Имрӯз, 17-уми май Вазорати корҳои дохилии Тоҷикистон расман хабар дод, ки дар задухӯрди дирӯзаи мақомот бо мардум як сокини вилоят кушта ва се афсари интизомӣ захмӣ шудааст.

Дар баёнияи ВКД гуфта мешавад, ки гурӯҳе аз ҷавонони Хоруғ шаби 16-уми май бо “супориш”-и Маҳмадбоқир Маҳмадбоқиров ва “таҳти раҳбарӣ”-и сокини Хоруғ Замир Назришоев (ҷавони кушташуда) гӯё ба кормандони пулиси Бадахшон, ки дар бинои Суди вилоят қарор доштанд, ҳамла карда ва “норинҷаки дастиро таркониданд”.

Дар натиҷаи ин ҳодиса муовини сардори Раёсати корҳои дохилӣ дар Бадахшон Ғайратшоҳ Муборакшозода, корманди шуъбаи оперативии ВКД Шӯҳрат Қамишев ва фармондеҳи взводи таъйиноти махсус Абубакр Файзуллозода захмӣ шуда, дар бемористон бистарӣ шудаанд.

ВКД менависад, ки “ҳангоми зада гардонидани ҳамлаи мусаллаҳона Назришоев З.М. захмӣ гардида, дар бемористон ба ҳалокат расид”.

Аммо сокинони ин вилоят ба изҳороти ВКД бовар надоранд ва мегӯянд, ки Замир Назришоев аз тири мақомот ба ҳалокат расидааст на он ҳодисае, ки мақомот нақл мекунанд. Ҳамчунин ба маълумоти сокинони ин вилоят, дар даргирии мақомот бо мардум 6 нафар аз сокинони маҳаллӣ бо тири резинии мақомот захмӣ шудаанд.

Вазорати корҳои дохилӣ Маҳмадбоқир Маҳмадбоқиров, яке аз раҳбарони мардумии Бадахшон, Улфатхоним Маҳмадшоева, фаъоли ҷомеаи шаҳрвандӣ ва Алим Шерзамонов, муовини раҳбари Паймони Миллии Тоҷикистонро ба ноонром кардани авзоъ дар Бадахшон гунаҳкор кардааст.

Дар баёнияи ВКД гуфта мешавад, ки “нисбати саркардагони ин ҳодиса аз тарафи Прокуратураи ВМКБ парвандаи ҷиноятӣ оғоз карда шудааст”.

Аммо Алим Шерзамонов, муовини раҳбари ПМТ, ки дар Аврупо қарор дорад, дар суҳбат бо Azda.tv ин иттиҳомоти нисбаташ эълон шударо рад карда гуфт:

“Ба ҳайси як бадахшонӣ ва зодаи маҳз ҳамон минтақае, ки дар он Муҳаммадбоқир низ сукунат дорад ва инак чаҳор моҳ ҳаст, ки мавриди ҳамлаи шадиди иттилоотиву амниятӣ қарор гирифтаст, албатта бетараф буда наметавонам. Ҳамчун як шаҳрванд мавқеамро дар ҳимоят аз ташаббуси худи мардуми Бадахшон дар мавриди баргузории ин тазоҳурот иброз доштаам, вале ташаббускор ва ё ташкилкунандаи он набудаам ва нестам”.

Маҳмадбоқир Маҳмадбоқиров ҳам дар суҳбат бо Радиои Озодӣ иттиҳомҳои мақомот алайҳи худашро бепоя дониста буд.

Дар вокуниш ба баёнияи мақомот корбарони шабакаҳои иҷтимоӣ ва шахсиятҳои шинохта аз Улфатхоним Маҳмадшоева, фаъоли ҷомеаи шаҳрвандӣ ҳимоят карда, иттиҳомоти нисбати Машмадшоева эълоншударо беасос хондаанд.

Дар ҳоле ВКД-и Тоҷикистон аз захмӣ шудани се афсари ниҳодҳои интизомӣ хабар медиҳад, ки дар рӯзи аввали эътирозҳо 16-уми майи соли ҷорӣ аз захми шудани 6 сокини Бадахшон хабар нашр шуда буд.

Ёдовар мешавем, ки 14-уми майи соли ҷорӣ ҷамъе аз сокинони ин вилоят, ки теъдоди онҳо беш аз ҳазор нафар гуфта мешуд, барои додхоҳӣ ва талаби истеъфои раиси вилоят ва раиси шаҳри Хоруғ тазоҳурот баргузор карда буданд.

Мақомот тазоҳурот ва талаби онҳоро ғайри қонунӣ дониста, иштирокчиёни он гирдиҳамоиро ба “терроризм”-у “экстремизм” муттаҳам карда гуфта буданд, ки онҳоро аз 5 соли зиндон то ҳабси абад интизор аст.

Бино ба наворҳое, ки дар шабакаҳои иҷтимоӣ ва расонаҳо нашр шуд, рӯзи 16-уми май сокинони  Бадахшон баъд аз иҷро нашудани талаботҳояшон ба кучаҳо баромаданд. Мақомот барои пароканда кардани эътирозгарон сӯяшон тир кушод.

Дар ҳоли ҳозир мактабҳо ва дигар муассисаҳои шаҳри Хоруғ баста, интернет дар ин минтақа масдуд шудааст.

Дар даргириҳои имрӯз, ки дар шаҳри Хоруғ идома доранд, дасти кам шаш нафар бо тири резинии мақомот захмӣ шудааст.

Ҳамин лаҳзаҳо дар шаҳри Хоруғ, маркази маъурии Вилояти Мухтори Кӯҳистони Бадахшон ҳамлаҳои шадиди мақомот алайҳи эътирозгарони мусолиматомез идома дорад.

Ба гуфтаи Алим Шерзамонов, муовини раиси Паймони Миллии Тоҷикистон дар шарҳи ин ҳодисаҳо мегӯяд, ки “Интернет дар Хоруғ масдуд шуд. Ду нафар аз тири резинӣ захм бардоштаанд. Бархурди мардуми осоишта бо мақомоти мусаллаҳ идома дорад.”

Ба гуфтаи ин муовини Паймони Миллии Тоҷикистон, ки аксар ҳодисаҳои Вилояти Мухтори Кӯҳистони Бадахшонро пайгирӣ ва расонаӣ мекунад, “даргирӣ хеле шадид аст ва мақомот аз тир истифода мекунанд,” аммо ҳанӯз маълум нест, ки тамоми тирҳо резинӣ ҳастанд ё на?

Мақомоти Тоҷикистон расман то замони таҳияи ин хабар ҳодисаҳои Хоруғро шарҳу тавзеҳ надодаанд, аммо пойгоҳи иттилоърасонии “Памир Дайлӣ Нюс“, ки аксар ахбори ин вилоятро пайгирӣ мекунад, теъдоди захмиҳои имрӯзро дасти кам аз 2 то 6 нафар гуфтааст.

Инчунин ин пойгоҳи иттилоърасонӣ бо нашри як навор нишон медиҳад, ки дасти кам се мошини камаз пур аз нерӯҳои муссалаҳ бо суръати баланд барои рафта расидан ба ҷои ҳодиса дар дохили шаҳри Хоруғ ҳаракат мекунанд.  

Гуфта мешавад, 14-уми майи соли ҷорӣ ҷамъе аз сокинони ин вилоят, ки теъдоди онҳо беш аз ҳазор гуфта мешуд, бо ҳузури Мамадбоқир Мамадбоқиров барои додхоҳӣ ва талаби истеъфои раиси вилоя ва раиси шаҳри Хоруғ тазоҳурот баргузор карда буданд.

Мақомот тазоҳурот ва талаби онҳоро ғайри қонунӣ дониста, иштирокчиёни он гирдиҳамоиро ба “терроризм”-у “экстримз” муттаҳам карда гуфта буданд, ки онҳоро аз 5 соли зиндон то ҳабси абад интизор аст.