Имрӯз, 10-уми июни соли 2022 додгоҳи минтақаи Пшемишли Лаҳистон ҳукми истирдоди шаҳрванди 29-солаи Тоҷикистонро таъйид ва ба истирдоди ӯ раъй дод.
Ба гуфтаи Анвар Деркач, раиси Созмони “Рука и Допомоги+”-и Украина, ин шаҳрванди 29-солаи Тоҷикистон (ба хотири ҳифзи амнияташ номаш зикр намешавад) аз ҷониби мақомоти тоҷик ба иттиҳоми пайравӣ аз гурӯҳҳои ифротии ДИИШ ва Алқоида дар пайгард қарор дошт.
Анвар Деркач дар суҳбат ба Azda tv гуфт, ки имрӯз ӯ дар додгоҳ ширкат дошт, вале қозии додгоҳ шаҳодати ӯро ба эътибор нагирифт ва ба далелҳои дифоъии ӯ гӯш надод.
Ҷаноби Деркач мегӯяд, Созмони “Рука и Допомоги+” аз ҳуқуқи ин шаҳрванди Тоҷикистон дар Украина ҳимоят мекард ва мақомоти Украина ин шаҳрванди Тоҷикистонро бо дархости мақомоти Тоҷикистон боздошт карда буданд ва Додистони Украина ҳукми истирдоди ӯро содир карда буд ва баъд аз шикоят ба Додгоҳи Ҳуқуқи Башари Аврупо, ин додгоҳ монеъи истирдоди ин шаҳрванди Тоҷикистон гашт ва то замони ҳамлаи Русия ба Украина ӯ дар Украина ҳамроҳи зан ва ду фарзандаш зиндагӣ мекард.
Azda tv бо модари ин шаҳрванди Тоҷикистон ҳамсуҳбат шуд, (ба хотири ҳифзи амнияти онҳо ва пайвандонашон аз ин модар ба номи мустаори Сония ёд мекунем).
Хонум Соня дар суҳбат бо Azda tv гуфт, ки писараш мутаваллиди соли 1993 буда, Коллеҷи Ҳоҷи Камолро бо баҳои аъло хатм карда, сипас соли 2011 ба Донишгоҳи Химия-Фарматсевтии шаҳри Санкт-Петербурги Русия дохил шуда, то соли 2014 дар ин донишгоҳ таҳсил кардааст. Ва баъд аз мушкилоти иқтисодӣ донишгоҳро тарк карда, ба Туркия рафт, баъд аз кудетои нофарҷоми ҷонибдорони Фатҳулло Гулан дар ин кишвар ба хотири таъқиби шогирдони мактаби ӯ, писараш ба Украина истирдод мешавад ва дар Украина ҳамроҳи зану фарзандаш зиндагӣ дошт. Фарзанди дувумаш дар онҷо ба дунё меояд.
Модари ӯ мегӯяд, агар даъвои мақомот дуруст бошад, ки писари ӯ дар суфуфи гурӯҳои ифротӣ будааст, пас чӣ гуна дар ин замон ҳамсараш аз ӯ соҳиби фарзанд шудааст?
Хонум Соня мегӯяд, ӯ аз хонаводаи таҳсилкарда аст ва худаш низ дар донишгоҳи тибби Душанбе дарс хонда, хатмкарда Коллеҷи тиббӣ мебошад ва дар созмонҳои байналмилалӣ, аз ҷумла “Relief International” ва “Наҷоти кӯдакон” кор кардаст. Ӯ писарашро бегуноҳ ва иттиҳомоти эълоншуда алайҳи ӯро беасос медонад. Ин модари тоҷик аз ҳукумати Лаҳистон хоҳиш карда, ки додгоҳи одилона баргузор кунанд, то писараш ба Тоҷикистон истирдод нашавад. Ба гуфтаи ӯ, дар ҳолати истирдод ӯро дар Тҷоикистон ҳабси тӯлонӣ, шиканҷа ва ҳатто марг таҳдид мекунад.
Анвар Деркач аз қавли Потр Сура, вакили дифои ин шаҳрванди 29-солаи Тоҷикистон гуфт, ки додгҳи шаҳри Пшемишл ҳукми истирдоди ин ҷавони тоҷикро таъйид кард ва ба шаҳодати Анвар Дарчек гӯш надод ва инчунин ҳукми Додгоҳи Ҳуқуқи Башари Аврупо барои манъи истирдоди таҳти ҳимояи ӯ аз Украинаро ба эътибор нагирифт ва гуфт ҳамаи ин ҳукмҳо ва далелҳо марбут ба ҳузури маҳкумшаванда дар Украина мебошад ва мо тибқи шавоҳид ва далелҳои худ тасмим мегирем.
Ҷаноби Деркач аз он нигаронӣ дорад, ки додгоҳ бадтар шудани вазъи ҳуқуқи башар дар Тоҷикситон ва саркӯбҳои ахир дар Бадахшонро нодида мегирад. “Барои пешгирӣ аз истирдоди ин шаҳрванди Тоҷикистон бояд ба Додгоҳи Ҳуқуқи башари Аврупо шикоят бурд,- мегӯяд ӯ.
Ёдовар мешвем, ки ин боре аввал нест, ки кишварҳои аврупоӣ шаҳрвандони Тоҷикистонро истирдод мекунанд, пештар додгоҳе дар Утриш Ҳизбулло Шовализодаро ба Тоҷикистон истирдод карда буд ва ӯро дар Тоҷикистон ба 20 соли зиндон маҳкум карданд.
