Алӣ Майсам Назарӣ, сухангӯи Ҷабҳаи муқовимати миллии Афғонистон пас аз чанд рӯзи инкор бо нашри эъломияе хабар дод, ки ҳайати ҶММ бо раҳбарони Толибон дар Эрон дидору гуфтугӯ доштанд.

Ин дар ҳолест, ки бо вуҷуди нашр шудани ахбори мулоқоти Толибон бо раҳбарони ҶММА дар тамоми расонаҳо, Алӣ Майсам дидори онҳоро расман рад мекард.

Сухангӯи Ҷабҳаи муқовимати миллӣ мегӯяд, ин дидор бо исрори зиёди Эрон ва Толибон сурат гирифт ва Амир Исмоилхон, собиқ волии Ҳирот дар раъси ҳайати Ҷабҳаи муқовимати миллӣ низ ҳузур доштааст.

Дар эъломия омада, ки Ҷабҳаи муқовимати миллӣ аз Толибон хостори ташкили ҳукумати воқеии исломӣ ва ҳамашумул, ки дар натиҷаи иродаи мардуми Афғонисон ба миён омада бошад, шуданд.

“Адолати иҷтимоӣ, навъи низом, ҳуқуқи шаҳрвандӣ, озодии баён, ҳуқуқ ва нақши воқеии бонувон, интихобот ва ҳаққи таъйини сарнавишти мардуми Афғонистон тавассути худашон, аз ҷумлаи аҳдоф ва мавзуоте буд, ки дар он нишаст аз сӯи ҳайати ҶММ ба унвони ҳаққи мардуми Афғонистон ёд гардид.”, омадааст дар эъломия.

Дар идома сухангӯи ҶММ иброз дошта, ки ин музокирот бенатиҷа анҷомид, чун пешниҳодоти онҳоро ҳайати Толибон напазируфтаанд.

Ба гузориши расонаҳо, ҳайати ҶММ дар баробари пешниҳодоти боло ҳамчунин аз Толибон хостанд, ки ҳафтаи Шаҳид – солгарди террори Аҳмадшоҳ Масъуд дар кишвар ба расмият шинохта шавад.  Ва дар ҳолати ба расмият шинохтани он Аҳмад Масъуд аз муқовимат даст кашида, бо Тлибон дар Аморати исломӣ мушоракат хоҳад кард.

Аммо сарпарасти Вазорати хориҷаи Толибон Амирхон Муттақӣ дар изҳороти ахираш аз натиҷаи ин музокирот гуфт, ки ҳайати Толибон аз сарони ҶММ хоста, ки ба унвони шаҳрвандони оддӣ метавонанд ба кишвар баргарданд ва Аморати исломӣ амнияти онҳоро таъмин хоҳад кард.

Вазири дифои Толибон аз Тоҷикистон ва Узбекистон хост, ки чархболҳои Афғонистонро баргардонанд ва сабри онҳоро имтиҳон накунанд.

Муло Муҳаммад Яқуб, сарпарасти Вазорати дифои Толибон дар маросими эҳёи фаъолияти чархболҳои нерӯи ҳавои Афғонистон суханронӣ намуда, бори дигар аз Тоҷикистон ва Узбекистон хост, ки чархболҳои Афғонистонро бозгардонанд ва сабри онҳоро имтиҳон накунанд.

“Мо эҳтиромона дархост мекунем, ки чархболҳо ва ҳавопаймоҳои низомиеро, ки халабонон бо онҳо фарор карданд,бозгардонанд. Сабри моро имтиҳон накнуед, сабри мо дар ҳоли лабрез шудан аст”, – мегӯяд сарпарасти Вазорати дифои Толибон.

Ӯ ҳамчунин дар идома афзуд, ки “дуруст аст, ки мо ҳоло заифем, ҳукумат дар ҳоли нав таъсисёбист ва то андозае номустақилем, аммо беғайрат нестем”.

Ин бори дуюм аст, ки Толибон бо сароҳат аз Узбекистону Тоҷикистон талаб доранд, ки чархболҳои низомии ин кишварро баргардонанд. Вале ин дафъа зоҳиран дархосташон ҷиддӣ аст. Аммо то ҳол мақомоти ин ду ҳамсоякишври Афғонистон посухи расмие надодаанд ва қазияи чархболҳоро ошкор накардаанд.

Гуфта мешавад, пас аз фирори Ашраф Ғанӣ аз Афғонистон даҳҳо нерӯҳои низомӣ ва халабонҳое, ки дар сафи нерӯҳои амрикоӣ кор мекарданд, бо чархболҳо ба Тоҷикистону Узбекистон фирор карданд. Ва чанде пеш шуморе аз халабонҳои афғоне, ки дар Тоҷикистон дар урдугоҳи махсус нигаҳдорӣ мешуданд ва аз вазъи худ шикоят карда буданд, ба Аморати Муттаҳидаи Арабӣ интиқол ёфтанд.