳрванди 51-солаи Тоҷикистон дар пайи тафтишоти полис бар асари ҳамлаи қалбӣ ҷон бохтааст.

Гуфта мешавад, ҳодисаи фавти зодаи Бадахшони Тоҷикистон ҳафтаи гузашта дар истгоҳи метрои “Дмитрия Донского” -и шаҳри Маскав рух додааст. Дар макони ҳодиса шавҳар ва чанде аз наздикони ин зан низ ҳузур доштаанд.

Бино ба гузоришот, моҳҳои ахир тафтишу бозҷӯиҳои бедалели мақомоти Русия алайҳи муҳоҷирони корӣ, аз кишвар рондани онҳо ва ҳаминтавр сахттаркунии шароити будубош ва манъи ба ин кишвар ворид шудани шаҳрвандони хориҷие, ки ба қасди кор омадаанд, дар ин кишвар бо шиддат афзоиш ёфтааст.

Ба гузориши Радиёи Озодӣ, 10-уми апрел мақомоти Русия баъди се рӯзи нигаҳдорӣ беш аз 20 муҳоҷири тоҷикро аз фурӯдгоҳи “Внуково”-и Маскав ба Тоҷикистон ихроҷ кардаанд.

Гуфта мешавад, назорат болои муҳоҷирон ва ихроҷи онҳо дар Русия баъд аз ҳодисаи хунин “Крокус Сити Холл”, ки гумонбарони он шаҳрвандони Тоҷикистон мебошанд, шиддат гирифт. Пас аз ин ҳодиса чораҳои назоратӣ сахттар шуда, маҳдудиятҳои нав дар бораи фаъолияти кории муҳоҷирон дар аксар минтақаҳои Русия ҷорӣ карда шуданд.

Танҳо дар соли 2024 бо қарори додгоҳҳои Русия беш аз 90 ҳазор муҳоҷир аз хоки Русия ихроҷ шудаанд, ки ин омор нисбат ба солҳои қаблӣ чанд баробар зиёд аст.

Зилзилаи шадид Тоҷикистонро такон дод

Аз ҷониби

-

14/04/2025

Субҳи рӯзи якшанбе, 13-уми апрел дар ноҳияи Рашт, қисмати шарқии Тоҷикистон заминларзаи шадид ба вуқуъ пайваст.

Мувофиқи маълумоти расмӣ, маркази заминларза 21 киломатер дуртар аз маркази ноҳияи Рашт дар ҳудуди Тоҷикистон рух дода, шиддати он дар марказаш 5.6 балл, дар минтақаи Рашт 4.5 балл ва дар шаҳри Душанбе 3 балро ташкил додааст.

Тавре Кумитаи ҳолатҳои фавқулоддаи Тоҷикистон хабар медиҳад, дар натиҷаи ин зилзила дар ноҳияҳои Рашт ва Тоҷикобод 94 хона пурра 50 хона қисман вайрон шуда, 61 хонаи дигар осебҳои андак дидаанд. Гуфта мешавад, инчунин ба 3 мактаб ва тақрибан 200 иншооти иҷтимоӣ зарар ворид шудааст.

Дар аксҳое, ки дар шабакаҳои иҷтимоӣ нашр шудааст, дида мешавад, ки баъзе хонаҳо валангор шуда, тақрибан аз истифода берун шудаанд.

Ҳамзамон ин ниҳояд мегӯяд, бар асари ин заминларза як кӯдаки сесолаи сокини деҳаи Уштурпасти ҷамоати деҳоти Ҳиҷбораки ноҳияи Рашт зери девор монда, ҷон бохтааст.

Кумитаи ҳолатҳои фавқулода хабар дода, ки дар ин минтақа давоми рӯзи якшанбе се маротиба заминларза ба қайд гирифта шуд. Бори аввал дар марказаш 5.6 ва дар минтақаи Рашт 4.5 балл, бори дуюм дар марказаш 4 балл ва дар ноҳия Рашт 2-3 балл ва ҳамин тавр бори сеюм нисфирӯзӣ рух дод, ки дар марказаш 3 ва дар Рашт 2 балро ташкил дод.

Ба иттилои расонаҳои кишвар, субҳи рӯзи душанбе низ дар 18-киломатерии қисмати шарқии водии Рашт заминларза рух додааст, ки қуввати он 3-4 балл гуфта мешавад.

Дар ҳамин ҳол бархе корбарон аз водии Рашт дар шабакаҳои иҷтимоӣ навиштаанд, ки бар асари ин заминларза 15 нафар дар водии Рашт ҷон бохтааст. Аммо ин маълумотро мақомоти расмӣ тасдиқ ё рад накардаанд.

Имрӯз Ҳукумати Тоҷикистон хабар дод, ки барои маълум кардани ҳаҷми хисорот ва кумакҳои фаврии зарардидагон як комиссияи ҳукуматӣ бо раҳбарии муовини сарвазири кившар, Сулаймон Зиёзода ташкил шуда, ба водии Рашт фиристода шуд.

ҶИРТ аз шаҳрвандони Тоҷикистон хост, ки сарбози диктатура нашаванд

Аз ҷониби

-

11/04/2025

Ҷунбиши “Ислоҳот ва рушди Тоҷикистон” бо нашри як изҳорот фиристодани иҷбории шаҳрвандони Тоҷикистон аз зиндонҳои Русияро ба ҷанги зидди Украина шадидан маҳкум кард.

Дар изҳороти ин созмони сиёсӣ, ки рӯзи 10-уми апрел нашр шудааст, гуфта мешавад, маъмурони Хадамоти махсус, кормандони Вазорати мудофиа ва Раёсати зиндонҳои Русия маҳбусони тоҷикро бо таҳдид, зӯроварии ҷисмонӣ, бо ҷойгир намудан дар утоқҳои муҷозотии зиндон барои ширкат дар ҷанги зидди Украина мефиристанд.

Инчунин дар ин изҳорот гуфта мешавад, ки 3-уми апрели соли 2025 ҳашт маҳбус аз колонияи рақами 26-и Волгоград барои фиристодани минбаъда ба минтақаи ҷангӣ бурда шуданд ва ҳоло беш аз 50 нафари дигар аз шаҳрвандони Тоҷикистон зери фишору таҳдидҳо қарор доранд, то баъдан ба ҷанг фиристода шаванд.

ҶИРТ ин амали мақомоти Русияро терроризми фаромиллӣ, ҷинояти ҷангӣ ва ҷиноят алайҳи башарият номида, онро нақзи дағалонаи қавонини байналмилалии башардӯстона, аз ҷумла конвенсияҳои Женева ва Конвенсияи ҷилавгирӣ аз наслкушӣ медонад.

Ҳамзамон ин созмони мухоли режими Раҳмонов аз беамалии мақомоти расмии Тоҷикистон изҳори нигаронӣ намуда, гуфтааст, ки сарфи назар аз муроҷиат ба сафорати Тоҷикистон дар Маскав, маҳбусон ҳеҷ гуна кумаке дарёфт накардаанд ва ин амал ба маънои ҳамдастӣ бо мақомдорони рус аст.

Дар ин изҳорот ҶИРТ аз мақомоти Тоҷикистон талаб кардааст, то баргардонидани шаҳрвандони ба ҷанг эъзомшударо тақозо кунанд ва аз ҳама гуна кумак ба ин амалҳо даст кашанд ва аз шаҳрвандони Тоҷикистон даъват карда, ки иштирокчии ҷанги каси дигар ва сарбози диктатура нашаванд.

Ҳамчунин аз ҷомеа ва созмонҳои ҷаҳонӣ даъват шуда, ки дар бораи фиристодани ғайриқонунии муҳоҷирон ва маҳбусон аз Русия ба ҷанг дар Украина тафтишоти фавриро оғоз кунанд.

Рустами Эмомалӣ боз нафари дувуми Тоҷикистон шуд

Аз ҷониби

-

11/04/2025

Рустами Эмомалӣ, шаҳрдори Душанбе ва писари раисҷумҳури худкомаи Тоҷикистон Эмомалӣ Раҳмон барои бори дувум раиси Маҷлиси миллии Маҷлиси Олии Ҷумҳурии Тоҷикистон, палатаи болоии порлумон интихоб шуд.

Бояд гуфт, тибқи Сарқонуни кишвар раиси Маҷлиси миллӣ шахси дувум дар Ҳукумати Тоҷикистон ба ҳисоб рафта, дар сурати истеъфо, марг, беморӣ ё аз салоҳиятҳои худ даст кашидани президент, то замони интихобот ӯ иҷрокунандаи вазифаи президент дар кишвар хоҳад буд.

Овоздиҳӣ барои “интихоб”-и Рустам ба ин мақом рӯзи 11-уми апрел баргузор шуда, аз 33 вакил, ки аксарашон узви Ҳизби ҳокими халқӣ-демократӣ мебошанд, 31 нафарашон ба ҷонибдории Рустами Эмомалӣ раъй додаанд.

Инчунин дар ин маҷлис мисли дафъаи қабл раиси вилояти Суғд Аҳмадзода Раҷаббой муовини якум ва раиси ВМКБ Мирзонабот Алишер муовини Рустами Эмомалӣ интихоб гардидаанд.

Гуфта мешавад, Рустами Эмомалӣ аз соли 2020 раиси Маҷлиси миллӣ, аз соли 2017 шаҳрдори Душанбе ва аз 2012 то имрӯз раҳбари Федератсияи футболи Тоҷикистон мебошад. Инчунин ӯ дар гузашта дар чанд вазифаҳои калидии дигар, аз ҷумла раҳбари Ожонси мубориза бо фасод ва Хадамоти гумрук низ кор кардааст.

Мунтақидони режими имрӯзаи Тоҷикистон дар вазифаҳои калидӣ кор кардани ӯро ба эҳтимоли интиқоли қудрат аз падар ба писар рабт медидиҳанд ва ин эҳтимол солҳо боз дар кишвар матраҳ аст.

Инчунин ҳама боздошту қатли дигарандешон дар 10 соли ахир Тоҷикистонро маҳз ба “фароҳам кардани шароити мусоид” барои интиқоли қудрат аз Эмомалӣ Раҳмон ба писараш Рустами Эмомалӣ рабт медиҳанд.

То ҳол раисҷумҳур Раҳмонов ва ё писараш Рустами Эмомалӣ ба ин гуфтаҳо посух надодаанд.

Ҳукумат: Нақшаи даъвати баҳории ҷавонон ба Артиш дар 10 рӯз 80% иҷро шуд

Аз ҷониби

-

11/04/2025

Бино ба иттилои Вазорати мудофиаи Ҷумҳурии Тоҷикистон, нақшаи даъвати баҳории ҷавонон ба сафи Қувваҳои мусаллаҳи кишвар давоми 10 рӯз аллакй 80% иҷро шудааст.

Гуфта мешавад, дар давоми ин 10 рӯз шаҳру ноҳияҳои Вилояти Мухтори Кӯҳистони Бадахшон, вилояти Хатлон ва шаҳри Душанбе аллакай аз иҷрои пурраи нақшаи пешбинишудаи даъвати сарбозон ба Артиш гузориш доданд.

Тибқи гузориши ин ниҳод, аз байни 13 шаҳру ноҳияҳои тобеи ҷумҳурӣ, ноҳияҳои Нуробод, Рашт, Тоҷикобод, Сангвор ва Лахш дар рӯзи нахустини оғози мавсими даъвати баҳорӣ ба анҷом расонида, дар боқӣ шаҳру ноҳияҳои тобеи ҷумҳурӣ нақша 72% иҷро шудааст.

Дар вилояти Суғд нақша 54 дарсад иҷро шуда, аммо дар сатҳи ҷумҳурӣ ин омор 80 дарсад гузориш мешавад.

Вазорати мудофеаи Тоҷикистон омили тез анҷом ёфтани нақшаи имсолаи даъвати баҳории ҷавонон ба Артишро дар “зиёд будани ҷавонписарони ихтиёрӣ” ва афзоиши “обрӯю нуфузи Артиши миллӣ дар байни аҳолӣ”, марбут донистааст.

Вазорати мудофеаи Тоҷикистон дар ин гузоришаш мегӯяд, вилояти Хатлон нақшаро 100% иҷро кардааст, вале рӯзи гузашта расонаҳои кишвар аз сарбозшикор дар бозори шаҳри Кӯлоб хабар доданд. Наворҳое, ки дар шабакаҳои иҷтимоӣ нашр шуд, дида мешавад, ки маъмурони Комиссарияти ҳарбиии шаҳри Кӯлоб дар бозори марказии шаҳр назди мағозае бо мардум ҷанҷол мекунанд ва мехоҳанд як ҷавонро бо зӯр ба Артиш бибаранд, вале мардум монеи кори онҳо мешаванд.

Ситоиши мақомот аз афзоиши ҷавонон ихтиёрӣ ба Артиш ва ёдоварӣ аз самараи заҳмату талоши мақомот барои фаҳмаондадиҳӣ байни ҷавонон дар ҳолест, ки аз ҳар гӯшаву канори кишвар сокинон аз сарбозшикор хабар медиҳанд.

Хидмати ҳарбии иҷборӣ дар Тоҷикистон, шароити бади қисмҳои низомӣ, бархурди дурушт ва зарбу лате, ки ҳатто ба марг оварда мерасонад, ҷавоноро аз хидмат дар сафи Қувваҳои мусаллаҳ гурезон кардааст.

Ба гуфтаи таҳлилгарон, аз замони ба қудрат расидани Эмомалӣ Раҳмон то кунун дар Тоҷикистон чандин мушкилии ҳалнашаванда, аз ҷумла бо зӯр бурдани ҷавонон ба Артиш, бебарқӣ дар фаслҳои сармо, муҳоҷират ва ришваву фасод ҷомеаро домангир шудааст, ки мақомот барои рафъи ин мушкилот талоше намекунанд ва ҳатто намехоҳанд ин мушкилот бартараф шаванд.

ҲНИТ ба ДБҶ аз Эмомалӣ Раҳмон шикоят бурд

Аз ҷониби

-

11/04/2025

Ҳизби наҳзати исломии Тоҷикистн ҳамроҳ бо чанд созмони дигар аз ҷиноятҳои Эмомалӣ Раҳмон ба Додгоҳи байналмилалии ҷиноӣ шикоят бурд.

Дар ин бора рӯзи ҷумъа, 11-уми апрели соли ҷорӣ раиси ҲНИТ Муҳиддин Кабирӣ дар шабкаи X хабар дод.

“Билохира дирӯз ба Додгоҳи Байналмиллалии Ҷиноӣ алайҳи Э. Раҳмон барои ҷиноятҳои зиди инсоният шикояти расмиро супурдем.”, менависад Кабирӣ.

Ӯ ҳамзамон афзуда, ки таҳияи ин парванда ва пешниҳоди он ба Додгоҳи байналмилалии ҷиноӣ 4 сол замон бурда, “кори пурмашаққати вакилону фаъъолони холис” будааст.

Муҳиддин Кабирӣ навишта, ки “Миллат ин рӯзро мунтазир буд! Дигар миллат не, ӯ ҷинояткор муаррифӣ хоҳад шуд.”

Аммо дар баёнияи муштаркаи ҲНИТ ХИБУ ва ОА иттилоъ дода шуда, ки “Се созмон – созмони ғайриҳукуматии Хазинаи ихтиёриёни байналмилалии Украина (FUVI), созмони ҷамъиятии Озодӣ барои Авруосиё ва Ҳизби наҳзати исломии Тоҷикистон (ҲНИТ) тавассути вакили мудофеи худ Николас Лигнул ба Додситонии Додгоҳи байналмилалии ҷиноӣ муроҷиати расмӣ ирсол карданд.”

Гуфта мешавад, шикоят бо дастгирии Кумитаи Ҳелсинкии Норвегия омода карда шуда, он аз “боздоштҳои худсарона, шиканҷа, таҷовуз, зиндонҳои инфиродӣ, нопадидшавии гумонбарон, муҳоҷирати маҷбурӣ, куштор” ва ғайра асос ёфтааст.

Дар иттилоияи ин се созмон зикр шуда, ки далелҳо бар асоси “маводҳои низоми додгоҳӣ ва маъмурии Тоҷикистон, ҳисоботи созмонҳои ғайридавлатӣ, ҳуҷҷатҳои аудиовизуалӣ, шаҳодати шоҳидони айнӣ”, ҷамъоварӣ шудаанд.

ҲНИТ мегӯяд, ҷиноятҳои Эмомалӣ Раҳмонро аз соли 2011 то имрӯз ҷамъоварӣ кардааст. Бо пешниҳоди шикоят ба ДҶБ хоста шуда, ки алайҳи мақомоти Тоҷикистон, аз ҷумла Эмомалӣ Раҳмон тафтишот оғоз шавад ва онҳо ба ҷавобгарӣ кашида шаванд.

Назари ҷониби ҲНИТ баъдтар нашр хоҳад шуд.

То ҳанӯз дар ин маврид вокуниши ҷониби ҳукумати Тоҷикистон нашр нашудааст.

Тирпаронӣ миёни нерӯҳои КДАМ ва ВКД дар Тоҷикистон

Аз ҷониби

-

10/04/2025