Мурофиаи аввали рӯзноманигори боздоштшуда Завқибек Саидаминӣ, ки бояд имрӯз, 10-уми октябр дар Додгоҳи ноҳияи Исмоили Сомонии Душанбе баргузор мешуд, ба таъхир гузошта шуд.

Пайвандонаш дар суҳбат бо Радиои Озодӣ гуфтаанд, ки сабаби таъхири мурофиаи Завқибек Саидаминиро намедонанд ва додгоҳ низ қазияро шарҳ надодааст.

Пештар аз ин Ҳабиса Ятимова, модари ин рӯзноманигор дар суҳбат бо расонаҳо гуфта буд, ки се моҳ боз писарашро надидааст ва намедонад дар чӣ шароит қарор дорад.

Гуфта мешавад, нисбати Завқибек Саидаминӣ бо моддаи 307 қисми 2 парванда боз шуда буд ва ӯро мақомот дар ҳамкорӣ бо Ҳизби наҳзати исломии Тоҷикистон ва “Гурӯҳи 24” гумонбар медонад. Худи ӯ борҳо ин иттиҳомотро рад карда буд.

Мақомоти Тоҷикистон дар пайи як амалиёти махсус тобистони соли ҷорӣ чанд рӯзноманигор, аз ҷумла Абдуллоҳ Ғурбатӣ, ки ба 7.5 соли зиндон маҳкум шуд, Далери Имомалӣ, Абдусаттор Пирмуҳаммадзода, Завқибек Саидаминӣ ва чанд нафари дигарро боздошт карданд.

Мурофиаи аввали рӯзноманигори дигари тоҷик Далери Имомалӣ, рӯзи 7-уми октябр баргузор шуда, мурофиаи навбатӣ ҳафтаи ҷорӣ қарор аст баргузор шавад.

Бино ба иттилои манбаи Радиои Озодӣ, дар мурофиаи аввал аксари шоҳидон даъват ва пурсида шуданд.

Гуфта мешавад мақомот Далери Имомалиро ба соҳибкории ғайриқонунӣ, расондани хабари бардурӯғ ва узвият дар созмонҳои мамнуъ гумонбар медонад. Ин блогери шинохта дар бозпурсиҳо иттиҳомро қисман қабул кардааст.

Боздошти ин рӯзноманигорони тоҷикро созмонҳои ҳуқуқӣ ва ҳимояи рӯзноманигорон маҳкум карда, борҳо озодии бечуну чарои онҳоро аз Ҳукумати Тоҷикистон талаб карданд, вале мақомоти тоҷик мисли ҳамеша ин дархостҳоро нодида гирифт.

Додгоҳи шаҳри Душанбе волонтёр ва блогери зодаи Бадахшон Комёр Мирзоевро ба муҳлати 10 сол равонаи зиндон кард. Дар ин бора ба наздикони Комёри 34-сола вакили мудофеаш хабар додааст.

Пайвандони блогери зиндонӣ намедонанд, ки мурофиа кай ва дар куҷо баргузор шуда, Мирзоев маҳз ба чӣ гунаҳкор дониста мешавад. Мақомоти кишвар низ аз шарҳи ин қазия худдорӣ кардаанд.

Бино ба навиштаи рӯзноманигори шинохта Анора Саркорова, Комёр Мирзоев рӯзи 7-уми сентябри соли ҷорӣ дар Маскав аз назди боздоштгоҳи муваққати Марино аз сӯи мақомоти амниятии Тоҷикистон рабуда шудааст. Гуфта мешавад, ӯро рӯзи 5-уми сентябр маъмурони интизомии Русия бо дархости Вазорати корҳои дохилии Тоҷикистон ба боздоштгоҳи муваққати Марино бурда бурданд.

Додситонии байниноҳиявии Лефортовои шаҳри Маскав Комёр Мирзоевро, ки мақомоти Тоҷикистон дар ҷустуҷӯи байнидавлатӣ қарор дода буд, раҳо карда буданд. Мақомоти Тоҷикистон ин блогери зодаи Бадахшонро ба иштирок дар ташкилоти ҷиноятӣ (моддаи 187 қисми 2) муттаҳам кардаанд.

Ба гуфтаи наздикони Мирзоев, блогерро тахминан соати 21:00-и рӯзи 7 сентябр пас аз хондани қарор дар бораи радди истирдоди ӯ аз боздоштгоҳи муваққат раҳо кардаанд, аммо ӯ онҷо рабуда ва ба Тоҷикистон бурда шудааст.

Комёр зодаи шаҳри Хоруғ буда, дар шабакаҳои иҷтимоӣ бо номи Комчек Мирзоев маъруф аст. Ӯ чанд моҳи охир дар Маскав зиндагӣ мекард ва ба фаъолияти ҷамъиятӣ машғул набуд.

Гуфта мешавад, ӯ дар гирдиҳамоиҳои эътирозии моҳи ноябри соли 2021 ва моҳи майи соли ҷорӣ дар Хоруғ ширкат надошт ва инчунин дар бораи воқеаҳои ВМКБ ягон изҳороти сиёсӣ низ нашар накардааст

Пас аз ҳодисаҳои ахири Бадахшон, дар Русия даҳҳо тан аз зодагони ВМКБ рабуда ва ба Тоҷикистон истирдод ва ба солҳои тӯлонӣ равонаи зиндон шудаанд.

Мақомоти зиндонҳои Тоҷикистон Бузургмеҳр Ёров, адвокати шинохта ва маҳбуси сиёсиро пас аз 10 рӯзи дар утоқи ҷаримавӣ (ШИЗО) нигоҳ доштан, имрӯз раҳо кардаанд.

Ҷамшед Ёров, раиси Бунёди “Бузургмеҳр” дар суҳбат бо AZDA TV хабари раҳоии Бузургмеҳр Ёровро аз ШИЗО тасдиқ намуда, гуфт, ки кормандони зиндони нави шаҳри Ваҳдат бародарашро 10 рӯз пеш, барои ширкат накардан дар ҳозир-ғоиб (перекличка) ба утоқи ҷаримавӣ андохта буданд ва имрӯз, 07-уми октябр ӯро озод кардаанд.

Ҳуқуқшинос Ёров гуфт, ки вақте бародараш Бузургмеҳр Ёров дар китобхонаи маҳбас будааст “дарро касе қасдан қулф мекунад, аз ҳамин хотир ӯ наметавонад, ки аз он ҷо берун шавад ва дар “перекличка”-и маҳбусон ширкат кунад”. Кормандони зиндон инро баҳона карда, Бузургмеҳр Ёровро барои 10 рӯз ба ШИЗО интиқол доданд.

Ҷамшед Ёров сабаби интиқоли бародашро ба ШИЗО ба фаъолиятҳои Бундёди “Бузургмеҳр” ва иштироки аъзои он дар нишасти ҳуқуқи башари САҲА рабт дода мегӯяд, ки кормандони зиндон қасдан ӯро дар китобхоҳаи маҳкам карда, баъдан барои набудан дар ҳозир-ғоиби маҳбусон ҷазо додаанд.

Ба гуфтаи ин ҳуқуқшиноси тоҷик дар ин ду ҳафтае, ки нишасти САҲА дар Варшава мегузашт, ду маҳбуси сиёсии дигарро низ ба ШИЗО интиқол додаанд ва то дақиқ шудани ин хабар номи онҳо нашр намешавад.

Ёров мегӯяд, ки мақомоти кишвар бо ҷазо додани Бузургмеҳр Ёров ва дигар маҳбусони сиёсӣ ба мухолифону ҳомиёни ҳуқуқи тоҷик паём доданиняд, ки “агар дасти мо ба шумо нарасад, дастамон ба наздиконатон мерасад ва онҳо ба ҷойи шумо ҷазо хоҳанд гирифт”.

Адвокати шинохта ва маҳбуси сиёсии тоҷик Бузургмеҳр Ёров 28-уми сентябри соли 2015 баъди омодагӣ ба ҳимоят аз ҳуқуқи аъзои боздоштшудаи ҲНИТ дастгир ва дар ҷиноятҳои мухталиф, аз ҷумла қаллобиву сохтакорӣ ва таҳқири Президент айбдор шуд. Бар ин асос додгоҳ ӯро ба 28 соли зиндон маҳкум кард. Худи ӯ ва тарафдоронаш иттиҳомотро рад карда, ҳукмро дорои ангезаҳои сиёсӣ меноманд.

То ҳол кишварҳои ғарбӣ ва чандин созмонҳои ҳомии ҳуқуқи башар борҳо аз ҳукумати Тоҷикистон хостаанд, ки Бузургмеҳр Ёровро бидуни қайду шарте аз зиндон раҳо кунад, вале мақомоти кишвар дар ҳеч маврид дархости ниҳодҳои ҳуқуқии дунёро ба инобат нагирифтааст.