Ҷустуҷӯ кунед
Ҷустуҷӯ
-0.1 C
Dushanbe
Хона блог саҳифа 50

Боздоши ду муҳоҷири тоҷик дар Русия

Аз ҷониби
Azda TV 3
-
0

Дар ноҳияи Всеволожски вилояти Ленинград ду шаҳрванди Тоҷикистон бо гумони ҳамла ба як сокини маҳаллӣ боздошт шудаанд.

Тибқи иттилои мақомоти ҳифзи ҳуқуқ, шоми 25 август як ҷавони 20-сола, ки ба ҳайси кафшергар фаъолият мекардааст, ба пулис муроҷиат намуда, аз ҳамлаи ду нафар дар манзили иҷорааш хабар додааст. Ба гуфтаи ӯ, ду ношинос бо силоҳ ва корд ӯро таҳдид карда, маҷбур карданд, ки ба ҳисоби бонкии онҳо тақрибан 2000 рубл интиқол диҳад.

Кормандони милитсия ду ҷавони муҳоҷиро, ки шаҳрвандони Тоҷикистон гуфта мешаванд, дар ҷои ҳадиса боздошт мекунанд. Яке 18 ва дигарӣ 19 сол син доштааст. Дар ҷараёни кофтукоб аз онҳо ниқоби сиёҳ, як пистолети травматикӣ ва тирдон пайдо карда, мусодира шудааст.

Ба иттилои мақомоти тафтишотӣ, боздоштшудагон қаблан дар ҳудуди Русия қонуншикании ҷиноятӣ накарда будаанд.

Ин дар ҳолест, ки расонаҳо русӣ дар Маскав низ аз як ҳодисаи монанд хабар доданд. Гуфта мешавад, дар Маскав шаҳрванди 26-солаи Тоҷикистон бо корд ба кормандони пулис ҳамла карааст.

Гуфта мешавад, ҳамлагар аввал ду шиша бо моддаҳои оташзананда ба самти мошинҳои Вазорати корҳои дохилӣ ва ГБУ “Жилищник” партоб карда ва сипас ба пулис ҳамла кардааст.

Тавре тафтишот мегӯяд, эҳтимоли асосии ҳамла нафрати ӯ нисбати кормандони қудратӣ буда, акнун ӯро ба санҷиши равонӣ мебаранд.

Ба гуфтаи коршиносон, агар шахс ҳамчун муқрим шинохта шавад, барои ӯ аз 12 то 20 сол зиндон ё маҳкумияти абадӣ таҳдид мекунад.

Ҳодисаи боздошти тоҷикон дар ҳолест, ки чанд соли ахир вазъи муҳоҷирон дар Русия печида ва пур аз мушкилот аст. Ҳар гуна ҷиноят бо дастгирии муҳоҷирон боиси афзоиши фишор, нобаробарӣ ва хушунати иҷтимоӣ нисбат ба садҳо ҳазор муҳоҷири қонунӣ мешавад, ки барои пайдо кардани ризқу рӯзии худ ба ин кишвар муҳоҷир шудаанд.

Манъи рафту омади мошинҳо ва чарондани говҳо пеш аз сафари Раҳмон

Аз ҷониби
AZDA-TV
-
0

26-уми августи соли ҷорӣ, раисҷумҳури худкомаи Тоҷикистон Эмомалӣ Раҳмон зимни сафари корияш ба ноҳияҳои тобеи марказ роҳи Роғун-Обигарм-Нурободро ба истифода дод.

Бино ба иттилои расонаҳои ҳукуматӣ, роҳи нав бо дарозии 75 километр ва бо меъёрҳои сеюми техникии роҳсозӣ ва паҳноии стандартии 12 метр сохта шуда, шаҳри Душанберо бо ноҳияҳои Нуробод, Рашт, Сангвор, Тоҷикобод ва Лахш мепайвандад.

Илова бар ин, 14 пул бо дарозии умумии 1150 метр ва се нақб, аз ҷумла нақби “35-солагии Истиқлолият” (2605 м), “Ваҳдат” (1700 м), “Ориёно” (1600 м), ки роҳро барои сокинон тақрибан 24 километр кӯтоҳ менамоянд, сохта шудаанд.

Гуфта мешавад, ин роҳҳо аз соли 2021 дар се марҳилла бо маблағи 381 миллион доллар, аз ҷумла 110 млн $ гранти Бонки осиёии Рушд, 40 млн $ қарзи Фонди ОПЕК, 28,1 млн $ аз буҷети Тоҷикистон, 150 млн $ қарзи Бонки аврупоии Таҷдид ва Рушд ва 50 млн $ қарзи Бонки осиёии сармоягузории инфраструктурӣ, сохта шудаанд, вале дар хабарҳои нави ҳукуматӣ ин оморҳо оварда нашудаанд.

Мақомот ба истифодо додани роҳу нақбу пулҳоро ҳамчун қадами стратегии кишвар барои баромадан аз “бунбасти коммуникатсионӣ”, рушди савдои дохилӣ ва хориҷӣ, транзит, сайёҳӣ ва баланд бардоштани сатҳи зиндагии мардум муаррифӣ доранд.

Аммо сокинон дар суҳбат бо Azda.tv гуфтанд, ки роҳҳо пештар омода буданд ва муддате сокинон аз он истифода мекарданд, вале ҳудуди 1,5 моҳ то омадани президент ба мошинҳо иҷозаи ҳаракатро дигар надоданд ва аҳолӣ маҷбур буданд аз роҳҳои куҳнаву хатарнок истифода баранд.

Инчунин як сокини дигари НТМ ба Azda.tv аз маҳдудияти серӯзаи чаронидани чорво изҳори норозигӣ кард гуфт, ки “мақомоти маҳаллӣ бо баҳонаи он ки говҳо роҳро ифлос мекунанду намуди онро пеш аз ифтитоҳи тантанавӣ вайрон месозанд”, чунин маҳдудиятеро дар чанд рӯзи охир ҷорӣ кардаанд.

Ин бори аввал нест, ки сокинони кишвар аз ҷорӣ шудани маҳдудиятҳо зимни сафарҳои Раҳмонов ба минтақаҳои гуногуни Тоҷикистон шикоят доранд. Дар гузашта сокинон борҳо аз бастани роҳҳо, ба мардум надодани иҷозаи берун шудан аз хонаҳо, барои баргузории зиёфату ороиш ҷамъ намудани маблағ аз аҳолӣ ва ҷалби кӯдакон барои пешвози Эмомалӣ Раҳмон шикоят кардаанд.

Рустами Эмомалӣ ба Қазоқистон рафт

Аз ҷониби
AZDA-TV
-
0

26-уми августи соли ҷорӣ, раиси Маҷлиси милли Маҷлиси Олии Тоҷикистон ва шаҳрдори Душанбе Рустами Эмомалӣ бо сафари расмӣ ба шаҳри Остона сафар кард.

Дар доираи ин сафар Рустам дар назди маҷмааи “Муҳофизони Ватан” гулчанбар гузошта, бо роҳбари Сенати Қазоқистон Маулен Ашимбаев мулоқот кардааст.

Ҷонибҳо масъалаи рушди робитаҳои байнипарлумонӣ, ҳамкориҳои иқтисодиву тиҷоратӣ, инчунин соҳаи маориф, илму фарҳанг, масъалаҳои амнияти минтақавӣ ва обу иқлимро баррасӣ карда, соҳаҳои саноат, энергетика, кишоварзӣ, нақлиёт ва рақамисозии иқтисодро самтҳои афзалиятноки ҳамкорӣ гуфтаанд.

Маълум нест сафари шаҳрдори Душанбе дар Остона чанд рӯз идома хоҳад кард ва бо раисҷумҳури Қазоқистон мулоқот мекунад ё на.

Гуфта мешавад, сафарҳои кории Рустами Эмомалӣ ба Русия ва кишварҳои ҳамсоя хусусан тайи як соли охир зиёдтар шудааст. Таҳлилгарон зиёд сафар карданҳои ӯро ба наздик шудани интиқоли қудрат аз падар ба писар дар Тоҷикистон рабт медиҳанд.

Маош зиёд мешавад, аммо нархи маҳсулоту андозҳо чӣ?

Аз ҷониби
Azda TV 3
-
0

Бо фармони президенти Тоҷикистон, аз 1-уми сентябри соли 2025 маош, нафақа ва стипендияҳо дар кишвар зиёд мешаванд. 

Қарор аст аз 1-уми сентябр маоши ҳадди ақал дар Тоҷикистон ба 1000 сомонӣ расонда шавад, дар ҳоле, ки то имрӯз 800 сомонӣ аст.

Мувофиқи ин фармон, маоши кормандони соҳаҳои маориф, тандурустӣ, фарҳанг ва мақомоти давлатӣ аз 20 то 30% афзуда мешавад. Аммо, стипендияҳо ва нафақаҳо бошанд, мутаносибан 20% ва 10% зиёд мегарданд.

Ҳукумат ин иқдомро ҳамчун дастгирии иҷтимоӣ ва талош барои беҳтар кардани шароити зиндагии мардум муаррифӣ мекунад, аммо сокинон мегӯянд, ки ин афзоиш нисбат ба болоравии нархҳо ва таваррум қобили мулоҳиза нест.

Бо вуҷуди ин, бисёре аз омӯзгорон, табибон ва бознишастагон (нафақахӯрон) мегӯянд, ки ин маблағ то ҳол наметавонад хароҷоти рӯзмарраро пӯшонад. Дар пасманзари гароншавии нархи ғизо, маводи сӯзишворӣ ва хидматрасониҳо, маоши 1000 сомонӣ барои як оила ҳатто як ҳафта басанда нест.

Коршиносон бар ин назаранд, ки зиёд шудани маошу стипендияҳо бояд ҳамзамон бо ислоҳи низоми андоз, идораи таваррум ва коҳиш фасод сурат бигирад. Аммо дар Тоҷикистон бештар аҳамияти рамзӣ дошта, барои хок пошидан ба ҷашми мардум мебошад.

Эмомалӣ Раҳмон ба духтараш унвони нав дод

Аз ҷониби
AZDA-TV
-
0

Раисҷумҳури худкомаи Тоҷикистон Эмомалӣ Раҳмон ба духтараш Озода Раҳмон, ки раҳбари Дастгоҳи иҷроияи Президент мебошад, унвони фахрии “Корманди шоиста”-ро додааст.

Маросим ҷоизасупорӣ рӯзи 25-уми август дар шаҳри Душанбе баргузор гардида, дар маҷмуъ ба дусад нафар унвону ҷоизаҳои давлатӣ супурда шудааст.

Дар сомонаи расмии Президент гуфта мешавад, дар остонаи 34-умин солрӯзи истиқлоли Тоҷикистон 23 нафар бо унвони фахрии “Корманди шоиста”, 3 нафар бо ордени “Дӯстӣ”, 1 кас бо ордени “Шараф” дараҷаи I, 11 нафар бо ордени “Шараф” дараҷаи II, 107 кас бо медали “Хизмати шоиста” ва 7 нафар бо Ифтихорномаи Ҷумҳурии Тоҷикистон сарфароз гардидаанд.

Эмомалӣ Раҳмон дар миёни ин дусад нафар дар ҳоле ба духтараш унвони нав медиҳад, ки дар гузашта ба ӯ ордени “Шараф” (дараҷаи як), рутбаи мушовири давлатии адлия ва рутбаи дипломатии сафири фавқулода ва мухторро низ дода буд.

Ва ҷоизагирии ӯ ҳам дар ҳолест, ки чанде аз донишмандону ҳунармандон, ки дигарандешанду ба ҳукумат наздик нестанд, аз бетаваҷҷуҳӣ ва қадр нашудани хидматҳояшон шикоят доранд.

Озода Раҳмони 46-сола духтари дуввуми раисҷумҳур буда, аз соли 2016 раиси Дастгоҳи иҷроияи Президент, яъне падараш мебошад. Ӯ дар гузашта дар сафорати Тоҷикистон дар Амрико ва дар мақоми муовини вазири корҳои хориҷӣ низ кор карда, шавҳараш Ҷамолиддин Нуралиев замоне муовини аввали раиси Бонки миллии Тоҷикистон буд.

Ӯ ягона фарзанди Эмомалӣ Раҳмон нест, ки дар вазифаҳои баланди ҳукуматӣ кор мекунад. Аз ҷумла, писараш Рустами Эмомалӣ шаҳрдори Душанбе ва раиси Маҷлиси Олӣ, духтаронаш Рухшона Раҳмонова сафир дар Британияи Кабир ва Фарзонаи Эмомалии 27-сола сардори раёсате дар Вазорати тандурустӣ ва ҳифзи иҷтимоии аҳолии Тоҷикистон мебошанд.

Боздошти як блогер барои таҳқири Фирдавсӣ ва “Шоҳнома”

Аз ҷониби
Azda TV 3
-
0

Мақомоти Эрон нисбат ба Зайнаб Мусавӣ, блогери маъруфи танзпардоз, бо иттиҳоми таҳқири Ҳаким Абулқосим Фирдавсӣ ва “Шоҳнома” парвандаи ҷиноятӣ боз кардаанд.

Ба гузориши расонаҳои маҳаллӣ, ин блогер дар як навори видеоӣ бо истифода аз калимаҳои таҳқиромез ва мазҳакаомез “Шоҳнома” ва шахсияти Фирдавсиро масхара кардааст. Ин иқдом боиси вокуниши густарда дар ҷомеаи Эрон гардид. Устодон ва пажӯҳишгарони адабиёт гуфтаанд, ки чунин рафтор “беҳурматӣ ва таҳқири мустақим ба ҳувияти миллӣ” мебошад.

Аббос Солеҳӣ, вазири фарҳанг ва иршоди исломии Эрон дар робита ба ин ҳодиса изҳор дошт:
“Бархе мехоҳанд бо корҳои нодир ва баҳсбарангез машҳур шаванд. Фирдавсӣ ҳазор сол аст, ки бо “Шоҳнома”-и худ пояи ҳувияти миллии Эронро устувор кардааст ва бо чунин суханон аз бузургии ӯ ҳеҷ чиз кам намешавад”.

Ин баҳс дар Эрон дар ҳолест, ки дар Тоҷикистон “Шоҳнома”-и Ҳаким Фирдавсӣ бо харҷи миллионҳо доллар аз сӯи Ҳукумат бознашр шуда ва айни замон ба таври ройгон миёни мардум тақсим карда мешавад.

Қатар барои бунёди “Роғун” $50 миллиони медиҳад

Аз ҷониби
AZDA-TV
-
0

Қатар барои сохтмони Нерӯгоҳи барқии обии “Роғун” ба Тоҷикистон 50 миллион доллар қарзи имтиёзнок медиҳад.

Бино ба иттилои Вазорати молияи Тоҷикистон, дар ин маврид рӯзи 23-уми августи соли ҷорӣ дар Душанбе вазири молияи Тоҷикистон Файзиддин Қаҳҳорзода ва директори генералии Хазинаи Қатар дар мавриди рушд Ҳамад Ал-Сулайтӣ созишномаеро ба имзо расондаанд. Шартҳои созишнома айни ҳол ошкор нашудаанд.

Аммо Вазорати молия иддао кардааст, ки маблағҳо ба пешбурди лоиҳаи “Роғун” равона шуда, иҷрои он ба таъмини амнияти энергетикӣ ва афзоиши истеҳсоли нерӯи барқ барои бозори дохилӣ ва содирот мусоидат хоҳад кард.

Инчунин ҷонибҳо пас аз имзои созишнома, роҳҳои тавсеаи ҳамкориҳои дуҷониба ва иштироки минбаъдаи Хазинаи Қатар дар мавриди рушдро дар дигар барномаҳои муҳими давлатӣ баррасӣ намуданд.

Ҳайати ин хазина ҳамзамон бо раисҷумҳури Тоҷикистон Эмомалӣ Раҳмон мулоқот кардаанд.

Панҷумин ҳолати марги зодагони Бадахшон дар зиндонҳои Тоҷикистон

Аз ҷониби
AZDA-TV
-
0

Дар соли 2025 дар зиндонҳои Тоҷикистон панҷ маҳбуси сиёсии зодаи Вилояти Мухтори Кӯҳистони Бадахшон фавтидаанд.

Сомонаи “Pamir Inside”, ки бештар ҳодисаҳои Бадахшонро пӯшиш медиҳад, 24-уми августи соли ҷорӣ, аз марги Боғшо Иматшоеви 67-сола, ки ҳанӯз 25-уми феврали соли ҷорӣ дар беморхонаи вилоятии шаҳри Хуҷанд пас аз як моҳи кома вафот кардааст, хабар дод.

Бино ба иттилои манбаъ, рӯзи 26-уми январи соли 2025 фишори хуни Иматшоев дар зиндони рақами 3/5-и шаҳри Хуҷанд ногаҳон боло рафта, вазъи саломатияш бад шудааст. Аммо кормандони зиндон ёрии таъҷилиро пас аз чор соат даъват карданд, ки дар натиҷа, Иматшоев сактаи майна гирифта, ба кома афтодааст. Ӯ дар беморхона қариб як моҳ беҳуш буд ва сипас даргузашт.

Манбаъҳо гуфтаанд, ки пештар ӯ ягон мушкили ҷиддии саломатӣ надошт ва бад шудани ногаҳонии саломатиаш ғайричашмдошт буд.

Гуфта мешавад, Боғшо Иматшоев соли 2023 баъди бозгашт аз Русия аз ҷониби кормандони КДАМ дар Хуҷанд дастгир ва бо иттиҳоми ҳамкорӣ бо созмонҳои фаъолияташон мамнуъ ба шаш соли зиндон маҳкум шуда буд.

“Pamir Inside” мегӯяд, ки дар давраи саркӯбҳо дар ВМКБ (ноябр 2021 – июни 2022) Иматшоев дар пахшҳои зиндаи Ҳаракати сиёсии “Гурӯҳи 24” иштирок карда, дар мавриди рӯйдодҳо дар ин вилоят назарашро баён мекардааст.

Бояд гуфт, Боғшо Иматшоев панҷумин зодаи Бадахшон аст, ки дар соли ҷорӣ дар зиндонҳои Тоҷикистон мефавтад. Пештар аз ӯ расонаҳо аз марги Аслан Гулобови 35-сола, Кулмамад Паллаеви 50-сола, Эроншо Мамадраҳимови 39-сола ва Музаффар Давлатмиров 61-сола хабар дода буданд.

То ҳол мақомоти Тоҷикистон марги ин фаъолони зодаи Бадахшонро дар зиндонҳои кишвар шарҳ надодаанд.

Бори охир 8 созмони ҳуқуқи башарӣ дар изҳороте аз идомаи таъқибу фишори системавии мақомоти Тоҷикистон алайҳи помириҳо ва марги чанд тани онҳо дар зиндонҳои кишвар изҳори нигаронӣ карда буданд.

Ин созмонҳо гуфта буданд, ки шароити номусоиди зиндонҳо, набудани дастрасӣ ба ёрии тиббӣ ва марги зиндониён дар боздоштгоҳҳо мушкили системавӣ дар Тоҷикистон мебошад.

Инчунин аз давлатҳои ҳамсоя ва Русия хоста буданд, ки дар таъқибҳои байналмилалии шаҳрвандони Тоҷикистон ширкат накунанд ва аз кишварҳои ҳомии ҳуқуқ талаб карданд, ки алайҳи мансабдорони масъули таъқибҳо таҳрим ва манъи сафар ҷорӣ намоянд.

400 сомонӣ барои аксгирӣ аз Кохи Наврӯз

Аз ҷониби
Azda TV 3
-
0

Як корбари Фейсбук бо нашри навори видеоие шикоят карда, ки ҳангоме мехост аз Кохи Наврӯз акс ва наворбардорӣ кунад, аз ӯ 400 сомонӣ талаб кардаанд.

Ин корбар, ки мехоста барои таблиғи кишвари худ тавассути наворҳо саҳм гузорад, бо ҳайрат мепурсад: “Ман дар кишвари худам зиндагӣ мекунам, барои таблиғу рушди сайёҳӣ талош мекунам чаро бояд барои як аксу навор 400 сомонӣ пардохт кунам?”

Зери навори мазкур даҳҳо корбар вокуниш нишон додаанд. Яке аз онҳо менависад, ки “Ин зулм ва тасмими худсарона аст!”. Ин корбар аз муаллифи навор хоста, ки ин бедодгариро тариқи воситаҳои ахбори омма ба ҳама расонад. “…бигзор дар ин бора ҳама огоҳ шаванд, на танҳо дар интернет!”

Корбари дигар навиштааст: “Ба зудӣ барои ҳаво низ бояд пул бардохт кард”.

“Он бо пули буҷетӣ сохта шудааст — бо пули мардум. Пас чаро аз мо барои акосӣ пул мегиранд?” навиштааст як корбар дигар. 

Ин бори аввал нест, ки сокинон аз пулситонии бемаврид ва ғайриқонунии масъулон шикоят мекунанд. Чанд сол пеш низ расонаҳо дар бораи пулситонӣ барои истифоди “Лифт” дар яке аз беморхонаҳои кишвар гузориш дода буданд.

Ёдовра мешавем, ки Кохи Наврӯз соли 2014 бо ҳазинаи давлатӣ ва аз ҳисоби андозу маблағи шаҳрвандон сохта шудааст.

Дар Ғазза боз 4 рӯзноманигори дигар кушта шуд

Аз ҷониби
AZDA.TV
-
0

Бар асари ҳамлаҳои шадиди Исроил ба Хон-Юнуси Ғазза 4 рӯзноманигор, аз ҷумла наворбардорони шабакаи “Ал-Ҷазира” ва “Reuters” кушта шуданд.

Артиши Исроил субҳи рӯзи душанбе ба беморхонаи “Маҷмааи тиббии Носир” дар Хон-Юнус бо ҳавопаймоҳо ҳамлаҳои шадид анҷом дод. Бар асари ин ҳамлаҳо 15 фаластинӣ, аз ҷумла 4 рӯзноманигор кушта шуданд, ки аз яке аз онҳо зан буд.

Мувофиқи омори Идораи ҳукуматии рӯзноманигорон дар Ғазза, Исроил аз оғози ҷанг 244 рӯзноманигорро бо шумули ин 4 нафар, ки субҳи имрӯз мавриди ҳадаф қарор гирифтанд, дар ин борика куштааст.

Ба иттилои расонаҳои маҳаллӣ, артиши Исроил махсус ва ҳадафмандона ошёнаи 4-уми беморхонаи “Носир” ва чанд бинои дохили ин маҷмааро мавриди ҳадаф қарор дод. Тавре расонаҳо хабар медиҳанд, гурӯҳи наҷоти Кумитаи ҳолатҳои фавқуолодда барои аз зери овораҳо берун кашидани ҷасадҳо ва ё маҷруҳин талош доштанд, ки Исроил ҳамлаи дуюмашро бо ҷангандаи бесарнишин анҷом дод ва ин шумори ҷонбохтагону захмиёнро дучанд кард.

Аз ҷумла, гуфта мешавад, яке аз кормандони Кумитаи ҳолатҳои фавқулоддаи Ғазза дар ин ҳамла низ ҷони худро аз даст дод ва 7 корманди дигараш захмӣ шудаанд.

Ҳамлаи маргбори Исроил ба беморхонаи “Носир” дар ҳоле сурат мегирад, ки ҳуҷумҳои ҳавоӣ ва заминии артиши он ба Ғазза аз 7-уми октябри соли 2023 идома дорад.

Дар ҳамин ҳол Созмони ҳукуматии рӯзноманигорони Ғазза аз ҷомеаи байналмилалӣ ва созмонҳои ҳомии ҳуқуқи рӯзноманигорон хоста, ки ҷиноятҳои қатлу куштори бераҳмонаи Исроил дар Ғаззаро маҳкум кунанд ва ӯро ба ҷиноятҳои мақомоти ин кишварро ба додгоҳҳои байналмилалӣ бикашонанду муҷримонро ба чанги адолат супоранд.

Исроил аз 7-уми октябри соли 2023 бо кумакҳои кишварҳои абарқудрат болои мардуми Ғазза беамон аз замин ва ҳаво бомборон дорад. Мувофиқи оморҳои расмӣ, то кунун дар пайи ин ҳамлаҳои сангини Исроил 62 ҳазор нафар кушта ва 158 ҳазор фаластинии дигар захмӣ шудааст. Ва шумори онҳое, ки зери овораҳо монданду ё беному нишон гаштаанд, беш аз 10 ҳазор гуфта мешавад.

Ҳамлаҳои Исроил ба манотиқи Ғазза пас аз тасмимаш дар бораи ғасби комили ин борика шиддат ёфтаст. Ва ба ин далил вуруди обу ғизоро ба Ғазза ба таври куллӣ манъ карда, ки рӯзона аз гуруснагии шадид садҳо зану кӯдак ва пиронсол ҷон медиҳад.

1...495051...738саҳифаи 50 аз 738

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
fog
0.1 ° C
0.1 °
0.1 °
100 %
1kmh
100 %
Tue
2 °
Wed
7 °
Thu
8 °
Fri
13 °
Sat
13 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст