Хона блог саҳифа 267

Тазоҳуроти мухолифони тоҷик ва дигар кишварҳои ОМ дар Олмон

Аз ҷониби
AZDA.TV
-
0

Имрӯз, 29-уми сентябр чанде аз мухолифони тоҷик бо шумули Паймони миллии Тоҷикистон ва шахсони алоҳида, инчунин мухолифони кишварҳои Осиёи Марказӣ дар Олмон даст ба таҷаммуи эътирозӣ зада, сафари раҳбарони ин кишварҳоро маҳкум карданд.

Тазоҳуроти мухолифони кишварҳои Осиёи Марказӣ дар шаҳри Берлин, муқобили қасри Садриаъзами Олмон, маконе, ки нишасти президентҳо идома дорад, баргузор шуд.

Эътирозгарон дар дасти худ овезаеҳоеро бо шиорҳои “озодӣ ба зиндониёнӣ зиёсӣ” ва озодӣ ба шахсиятҳои алоҳида бардошта, аз мақомоти Олмон хостанд, ки бо президентҳои диктатор ва онҳое, ки ҳуқуқи инсон барояшон арзиш надорад, муносибат накунанд.

Муовини раиси Паймони миллии Тоҷикистон Алим Шерзамонов зимни суханронӣ дар ин гирдиҳамоӣ, дар хитоб ба мақомоти Олмон таъкид кард, ки “Шумо чӣ гуна бо диктаторе, ки ҳуқуқи мардумашро поймол мекунад, бегуноҳ рӯзноманигорон, озодандешон ва мухолифонашро саркӯб мекунад ва ба зиндон меандозад, даст мефишоред?“

Аммо то ҳол аз намояндагони кишварҳои Осиёи Марказӣ ва ё аз намояндагони ҳукумати Олмон касе назди тазоҳуркунандагон набаромада ва бо онҳо суҳбат накардааст.

Ёдовар мешавем, ки бо даъвати расмии мақомоти Олмон раҳбарони кишварҳои Осиёи Марказӣ – Тоҷикистон, Қазоқистон, Қирғизистон, Узбекистон ва Туркманистон барои ҳузур дар нишасти якҷояи ин кишварҳо бо Олмон ва мулоқот бо садриаъзам Олаф Шолтс ва президенти ин кишвар Франк-Валтер Штайнмайер иштирок хоҳанд кард. Қарор аст, ин сафар то фардо, 30-уми сентябр идома пайдо кунад.

Субҳи имрӯз АМИТ “Ховар” иттилоъ дод, ки Эмомалӣ Раҳмон бо президенти ин кишвар Франк-Валтер Штайнмайер мулоқот карда, ҷонибҳо масоили “тавсеаи робитаҳои минтақавӣ ва дуҷониба дар соҳаҳои тиҷорату иқтисод, афзоиши ҳаҷми гардиши мол, содироти маҳсулоти кишоварзӣ ва рушди ҳамкории байниминтақавӣ”-ро баррасӣ карданд.

Гуфта мешавад, Эмомлаӣ бо ҳамтои олмонияш зимни ин мулоқот низ дар мавриди “ҳамкории амниятӣ ба мавзӯи афзоиши таҳдиду хатарҳо, аз он ҷумла вазъ дар Афғонистон” гуфтугӯ карданд.

Ҳамзамон бо расонаӣ шудани хабари мулоқоти раҳбарони кишварҳои Осиёи Марказӣ бо президенти Олмон Франк-Валтер Штайнмайер, Дидбони Ҳуқуқи Башар бо нашри изҳороте аз мансабдорони Олмон хоста, ки зимни мулоқот бо раҳбароин ин кишварҳо вазъи бади ҳуқуқи инсонро дар давлатҳои Осиёи Марказӣ, аз ҷумла дар Тоҷикистон баррасӣ кунанд.

Дар пасманзари сафари раисҷумҳури Тоҷикистон ва дигар раҳбарони кишварҳои Осиёи Марказӣ ба Олмон, мухолифони ин ҳукуматҳо, аз ҷумла мухолифи режими Эмомалӣ хабар дода буданд, ки рӯзҳои 28 ва 28-уми сентябр дар назди сафаорати Тоҷикистон дар Берлин ва дар макони баргузории нишастҳои президентҳо тазоҳурот баргузор мекунанд.

Оғози тазоҳуроти мухолифин дар Олмон

Аз ҷониби
AZDA TV-2
-
0

Мухолифини Тоҷикистон, ки бо даъвати Ҳаракати сиёсии “Гурӯҳи 24” имрӯз дар Берлин ҷамъ шуда буданд, тазоҳуроти худ дар назди сафорати Тоҷикистонро оғоз карданд.

Имрӯз, 28-уми сентябри соли 2023, Ҳаракати сиёсии “Гурӯҳи 24” бо баргузории як барномаи махсуси онлайнӣ аз оғози тазоҳуроти мухолифини Эмомалӣ Раҳмон дар назди сафорати Тоҷикистон хабар додаааст.

Дар ҳамоиши эътирозӣ намояндаҳои қариб ҳама ҳизбу ҳаракатҳои сиёсии Тоҷикистон ҳузур доранд ва пас аз чанд соли гузашта ин яке аз нахустин гирдиҳамоиҳои пуршукӯҳест, ки намояндаҳои Паймони Миллии Тоҷикистон ҳамроҳ бо намояндагони Ҳаракати сиёсии “Гурӯҳи 24” якҷо гирди ҳам муттаҳид шудаанд.

Дар аксу наворҳое, ки аз ҷои баргузории ин тазоҳурот дар шабакаҳои иҷтимоӣ нашр шудааст, дида мешавад, ки иштирокчиёни ин ҳамоиши эътирозӣ бархилофи тамоми тазоҳурот ва пикетҳои қаблӣ як намоишгоҳи хурди мева ва полезиҳои Тоҷикистонро низ, ки дар он ҷо кадуву картошка, себу анор ва ғайра низ дида мешавад, баргузор кардаанд.

Гуфта мешавад, бар иловаи тазоҳуроти кунунӣ, Паймони миллии Тоҷикистон бо нашри як иттилоия аз тамоми тоҷикони муқими кишварҳои аврупоӣ даъват карда, субҳи 29-уми сентябри соли ҷорӣ ҳамроҳ бо мухилифини дигари кишварҳои Осиёи Марказӣ як тазоҳуроти дигаре низ дар Берлин баргузор хоҳанд кард.

Боздошти кормандони фурудгоҳ

Аз ҷониби
AZDA.TV
-
0

Ду маъмури Фурудгоҳи байналмилалии Душанбе бо иттиҳоми ғайриқонунӣ иҷозат додан ба қочоқи тилло ба Ҳиндустон боздошт шудаанд.

Дар ин бора Радиои Озодӣ аз манобеи худ хабар дод. Гуфта мешавад, боздоштшудаҳо яке Азаматулло Маҳмадшоев ва Олим Ҷалолов ном доранд. То ҳол мақомоти Тоҷикистон дар ин бора шарҳи расмие надодаанд.

Манбаи Радиои Озодӣ гуфтааст, ки “Дар аввали моҳи сентябр ба воситаи мусофирон аз Душанбе ба Деҳлӣ тило фиристодаанд. Ин миқдор тилоро дар Ҳиндустон боздошт мекунанд. Хабараш ба Фурудгоҳ расид. Додситонии нақлиёт ҳодисаро таҳқиқ ва ду корманди фурудгоҳро боздошт кард.”

Ба иттилои манбаъ, “Додситонии нақлиёт ба зидди Азаматулло Маҳмадшоев ва Олим Ҷалолов ба иттиҳоми қочоқ ба миқдори калон (қисми 2-и моддаи 289-и Кодекси ҷиноии Тоҷикистон) парванда кушодааст.”

То ҳол маълум нест гумонбарон ин иттиҳоми алайҳашон эълоншударо қабул кардаан ё на. Назари наздикон ва вакилони дифоашон низ дастраси расонаҳо нашудааст.

Соли 2021 низ мақомоти Тоҷикистон аз як амлиёти қочоқи чандин кило тилло хабар дода буданд. Аммо сардори гумруки Хатлон гуфта буд, ки ин миқдор тилло ва маблағҳои зиёд аз гузаргоҳи марзии Панҷи Поён то Душанбе қонунӣ омада буданд. Аммо Додситонии кулли кишвар нахост дар бораи ин қазия шарҳ бидиҳад.

Ба гуфтаи бархе коршиносон, мақомоти фурудгоҳи кишвар бо ситонидани ришва ва ё шиносбозӣ ба қочоқи ғайриқонунии ашёи мамнуъа зиёд роҳ додаанд.

Ду созмони ҷаҳонӣ аз мақомоти тоҷик озодии Бузургмеҳр Ёровро талаб карданд

Аз ҷониби
AZDA-TV
-
0

Ду созмони ҷаҳонии ҳомии ҳуқуқ аз мақомоти Тоҷикистон хостанд, ки адвокати шинохта ва маҳбуси сиёсии тоҷик Бузургмеҳр Ёровро фавран озод кунанд.

Иттиҳоди ҷаҳонии созмонҳои ҷомеаи шаҳрвандӣ (CIVICUS) ва Шарикии байналмилалӣ барои ҳуқуқи инсон (IPHR) дар изҳороти якҷояе аз ҳаштумин солгарди боздошти Бузургмеҳр Ёров ёдовар шуда, аз мақомоти Тоҷикистон хостаанд, ҳама иттиҳомот нисбати ин маҳбуси сиёсиро бекор ва ӯро озод кунанд. 

Дар ин изҳорот, ки рӯзи 27-уми сентябр нашр шудааст, директори IPHR Бриҷит Дюфур боздошти Бузургмеҳр Ёровро худсарона номида, гуфтааст, ки ин адвокати шинохта ба хотири ҳимоят аз мухолифони сиёсии Тоҷикистон муҷозот шуд.  

Дар идома Бриҷит Дюфур аз ҷомеаи ҷаҳонӣ хостааст, ки ба қазияи Бузургмеҳр Ёров таваҷҷуҳи ҷиддӣ намуда, озодии фарии ӯро аз мақомот талаб кунанд. 

Гуфта мешавад, маҳбуси сиёсӣ Бузургмеҳр Ёров соли 2015 замоне боздошт шуд, ки вакили мудофеи аъзои боздоштшудаи Ҳизби наҳзати исломии Тоҷикистон буд. 

Мақомот баъд аз боздошт ӯро бо иттиҳомоти сохта, аз ҷумла таҳқири мансабдорони давлатӣ, беэҳтиромӣ ба додгоҳ, тавҳин ба президенту қаллобӣ ва дар умум ба 28 соли зиндон маҳкум кардаанд. 

Баъдан тибқи Қонуни ҶТ “Дар бораи афв” соли 2019 шаш сол ва соли 2021 чор сол аз муҳлати иҷрои ҷазои ӯ дар зиндон кам гардида буд ва дар умум дар ин марҳила 10 сол аз иҷрои ҷазои ӯ кам карда шуд.

Вале дар моҳи июли соли ҷорӣ дар як мурофиаи дигар, ки ба меъёрҳои байналмилалӣ ҷавобгӯ набуд, ба ҳукми ӯ боз даҳ соли дигар бо иттиҳоми сохтаи қаллобӣ изофа карда шуд.

Дэвид Код, намояндаи CIVICUS мегӯяд, ки ҳукмҳои ӯ таҳқир ба адолат аст ва бояд фавран қатъ карда шаванд. Ҷаноби Код дар идома таъкид мекунад, ки ҳашт соли зиндон хеле тӯлонӣ буда, набояд иҷозат дод, ки Ёров аз ин вақти бештарро дар зиндон гузаронад. 

Гуфта мешавад, Бузургмеҳр Ёрови 52-сола дар маҳбас борҳо мавриди фишор ва шиканҷа қарор гирифтааст.   

Соли 2019 Кумитаи ҳуқуқи башари Созмони Милали Муттаҳид баъд аз баррасии парвандаи Бузургмеҳр Ёров ва дигар раҳбарони ҲНИТ, боздошти ӯро худсарона эълом карда, аз ҳукумати Тоҷикистон хоста буд, ки бидуни қайду шарт фавран ӯро  озод кунад, вале то имрӯз ҳукумати Эмомали Раҳмон ҳеч дархости ин кумитаи СММ-ро иҷро накарда ва ба таъаҳудоти байналмиллалии худ пойбанд набудааст.

CIVICUS ва IPHR Бузургмеҳр Ёровро ба маъракаи “Шоҳиди ман бош” шомил кардаанд, ки барои озодии фаъолон ва ҳомиёни ҳуқуқи башар дар саросари ҷаҳон талош мекунад.

Коршиносони ин созмонҳо боздошт ва ҳабси Бузургмеҳ Ёровро бахше аз саркӯб дар Тоҷикистон номида мегӯянд, ки дар ин кишвар ҳама кӯшишҳои тазоҳуроти осоишта ба таври бераҳмона саркӯб мешаванд, намояндагони мухолифони сиёсӣ нопадиду зиндонӣ мешаванд, вебсайтҳои расонаҳои мустақил баста мешаванд, ҳомиёни ҳуқуқ, ҳуқуқшиносон, блогерҳо ва рӯзноманигорон таъқиб мешаванд. 

Бино ба гузориши нави солонаи CIVICUS Monitor, ки вазъи озодиҳои ҷомеъаи шаҳрвандиро дар саросари ҷаҳон арзёбӣ мекунад, Тоҷикистонро дар қатори кишварҳои “пӯшида” ҷойгир карда буданд.

Таркиш дар Тошканд даҳҳо захмӣ ба ҷо гузошт

Аз ҷониби
AZDA TV-2
-
0

Бар асари як таркиши сахте, ки шаби гузашта дар шаҳри Тошканд рух дод, даҳҳо нафар захмӣ ва дасти кам як нафар кушта шудааст.

Бино ба иттилои расонаҳо, бомдоди рӯзи 28-уми сентябри соли 2023 тақрибан соати 02:43 дақиқа ба вақти маҳаллӣ таркиши сахте дар Фурудгоҳи шаҳри Тошканд рух дода, ки садои он аз дурии то 30 километр дуртар шунида шудааст.

Кумитаи ҳолатҳои фавқулъоддаи Узбекистон гуфтааст, ки ин таркиш дар яке аз анборҳои гумруки Фурудгоҳи байналмилалии Тошканд ба амал омадааст. Дар натиҷаи ин таркиш даҳҳо нафар захмӣ шуда, дасти кам як нафар ҷон бохтааст.

Пеш аз ин Вазорати тандурустии Узбекистон ҳам дар ибтидо хабар дода буд, ки тамоми осебдидагон аз ҷои ҳодиса ба бемористонҳо интиқол дода шудаанд ва дар байни онҳо ҳолати ҳолати ҳеч касе вазнин арзёбӣ намешавад.

Ин таркиш, ки дар анборҳои ширкати “Интер Логистик” рух додааст, шиддати он қадар сахт буда, ки ба қавли расонаҳо, аз ин анборҳо чизе солим боқӣ намондааст. Ҳатто дару тиреза, девору сақфу боми бархе хонаҳои наздик ба фурудгоҳ низ аз шиддати сахти ин таркиш осеб дидаанд.

Пойгоҳи иттилоърасонии Mash бо нашри чанд навор аз ин ҳодиса хабар додааст, эҳтимол меравад, сабаби асосии таркиш дар Тошканд, вуҷуди батареяҳои акумулаторӣ барои мошинҳои барқӣ бошанд, ки дар он ҷо нигаҳдорӣ мешуданд.

Гуфта мешавад, мақомоти дахлдор пас аз ин ҳодиса таҳқиқоти худро дар бораи муайян кардани сабабу омилҳои ин таркиш оғоз кардаанд, аммо то замони таҳияи ин хабар гузориши расмие дар бораи ҳаҷми зарар, теъдоди пурраи маҷрӯҳон ва ҷонбохтагонро нашр накардаанд.

Тавре дар сомонаи расмии ин ширкат гуфта шудааст, “Интер Логистик” аз соли 2017 ба ин сӯ ба интиқоли борҳои содиротӣ, воридотӣ ва транзитӣ дар бандарҳои Федератсияи Русия, Украина ва Аврупои Ғарбӣ; интиқоли мол тавассути роҳи оҳан ва автомобилӣ дар саросари Русия ва ИДМ; интиқоли мол дар контейнерҳо ва ғайра мешғул будааст.

Эмомалӣ Раҳмон ба Олмон сафар кард

Аз ҷониби
AZDA.TV
-
0

Бино ба иттилои дафтари матбуоти Президенти Тоҷикистон, имрӯз, 28-уми сентябр Эмомалӣ Раҳмон бо сафари расмӣ озими кишвари Омлон шуд.

Ба иттилои манбаъ, сафар бо ҳадафи иштирок дар “Вохӯрии сарони давлатҳои “Осиёи Марказӣ – Ҷумҳурии Федеративии Олмон” буда, он то рӯзи 30-юми сентябр идома хоҳад кард.

Гуфта мешавад, дар ин сафар Эмомалиро вазири корҳои хориҷӣ, ёвари Президент дар умури равобити хориҷӣ ва масоили иқтисодӣ, вазирони саноат ва технологияҳои нав, молия ва дигар шахсони расмӣ ҳамроҳӣ мекунанд.

Ҳамчунин дар ин нишаст раҳбарони кишварҳои Осиёи Марказӣ, аз ҷумла Қазоқистон, Қирғизистон, Узбекистон ва Туркманистон низ иштирок хоҳанд кард.

Қарор аст сарони кишварҳои Осиёи Марказӣ бо садри аъзами Олмон Олаф Шолтс ва президенти ин кишвар Франк-Валтер Штайнмайер мулоқот кунанд.

Гуфта мешавад, ҷонибҳои масъалаҳои таҳкими ҳамкориҳои минтақавӣ ва иқтисодӣ, инчунин масъалаҳои ҳамкориҳо, ки барои минтақа ва Олмон муҳиманд, баррасӣ хоҳанд кард.

Инчунин мулоқоти дуҷонибаи Эмомалӣ Раҳмон ва Олаф Шолтс низ пешбинӣ гардидааст. Илова бар ин, дар доира сафараш Эмомалӣ Раҳмон дар конфронси иқтисодии кишварҳои Осиёи Марказӣ ва Олмон ширкат мекунад.

Дар пасманзари сафари раисҷумҳури Тоҷикистон ва дигар раҳбарони кишварҳои Осиёи Марказӣ ба Олмон, мухолифони ин ҳукуматҳо, аз ҷумла мухолифи режими Эмомалӣ хабар доданд, ки имрӯзу фардо дар назди сафаорати Тоҷикистон дар Берлин ва дар макони баргузории нишастҳои президентҳо тазоҳурот баргузор мекунанд.

Сафари серӯзаи Эмомалӣ Раҳмон ба Олмон

Аз ҷониби
AZDA-TV
-
0

Эмомалӣ Раҳмон, раисҷумҳури Тоҷикистон бо як сафари серӯза ба Берлин меравад.

Дар ин бора “Asia-Plus” дар истинод ба Хадамоти матбуоти президенти Тоҷикистон хабар дод.

Бино ба иттилои манбаъ, сафари Эмомалӣ Раҳмон рӯзи 28-уми сентябр оғоз ёфта, то 30-юми ҳамин моҳ идома хоҳад кард.

Интизор меравад, ки бо шумули Эмомалӣ Раҳмон сарони кишварҳои дигари Осиёи Марказӣ, аз ҷумла Қазоқистон, Қирғизистон, Туркманистон ва Ӯзбекистон низ ба Олмон сафар намуда, бо садри аъзами Олмон Олаф Шолтс ва президенти ин кишвар Франк-Валтер Штайнмайер мулоқот кунанд.

Гуфта мешавад, ҷонибҳои масъалаҳои таҳкими ҳамкориҳои минтақавӣ ва иқтисодӣ, инчунин масъалаҳои ҳамкориҳо, ки барои минтақа ва Олмон муҳиманд, баррасӣ хоҳанд кард.

Инчунин мулоқоти дуҷонибаи Эмомалӣ Раҳмон ва Олаф Шолтс низ пешбинӣ гардидааст. Илова бар ин, дар доира сафараш Эмомалӣ Раҳмон дар конфронси иқтисодии кишварҳои Осиёи Марказӣ ва Олмон ширкат мекунад.

Дар пасманзари сафари раисҷумҳури Тоҷикистон ба Олмон, мухолифони режими Раҳмон дар хориҷ аз баргузории ду тазоҳурот дар шаҳри Берлин хабар доданд.

Шикояти калонсолтарин блогери тоҷик аз мақомдорони Тоҷикистон

Аз ҷониби
AZDA.TV
-
0

Калонсолтарин блогери тоҷик, Бобои Муҳаммадҷон, маъруф ба бобои блогер, аз мақомоти кишвар хостааст, ки ба кори моҳипарварии ӯ монеа нашаванд.

Ин блогери тоҷик дар шабакаи ютубии худ ба номи Qand Show навореро нашр карда, аз мақомоти Додситони кул ва Додгоҳи олии Тоҷикистон хостааст, ки пеши роҳи онҳоеро, ки оби ҳавзҳои моҳиҳояшро бе далел қатъ мекунанд, бигирад.

Бобои Муҳаммадҷон, ки дар шаҳри Ваҳдат “Хоҷагии моҳипарварӣ” дорад, дар ин навори худ ба Кумитаи давлатии идораи замин ва геодезии Ҷумҳурии Тоҷикистон, Додгҳи олӣ ва Додситонии кулли Тоҷикистон, инчунин ба Додситонии шаҳри Ваҳдат ва дигар мақомоти дахлдор муроҷиат карда, аз “монегузорҳо” шикоят мекунад. Ӯ мегӯяд, ки “ин моҳиҳо чӣ гуноҳ доранд, ки обашонро қатъ мекунанд? Калон намешаванд, азоб мекашанд, мемиранд, оиди ҳаминҳо муроҷиат дорам.”

Дар идома Бобои Муҳаммадҷон мегӯяд, ба ин ниҳодҳо муроҷиат дорам, ки “ҳамин моҳиҳои маро – дилам месӯзад, обро бароияшон қатъ мекуананд, бисёр монеагӣ мекунанд. Ҳамина як бинен охир, ҳамчун як бобо бинед ку барои чӣ монеагӣ мекунанд. Агар ягон кори ман хатову нодуруст бошад, прокуратура бгирад ҳалаш кунад охир, моҳиҳо чӣ гуноҳ доранд?”

Ин блогери калонсоли тоҷик нагуфтааст, ки кӣ ва кадом ниҳод пеши роҳи ӯро мегирад ва намегузорад фаъолият кунад. Танҳо мегӯяд, ки дигар ба “Кумитаи заминсозии шаҳри Ваҳдат ҳоҷати муроҷиат нест.”

Бобои Муҳаммадҷон бо чандин суханрониҳояш дар шабакаи Ютуб маъруф аст. Баъзе гуфтаҳои ӯ дар байни ҷавонон баҳсҳои зиёдеро барпо карда буд. Аз ҷумла, чанде пеш дар хитоб ба Ҷонон, як бонуи тоҷик, ки ӯ низ блогери маъруф аст, гуфта буд, “Ин гуноҳе, ки ту кардаӣ чандон гуноҳе нест.” Бо ин суханаш мавриди интиқодоти шадиде қарор гирифт.

Чандест мақомоти амниятии Тоҷикистон барои таблиғи сиёсати ҳукумати кишвар аз блогерон истифода мекунад. Ин гурӯҳ бештар ба “мубаллиғони” ҳукумати Раҳмон табдил ёфтаанд.

Бо вуҷуди ин, шикояти ин блогери пирамард аз монеагузориҳо дар фаъолияти соҳибкорияш суолҳоеро дар зеҳни мардум эҷод кардааст. Бархе бар ин назаранд, ки мақомоти кишвар, бахусус КДАМ дар ҳар қадам барои тоҷирон ва фаъолони ҷомеа монеъа мегузоранд ва намехоҳанд касе рушд кунад.

Ироқ се рӯз мотами умумӣ эълон кард

Аз ҷониби
AZDA TV-2
-
0

Дар пайи як сӯхтори мудҳише дар вилояти Найнавои Ироқ дасти кам беш аз 400 нафар кушта ва захмӣ шудааст.

Бино ба иттилои расонаҳо, шоми дирӯз дар минтақаи Ал-Ҳамдонияи устони
Найнавои Ироқ ҳангоми баргузории ҷашни арусии ду ҷавон, Ҳанин ва Ривон толори баргузории
ҷашни арӯсӣ оташ гирифт ва дар натиҷаи ин сӯхтор садҳо нафар
кушта ва захмӣ шуданд.

Кумитаи Ҳилоли Аҳмари Ироқ теъдоди қурбониёни ин ҳодисаро зиёда аз 450 нафар
эълон карда буд, вале баъдтар вазири тандурустии ин кишвар ба Ал-Ҷазира гуфт, дар ин ҳодиса “87 нафар кушта ва ҳудуди 100 нафари дигар маҷруҳ шудааст.”

Аз сӯи дигар, шабакаи Ал-Ҳурра бо нашри гузорише аз ҷои ҳодиса гуфтааст, теъдоди қурбониён он қадр зиёд буданд, ки (наздиктарин) бемористониҳои ин устон имкони қабули ҳамаи онҳоро
надоштанд, ба ин хотир қисме аз осибдиҳоро ба бемористони устони Арбил интиқол
доданд.

Наҷм Алҷаббурӣ, раиси устони Найнаво гуфтааст, ки бар асари ин ҳодиса дасти
кам 114 нафар кушта ва ҳудуди 200 каси дигар ҳам маҷрӯҳ шудаанд. Вай сабаби ин
сухтори пурқурбониро оташбозии иштирокчиёни ин маросим дар дохили толор
гуфтааст. Вай теъдоди кулли иштирокчиёни ин маросими арӯсиро ҳудуди 800 то 1000 нафар унвон кардааст.

Ҷолиби диққат дар хеле аз наворҳои нашршуда аз ҷои ин ҳодиса он аст, ки
вақте бархе иштирокчиён оташбозӣ мекунанд ва сӯхтор дар сақфи ин бино сар мезанад,
аксари иштироқчиён дар ҷойҳои худ истода, машғули хӯрдану пойкӯфтану рақсидан ҳастанд.

Мақомоти ҳифзи ҳуқуқ ва сӯхторхомӯшкунии Ироқ бо анҷоми таҳқиқоти ибтидоӣ
дар бораи сабабҳои ибтидоии ин сӯхтор гуфтаанд, оташбозии иштирокчиён ҳангоми
баргузории ҷашни арӯсӣ омили асосии ин сӯхтор будааст. Сақфи ин бино низ аз
маводҳои палостикии зудсӯз сохта шуда, ки ҳангоми сӯхтор шуълаҳои оташ дар
зарфи чанд лаҳза ҳамаҷоро фаро гирифтааст.

Давлати Ироқ ба хотири теъдоди зиёди қурбониён 3 рӯзи мотами миллӣ эълон
карда, президенти ин кишвар ҳам гуфтааст, “ин як фоҷеи дарднок ва як ҳодисаест, ки қалби ҳамаи ироқиҳоро ба дард овардааст.”

Инчунин таъкид шудааст, биное, ки дар он ин толори ҷашнҳои арӯсӣ сохта шуда
буд, мухолифи меъёрҳои қонунгузорӣ сохта шуда, қоидаҳои эминии сар задани
сӯхтор риоя нашуда буданд. Ба ҳамин хотир, дасти кам 6 нафар аз моликон ва дигар касоне, ки дар сохтани он саҳм доштанд, боздошт шудаанд.

Тазоҳуроти мухолифони кишварҳои Осиёи Марказӣ дар Олмон

Аз ҷониби
AZDA-TV
-
0

Пас аз эълони “Гурӯҳи 24” Паймони миллии Тоҷикистон низ аз омодагии худ барои ширкат дар тазоҳуроти Олмон хабар дод.

Эътилофи Паймони миллии Тоҷикистон рӯзи 27-уми сентябри соли ҷорӣ бо нашри изҳороте аз тоҷикони муқими Аврупо даъват кард, ки дар эътироз алайҳи сафари раҳбарони кишварҳои Осиёи Марказӣ ба Олмон, ҳамроҳи фаъолон аз кишварҳои дигари ОМ ширкат кунанд.

Дар ин изҳорот, ки дар саҳифаи фейсбукии ПМТ нашр шудааст, сафари раисҷумҳури Тоҷикистон Эмомалӣ Раҳмон ва дигар раҳбарони кишварҳои Осиёи Марказиро ба Олмон як фурсат барои мухолифин номида, гуфтааст, ки “истифода аз фурсатҳо барои расонидани садои мазлумон, зиндониёни сиёсӣ ва муҳоҷирон ба ҷаҳониён ва эътироз алайҳи даъвати диктотурҳо ба кишварҳои мутамаддин яке аз вазифаҳои неруҳои мухолиф дар хориҷ мебошад”.

Паймони миллии Тоҷикистон дар изҳороти худ аз ҳамоҳангӣ бо мухолифини сиёсии кишварҳои Осиёи Марказӣ барои баргузории тазоҳурот дар назди қасри раёсатҷумҳурии Олмон дар Берлин хабар додааст. 

Гуфта мешавад, тазоҳурот дар “назди макони мулоқотҳо” рӯзи 29-уми сентябр соати 8 шуруъ шуда, то соати 13 идома хоҳад кард.

Инчунин ПМТ аз тазоҳуроти дигар, ки Ҳаракати сиёсии “Гуруҳи 24” рӯзи 28-уми сентябр дар назди сафорати Тоҷикистон дар Берлин баргузор мекунад ҷонибдорӣ карда, аз тоҷикони муқими Аврупо ва тарафдоронаш даъват кардааст, ки дар ҳарду тазоҳурот ширкат кунанд. 

Гуфта мешавад, рӯзи 29-уми сентябри соли ҷорӣ қарор аст дар шаҳри Берлин мулоқоти президентҳои Осиёи Марказӣ, аз ҷумла Эмомалӣ Раҳмон ва раисҷумҳури Олмон Френк Валтер Штейнмайер баргузор шавад. Дар ин бора сомонаи расмии Президенти Олмон хабар додааст.

То ҳол мавзуи гуфтугӯҳо нашр нашудааст ва мақомоти Тоҷикистон низ дар бораи сафари Эмомалӣ Раҳмон чизе нагуфтаанд.

1...266267268...786саҳифаи 267 аз 786