Ҷамъе аз сокинони Вилояти Мухтории Кӯҳистони Бадахшон бо ирсоли як номаи боз ба Президент Эмомалӣ Раҳмон аз вай талаб кардаанд, ки раиси вилоят ва раиси шаҳри Хоруғро аз мансабҳояшон барканор кунад.

Дар ин нома, ки дар пойгоҳи телеграмии ‘‘Pamirdaylynews’‘ нашр шудааст, сокинон таъкид мекунанд, ки бо вуҷуд пароканда шудани иштирокчиёни гирдиҳамоии эътирозии сокинон аз майдони Исмоилии Сомонии шаҳри Хоруғ, боз шудани хиёбони марказӣ ва ба эътидол овардани тарбиботи ҷамъиятӣ мақомот ба ваъдаҳои худ амал намекунанд.

Дар ин нома сокинон таъкид мекунанд, ки раиси вилоят Алишер Мирзонаботов ва раиси шаҳри Хоруғ Ризо Назарзода намехоҳанд бо ҷомеаи шаҳрвандӣ ҳамкорӣ кунанд ва ба ваъдаҳои худ дар мавриди барқарор кардани алоқаи молибӣ ва интернет дар вилоят амал кунанд. Ва аз Президент хостаанд, ки раиси вилоят ва шаҳри Хоруғ ҳарду аз мансабҳояшон сабукдӯш шаванд.

Ин номаи сокинон ба Президент, ҳамчун кафили сулҳу оромӣ ва тазминкунандаи ҳуқуқҳои конститутсионии шарҳвандон дар Тоҷикистон ирсол шудааст. Онҳо мегӯянд, талаботи зиёде надоранд. Танҳо таъмини оддитарин ҳуқуқҳои худро талаб доранд. Ба ин хотир таъкид мекунанд, ки Эмомалӣ Раҳмон бояд ба хостаҳои онҳо расидагӣ кунад.

Дар ин нома ишора шудааст, ки бо вуҷуди пароканда шудани эътирозҳо, аммо вақте мақомот ба ваъдаҳои худ амал намекунанд, хабарҳое ба гӯш мерасад, ки эътирозгарон дубора ба майдон хоҳанд омад ва ҳамоишҳои эътирозӣ дубора оғоз хоҳанд шуд.

Ин нома дар ҳоле нашр шудааст, ки як назарсанҷӣ дар саҳфаи ‘‘Pamir News’‘ дар Фейсбук зери унвони “шумо розӣ ҳастед, ки раиси вилоят Алишер Мирзонаботов ва раиси шаҳри Хоруғ Ризо Назарзода аз мақомҳои худ барканор шаванд?”, 2744 нафар раъй дода, зиёда аз 97 дарсади ширкаткунандагон, яъне 2670 нафари онҳо гуфтаанд, ки бояд раиси вилоят ва раиси шаҳри Хоруғ аз вазифаҳои худ барканор шаванд ва танҳо 2,8% раъйдиҳандагон, яъне 74 каси онҳо қайд кардаанд, ки набояд онҳо аз вазифаҳояшон барканор шаванд.

Кормандони комиссариати ҳарбии шаҳри Панҷакент бо вуҷуди ба охир расидани муҳлати даъват ба артиш, дохили донишкадаҳо шуда, донишҷӯёнро аз дарс гирифта, зӯран ба артиш мебаранд.

Ҷамшед Ҳабиб, як корбар бо нашри наворе дар шабакаи иҷтимоии Фейсбук навишта, ки кормандони комиссариати ҳарбии шаҳри Панҷакент сухани муаллимонро итоат накарда, донишҷӯёнро аз дохили донишкада омада мебаранд.

Ин корбар аз рӯзноманигон ва зиёиён гила карда, ки чунин беқонуниро расонаӣ намекунанд.

“Панҷакенте, ки чандин журналисту зиёи дорад, аммо донишҷӯро омада аз даруни донишкадааш гирифта мебаранд, дигар будани он журналисту ба ном зиёи чӣ лозим? Ҳатто гапи муаллимаро касе гуш намекунад. Прократураи ҳарбӣ ба доди касе намерасад”, – менависад, Ҷамшед.

Ҳамзамон бино ба иттилои расонаҳо дар ноҳияи Абдураҳмони Ҷомӣ аз мудирони мактаб ва дигар муассисҳо талаб доранд, ки ҳар нафари онҳо як ҷавонро барои хидмат ба артиш биёранд. Масъулони ноҳия низ тасдиқ кардаанд, ки аз ҳама мудирон хоста шуда, ки фарзандони худро ба хидмат равона кунанд.

Ин дар ҳолест, ки даъвати тирамоҳии ҷавонон ба артиш аз дирӯз 30-уми ноябр ба охир расидааст. Вазорати дифои кишвар ҳам бо ба охир расидани муҳлати даъвати ҷавонон ба атриш то имрӯз гузорише ироа накардааст.

Дар гузориши қаблии вазорат, ки 2-уми ноябр нашр гардида буд, гуфта мешуд, ки бо гузашти як моҳ аз оғози даъвати тирамоҳии шаҳрвандон ба хизмати ҳатмии ҳарбӣ нақшаи даъват дар тамоми ҷумҳурӣ наздики 70% иҷро шудааст.

Баъзе сокинон аз вилояти Хатлон ба Аздо тв гуфтанд, ки баъзан муҳлати даъват ба охир мерасад, аммо кормандони комиссариатҳои ҳарбӣ то як ҳафтаи дигар барои ҷайби худашон “шикор” мекунанд ва касе ҳам пеши роҳи онҳоро намегирад.

Гуфтанист, ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хидмат аз артиш мегурезанд ва мақомот бо тарзи маҷбурӣ ё “облава” ҷавононро ба артиш сафарбар мекунад, ки ин амали мақомдорон ҳамеша дар ҷомеа мавриди баҳс қарор мегирад.