Додгоҳи вилояти Мухтори Кӯҳистони Бадахшон як сокини ноҳияи Дарвози Тоҷикистонро бо ҷурми ҳамкорӣ бо гурӯҳи “Толибон” гунаҳкор дониста барои 15 сол равонаи зиндон кард.

Бино ба навиштаи Радиои Озодӣ, ин сокини ноҳияи Дарвоз Суҳробҷон Вазиров ном дошта, рӯзи 19 марти соли ҷорӣ додгоҳи ВМКБ ӯро бо ду банди Кодекси ҷиноятии Ҷумҳурии Тоҷикистон, яке “ҷалб кардан барои содир намудани ҷиноятҳои хусусияти террористидошта” ва дуюмӣ “даъвати оммавӣ барои содир намудани ҷиноятҳои хусусияти террористидошта” гунаҳкор донистааст.

Ҳамзамон дар пайи боздошти Суҳробҷон низ ду сокини ҳамин ноҳия барои “хабар надодан”, бо пардохти 30 ҳазор сомонӣ муҷозот шудаанд. Аммо наздикони ни ду муҷозотшуда аз ҳукми додгоҳ норозӣ буда онро “ноодилона” хондаанд.

Ба навиштаи манбаъ, дар ҳукми додгоҳ гуфта шудааст, Сӯҳробҷон Вазиров, сокини 44-солаи ноҳияи Дарвоз, давоми ду соли охир бо роҳбари Толибон дар ноҳияи Нусайи Афғонистон, Ҷумъа валади Талбон, тамоси телефонӣ дошта, “мавқеъгирии нерӯҳои ҳукуматии Афғонистонро, ки аз ҷониби Тоҷикистон намоён аст, ба ҷангҷӯёни ҳаракати Толибон хабар медод”.

Боздошти сокинони дарвоз дар ҳолест, ки ҳаргоҳе мақомот аз наздик шудани ҷангиёни гурӯҳи “Толибон” ба марзи Тоҷикистон бонги хатар мезананд.

Вазири умури хориҷаи Шветсия ва ҳамзамон раиси Созмони амният ва ҳамкорӣ дар Аврупо хонум Анн Линде бо сафари корӣ дар Душанбе карор дорад.

Бино ба иттилои хабаргузории “Спутник” вазири умури хориҷаи Тоҷикистон Сироҷиддин Муҳриддин бо вазири умури хориҷаи подшоҳии Шветсия ва раиси амалкунандаи САҲА хонум Анн Линдеро, ки бо сафари корӣ дар Душанбе қарор дорад дидору гуфтугӯ намуд.

Тибки иттилои дафтари матбуоти вазорати умури хориҷаи Тоҷикистон дар ҷараёни мулоқот доираи васеи ҳамкориҳои дуҷониба ва бисёрҷониба бо Шветсия инчунин ҳамкорӣ дар чаҳорчуби САҲА мавриди баррасӣ карор гирифтанд.

Ҳамзамон гуфта шуда, ки ҷонибхо ҳамчунин вазъро дар минтака ва Афғонистон баррасӣ намудаанд. Ҷонибҳо масъалаҳое чун таъсири бемории “Covid-19” ба иқтисодиёт, тағйирёбии иқлим, мубориза алайҳи терроризму ифротгароӣ, гардиши ғайри қонунии маводи мухаддир ва киберҷиноятҳоро баррасӣ кардаанд, омадааст дар иттилоия.

Сироҷиддин Муҳриддин зимни ин мулоқот зикр намуда, ки Тоҷикистон САҲА-ро ҳамчун платформаи муҳим барои муколамаи созанда медонад ва барои тавсеаи муносибот бо Созмон дар доираи ҳарсе ченак низомӣ-сиёсӣ иктисодӣ -муҳити зистӣ ва инсонӣ ҳавасманд мебошад.

Ҳамзамон қайд шуда, ки дар доираи муносиботи дуҷониба тарафайн омодагии худро барои истифодаи имкониятҳои фаровон ҷиҳати густариши ҳамкориҳо дар соҳаҳои иқтисодӣ ва тиҷорат энергетика, маориф, амният, саёҳӣ ва тағйири иқлим изҳор доштанд.

Ёдрас мешавем, ки Тоҷикистон моҳи феврали соли 1992 санади хотимавии Хельсинкиро имзо кард.

Ҳамкории Тоҷикистон бо Созмони амният ва ҳамкорӣ дар Аврупо (САҲА) аз соли 1994 оғоз гардид. Намояндагии САҲА дар Тоҷикистон 17 феврали соли 1994 ифтитоҳ гардид. Қарор оид ба таъсиси миссияи САҲА дар Тоҷикистон ҳанӯз 1 декабри 1993 зимни мулоқоти шӯрои вазирони корҳои хориҷии САҲА дар Рим қабул гардида буд.

Дафтари САҲА дар ҳошияи ёддошти тафоҳум бо Тоҷикистон дар асоси се ченаки мушаххас шуда: низоми-сиёсӣ, иктисодиву экологӣ ва инсонӣ лоиҳаҳои гуногун амалӣ мекунад.

Прокуратураи генералии Тоҷикистон алайҳи як ташкилоти перамидаи молиявӣ, ки ба қавли ин ниҳод дар кори онҳо ҷиноятӣ қаллобӣ ва фиреби мардум ошкор гардидааст, парванда боз намуда, намояндагони онро ҷустуҷӯ дорад.

Бино ба маълумоти Прокуратураи генералии Тоҷикистон ин ташкилот бо номи ҶДММ “Тозакор” сабт шуда, дар шакли перамидаи молиявӣ дар шаҳри Душанбе, вилояти Суғд ва вилояти Хатлон фаъолият мекардааст.

“Тафтишот муайян кард, ки ин гурӯҳи ҷиноятӣ худро намояндаи ташкилоти хориҷии ҶДММ “Аффинаж” (Ltd”Affinage”), ки гуё бо ташкилотҳои ба истихроҷ, нигохдошт, коркард ва фурӯши нафт, газ, тилло ва дигар ашёи хом машғул буда ҳамкорӣ дорад, муаррифӣ намуда, бо ваъдаи додани фоидаи калон барои маблағгузорӣ ба ҶДММ “Аффинаж” зиёда аз 300 нафар шаҳрвандонро ҷалб намуда, аз онҳо дар ҳаҷми аз 100 то 4000 доллари ИМА ба суратҳисоби бонкҳои берун аз кишвари худ ба маблағи умумии зиёда аз 150 000 доллари ИМА гузаронидаанд”.

Гуфта мешавад, айни замон 2 нафар аз аъзои ин гурӯҳ дастгир шуда, ҷустуҷӯи дигар нафарон идома дорад.

Ҳамчунин Прокуратураи генералии кишвар аз шаҳрвандон хоста, ки ҳарки дар натиҷаи фаъолияти ғайриқонунии ҶДММ “Аффинаж” (Тозакор) зарари моддӣ дидаанд ё ин ки оид ба фаъолияти ғайриқонунии ин гурӯҳи ҷиноятӣ маълумот доранд, метавонанд ба Прокуратураи генералии ҶумҳурииТоҷикистон муроҷиат намоянд.