Дар ҳамлаи имрӯзаи мақомоти қудратӣ алайҳи мардум дар маркази ноҳияи Рӯшон дасти кам ду нафар кушта ва 8 каси дигар захмӣ шудааст.

Субҳи имрӯз, 18-уми майи соли 2022 Вазорати корҳои дохилии Тоҷикистон эътирозгарони ноҳияи Рӯшонро ба “терроризм” муттаҳам карда, аз оғози амалиёти низомӣ алайҳи онҳо хабар дод.

Пеш аз ин Умед Ҷайҳонӣ, донишманди шинохтаи кишвар ва яке аз зодагони ВМКБ ба нақл аз манобеи худ хабар дода мегӯяд: “Даргирӣ субҳ соатҳои 7 ба вақти Душанбе сар зада ва то кунун идома дорад. Гуфта мешавад, ки нерӯҳои низомӣ аз чархбол ва минандозҳо мардумро гулӯлаборон мекунанд.”

Вазорати корҳои дохилии Тоҷикистон ҳам гуфтааст, ки ин ҳамла “бо мақсади таъмини амнияти шаҳрвандон, тартиботи ҷамъиятӣ ва барқарорсозии ҳаракати бемамониати воситаҳои нақлиёт тавассути шоҳроҳи байналмилалии Душанбе-Кулма дар қисмати роҳи ноҳияи Рӯшон аз тарафи мақомоти ҳифзи ҳуқуқи кишвар амалиёти зиддитеррористӣ оғоз гардид.”

Мақомоти қудратии Тоҷикистон пас аз он ки ба саркӯби шадиди эътирозгарон дар шаҳри Хоруғ муваффақ нашуданд, субҳи имрӯз дар макази ноҳияи Рӯшон “нерӯҳои интизомӣ хона ба хона гашта ҷавонҳоро боздошт мекунанд ва ба посгоҳи марзбонӣ ё милиса мебаранд.”

Вазорати корҳои дохилӣ ба хотири бузургнамоӣ ва аз ҳад зиёд нишон додани ҳаҷми ҳодисаҳои дирӯз дар ноҳияи Рӯшон эътирозгаронро “ҷинояткорон” гуфта, онҳоро муттаҳам карда, ки “бо дастгирии ташкилоти байналмилалии террористӣ силоҳу лавозимоти ҷангиро  берун аз ҳудуди ҷумҳурӣ дастрас карда, барои анҷом додани амалҳои террористӣ ва дигар шаклҳои иғвоангезӣ зархаридони хориҷиро ҷалб намуданд.“

Аммо манобеи мо мегӯянд, ки асли ин моҷаро он тавре, ки ВКД воҳима кардааст, рух надодааст. Мардуми мулкӣ дирӯз, 17-уми май дар маркази ин ноҳия ҷамъа шуда, ба хотири пешригӣ аз саркӯби шадиди эътирозгарон дар шаҳри Хоруғ, маркази маъмурии ВМКБ пеши роҳи корвони низомиёнро, ки ба хотири саркӯби эътирозҳо аз шаҳри Душанбе ба самти маркази маъмурии вилоят ҳаракат мекард, гирифта буданд. Аммо субҳи имрӯз мақомоти қудратии кишвар тамоми онҳоро “террорист” эълон карда, соати 7-и субҳ алайҳи ин мардуми осоишта дар маркази ноҳияи Рӯшон амалиёти ба гуфтаи ВКД “зиддитеррористӣ”-ро оғоз кардаанд.

Моддаи 29 Қонуни асосии Тоҷикистон мегӯяд:

“Шаҳрванд ҳуқуқ дорад дар маҷлис, гирдиҳамоӣ, намоиш, раҳпаймоии осоишта, ки қонун муқаррар кардааст, ширкат варзад. Ҳеҷ касро ба ин тадбирҳо маҷбуран ҷалб кардан мумкин нест.”

Аммо мақомоти Тоҷикистон ба ҳама гуна ҳамоишҳои эътирозӣ, ки ба нафъи ҳукумат набошанд, иҷозат намедиҳанд.

Бо ин вуҷуд, мавҷи ҷадиди эътирозҳои мардумӣ дар шаҳри Хоруғ, маркази маъмурии Вилояти Мухтори Кӯҳистони Бадахшон пас аз афзоиши боздоштҳои ғайриқонунӣ дар ин вилоят ба рӯзи 14-уми майи соли ҷорӣ шуруъ шуд. Эътирозгарон бо шумули Мамадбоқир Мамадбоқиров, сарҳанги мустаъфӣ ва яке аз раҳбарони мардумӣ барои баргузории гирдиҳамоиҳои худ ба мақомот ариза пешниҳод карда буданд, аммо мақомот ба онҳо иҷозати баргузории онро надоданд.

Эътирозгарон ба хотири баровардасозии талабҳои худ, аз ҷумла талаби истеъфои раиси вилоят ва раиси шаҳри Хоруғ, озодии боздоштшудаҳо ва ғайра хостанд тазоҳуроти худро баргузор кунанд, вале мақомот онҳоро “ҷинояткор”- ва “террорист” хонда, дар посух ба талабҳои онҳо бо тиру тӯп бар сари онҳо шилик карданд.

Эмомалӣ Раҳмон шаш моҳ инҷониб дар шаҳри Хоруғи Вилояти Мухтори Кӯҳистон Бадахшон бо Мамадбоқир Мамадбоқиров ҷанг эълон кардаву имрӯз Муҳаммад Боқириро дар шаҳри Душанбе ба ҳузур пазируфт.

Дирӯз, кормандони мақомоти қудратии Тоҷикистон дар шаҳри Хоруғ, маркази маъмурии Вилояти Мухтори Кӯҳистони Бадахшон (ВМКБ) Мамадбоқир Мамадбоқиров ва ҷамъе аз эътирозгарони бесилоҳро мавриди ҳамла қарор дода, як каси онҳоро куштаву дасти кам 6 нафари дигарро захмӣ карданд.

Инчунин кормандони мақомоти қудратии кишвар ба хотири рӯйпӯш кадани ҷиноятҳои худ ва бузург нишон додани ҳодиса на танҳо ба самти эътирозгарон оташ кушоданд, балки ба сӯи ҳамтоёни худашон низ як норинҷак партофта, се корманди Вазорати корҳои дохилиро ҳам маҷрӯҳ карданд.

Аммо имрӯз вазири мудофиаи кишвар дар шаҳри Душанбе бо Муҳаммад Боқирӣ “хатти тавлиди паҳподҳои Абобил 2”-ро ба хотири нерӯмандтар кардани сафи қувваҳои мусаллаҳи Тоҷикистон, саркӯби душман ва хатарҳои эҳтимолӣ мавриди баҳрабардорӣ қарор доданд.

Хабари таъсиси “хатти тавлиди паҳподҳои Абобил 2”-и эронӣ дар сархати хеле аз расонаҳои дунё қарор гирифт. Ин хабар то ҳадде масарратбахш буд, ки ҳатто хеле аз чеҳраҳои мухолифини Эмомалӣ Раҳмонро ҳам ба ваҷд оварду аз он истиқбол карданд.

Аз сӯйи дигар, бо вуҷуди он ки нимаи дуюми дирӯз, 16-уми май Вазорати коҳои дохилии Тоҷикистон пас аз он ки хостаҳои мардум ва талаби эътирозгарон дар шаҳри Хоруғро ба хушунат кашид, натавонист ҷомеаро қонеъ ва эътирозгаронро розӣ кунад. Ба ин хотир Интернетро қатъ карду ба самти мардум тир кушод.

Дар ҳамин рӯз бону Улфатхоним Мамадшоева, сокини шаҳри Душанбе ва Алим Шерзамонов, муқими Лаҳистонро ба ташкил кардани ин эътирозҳо айбдор кард. Инчунин ВКД онҳоро ба “терроризм” муттаҳам карду прокуратураи вилоятӣ ҳам аз оғози парвандаҳои ҷиноятӣ алайҳи онҳо хабар дод.

Вале нимаи дуюми имрӯз, дар шаҳри Душанбе дар Қасри миллат “Эмомалӣ Раҳмон Раиси Ситоди кулли Нерӯҳои мусаллаҳи Ҷумҳурии Исломии Эрон Муҳаммад Боқириро ба ҳузур пазируфт.”

Президенти Тоҷикистон дар суҳбат бо Муҳаммад Боқирӣ дар бораи масоили мавриди таваҷҷуҳи ду кишвар “бахусус дар соҳаҳои амниятӣ ва низомии техникӣ” гуфтугӯ кард. Аммо дирӯз, мақомоти қудратии зери раҳбарии Эмомалӣ Раҳмон Мамадбоқир Мамадбоқировро бидуни ҳукми суд “саркардаи гурӯҳи ҷиноятӣ” хонда, яке аз омилҳои бесуботкунандаи минтақа донистанд.

Мамадбоқир Мамадбоқиров, сарҳанг (полковник)-и мустаъфии мақомоти Тоҷикистон ва яке аз раҳбарони мардумӣ дар Вилояти Мухтори Кӯҳистони Бадахшон аст. Аммо Муҳаммад Боқирӣ, Раиси Ситоди кулли Нерӯҳои мусаллаҳи Ҷумҳурии Исломии Эрон мебошад.

Ҳар дуи онҳо, ҳамдину ҳамнажоду ҳаммазҳаб мебошанд, аммо чун яке аз мақоми ҳимоятҳои мардумӣ дар ВМКБ суҳбат мекунад, Эмомалӣ Раҳмон ба он пушт кардаву он дигаре чун аз мақоми расмии ба гуфтаи Президенти Тоҷикистон “кишвари ба ҳама маълум” гап мезанад, мавриди истиқболи ӯ қарор гирифтааст…

Ба ҷои хулоса, давлатҳои истибдодӣ ва ҳокимони золим огоҳони ҳақталаби мардумони худро “душманони сарсахт” медонанд, ва ба ҳамин хотир ҳар гоҳе ҷамъи кӯчаке ҳам агар аз байни мардум ҳуқуқи худро талаб кунанд, ин давлатҳои истидодӣ ва ҳокимони золим дарҳол онҳоро ба мисли режими Эмомалӣ Раҳмон “террорист”-у “экстримист” ва “душмани халқ” эълон карда, саркӯбу боздошт ва барои солҳои тӯлонӣ равонаи зиндон ва ё қатл мекунанд.

Ҷумҳурии исломии Эрон низ хуб медонад, ки дар Тоҷикистон ҳамагуна эътирозҳои мардумӣ тавассути мақомоти зери раҳбарии Эмомалӣ Раҳмон саркӯб мешаванд, ба хусус агар ин эътирозҳо дар Вилояти Мухтори Кӯҳистон Бадахшон баргузор шаванд, шиддати саркӯбҳо бештар мешаванд, аммо ин дафъа Эмомалӣ Раҳмон мехоҳад, ки бо силоҳу таҷҳизотҳои низомии ҷониби Муҳаммад Боқирӣ мардуми маҳаллиро дар Бадахшон бо шумули Мамадбоқир Мамадбоқиров на танҳо саркӯб кунад, балки агар лозим шавад, ҳамаи онҳоро аз байн бибарад.

Амруллоҳи Низом, махсус барои АЗДО тв