Масъулони Кумитаи идораи замин дар вилоятҳои Суғду Хатлон зимни нишастҳои матбуотияшон дар бораи ҷой доштани қонуншиканиҳои зиёд дар робита ба хариду фурӯши замин хабар доданд.
Раиси Кумитаи идораи замин дар вилояти Хатлон Диловар Паризода ба хабарнигорон гуфт, ки кормандони ниҳоди зери дасташ соли гузашта дар вилояти Хатлон дар майдони 3 ҳазору 321 гектар замин санҷиш гузарониданд, дар пайи он санҷиш 5 ҳазору 352 ҳолати қонуншикании дар робита ба хариду фурӯши замин ошкор гардидааст.
Диловар Пирзода мегӯяд, пас аз ошкор шудани ин миқдори қонуншиканиҳо беш аз 4 ҳазору 245 протакол ва қарор барои ҷарима бастани гумонбарон қабул карда шуд.
Ба гуфтаи ӯ, ҷаримаҳо дар маҷмуъ беш аз 2 миллиону 310 ҳазор сомониро ташкил медиҳанд. Вале аз ин миқдор маблағи ҷарима то ҳол танҳо 1 миллиону 900 ҳазор сомонӣ ситонида шудааст.
Ҳамзамон Нусратулло Салимзода, раиси ноҳияи Бобоҷон Ғафуров 2-уми феврал низ дар нишасти матбуотияш аз мушкилоти замин ва ҷой доштани қонуншиканиҳо дар ин соҳа шикоятомез гуфт, ки “дар ноҳия як ваҷаб замин боқӣ намондааст, ҳамаро харида шахсӣ кардаанд.”
Салимзода мегӯяд, дар ноҳия заминҳои шахсии бекорхобида зиёде ҳастанд, ки соҳибонашон онҳоро шахсӣ кардаанд, вале умуман истифодаашон намебаранд. Ба гуфтаи ӯ, ҳоло ҳукумат тасмим гирифта, ки бархе чунин қитъаҳои заминро аз соҳибонашон гирифта ба ҳисоби ҳукумат бигузаронанд.
Шикояти масъулони шаҳру вилоятҳои Тоҷикистон аз қонуншиканиҳо дар бораи заминфурӯшӣ дар ҳолест, ки ҳар сол даҳҳо мақомдор бо иттиҳоми ғайриқонунии хариду фурӯши замин боздошт мешавад, вале боз ҳам ин раванд идома дорад. Ба гуфтаи коршинсон, заминфурӯшону аснод тартиб медодагиҳо худи мақомот ҳастанд, ки бо гирифтани пора ва ё хешутаборбозӣ заминҳои зиёдеро дар ихтиёри дигарон мегузоранд, вале сокинони ниёзманд дарбадари мақомот барои як тикаи замин мегарданду солҳо навбат мепоянд боз ҳам чизе ҳосилашон намешавад.
Коршиносон мегӯянд, фасод ва ришвар дар тамоми соҳаҳои кишвар чунон афзоиш ёфтааст, ки пеши ин ҷиноятҳоро гирифтан маҳол аст. Зеро, ба гуфтаи онҳо, ин тарзи муомиларо худи ҳамон мансабдор вақти гирифтани мансабаш дидааст, яъне мансабро бо додани пул харидааст ва ӯ низ ин корро идома хоҳад дод. Пас ба ҳамин тариқ решаи ин кор рафта рафта ба нафарони асосии кишвар мерасад, ки маҳви он аз имкон дур аст.
