Қирғизистон иддао дорад, ки Тоҷикистон дар назди маркази обтақсимкунии “Головной” – яке аз нуқтаҳои баҳсии марз, хандақҳои бетонӣ месозаду сокинони Исфара исбот карданд, ки қирғизҳо пеш аз тоҷикон ба кандани хандақҳо оғоз кардаанд.
Эҳтимол Афғонистонро як Шӯро бо раҳбарии Толибон идора кунад
Ба эҳтимоли зиёд идораи Афғонистон дар рӯзҳои наздик бо ташкили як шӯро, ки раҳбаряшро Толибон бар уҳда доранд, ба дасти ин ҳаракат хоҳад гузашт. Аммо собиқ мақомдорони афғон аз ин розӣ нестанд.
Бино ба гузориши телвизиони Тулуъ, Толибон гуфтаанд, ки мумкин Афғонистон аз сӯи як Шӯро раҳбарӣ шавад. Ваҳидуллоҳ Ҳошимӣ, яке аз аъзои баландпояи Толибон ба хабаргузории “Ройтерз” гуфта, ки ин шӯро тасмимгиранда хоҳад буд ва аз сӯи Мулло Ҳайбаттулоҳ Охундзода, раҳбари Толибон идора хоҳад шуд.
Ин мақоми Толибон таъкид дошта, ки раиси шӯро Мулло Ҳайбаттулоҳ Охундзода мешавад, “ӯ раҳбари мост, раҳбари мазҳабӣ ва ҳамчунин сиёсати бахше аз дини мост, аммо ӯ нақши раисҷумҳурро бозӣ намекунад, нақши барҷастатареро ифо мекунад. Шояд муовини ӯ нақши раисҷумҳурро бозӣ кунад”.
Дар Афғонистон талошҳо барои эҷоди як ҳукумати қонунӣ идома дорад, рӯзи 19 август 102-умин солгарди истиқлоли ин кишвар буд. Расонаҳои маҳаллӣ бо нашри наворҳое хабар доданд, ки мардуми Кобул бо ташабуссҳои худ дар кӯчаҳои ин шаҳр парчами серангаи давлатиро бардошта дар кӯчаҳои шаҳр гаштанд ва аз Толибон хостанд, ки ҳурмати парчами Афғонистонро пос доранд. Ва онро ҳамчун парчами давлати оянда бипазиранд. Аммо дар мавриди вокуниши Толибон дар ин хусус то ҳол чизе нашр нашудааст.
Инчунин гузоришҳо нашр шуд, ки садҳо тан аз шаҳрвандони Афғонистон дар вилоятҳои Нангарҳор, Кунар ва Хуст барои гиромидошти парчами ин давлат роҳпаймоӣ карданд, аммо ин роҳпаймоиҳо дар Ҷалолобод ба хушунут кашида шуд ва дар натиҷаи тирандозии Толибон се нафар ҷон бохт. Дар умум 16 нафар бо сабаби ҳамли парчам ҷон бохтааст.
Толибон дар ҳоле аз ташкили Шӯрои рабарикунанда мегӯянд, ки дар Панҷшер Ҷабҳаи дувуми муқовимати миллии Афғонистон бар зидди Толибон бо раҳбарии Аҳмад Масъуд, писари Аҳмадшоҳ Масъуд ва собиқ муовини аввали раисҷумҳур Амруллоҳ Солеҳ шакл гирифтааст.
Ба гузориши “The Washington Post“, Аҳмад Масъуд гуфта, ки “Набарди муқовимати муҷоҳидин дар баробари Толибон акнун оғоз мешавад, аммо мо ба кумак ниёз дорем.”
Аҳмад Масъуд ба ҳайси раҳбари Ҷабҳаи муқовимати миллӣ мегӯяд, аз Панҷшер ба унвони охирин сангар аз озодии Афғонистон дифоъ хоҳанд кард. “Азмамон росих аст ва бинобар таҷриба медонем чи чизе дар интизорамон аст. Аммо мо ба силоҳ, муҳиммот ва манобеи бештаре ниёз дорем”, – афзудааст ӯ.
Ҳамчунин Аҳмад Масъуд иброз дошта, ки баъд аз эълони ташкили Ҷабҳаи муқовимат бар зидди Толибон садҳо аъзои собиқи нерӯҳои вижаи артиши Афӯонистон ба онҳо пайвастаанд. Аммо ин ҳамаро нокфӣ медонад ва аз Амрико ва муттаҳидонаш хоста, ки ба ӯ ва нерӯҳояш кумакҳои низомӣ бирасонанд, то битавонанд дар баробари Толибон муқовимат кунанд.
Дар ҳамин ҳол Бисмиллоҳ Муҳаммадӣ, собиқ вазири дифои Афғонистон бо баъзе шартҳо сулҳ бо Толибонро имконпазир медонад. Ӯ дар ҳисоби шахсияш дар Твиттер навишта, ки “ба як шарт бо Толибон кори муштарак мекунем: парчам, Қонуни асосӣ ва суруди миллӣ хатти сурхи мост. Дар сурате, ки Толибон бипазиранд, мо омода ҳастем ҳукумати муштарак бо Толибонро бипазирем”.
به یک شرط با طالبان کار مشترک میکنیم
پرچم، قانون اساسی و سرود ملی خط سرخ ماست، در صورتیکه طالبان بپذیرند ما آماده هستیم حکومت مشترک با طالبان را بپذیریم. pic.twitter.com/3KnqzGmfsr— Genral besmullah mohammadi (@Gbesmullahm) August 19, 2021
Вазъи вахим дар фурӯдгоҳи Кобул
Баъд аз тасаллут ёфтани Толибон бар шаҳри Кобул, иддае аз давлатҳои ғарбӣ дар баробари ихроҷи депломатҳояшон эъломи омодагӣ карданд, ки афғонҳое, ки бо онҳо ҳамкорӣ кардаанд ва ҷонашон дар хатар аст, дар кишварҳои худ паноҳ медиҳанд.
Расонаҳои Афғонистон хабар медиҳанд, ки аз рӯзи душанбе 16 август то имрӯз дар назди сафоратхонаҳо ва фурӯдгоҳи Кобул бо вуҷуди бархурди тунди нерӯҳои Толибон ва амрикоиҳо ҳазорҳо нафар барои хориҷ шудан аз кишвар таҷаммуъ кардаанд ва намехоҳанд ба хонаҳояшон баргарданд.
Сафоратхонаҳо низ таъкид намудаанд, ки танҳо ба касоне иҷозати хориҷ шудан медиҳанд, ки аснод ва ё далоили исботкунанда дошта бошад, ки ҷонаш дар хатар аст.
Рӯзи 16 август дар ҳоли набудани ҳеч контроле дар фурӯдгоҳ панҷ нафар аз ҳавопаймо сарозер шуданд, ки онҳо худро аз берун дар тани он маҳкам гирифта буданд.
Хабаргузории “Тулуъ нюз” мегӯяд, аксари онҳое, ки дар фурӯдгоҳ ва ё назди сафоратхона таҷаммуъ кардаанд, ҳеч санаде надоранд ва ҳатто аз роҳҳои дур омадаанд ва танҳо мехоҳанд бидуни ҳеч санаде аз кишвар хориҷ бишаванд.
Наворҳои зиёде дар шабакаҳои иҷтимоӣ нашр шуда, ки вахим будани вазъро дар фурӯдгоҳи Кобул нишон медиҳад. Дар онҳо дида мешавад, ки чандин зану кӯдак зери пойи мардум афтодаанд ва мардум барои наҷоти онҳо талош мекунанд. Инчунин баъзе аз онҳо мегӯянд, ки аз сабаби таҷаммуи зиёд пайвандонашонро гум кардаанд ва бо гузашти як шабонарӯз онҳоро пайдо накардаанд, ба ин хотир аз тақдирашон нигаронанд.
Дар як навор дида мешавад, ки нерӯҳои низомии амрикоӣ мардумро бо чархболҳо аз роҳи ҳавопаймо дур месозанд, ки то ҳавопаймо битавонад парвоз кунад.
Дар фурӯдгоҳи Кобул издиҳоми мардум ба ҳадде зиёд гуфта мешавад, ки нерӯҳои амрикоӣ барои пароканда кардани издиҳом аз гази ашковар истифода мекунанд, вале чандон натиҷа намедиҳад.
Оё Толибон дар ҳамкорӣ бо Русия ҳукумати Ғаниро сарнагун кард?
Фарзияи вуҷуди радди пойи Русия дар фирорӣ додани Муҳаммад Ашраф Ғанӣ, собиқ президенти Афғонистон аз Кобул то рафт рӯшантар мешавад.
Муҳаммад Ашраф Ғанӣ, ки рӯзи 15-уми август баъди нисфирӯзӣ Арг (қаср)-и раёсати ҷумҳурии Ағонистонро тарк ва Толибон Кобулро ишғол карданд, 18-уми август дар як навори видеоӣ аз мавҷуд будани худ дар Амороти Муттаҳидаи Араб дарак дода, гуфт: “Толибон ва чеҳраҳои ношинос, ки ба забони кишвари Афғонистон ошно набуданд, вориди Арг (қасри Президент) шуда, утоқ ба утоқ гашта, ӯро ҷустуҷӯ мекарданд…”
16-уми август, Никита Ишенко, котиби матбуоти сафорати Русия дар Кобул ба “РИА Новости” гуфта буд, “чор мошин пур аз пул буд, онҳо (Муҳаммад Ашраф Ғанӣ ва ҳамроҳонаш) қисми дигари пулро ба чархбол пур карданӣ шуданд, аммо на ҳамааш ғунҷида буд. Ва як қисми пул дар майдони ҳавоии Кобул боқӣ монд.”
Хабар дар бораи бо пул хориҷ шудани Ашраф Ғаниро сафири Афғонистон дар Тоҷикистон ҷаноби Муҳаммад Зоҳири Ағбар низ баъдтар таъйид карда, 18-уми август дар суҳбат ба расонаҳо эълом кард, ки президенти фирории ин кишвар бо 169 миллион доллар Кобулро тарк кардааст.
Ҳамзамон шабакаи хабарии Эронинтернешнал бо нашри феҳристи мусофирони як парвози Кобул дар шоми 15-уми август эълом кард, ки зоҳиран Муҳаммад Ашраф Ғанӣ тавассути ҳавопаймои яке аз ширкатҳои ҳавопаймоии русӣ Афғонистонро тарк кардааст. Зеро номи президенти фирории ин кишвар дар охирин сатри ин лист таҳти рақами 52 сабт шудааст.
Инчунин дар замони фирорӣ додани Ашраф Ғанӣ бо Толибон киҳо буданд ва аз соати 14:00 баъд аз зуҳр то замони парвоз, ки соати 21-и шаб гуфта мешавад, президенти фирории Афғонистон дар куҷо нигаҳдорӣ мешуд, суолест, ки то ҳол посухи худро наёфтааст…
Ба навиштаи расонаҳо, афғонҳо дар аввал бо дидани ин лист гумон карданд, ки чун овоза буд Муҳаммад Ашраф Ғанӣ нахуст ба Тоҷикистон фирор кардааст, ин лист бо забони форсӣ-тоҷикӣ ва бо хатти крилӣ тартиб дода шудааст, аммо акнун мефаҳманд, ки лист бо забони русӣ таҳия шуда, Ашраф Ғанӣ ва ҳамроҳонаш бо ҳавопаймои русӣ Кобулро тарк кардаанд.
Ин дар ҳолест, ки ба қавли хабаргузории “Форс” ба нақл аз шабакаи хабарии Алҷазира масъули сиёсати хориҷии Иттиҳодияи Аврупо Бурл эълом кард, “масъалаи муҳим ин аст, ки иҷоза надиҳем Чин ва Русия контроли Афғонистонро дар даст бигиранд. Чин ва Русия акнун гомҳои дипломатики худро бо Толибон бардоштаанд ва ин тавозуни қувваро тағйир хоҳад дод ва бояд барои муқобила бо он фикр кунем.”
20-уми агвуст, Мария Захарова, сухангӯи Вазорати хориҷаи Русия таъкид кард, ки Муҳаммад Ашраф Ғанӣ аз Афғонистон фирор кард ва ӯ масъули вазъияти феълӣ аст. Ба гуфтаи Захарова, Ғанӣ гуфтугӯҳои байналафғониро натавонист дар муддати се сол ба натиҷа бирасонад, то як давлати фарогир бо мушорикати ҳама нерӯҳои сиёсӣ ҳосил шавад, аммо ин фурсатҳо аз даст рафт.
Мақомоти Русия пеш аз ин ҳам аз замони суқути Кобул ба дасти Толибон дар рӯзи 15-уми августи соли ҷорӣ то кунун ба ҳисоби миёна ҳар рӯз бо шаклҳои мухталиф аз ҳукумати Ашраф Ғанӣ, ки онро дастнишондиҳандаи Амрико медонанд, интиқод ва аз ҳаракати Толибон истиқбол мекунад, ҳатто кор то ҷое расид, ки сафорати Русия дар Афғонистон шаби аввали ҳузури Толибон дар Кобулро амнтар аз замони Ашраф Ғанӣ эълон кард, ҳол он, ки Русия Толибонро ҳаракати террористӣ мешиносад.
Коршиносон мегӯянд, яке аз иллатҳои аслӣ дар хусуси фаъол шудани сафорати Русия дар Кобул ва иддаъои фошкориҳо дар робита ба ғорати 4 мошин пул тавассути президенти собиқи Афғонистон, ки Ашраф Ғанӣ ин иддаъои пулдуздиро рад кард, дар он тахмин зада мешавад, ки дипломатҳои рус чун дар ин қазия даст доранд, ҳамзамон дар такя ба халабонҳои мавҷуд дар парвози зикр шуда хостанд пеш аз дигарон иттилоърасонӣ кунанд.
Пеш аз ин собиқ сухангӯи Толибон Абдулманнон Ниёзӣ дар як навори видеоӣ иддаъо карда буд, ки Русия “ба хотири задани Амрико дар Афғонистон” бо Толибон ҳамкорӣ мекунад ва тавассути Тоҷикистон ба ин ҳаракат кумакҳои молии худро мерасонад.
Таъкиди Вазорати хориҷаи Русия бар ин, ки Ашраф Ғанӣ фирор кардааст, ин тахмини коршиносонро тақвият медиҳад. Инчунин гуфтаҳои президенти Афғонистонро, ки иддаъо мекунад “Толибон ва чеҳраҳои ношинос, ки ба забони кишвари Афғонистон ошно набуданд*” фарзияи даст доштани русҳо ҳамроҳи Толибон дар сарнагун кардани ҳукумати Афғонистонро қаввитар мегардонад.
*Забони муоширати байналмилалӣ дар Афғонистон англисӣ аст. Ашраф Ғанӣ таҳсилкардаи Амрико ва бо ин забон хуб балад аст. Ӯ форсӣ, пашту, урду ва англисиро медонад. Нерӯҳои НАТО низ дар Афғонистон бо англисӣ суҳбат мекунанд. Ғанӣ русиро намедонад ва ин забон барои аксари афғонҳо низ ноошност. Ғанӣ мехоҳад бигӯяд, ки ҳангоми суқут додани Кобул дар Арг ҳамроҳи Толибон на эрониву покистонӣ ва на аз нерӯҳои НАТО, ки бо англисӣ суҳбат мекунанд, касе ҳузур надошт…
Сӯиқасд ба ҷони бародар
Суд як сокини 39-солаи ноҳияи Ёвонро барои даст доштан дар сӯиқасд ба ҷони бародараш ба 8 соли зиндони низомаш пурзӯр маҳкум кард.
Бино ба иттилои сомонаи расмии суди ноҳияи Ёвон судшаванда Саидов Сайбурҳон Мадалиевичи 39-сола, зода ва истиқоматкунандаи ноҳияи Ёвон аст. Ӯ 20-уми декабри соли 2020 дар ҳолати мастӣ бо мақсади аз ҳаёт маҳрум сохтани бародараш Расул бо корд ба узвҳои ҳаётан муҳими бародараш якчанд зарба задааст.
Ин ҳолатро шаҳрвандони Аркадев Юра ва Ҷабборов Рустам дида, Расулро аз дасти бародараш халос кардаанд. Дар натиҷа худи ин шаҳрвандон низ ҷароҳатҳои ночизи ҷисмонӣ бардоштаанд.
Баъд аз ба бемористон инқол ёфтан ва экспертизаи судӣ-тиббӣ муайян шуд, ки Масаев Расул дар натиҷаи корд хурдан ҷароҳати ҷисмонии сабук бардоштааст.
Гуфта мешавад Саидов Сайбурҳон дар содир намудани ҷиноят бо моддаҳои 32 қисми 3- қисми 1 моддаи 104 Кодекси ҷиноятии Ҷумҳурии Тоҷикистон гунаҳгор дониста шуда, ба 8 (ҳашт) соли зиндон, бо адо намудани ҷазо дар муассисаҳои ислоҳии дорои низоми пурзур маҳкум карда шуд.
Дар ҳамин ҳол Вазорати корҳои дохилаи Тоҷикистон аз ҷанҷоли ду бародар, ки бо кордзанӣ анҷомид хабар медиҳад. Дар хабар гуфта мешавад, ки 19-уми августи соли ҷорӣ дар шаҳри Кӯлоб дар хонаи истиқоматии марди 46-сола ҷанҷол рӯх медиҳад. Ин марди 46-сола ба узвҳои бадани бародари 57-солааш бо корд 7 маротиба зарба мезанад.
Дар натиҷаи ин ҳодиса ҷабрдида дар беморхона бистарӣ шуда, гумонбар боздошт шудааст. Аз рӯи ин ҳодиса тафтишот идома дорад, хабар медиҳад ВКД.
Русия: Оё ширкатҳо барои ба кор қабул кардани нафақахӯрон омодаанд?
Як ширкати хизматрасонии ҷустуҷӯи кор “ Бино ба иттилои ТАСС, ин тадқиқот аз 10 то 16 августи соли 2021 баргузор шуда, намояндагони 1000 ширкат аз тамоми ноҳияҳои Федератсияи Русия дар ин пурсиш иштирок карданд. Сабаби афзоиши шумораи бознишастагонро намояндаҳои ширкатҳо нарасидани муҳоҷирони корӣ ва набудани мутахассисони ҷавон арзёбӣ карданд. “Бо сабаби равандҳои демографӣ ва хуруҷи қисми зиёди муҳоҷирони корӣ, бозори меҳнатии Русия бо қувваи кории бознишастагон рӯбарӯ шудааст. Ширкатҳое, ки довталабони ба синни нафақа расидаро барои кор ҷалб кардаанд, нисбат ба гузашта 42 дарсад афзоиш ёфтааст. Соли 2019 ин нишондод 38%-ро ташкил медод”,- омадааст дар таҳқиқот. Гуфта мешавад, ки менеҷерҳои ширкатҳои корфармо аз сабаби нарасидани мутахассисони ҷавон маҷбуранд, ки коргарони калонсолро ба кор гиранд. 30% -и дигар кормандони ба сини нафақаро ҳамчун истисно киро мекунанд. 28% дигар қайд карданд, ки онҳо омода нестанд, ки нафақахӯронро дар ширкати худ ба кор ҷалб кунанд ва сабабашро хавфи баланди сирояти коронавирус медонанд. Қаблан дар Думаи давлатии Русия пешниҳод шуда буд, ки синни нафақаи қаблӣ баргардонида шавад. Ба гуфтаи муаллифони лоиҳаи қонун ба ҷои боло бурдани он дар соли 2018, механизми дастгирии молиявиро дар системаи нафақаи суғурта такмил додан зарур буд. Айни ҳол дар Русия тибқи Қонуни федералӣ синни нафақа барои мардон аз 61 солагӣ ва барои занон аз 56 солагӣ муайян шудааст, ки он дар асоси тағиру иловаҳо аз соли 2019 то 2028 дар назараст марҳила ба марҳила дар муддати 10 сол синни нафақа ба боло биравад. Барои занон то 60 сол, барои мардон то 65 сол.
Иштироки низомиёни тоҷик дар мусобиқаҳои АрМИ-2021
Низомиёни Тоҷикистон дар Бозиҳои байналмилалии артишии “АрМИ-2021” ширкат мекунанд.
Дар ин бора АМИТ “Ховар”, ба истинод ба сардори маркази матбуоти Вазорати мудофиаи ҷумҳурӣ, полковник Фаридун Маҳмадализода хабар медиҳад.
Гуфта мешавад дар ин Бозиҳо тақрибан сад нафар аз низомиёни Тоҷикистон, дар панҷ мусобиқаи «АрМИ-2021» ширкат хоҳанд кард.
Фаридун Маҳмадализода ҳамчунин қайд кардааст, ки танкчиёни тоҷик дар мусобиқаи «Биатлони танкӣ», ки дар машқгоҳи Алабино дар наздикии Маскав баргузор мешавад, ширкат мекунанд. Снайперҳои тоҷик барои унвони беҳтарин дар Беларус рақобат хоҳанд кард, онҳо инчунин барои ширкат дар озмуни артиллериячиён ба Қазоқистон мераванд. Намояндагони Тоҷикистон дар мусобиқаи духтурони низомӣ ва озмуни “Ошхонаи саҳроӣ”, ки дар Ҷумҳурии Узбекистон баргузор мешаванд, иштирок хоҳанд кард.
Бозиҳои VII байналмилалии артишии «АрМИ-2021» аз 22 август то 4 сентябри соли ҷорӣ дар ҳудуди 12 давлат баргузор мегардад. Дар Русия 16 навъи мусобиқа, дар ҳудуди 11 давлати дигар 21 намуди мусобиқаҳо гузаронида мешаванд.
Вазорати мудофиаи Русия 96 кишварро барои ширкат дар Бозиҳои 2021 даъват кардааст. Аз 96 кишвар танҳо 40 кишвар бо 277 дастаи худ иштирок мекунанд.
Изҳороти бесобиқаи Ҳизби демократи Тоҷикистон
Ҳизби демократи Тоҷикистон (ҲДТ) роҷеъ ба вазъияти ахири Афғонистон изҳорот дод. Ин ҳизб аз тасаллути Ҳаракати Толибон ба шаҳру вилоятҳои Афғонистон нигаронӣ намуда, аз харобкориву қатлу куштори ин гурӯҳ ҳушдор додааст.
ҲДТ хомӯшии Созмони Миллали Муттаҳид, созмонҳои ҷаҳонии ҳифзи ҳуқуқ ва ғайраро дар баробари амалҳои Толибон ҳайратовар хондааст.
Инчунин аз мақомоти Тоҷикистон хоста, ки барои муҳоҷирони афғон, ки ба ватани мо омадан мехоҳанд, раводид ва дигар асноди лозимаро бепул барояшон иҷро кунанд ва онҳоро ба кишвар роҳ дода, барояшон шароити хуб фароҳам кунанд.
Матни комили изҳороти ҲДТ:
ИЗҲОРОТИ ҲИЗБИ ДЕМОКРАТИ ТОҶИКИСТОН
Таҳаввулоти вазъияти сиёсии Афғонистон дар чанд рӯзи ахир нигаронии ҷомеаи ҷаҳон, мардуми рушанфикр, ба хусус сокинони кишвари моро ба вуҷуд овардааст. Гурӯҳи фурсатталаби террористони байналмилалии Толибон бо пуштибонии давлатҳои манфиатҷӯ низоми давлатиро дар Афғонистонбарҳам зада ҳукумати ин кишварро ба даст гирифтанд. Амалҳои харобкоронаи ин гурӯҳи беҳуввият, бесаробон ва ифротӣ дар чанд сол барои мардуми ҷаҳон аён аст.
Барои мо мардуми Тоҷикистон тохтутоз ва куштору вайронкориҳои Толибон хеле ғамангез аст, зеро дар қаламрави ин мамлакат мардуми мо ҳамзабонон ва ҳаммилатони мо аксари аҳолиро ташкил мекунанд. Фаромӯш набояд кард, ки ин кишвар сарзамини таърихии миллати мост. Тавре дида мешавад, ин гурӯҳи даҳшатбор замину манзил, шаҳру деҳоти тоҷикнишинро дар чанд соли ахир ба харобию нестӣ расонданд. Имрӯзҳо амалҳои ваҳшиёна ва хонахароби ин гурӯҳ махсусан дар маҳалоти тоҷикнишин ба сатҳи наслкушӣ расидааст. Онҳо духтарони ноболиғро аз бағали модаронашон рабуда, мардонро мекушанд ва занони онҳоро таҷовуз мекунанд, ҷавонони бегуноҳро ба баҳонаҳои гӯшношунид қатор монда, бераҳмона қатл мекунанд, ки анқариб ҳамаи онҳо мардуми миллати мо ҳастанд. Толибон, ки намояндагони қавмҳои фарҳангситези паштун ҳастанд, мардуми тоҷикзабонро дар Афғонистон барои надонистани забони пашту бераҳмона мекушанд ва мардуми ваҳшитабиати худро дар сарзаминҳои азалии мардуми тоҷик ҷойнишин мекунанд.
Силоҳдорони хунхори Толибон шаҳру деҳоти Афғонистонро зӯран ба итоати худ дароварда ҳукумати ваҳшиёнаро ба вуҷуд овардаанд. Танҳо дар муддати се-чор рӯзи ахир мардуми зиёди ин кишвар роҳи гурезро пеш гирифта ба кишварҳои дигар паноҳ мебаранд, дар як қатор шаҳрҳо мардум ба эътирози зидди Толибон мебароянд ва аз сӯйи онҳо бераҳмона тирборон мешаванд.
Ҳайратовар аст, ки дар баробари ин ҳама рафторҳои золимонаи зиддибашарӣ, наслкушӣ ва ваҳшигарии Толибон Созмони Милали Муттаҳид, созмонҳои ҷаҳонии ҳифзи ҳуқуқ, давлатҳое, ки худро ҳомии демократия ва низоми мардумсолорӣ медонанд, комилан хомӯшанд. Мисли ин ки ҳамаи онҳо ҳамоҳанги ин разолати бузурги ҷаҳон ҳастанд
Дар миёни ин ҳама бадиҳову ваҳшоният танҳо неруе, ки дар муқобили онҳо қарор гирифтааст, Ҷабҳаи Шимол – Иттиҳоди эҷокардаи Аҳмадшоҳ Масъуд аст, ки неруҳои ватандӯст бо роҳбарии писари ин қаҳрамони номдор Аҳмади Масъуд роҳбарӣ мешавад. Боиси хушҳолист, ки ин нерӯи созанда чанд шаҳру деҳа, се вилояти кишварашро аз вуҷуди Толибон озод кардааст.
Мардуми шарафманду тамаддунофари тоҷики Афғонистон, бидонед, ки шумо мардуми мо, миллати мо, бародарони мо ҳастед ва тавре Президенти мо Эмомалӣ Раҳмон гуфтааст: “Тоҷикистон хонаи умеди ҳама тоҷикони дунёст”. Мо шуморо танҳо намегузорем ва як бурда нонамонро бо шумо тақсим мекунем, барои пирӯзӣ дар паҳлуятон истода мубориза мебарем.
Ҳизби демократи Тоҷикистон чун неруи меросдори низоми мардумсолору пуштибони ормонҳои волои инсонӣ, ба хотири пуштибонӣ ва дифоъи мардуми азияткашидаи тоҷик дар Афғонистон изҳор медорад:
1. Вазорати корҳои хориҷии Ҷумҳурии Тоҷикистон ба хотири пуштибонӣ ва ҳимояти мардуми миллатамон барои ҳамаи гурезагони Афғонистон, ки ба кишвари мо рӯйи ниёз овардаанд, шароити лозим муҳаё кунад ва ҳама гуна корҳои раводид, таҳияи аснод ва дигар шароитҳоро бепул барои онҳо иҷро кунад.
2. Масъулони Кумитаи Амнияти миллӣ, вазоратҳои дохила ва ҳуқуқи ҷумҳурӣ барои гурезагони Афғонистон шароити беҳтар, муносибати бародарона ва шоистаро ба роҳ монанд.
3. Аз ҳама масъулони корҳои амният ва гумрук дар марзҳои Тоҷикистон талаб карда шавад, ки барои гурезаҳои Афғонистон шароити муносиб ва шоиста муҳаё карда, бо онҳо муносибати самимона ва дӯстонаро ба роҳ монанд.
4. Аз ҳамаи шаҳрвадони ҷумҳурӣ талаб карда шавад, ки дар шаҳру деҳот, дар кӯчаву бозор бо гурезагони Афғонистон муносибати дӯстона ва сазоворро ба роҳ монанд.
5. Ҳукумати Ҷумҳурии Тоҷикистон барои зиндагии муваққати гурезагони Афғонистон шароит фароҳам оварда, барои онҳо расондани ёриҳои башардӯстонаро бо кумаки мардуми кишвар ба роҳ монад ва иҷрои талаботи номбурдаро дар ҳама сохторҳои ҳукумат зери назорати ҷиддӣ қарор бидиҳад.
6. Низоми Толибон як ҳаракати бенизом, як неруи ваҳшатафкан ва қотил аст, ки аз сӯйи давлатҳои ғаразхоҳ ба саҳнаи ҷанги Афғонистон ворид карда шудааст. Давлатҳои манфиатдор барои ин гурӯҳи ғаддор ҳама шароит, пул, силоҳи ҷангро муҳаё кардаанд, то ки дар ин минтақа ҳама гуна бедодгарии золимонаро анҷом бидиҳанд. Ин тартиби ҳукуматдорӣ торафт дар ин кишвар реша медавонад ва мардуми тоҷиктабори Афғонистон аз хонаву дар, забону фарҳанг ва ватан маҳрум мешавад. Бинобар ин аз Ҳукумати Ҷумҳурии Тоҷикистон талаб карда мешавад, ки дари сафоратхонаҳои давлатҳоеро, ки ин низоми бешарафи инсониро дар Афғонистон пуштибонӣ мекунанд, бибандад. Давлатҳои Покистон, Арабистони Саудӣ ва Қатар ба ин гурӯҳи золим ёриҳои бевоситаи пуливу молӣ ва силоҳу муҳимоти ҷангӣ медиҳанд. Ҳамчунин ба ҳукуматҳое, ки ин низоми терористиро эътироф мекунанд, эътироз баён карда шавад.
7. Аз Созмони Милали Муттаҳид, созмонҳои ҷаҳонии ҳуқуқи башар талаб карда шавад, ки рафторҳои гурӯҳи Толибонро дар қиболи мардуми тоҷик ва форсизабони Афғонистон чун ҳаракати наслкушӣ (геносид) эътироф кунад.
Шӯрои сиёсии Ҳизби демократи Тоҷикистон
Лаҳистон: паноҳҷӯёни ғайриқонунӣ ихроҷ мешаванд
Ҳукумати Лаҳистон мубориза бо муҳоҷирони ғайриқонуниро оғоз мекунад. Рӯзи сешанбе 17- август Шӯрои вазирони ин кишвар лоиҳаи ислоҳоти қонун дар бораи хориҷиён ва ҳамчунин қонун дар бораи додани паноҳандагӣ ба хориҷиёнро қабул кард.
Сабаби тағйирот дар қонунро мақомот вуруди фавҷи муҳоҷирони ғайриқонунӣ аз қаламрави Беларус ба Лаҳистон рабт медиҳанд.
“Мо мехоҳем лоиҳаи тағйиротро ба вазъи кунунии муҳоҷират дар сарҳад мутобиқ кунем. Сухан дар бораи содда кардани тартиб дар сурати убури ғайриқонунии сарҳад ва таъмини амнияти дохилии давлат ва ҳифзи тартиботи ҷамъиятӣ меравад,” – омадааст дар сомонаи Вазири корҳои дохилаи Лаҳистон, Мариуш Блашак рӯзи чоршанбеи 18-уми август дар саҳифаи твиттериаш хабар дод, ки айни замон зиёда аз 900 сарбоз барои кумак ба Хадамоти марзбонӣ дар сарҳади Лаҳистон бо Беларус ҷалб шуда аст. Бино ба маълумоти Маркази иттилоотии ҳукумати Лаҳистон танҳо дар моҳи августи соли ҷорӣ аз вуруди 1935 нафар муҳоҷир, ки мехостанд ғайриқонунӣ сарҳадро убур кунанд пешгирӣ кард. Аз 1935 муҳоҷир 760 нафар боздошт шуда, ба лагерҳои баста интиқол дода ва 1175 нафари дигарро бозпас ба Беларус фиристодааст.
Муҷозоту мукофоти президент: Эмомалӣ Раҳмон ба кӣ мукофот доду киҳоро ноумед кард
🔴•Барномаи пахши зиндаи “Суоли рӯз” дар шабакаи YouTube-и “Аздо тв”.
🔵• Мавзӯъ:Муҷозоту мукофоти президент: Эмомалӣ Раҳмон ба кӣ мукофот доду киҳоро ноумед кард