Ҷустуҷӯ кунед
Ҷустуҷӯ
23.9 C
Dushanbe
Хона блог саҳифа 3

Туркия ва Тоҷикистон раводидро аз байн мебаранд?

Аз ҷониби
Azda TV
-
0

Рӯзи 21-уми апрели соли ҷорӣ дар шаҳри Анқара машваратҳои консулии дуҷониба миёни вазоратҳои корҳои хориҷии Тоҷикистон ва Туркия баргузор гардид.

Тавре Вазорати корҳои хориҷии Тоҷикистон хабар медиҳад, ҳайати кишварро cардори Сарраёсати консулии Вазорати корҳои хориҷии Тоҷикистон Сафарзода Баҳодур ва ҷониби Туркияро директори генералии Вазорат оид ба масъалаҳои консулӣ ва муҳоҷират Фатма Ҷерен Язган раҳбарӣ карданд.

Ба иттилои ин ниҳод, дар ҷараёни машваратҳо масъалаҳои муҳими ҳамкориҳои дуҷониба, аз ҷумла соддагардонии расмиёти раводид, ҳифзи ҳуқуқу манфиатҳои шаҳрвандон ва кумаки ҳуқуқии мутақобила баррасӣ шуданд.

Ин ҳам дар ҳолест, ки соли гузашта давлати Туркия барои шаҳрвандони Тоҷикистон низоми раводид (виза)-ро ҷорӣ кард, ки қаблан байни ду кишвар низомӣ бераводид ҷорӣ буд.

Хабаргузории “Aзия-Плюс” бо такя ба сафорати Туркия дар Душанбе хабар дод, ки қарор аст ҷонибҳо рӯзи 22-юми апрел дар Анқара нишасте доир кунанд ва дар ҷараёни баррасии чанде аз масоил, масъалаи дигарбора ҷорӣ кардани низоми бераводидро баррасӣ кунанд. Вале то лаҳзаи омода шудани ин хабар, сомонаҳои расмии Вазорати корҳои хориҷии Тоҷикистон ва Туркия дар ин бора чизе нашр накардаанд.

Сафорати Туркия дар Тоҷикистон гуфтааст: “Мо тавассути ҳамкориҳои зич ва гуфтушунид байни ниҳодҳои марбутаи ду кишвар талош дорем, ки дар оянда низоми раводидро бекор кунем.”

Ёдовар мешавем, ки аз 20-уми апрели соли 2024 мақомоти Туркия реҷаи раводидро барои шаҳрвандони Тоҷикистон – бидуни шарҳу тавзиҳе ҷорӣ кард, ки то ҳол шаҳрвандони Тоҷикистон бе раводид ба ин кишвра сафар карда наметавонанд.

Ба гуфтаи коршиносон, бекор шудани раводид байни ин ду кишвар ҳам барои тоҷирон, ки амволи худро аз Туркия барои фурӯш меоварданд ва ҳам барои касоне, ки аз пайи ҷойи кор ҳастанд, осонӣ меоварад.

Гуфта мешавад, дар айни ҳол барои гирифтани раводиди Туркия шаҳрвандони Тоҷикистон бояд аз 100 то 160 доллар бипардозанд.

Русия гирифтани ВНЖ-ро барои пизишкон ва омӯзгорон сахт кард

Аз ҷониби
Azda TV 3
-
0

Русия рӯйхати касбҳое, ки ба хориҷиён иҷозати иқомати соддакардашударо медод, маҳдуд кард.

Вазорати кор ва ҳифзи иҷтимоии аҳолии Русия рӯйхати касбҳоеро, ки ба мутахассисони хориҷӣ барои гирифтани иҷозати иқомати зист (ВНЖ)-ро бо тартиби содда имкон медод, аз 203 то 29 номгӯй коҳиш дод. Дар рӯйхати нав, ки ахиран дар портали иттилооти ҳуқуқии Русия нашр шуд, чанде аз ихтисосҳои маъмул, аз ҷумла табибон, омӯзгорон, хориҷ шудаанд.

Ба рӯйхати тасдиқшуда асосан мутахассисони соҳаи саноату техника, аз қабили муҳандисон, барномасозон, кафшерчиён ва ғайра ворид шудаанд. Вазорат сабаби чунин маҳдудсозиро зарурати мутобиқ кардани рӯйхат бо ниёзҳои воқеии бозори кори Русия арзёбӣ кардааст.

Шароит ва талаботи нав

Бар пояи тавзеҳи расмии Вазорати кори Русия, хориҷиёне, ки мехоҳанд соли 2025 бо такя ба ин рӯйхат иҷозати иқомат гиранд, бояд як сол таҷрибаи кории тасдиқшуда дар ҳамон касб дошта бошанд ва ҳамаи меъёрҳои ҳуқуқии амалкунанда дар Русияро риоят кунанд.

Аз соли 2017 то 2023 шаҳрвандони хориҷӣ бо касбҳои серталаб метавонистанд шаҳрвандии Русияро бо тартиби содда ба даст оранд. Бо вуҷуди ин, тибқи маълумоти Вазорати корҳои дохилӣ, камтар аз 1% аз ин имтиёз истифода бурдаанд. Моҳи апрели соли 2023 ин қоида бекор шуд ва ҳоло тағйироти нав ба Қонуни “Дар бораи вазъи ҳуқуқии шаҳрвандони хориҷӣ” ворид гашт, ки танҳо ба гирифтани иҷозати иқомат дахл дорад (на шаҳрвандӣ).

Рӯйхати нав бо иштироки вазоратхонаҳои дахлдор, ширкатҳои калон ва Агентии ташаббусҳои стратегӣ таҳия шудааст. Лоиҳаи ибтидоӣ 31 ихтисосро дар бар мегирифт, аммо дар ниҳоят шуморааш то ба 29 кам карда шуд.

Ин дарҳоле аст, ки аксари мутахасисони ботарҷрибаи тоҷик, махсусан пизишкон бо даст овардани ВНЖ осон ба Русия ҷалб шуда буданд.

Сафари навбатии Рустами Эмомалӣ ба Русия

Аз ҷониби
AZDA-TV
-
0

Имрӯз, 17-уми апрел Рустами Эмомалӣ, раиси Маҷлиси миллии Маҷлиси Олӣ, шаҳрдори Душанбе ва писари раисҷумҳури худкомаи Тоҷикистон Эмомалӣ Раҳмон ба шаҳри Санкт-Петербурги Федератсияи Русия рафт.

Бино ба иттилои расонаҳои ҳукуматӣ, Рустамро дар ин сафар раисони кумитаҳои Маҷлиси миллӣ ва дигар шахсони расмӣ ҳамроҳӣ доранд ва ӯ дар ҷаласаи навбатии Шӯро ва ҷаласаи 58-уми пленарии Ассамблеяи Байнипарламентии Иттиҳоди Давлатҳои Мустақил иштирок хоҳад кард.

Гуфта мешавад, дар ҷаласаҳои намояндагони парлумонҳои кишварҳои аъзои ИДМ аз фаъолият дар соли 2024 натиҷагирӣ карда, масоили омодагӣ ба нишастҳои қарибулвуқуи байнулмилалӣ, масоили сиёсӣ, хавфу таҳдидҳои марбут ба истифодаи ҳуши маснӯӣ бо ҳадафҳои террористӣ, инчунин ҷустуҷӯ ва дарёфти тавозун байни амнияту бехатарӣ, инноватсия ва ғайра баррасӣ хоҳад шуд.

Инчунин Рустам дар доираи ин сафараш дар кори ҷаласаи Ассамблеяи Байнипарлумонии ИДМ бахшида ба 80-солагии Ғалаба дар Ҷанги Бузурги Ватанӣ иштирок хоҳад кард.

Бояд гуфт, ин аввалин сафари Рустами Эмомалӣ ба Русия набуда, ӯ моҳи июни соли 2023 барои иштирок дар ҷаласае ба Санкт-Петербург рафта буд. Моҳи ноябри ҳамон сол ӯ дар Маскав буд ва дар он ҷо бо раҳбарияти Шӯрои Федератсия ва Думаи давлатӣ мулоқотҳо анҷом дода буд. Қаблан, моҳи майи соли 2021 дар Анҷумани байналмилалии иқтисодии Санкт-Петербург ва соли 2022 дар Форуми вакилони ҷавон дар Қазон ширкат карда буд.

Гуфта мешавад, сафари навбатии Рустам ба Русия дар ҳолест, ки ӯ 11-уми апрели соли ҷорӣ барои бори дувум раиси Маҷлиси миллии Маҷлиси олии Ҷумҳурии Тоҷикистон, палатаи болоии порлумон интихоб шуд.

Тибқи Сарқонуни кишвар раиси Маҷлиси миллӣ шахси дувум дар Ҳукумати Тоҷикистон ба ҳисоб рафта, дар сурати истеъфо, марг, беморӣ ё аз салоҳиятҳои худ даст кашидани президент, то замони интихобот ӯ иҷрокунандаи вазифаи президент дар кишвар хоҳад буд.

Мунтақидони режими имрӯзаи Тоҷикистон дар вазифаҳои калидӣ кор кардани ӯро ба эҳтимоли интиқоли қудрат аз падар ба писар рабт медидиҳанд ва ин эҳтимол солҳо боз дар кишвар матраҳ аст.

Инчунин ҳама боздошту қатли дигарандешон дар 10 соли ахир Тоҷикистонро маҳз ба “фароҳам кардани шароити мусоид” барои интиқоли қудрат аз Эмомалӣ Раҳмон ба писараш Рустами Эмомалӣ рабт медиҳанд.

Боздошти “Усмони блогер” дар Тоҷикистон

Аз ҷониби
AZDA-TV
-
0

Пулиси Душанбе 17-уми апрели соли ҷорӣ аз боздошти Усмон Мирзомуродов, маъруф ба “Усмони блогер” хабар дод.

Бино ба иттилои Раёсати Вазорати корҳои дохилии шаҳри Душанбе, Усмон бар асоси шикоятҳои шаҳрвандон аз ҷониби кормандони ШВКД-2 дар ноҳияи Шоҳмансур дастгир гардида, ба таври доимӣ нашр кардани “наворҳои пур аз алфози қабеҳ дар шабакаҳои иҷтимоӣ” айбдор мебошад.

Инчунин манбаъ иддао дорад, ки зимни ташхис муайян гардидааст, ки ин блогер “дар ҳолати сархушӣ аз истеъмоли воситаҳои нашъадори навъи “Метамфетамин” (кристалл) қарор доштааст”.

Ҳоло ӯ бо қарори додгоҳ барои 15 шабонарӯз ба ҳабс гирифта шудааст. Аммо назари худи Усмон ва наздиконаш дар мавриди иттиҳомоти мақомот дастрас нест.

Усмон Мирзомуродови 33-сола дар миёни корбарони шабакаҳои иҷтимоӣ бо номи “Усмони блогер” машҳур буда, дар инстаграм саҳифаи “tojikonshow”-ро бо 891 ҳазор думболгир дорад ва дар ин саҳфа бештар наворҳои ҳазлу шухиомезро нашр мекунад.

Мақомот ӯро дар гузашта низ барои нашри наворҳояш 11 рӯз зиндонӣ карда буданд ва ӯ муддате аз нашри навор дар шабакаҳои иҷтимоӣ худдорӣ мекард.

Худи ӯ дар наворе соли 2022 гуфта буд, ки “Вақтҳои охир мардум, вақте маро мебинанд, бародарвор ба оғӯшам мегиранд ва сипас ҳамааш як саволам медиҳанд: А бача, чӣ кардӣ, видео кам бароварда истодаӣ? Ман ранги ҳарвақта як ҷавоб дорам. Мегӯям, дар отпускам. Рӯямро сиёҳ мекунам, чӣ хелӣ отпуск? Сабаби видео кам бароварданам ин аст, ки ҳақиқат талх аст, ҳақиқатро инҳо зиёд намепазиранд”, вале нагуфт, ки “инҳо” гуфта, киҳоро дар назар дорад.

Инчунин ӯ дар ҳамон навораш аз кормандони андоз шикоят карда буд, ки бо вуҷуди надоштани даромад аз саҳфааш болои сари ӯро ҳам гирифтаанд ва талаб доранд, ки андоз бисупорад.

Ҳамзамон дар тобистони соли 2024, дар Русия низ як навори Усмон, ки дар он аз муҳоҷирон даъват мекунад, то будубоши худро дар Русия аз тариқи дарёфти билетҳои донишҷӯӣ расмӣ гардонанд, барояш дарди сарсоз шуда буд ва раиси Кумитаи тафтишоти Русия Александр Бастрикин, ки дар расонаҳо бо мавқеъгириҳои зидди муҳоҷирияш машҳур аст, санҷиши видеои ӯро таҳти назорати худ гирифта буд ва маълум нест хулосаи тафтишот чӣ шудааст.

Мусодираи амволи чеҳраҳои амъруф баъд аз зиндонӣ кардани онҳо

Аз ҷониби
Azda TV 3
-
0

Мақомоти Тоҷикистон молу дороии чеҳраҳои маъруфро, ки ба гуноҳи “кӯшиши табаддулот” маҳкум шудаанд, мусодира мекунад.

Бино ба иттиллои Радиои Озодӣ, баъди ба иҷро даромадани ҳукми додгоҳ дар бораи зиндонӣ шудани шахсиятҳои шинохта, мақомоти марбута мусодираи дороии онҳоро оғоз кардаанд.

Гуфта мешавад, хонаи падарии Саидҷаъфар Усмонзода, раиси пешини Ҳизби демократ ва собиқ вакили порлумон дар ноҳияи Фархор аллакай мусодира шудааст. Аммо хонае, ки Усмонзода дар шаҳри Душанбе дар он зиндагӣ мекард, ба номи ҳамсараш будааст, ба ин далел мусодира нашудааст.

Ҳамчунин мақомот манзили Ҳамрохон Зарифӣ, вазири пешини корҳои хориҷии кишварро дар Душанбе мусодира намудаанд.

Бино ба гуфтаи ҳамсояҳои Зарифӣ, ду рӯз қабл, мақомот ба манзили ӯ омада, ба хешовандони вай огоҳӣ додаанд, ки тибқи ҳукми додгоҳ хона мусодира шудааст ва онҳо бояд онро холӣ намоянд. Манбаъ мегӯяд, мақомот мехоҳанд хона ва ду мошини ӯро мусодира кунанд.

Гуфта мешавад, масъулини марбута инчунин шоми 15-уми апрел ба хонаи Акбаршо Искандаров, собиқ раиси Шӯрои олӣ ва иҷрокунандаи пешини вазифаи президенти Тоҷикистон низ рафта, ба наздиконаш ҳушдор додаанд, ки бояд дар муддати ду рӯз хонаро холӣ кунанд.

“Ҷияни Акбаршо эътироз карда, гуфтааст хона аз ман аст кормандон мақомот гуфтанд, ки фақат супоришро иҷро мекунанд, агар норозӣ ҳастед метавонед ба Додгоҳи олӣ муроҷиат кунед.”, омадааст дар хабар.

Ба ҳамин тартиб, мақомот манзили Аҳмадшо Комилзода, муовини пешини раиси Ҳизби демократи Тоҷикистонро низ мусодира кардаанд. Ба гуфтаи ҳамсояҳо, 14-уми апрел намояндагони Хадамоти иҷро ба пайвандони Комилзода фақат се рӯз муҳлат додаанд, ки хонаро тарк кунанд.

Шаҳноз Комилзода, духтари Аҳмадшо Комилзода, гуфтааст, ки падараш моликияте надорад ва ҳамон ҳавлие, ки ба номи модараш аст, бо қарор додгоҳ мусодира мешавад.

Аммо хонаи Шокирҷон Ҳакимов, муовини раиси Ҳизби сотсиал-демократи Тоҷикистонро мусодира накардаанд, зеро манзили ягонаи ӯ сарпаноҳи хонавода будааст.

Дар пайи мусодираи хонаҳои ин чеҳраҳои маъруф, инчунин масъулин 230 ҳазор сомонии Рухшона Ҳакимоваро, ки дар суратҳисобаш доштааст, ҳабс кардаанд.

Ҳамзамон мнбаъ аз мусодираи ду манзили Абдулфайз Атои низ гузориш медиҳад.

Ёдовар мешавем, ки як гурӯҳ сиёсатмадорону мансабдорони собиқ ва як рӯзноманигор дар моҳи феврали соли ҷорӣ бо иттиҳоми “хиёнат ба давлат” ва “кӯшиши табаддулот” боздошт ва аз 8 то 27 сол ба зиндон маҳкум шуданд.

Мусодираи амвол ва дороиҳои маҳкумшудагони муттаҳам ба “табадуллоти давлатӣ” дар Тоҷикистон таҷибаи нав нест. Соли 2015 баъд аз боздошти раҳбарон ва тарафадорони Ҳизби наҳзати исломи Тоҷикистон дороӣ ва моликияти онҳо низ аз ҷониби Ҳукумат мусодира шуда буд.

Боз заминларза Тоҷикистонро такон дод

Аз ҷониби
Azda TV
-
0

Пасзилзилаҳои водии Рашт то Душанбе ҳанӯз идома дорад. Дирӯз 16-уми апрел, дар шаҳри Душанбе ва дигар навоҳии кишвар заминларза сабт шуд.

Кумитаи ҳолатҳои фавқулоддаи Тоҷикистон иттилоъ дод, ки заминларза дар пойтахти кишвар рӯзи 16-уми апрел соати 04-и субҳ сурат гирифта, қуввати он ба 3 бал расидааст.

Кормандони КҲФ мегӯянд: “Маркази заминларза 320 километр дур аз Душанбе ва дар ҳудуди Афғонистон ҷойгир буд”. Дар маркази ин зилзила дар Афғонистон қувваи заминларза 5-6 балл ва наздиктар дар ҳудуди ноҳияи Ишкошими ВМКБ 4 балл, дар Душанбе 3 балро ташкил медод.”

Баъзе корбарон аз пойтахт дар шабакаҳои иҷтимоӣ таҷрубаи худро аз ин воқеа даҳшатнок унвон карда мегӯянд, қувваи заминларза аз 3 бал ҳам бештар буд.

Гуфта мешавад, ин ҳодиса хисороти ҷонӣ ва молӣ дар пай надоштааст.

Ҳодисаи мазкур дар ҳоле рух медиҳад, ки ҳанӯз хисороти заминларзаи рӯзи 13-уми апрел ба пуррагӣ ҳисобот ва бартараф нагаштааст.

Ба гуфтаи расонаҳои ҳукуматӣ, бинобар фармони раисҷумҳур барои маълум кардани ҳаҷми хисорот ва кумакҳои фаврии зарардидагон як комиссияи ҳукуматӣ бо раҳбарии муовини сарвазири кишвар, Сулаймон Зиёзода ташкил шуда буд ва дирӯз кумакҳои озуқаворию ашёи хоҷагидорӣ ва масолеҳи сохтмонӣ ба осебдидагон равона шудааст.

Дар расонаҳои давлатӣ масолеҳ ва хӯрокиҳои фиристодашуда аз тарафи президент унвон мешаванд, вале ҳаҷми дақиқи ин кумакҳо ва кофӣ будани он барои зарардидаҳо мушаххас нест.

Аммо шаҳрвандон дар шабакаҳои иҷтимоӣ менависанд, ки кумакҳои дар ин ҳаҷм ба зарардидагони зилзила кофӣ нестанд ва ба ҳама зарардидагон то ҳол дастрас нагаштааст.

Ёдовар мешавем, ки субҳи рӯзи якшанбе, 13-уми апрел дар ноҳияи Рашт, қисмати шарқии Тоҷикистон заминларзаи шадид ба вуқуъ пайваст ва маркази заминларза 21 километр дуртар аз маркази ноҳияи Рашт дар ҳудуди Тоҷикистон рух дода, шиддати он дар марказаш 5.6 балл, дар минтақаи Рашт 4.5 балл ва дар шаҳри Душанбе 3 балро ташкил дода буд.

Бино ба иттилои расмӣ дар ноҳияҳои Рашту Тоҷикобод 94 хонаи истиқоматӣ пурра ва 50 хона қисман вайрон шуда, ба 61 хонаи дигар осеби сабук расида буд. Ҳамчунин 3 муассисаи таҳсилоти миёнаи умумӣ ва қариб 200 иншооти гуногун зарар дида, марги як кӯдаки хурдсол ва маҷруҳ шудани даҳҳо нафар сабт гардиааст.

Мулоқоти намояндагони Тоҷикистону Эрон

Аз ҷониби
AZDA-TV
-
0

Бо сафарҳои расмӣ Эмомалӣ Собирзода, вазири дифои Тоҷикистон ба Ҷумҳурии исломии Эрон рафту Алӣ Наҷафии Хушрудӣ, муовини аввали раисҷумҳури Эрон ба Тоҷикистон омад.

Гуфта мешавад, сафари Собирзода ба Эрон рӯзи 14-уми апрел аз шаҳри Шероз ва мулоқот бо Ҳусейналӣ Амирӣ, раиси вилояти Форс оғоз шуд.

Бино ба навиштаи расонаҳои эронӣ, Амирӣ дар мулоқот бо ин мақомдори тоҷик бар мушобеҳоти зиёди фарҳангии Эрон ва Тоҷикистон таъкид карда, бахшҳои ҳамкориҳои ду кишварро густурда хондааст.

Дар идомаи сафараш вазири дифои Тоҷикистон бо Абдураҳим Мусавӣ, фармондеҳи кулли артиш ва Азиз Носирзода, вазири дифои Ҷумҳурии исломии Эрон мулоқотҳои алоҳида намуда, ҷонибҳо бештар масъалаҳои тавсеаи ҳамкориҳо дар соҳаҳои дифоъ, амнит, мубориза бо терроризм, ифротгароӣ, қочоқи аслиҳа ва ҷиноятҳои созмонёфтаро баррасӣ кардаанд.

Инчунин Собирзода бо Алиакбар Аҳмадиён, дабири Шӯрои олии амнияти миллии Эрон гуфтугӯ намуда, Аҳмадиён аз равобити гарм ва бародаронаи ду кишвари ҳамзабон ва дорои собиқаи муштараки тамаддунӣ ва фарҳангӣ, сатҳи баланди равобити сиёсӣ, фарҳангӣ, иқтисодӣ, дифоӣ, илмӣ ва фанноварӣ ва амниятии ду кишвар гуфтааст.

Бояд гуфтаи Эмомалӣ Собирзода, ки 3 моҳи пеш ба ҷойи Шералӣ Мирзо вазири дифои кишвар таъйин шуда буд, бори аввал аст, ки ба ҳайси вазир ба Эрон сафари расмӣ анҷом медиҳад. Ва то ҳол расонаҳои ҳукуматӣ сафари ӯро пушиш надода, аз ҷузъиёти мушаххаси гуфтугӯҳояш бо мақомдорони Эрон чизе нанавиштаанд.

Дар пасманзари сафари ин мақомдори тоҷик ба Эрон, рӯзи 15-уми апрел як ҳайат таҳти роҳбарии муовини аввали раисҷумҳури Эрон Алӣ Наҷафии Хушрудӣ бо сафари кории се рӯза ба Тоҷикистон омаданд.

Дар доираи ин сафар Алӣ Наҷафии Хушрудӣ бо Сарвазир ва муовини якуми Сарвазир, вазирони корҳои хориҷӣ, рушди иқтисод ва савдо, энергетика ва захираҳои об, саноат ва технологияҳои нав мулоқот намуда масъалаҳои густариши ҳамкории Эрону Тоҷикистон дар соҳаҳои мазкурро баррасӣ хоҳанд кард.

Сафари намояндагони Тоҷикистону Эрон ба кишварҳои якдигар дар ҳоле сурат мегирад, ки мақомоти Тоҷикистону Эрон дар ин чанд соли ахир равобити печидае доштанд. Тира шудани муносибатҳои дипломатии ду кишвар аз зиндонӣ шудани Бобаки Занҷонӣ ва Қарзи “Барқи тоҷик” аз нерӯгоҳи “Сангтӯда-2”шуруъ шуда, бо бастани Ҳизби наҳзати исломии Тоҷикистон дар соли 2015 тиратар гашта буд.

Аммо соли 2019 пас аз сари қудрат омадани Иброҳим Раисӣ дар Эрон муносибатҳои ин ду кишвар нармтар шуд ва дар замони расиҷумҳурии Раисӣ миёни Тоҷикистону Эрон низоми бидуни раводид барои шаҳрвандони ду кишвар ҷорӣ шуд.

Инчунин дар моҳи январи соли равон сафари расмии Масъуд Пизишкиён раисҷумҳури нави Эрон ба Тоҷикистон баргузор шуд, ки дар он сафар 23 санади ҳамкории дуҷониба ба имзо расид ва дар ҷараёни он Форуми тиҷоратии кишварҳо дар Душанбе баргузор шуд ва маблағи зиёда аз 450 млн доллар санадҳои ҳамкорӣ имзо гардид.

Ҳамлаи Исроил ба бузургтарин беморхона дар Ғазза

Аз ҷониби
Azda TV
-
0

Исроил танҳо беморхонаи боқимонда дар Ғаззаро бо ҳамлаи мушакӣ тарконд. Дар пайи ин ҳамла 21 нафар, аз ҷумла кӯдакону занон кушта шуданд.

Ба иттилои расонаҳо, аз субҳи дирӯз то ин лаҳзаҳо дар пайи ҳамлаҳои ҳавоии Исроил ба хонаву паноҳгоҳҳо беш аз 30 нафар кушта шудааст.

Созмони Табибони бидуни марз бо нашри изҳороте гуфтааст, Исроил ягона беморхонаи фаъоли Ғазза бо номи “Ал-Аҳлӣ”-ро аз байн бурд ва дигар дар ин борика фаъолияте барои кумакрасонӣ ва наҷоти ҷони одамон боқӣ намондааст. Ин созмон гуфта, ки Исроил бо ҳамлаҳояш болои мардуми бегуноҳ Ғаззаро ба қабристон муубаддал кардааст.

Манобеъ мегӯянд, беморхонаи “Ал-Аҳлӣ” танҳо беморхонаи бузурги фаъол дар ин шаҳр ва дар ҳоли хидматрасонӣ ба маҷрӯҳону беморон буд.

Фодил Наим мудири беморхона мегӯяд, дар ҳамлаи Исроил ба онҷо 21 кас кушта шудаанд, ки чанде аз онҳо кӯдакони хурдсол буданд. Дар маҷмуъ бештар аз 100 нафар, аз ҷумла беморон, духтурону коргарон захмӣ шуданд.

Нерӯҳои дифоии Исроил иддао мекунад, ки онҳо дар ин амалиёт маркази фармондеҳӣ ва идораи тавассути ҲАМОС истифодамешударо задаанд дар ҳоле, ки ҳеҷ мадраке барои ин иддао ироа нашудааст.

Дар муқобил, ҲАМОС ин иддаоро, ки беморхона барои аҳдофи низомӣ истифода мешударо рад кардааст. Аммо Исроил аз оғози ҷанг бо баҳонаи вуҷуди низомиёни ҲАМОС тамоми мактабу идора ва беморхонаҳоро бомборон карда аз байн бурд.

Хабаргузории CNN мегӯяд, артиши Исроил амалиётҳои заминии худро ба умқи Ғазза густариш дода, даҳҳо ҳазор ғайринизомиро ба таври иҷборӣ дарёи Мадетирона муҳоҷир кардааст. Хеле аз сокинон барои дур мондан аз зарбаҳои мушакии Исроилӣ аз маҳаллаҳову биноҳои истиқоматӣ дур рафтаанд ва бар асоси гузоришҳо, баъзе сокинон ҳатто ба зуболадонҳо паноҳ бурда, онҷоро мақони истиқоматӣ интихоб кардаанд.

Бино ба иттилои Вазорати беҳдошти Ғазза аз оғози ҳамлаҳои Исроил дар 7-уми октябри соли 2023 то имрӯз беш аз 163 ҳазор фаластинӣ, ки аксари онҳо кӯдакон ва занон мебошанд, кушта ё маҷруҳ шуданд ва зиёда аз 14 ҳазор нафар зери овораҳо бенишон гаштаанд. Коршиносон яке аз роҳҳои ҳалли низоъҳо байни Исроил ва Фаластинро эътирофи ҷаҳонии Фаластин ҳамчун кишвари мустақил медонанд ва гуфта мешавад, то кунун наздики 150 кишвари ҷаҳон давлати Фаластинро эътироф кардаанд. Танҳо дар соли 2024 кишварҳои Ирландия, Норвегия, Испания ва Словения ба ин рӯйхат пайвастанд.

Хатсайри нави ҳавоӣ байни Тоҷикистону Қирғизистон

Аз ҷониби
AZDA.TV
-
0

Ба зудӣ байни Тоҷикистону Қирғизистон хатсайри нави ҳавоӣ кушода мешавад. Дар ин бора байни мақомоти дахлдори ду кишвар созишнома ба имзо расид.

Бино ба иттилои Агентии авиатсияи граждании назди Ҳукумати Тоҷикистон, рӯзи 15-уми апрел мулоқоти директори ин ниҳод бо Назарзода Ҳабибулло Темур бо Директори Агентии давлатии авиатсияи граждании назди Девони вазирони Қирғизистон Бостонов Данияр ва Директори генералии КД “Қирғизаэронавигатсия” Омуров Торокелди сурат гирифтааст.

Гуфта мешавад, ҷонибҳо дар ҷараёни мулоқот “масъалаи зиёд намудани шумораи парвозҳо дар хатсайрҳои Душанбе – Бишкек – Душанбе ва Хуҷанд – Бишкек – Хуҷанд”-ро баррасӣ кардаанд.

Ҳамзамон хабар дода мешавад, ки намояндагони ду кишвар санадҳои муҳимеро дар робита ба кушодани парвозҳои нав дар хастайри Душанбе – Иссик Кул ва Хуҷанд – Иссик Кул ба имзо расондаанд.

Инчунин гуфта мешавад, зимни ин мулоқот масъулон дар робита ба таҳкими “ҳамкориҳои дуҷониба оид ба бехатарии парвозҳо ва бехатарии авиатсионӣ, рақобатпазир намудани соҳаи авиатсияи гражданӣ” гуфтугӯ карданд.

Ба иттилои ин ниҳод, баъд аз анҷоми мулоқот байни ҷонибҳо “Ёддошти тафоҳум оид ба ҳамкорӣ байни Агентии авиатсияи граждании назди Ҳукумати Ҷумҳурии Тоҷикистон ва Агентии давлатии авиатсияи граждании назди Девони вазирони Ҷумҳурии Қирғизистон” ба имзо расид.

Шикояти як сарбози тоҷике, ки дар Украина қарор дорад

Аз ҷониби
AZDA-TV
-
0

Як зодаи Тоҷикистон аз он шикоят дорад, ки бо вуҷуди ба охир расидани шартномааш бо Вазорати дифои Русия, ӯро аз ҷанг дар Украина рухсатӣ намедиҳанд.

Ин сарбози тоҷик бо шарти зикр нашудани номаш 15-уми апрели соли ҷорӣ ба Azda.tv гуфт, ки ӯ моҳи феврали соли 2024 бо Вазорати дифои Русия барои иштирок дар ҷанги зидди Украин ба хотири ба даст овардани шаҳрвандии ин кишвар, шартномаи як сола баста буд.

Ба гуфтаи ӯ, ин шартнома дар моҳи феврали соли ҷорӣ ба охир расид, аммо бо гузашти ду моҳ ва навиштани даҳҳо ариза ва нома ба прокуратура ва Вазорати дифои Русия ба ӯ иҷоза надодаанд, ки аз минтиқаи ҷангӣ берун барояд ва ҳатто иҷозаи рухсатиро ба ӯ надодаанд.

Ӯ ҳамчунин таъкид кард, ки вазъи руҳияш бад асту чашми чапаш хуб намебинад ва маълумотнома (справка)-и духтур ва тавсифнома (характеристика)-и муовини фармондеҳи дастаи низомӣ (командири рота)-яшро ба даст овардааст, ки дар онҳо гуфта мешавад, ҳаққи идома ширкат дар ин ҷангро надорад.

Вале, ба гуфтаи худаш, бо вуҷуди ин ҳама ӯро маҷбур доранд, ки боз барои идомаи иштирок дар ҷанги зидди Украина бо шиносномаи русияш шартномаи нав бандад.

Ин зодаи Тоҷикистон мегӯяд, ки мисли ӯ чандин тоҷикистоние дар сафи қувваҳои мусаллаҳи Русия қарор доранд, ки барои гирифтани шиносномаи ин кишвар ба ҷанги зидди Украина рафта, бо вуҷуди ба охир расидани шартномаҳояшон онҳоро намегузоранд аз минтақаи ҷанг берун бароянд.

Гуфта мешавад, мақомоти Русия пас аз ҳамлааш ба Украина дар соли 2022 то кунун садҳо зодаи Тоҷикистонро ба ҷанг фиристодааст ва хабари марги чандин тани онҳо расонаӣ шуда буд. Ҳоло мақомоти Русия бар ивази иштирок дар ин ҷанг ба муҳоҷирон ва зиндониёни хориҷӣ шиносномаи ин кишвар ва озод шудан аз ҷавобгариро пешниҳод мекунанд.

Дар сурати гирифтани рад мақомомоти Русия муҳоҷиронро аз хоки ин кишвар меронанд ва ё бо зӯру фишор ба ҷанг мефиристанд.

Дар Тоҷикистон иштироки шаҳрвандон дар ҷанги дигар кишварҳо ҷиноят ҳисобида мешавад ва созмонҳои ҳуқуқиву сиёсӣ борҳо аз зодагони Тоҷикистон хоста буданд, ки ба фиреби мақомоти рус дода нашванду худро ба куштан надиҳанд.

1234...657саҳифаи 3 аз 657

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
24.1 ° C
24.1 °
24.1 °
53 %
2kmh
20 %
Tue
23 °
Wed
27 °
Thu
27 °
Fri
28 °
Sat
31 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст