Президенти Украина Владимир Зеленский бомдоди рӯзи душанбе дар саҳифаи Твиттераш хабар дод, ки шаб бо раиси Комиссияи Аврупо Урсула фон дер Лейен дар бораи таҳкими иқтидори дифоии Украина, кумакҳои молиявӣ ва узвияти Украина дар ИА-ро баррасӣ карданд.
Також провів телефонну розмову з @vonderleyen. Обговорили конкретні рішення щодо підсилення обороноздатності України, макрофінансову допомогу та членство України в #ЄС.
Ҳайати музокиракунандаи Украина вориди хоки Белорус шудааст. Қарор аст музокироти намояндагони Маскав ва Киев тақрибан соати 12:00 ба вақти маҳаллӣ оғоз шавад. Дар ин бора роҳбари ҳайати Русия, ёвари Президент Владимир Мединский хабар дод.
Владимир Мединский, раҳбари ҳайти музокиракунандагони Русия
Бино ба иттилои “РИА Новости” намояндагони Киев бо каме таъхир, вале ба макони таъйиншуда пас аз лаҳзае мерасанд ва гуфтушуниди ҷонибҳо оғоз мешавад.
“Ҳоло мо маълумот гирифтем, ки онҳо тақрибан як соат пас мерасанд ва то соати 12 сари мизи гуфтушунид менишинем” гуфт ӯ.
Аз ин пеш Киев пешниҳоди Маскав дар мавриди гузаронидани гуфтушунид дар Минскро бо далели ин, ки нерӯҳои русӣ аз хоки Беларус ба Украина ҳамла мекунанд, рад карда буд.
Украина барои оғози музокирот бо Русия аз чанд шаҳри дигар дар ҳамсоякишварҳояш, аз ҷумла Варшава, Вилнюс, Будапешт ва Истанбул ном гирифта, гуфта буд, ки ба ғайр аз Минск омодааст, ки дар ҳар ҷои дигар бо Русия сари мизи музокирот бинишинад. Аммо баъдтар бидуни ҳеч пешшарти Маскав дар марзи Белорус бо Украина музокиротро пазируфт.
Ҳамзамон Исломҷон Саидов, намоядаи ПМТ дар Лаҳистон дар суҳбат бо АЗДО ТВ гуфт, ки ситод дар муддати ду рӯз беш аз 100 муҳоҷири тоҷик, узбек ва қирғизро, ки аз Украина ба хоки Аврупо паноҳ бурдаанд, кумак ва роҳнамоӣ намудааст. Ӯ афзуд, “ҳоло низ муҳоҷирони зиёде дар роҳ ҳастанд ва бо онҳо дар тамос ҳестем ва барои кумаки онҳо омодагӣ мебинем.”
Саидов мегӯяд, дар байни ин муҳоҷирон калонсолон ва кӯдакон зиёданд ва онҳое, ки шароит ва ҷойи зист надоранд, онҳоро бо мошинҳо ба хонаҳои дигар ҳамватанон бурда, бо ҷойи хоб таъмин карданд.
Ба гуфтаи намояндаи ПМТ дар Лаҳистон, Ситоди кумак ба муҳоҷирон шабонарӯзӣ фаъол аст ва ба ҳар муҳоҷири ниёзманд, ки дар Лаҳистон бе ҷои зист мондааст ва ё ниёз ба кумакҳои ҳуқуқӣ дорад, кумак карда истодаанд.
Ёдовар мешавем, ки бомдоди 24-уми феврал артиши Русия бо фармони Путин ба қаламрави Украина ҳамла кард, ки дар натиҷаи ҳамлаҳои пайдарпай садҳо нафар куштаву захмӣ шуданд ва даҳоҳазор нафар тарки ин кишвар карда истодаанд. Ҳукумати Лаҳистон эълон кард, ки аз аввали ҷанг то имрӯз беш аз 200 ҳазор нафар ба хоки ин кишвар паноҳ бурдаанд ва ҳазорҳо нафари дигар дар назди марзҳои Лаҳистон барои ворид шудан ба ин кишвар мунтазиранд.
Шоми шанбе Комиссияи Аврупо бо судури баёнияе бори дигар ҳуҷуми Русияро ба хоки Украина маҳкум намуда, аз фишори нави молӣ болои Маскав хабар дод.
Акс аз сомонаи “pymnts.com”
Кишварҳои Иттиҳоди Аврупо бо шумули Амрико ва Канада Бонки марказии Русияро аз дастрасӣ ба системаи ҷаҳонии паёмрасонии байнибонкии “SWIFT” қатъ кард.
Гуфта мешавад, ин бузургтарин иқдомест, ки Ғарб болои Русия пас аз оғози ҳамла ба Украина гирифта аст.
Ихроҷи Русия аз ин низоми молии ҷаҳонӣ пас аз дархости вазири хориҷии Украина Дмитри Кулеба сурат гирифт.
Раиси Комиссюни Аврупо Урсула фон дер Ляйен шоми шанбе гуфт, Ғарб ва Амрико бо берун кардани Русия аз низоми “SWIFT”, исдор ва ворид кардани колои русиро қатъ намуда, ҳисобҳои Бонки марказии Русияро мунҷамид ва саҳмияҳои русиро аз гардиши ҷаҳонӣ боз медоранд, ки ин зарбаи бузурги иқтисодӣ бар Русия ворид хоҳад кард.
Ёдовар мешавем, ки субҳи 24-уми феврал бо фармони Президенти Русия Владимир Путин ҳамлаи мушакӣ ба шаҳрҳои Украина оғоз шуд.
Пас аз оғози ҳамлаҳои низомии Русия ба Украина президенти ин кишвар Владимир Зеленски дар кишвараш вазъи ҳарбӣ эълон када, аз шаҳрвандонаш хост, ки ҳама дар хонаҳояшон бошанд. Ӯ инчунин тамоми парвозҳои ғайри низомиро бекор кард.
Путин иддао дорад, ки ин амалиёти ӯ дифоъ аз худ ва барои пешгирӣ аз таҳдидҳои бузургтаре аст. Аммо Амрико ва сарони кишварҳои арврупоӣ ин амалиёти низомии Русияро ҳуҷум ба хоки Украина дониста, аз Путин борҳо хостанд, ки ҳарчи сареъ амалиётро қатъ кунад.
Қосим Раҳбар, раиси шаҳри Ҳисор бо гузашти як ҳафта хомӯшӣ ахиран рӯзи 24-уми феврал доштани суратҳисоб дар Бонки Швейтсария бо маблағи беш аз 9 миллион долларо рад кард.
Акс аз “Азия-Плюс”
Ӯ дар суҳбат бо ҳафтаномаи “СССР” мегӯяд, ки чунин матлабе ҳанӯз 10 сол пеш дар хабаргузории “Центразия” нашр шуда буд ва аз дигарбора нашр шудани ин хабар аз оғози моҳи феврал огоҳӣ доштааст.
“Зеро 1 ҳафта пеш аз интишори он аз рақамҳои ношинос ба воситаи шабакаи Телеграмм ба аҳли хонавода, ба бародаронам дар Тоҷикистон, ҷияну бародарзодаам, ки дар Россия таҳсилу зиндагӣ мекунад, паёмҳои гуногун расида, тарафи номаълум пешниҳод медоданд, ки барои пешгирӣ аз нашри хабар ман ин қазияро ё шарҳ диҳам ё пешгирӣ намоям, вале ман ба ҳамаи ин аҳамият надодам, зеро чизе барои пинҳон кардан надораму аз касе ҳам наметарсам ва дар Швейтсария ҳам боре набудам,” – гуфт Қосим Раҳбар.
Владимир Зеленский, раисҷумҳури Украина субҳи 25-уми феврал дар як муроҷиатномаи видеоӣ аз шаҳрвандони кишвараш даъват кард, ки дифоъ аз худ ва Ватани худро аз ҳамлаҳои Русия идома диҳанд.
Ӯ аз Русия кишвари ғосиб ном бурда, шаҳрвандонашро барои ҳимояти кишвараш аз ҳамлаҳои низомӣ ташвиқ кард.
Ба гуфтаи раисҷумҳури Украина, дар рӯзи аввали ҷанг бо Русия 137 нафар укроинӣ бо шумули ҳарбиён ва мардуми мулкӣ кушта шуда, дастикам 316 нафар захмӣ шудаанд. Ӯ гуфт, дар як воҳиди марзбонӣ дар вилояти Одесса ҳамаи афсарону аскарони он дар ҷанг бо низомиёни рус кушта шуданд. Зеленский ҳамаи кушташудаҳоро қаҳрамонони Украина номид ва гуфт ҳама ҳарбиёни кушташударо бо унвони “Қаҳрамони Украина” сарфароз мегардонад.
Дар ҳамин ҳол, вай афзуд, ки “Украина маҷбур аст, танҳо аз худ дифоъ кунад, Русия ба таҳримҳои нав мутақоид нашуд то ҷангро бас кунад ва ҷаҳон аз дур нигоҳашро идома медиҳад.”
Зеленский дар идома бо боварӣ гуфт, ки дер ё зуд Русия маҷбур мешавад бо Украина вориди муколама шавад ва ҳар қадар зудтар ин гуфтугӯ оғоз шавад, талафоти худи Русия ҳамон қадар камтар мешавад.
Президенти Украина бомбаборони маҳаллаҳои истиқоматии шаҳри Киевро ба соли 1941 монанд кард.
Аз субҳи барвақти 24-уми феврал артиши Русия бо фармони Путин ба қаламрави Украина ҳамла мекунад. Гузоришҳо дар бораи тирборон ва бомбаборон кардани шаҳрҳои бузурги Украина вуҷуд доранд. Дар Донбасс, дар наздикии Харков ва дар Шимоли Украина, даргириҳо идома доранд.
Дар наздикии Киев, дар самти шимолу ғарб низомиёни украинӣ се пулро тарконданд, то гузариши нерӯҳои Русияро боздоранд. Дар ин бора хабаргузории “Украинская правда” бо такя ба манобеи худ аз Ситоди кулли Украина хабар додааст.
Шаби ҷумъа ба воҳиди марзии “Приморский посад” дар вилояти Запороже ҳамлаи мушакӣ сурат гирифт. Хабаргузории “Интерфакс-Украина” бо истинод ба Хадамоти давлатии марзбонии Украина хабар медиҳад, ки дар натиҷаи ин ҳамла марзбонон кушта ва захмӣ шудаанд.
Ҳамчунин СNN бо истинод аз манобеаш дар Пентагон хабар медиҳад, ки Русия то имрӯз 160 мушак ба Украина партоб кардааст.
Артиши Украина эълон кард, ки нирӯҳои украинӣ давоми рӯзи 24 феврал, рӯзи аввали набард ба зидди артиши Русия 30 тонк, 5 ҳавопаймо ва 6 чархболи артиши Русияро аз байн бурдаанд.
Русия дар бораи талафоти ҷонибҳо то ҳол хабари расмие надодааст, вале Алексей Арестович, яке мушовирони Дастгоҳи Президенти Украина дар бораи кушта шудани ҳудуди 450 нафар аз нерӯҳои Русия дар рӯзи аввали задухӯрдҳо хабар дод.
Дар Тоҷикистон наздики 90 дарсади сокинони аз 18-сола боло бар зидди COVID-19 эм карда шуданд.
Бино ба иттилои Вазорати тандурустӣва ҳифзи иҷтимоии аҳолии Тоҷикистон то 23 феврали соли равон беш аз 5 миллион сокини аз 18-сола боло дар кишвар алайҳи вируси COVID-19 эм карда шудаанд.
Валентина Матвиенко бо супориши Владимир Путин Эмомалӣ Раҳмонро дар Қасри миллат дар бораи ҳодисаҳои атрофи Украина огоҳ кард.
Субҳи имрӯз Президенти Тоҷикистон дар шаҳри Душанбе бо Раиси Шӯрои Федератсияи Маҷлиси Федералии Русия Валентина Матвиенко мулоқот кард.
Ба навиштаи хабаргузории давлатии Русия “Тасс”, Валентина Матвиенко, Раиси Шӯрои Федератсияи Маҷлиси Федералии Русия зимни ин мулоқот паёми Владимир Путин, Раиси Федератсияи Русияро ба Президенти Тоҷикистон Эмомалӣ Рамҳон расонидааст.
Расонаҳои давлатии Тоҷикистон дар бораи муҳтавои ин паёми Президенти Русия ба ҳамтои тоҷикистониаш дар хусуси ҳодисаҳои атрофи Украина бо сароҳат чизе нагуфтаанд, аммо “Тасс” менависад, ки хонум Матвиенко Раҳмонро огоҳ кард.
Сомонаи Президенти Тоҷикистон бидуни овардани номи кишварҳои даргир қораи Аврупо ва оғози ҳамлаҳои маргбори Русия ба Украина танҳо дар ҷумлаи охири гузориши худ гуфтааст: “Дар рафти вохӯрӣ, ҳамчунин доир ба авзои зудтағйирёбандаи сиёсии ҷаҳон, афзоиши низоъҳо дар баъзе минтақаҳо, вазъи сиёсии Афғонистон ва мубориза бар зидди хатару таҳдидҳои ҷаҳони муосир, табодули афкор сурат гирифт.”
Валентина Матвиенко пеш аз мулоқоти Эмомалӣ Раҳмон, раиси ҷумҳури Тоҷикистон бо Рустами Эмомалӣ, шаҳрдори Душанбе ва раиси Маҷлиси миллӣ ҳам мулоқот карда буд.
Гуфта мешавад, субҳи 24-уми феврали соли 2022 Русия ҳамлаҳои густурдаи низомии худро бар Украина оғоз кард ва то кунун ин ҳамлаҳо дар чанд ҷабҳа, аз он ҷумла ҷабҳаи низомӣ, иттилоотӣ ва гибридӣ идома доранд.
Ба гузориши Садои Олмон, мақомоти Украина теъдоди қурбониёни ин кишварро 137 нафар аз шаҳрвандони низомӣ ва мулкӣ эълон кардаанд ва инчунин гуфтаанд, ки дар ин набардҳо ҳудуди 800 низомии Русия низ кушта шудааст. Иттилое, ки то кунун мақомоти Русия онро таъйид ва ё такзиб накардаанд.
