Пас аз шикояти зиёди шаҳрвандон дар бораи гаронии билетҳо аз Тоҷикистон ба Русия имрӯз 5 апрел Агентии авиатсияи граждании Тоҷикистон барои ҳалли ин масъала ҷаласаи фаврӣ баргузор кард.

Икром Субҳонзода, директори Агентӣ ба Sputnik Тоҷикистон гуфт, ба ин ҷаласа намояндагони Прокуратураи нақлиёт, Кумитаи давлатии амнияти миллӣ ва Агентии алоқаи ҳавоии Тоҷикистон низ даъват шуданд. Дар ҷаласа аз ширкатҳои ҳавонавардӣ ва чиптафурӯшҳо талаб карда шуд, ки чиптаҳоро гарон аз нархҳои муайянкардашуда нафурӯшанд.

“Мо ҳанӯз 26 – уми март дархост карда будем, ки нархи рафтуомад аз 500 доллар зиёд набошад, бахусус аз Душанбе ба самти Маскав набояд нархи як чипта марзи 350 долларро убур кунад. Дар чипта ҳам возеҳ навишта шудааст, ки нарх 4 ҳазору 50 сомонӣ аст. Аммо ҳоло ба мо иттилоъ мерасад, ки як чипта то 8-10 ҳазор сомонӣ фурӯхта мешавад” – гуфт Икром Субҳонзода.

Субҳонзода дар ҷаласаи имрӯзааш гарон фурӯхтани билетҳоро беинсофӣ хонда мегӯяд: “Чунин вазъ қобили қабул нест, ҳатто як беинсофии калон аст. Метавон гуфт, ки хилофи сиёсати давлат дар мавриди пуштибонии молии қишрҳои осебпазири ҷомеа, бахусус муҳоҷирини меҳнатӣ аст. Боз ба такрор мегӯям, ки вазъ истисноӣ аст, чун гузаштаҳо маъмулӣ нест. Аз ин хотир, ширкатҳо ва нуқтаҳои чиптафурӯшӣ бояд масъулият нишон диҳанд”.

Дар ҳамин ҳол, як сокин аз вилояти Хатлон дар суҳбат ба “Аздо тв” гаронии билетҳоро тасдиқ кард ва гуфт, дар маркази вилоят, шаҳри Бохтар билет пайдо карда натавонист, билетфурӯшон гуфтаанд, система фаъол нест ба Душанбе раванд. Ӯ мегӯяд, акнун 4 рӯз боз дар Душанбе навбат мепояд ва талош дорад, ки билет харад, вале наметавонад. “Баъзе шиносҳоям то 10 ҳазор сомонӣ билет хариданд, ҳатто медонам онҳоеро, ки то 12 ҳазор ҳам хариданд. Аз Шумо хоҳиш, расонед ба гӯши мақомдорон, ки билетро арзон кунанд”.

Аз ин пештар наворе дар шабакаҳо роҳ ёфта буд, ки як зан аз гарон будани аз ҳад зиёди билетҳо дар назди билетфуршӣ эътироз мекунад. Ӯ мегӯяд, мақомот билетҳоро 4-5 ҳазор муайян кардааст, аммо касе бо ин нарх билет нахаридааст.

Директори Агентии авиатсияи граждании Тоҷикистон гуфта, ширкатҳо ваъда доданд, ки барои ислоҳи вазъ иқдом мекунанд ва фурӯши чиптаҳоро таҳти назорати шадид қарор медиҳанд. Ба гуфтаи ӯ, агар вазъ беҳтар нашавад, маҷбуранд дар ин кор бо сохторҳои дахлдор чора андешанд.

Ёдовар мешавем, бо қарори Ситоди мубориза бар зидди каронавируси Русия аз таърихи 25 март эълон шуд, ки ин кишвар парвозҳои мунтазами худро бо Тоҷикистон барқарор мекунад ва тибқи нақшаи аввалӣ ҳафтае як маротиба ширкати русии “UTair” ва як маротиба ширкати “Сомон Эйр” мусофиронро ба Русия хоҳанд бурд.

Дар рӯзи аввали даъвати ҷавонон ба артиш вилояти Мухтори Кӯҳистони Бадахшон нақшаи даъватро дар тамоми вилоят беш аз 100% иҷро кардааст. Дар ин бора ба “Азия-Плюс” сухангӯи раиси ВМКБ, Ғолиб Ниятбеков хабар дод.

Ба гуфтаи Ниятбеков шаҳри Хоруғ, ноҳияи Дарвозу Ванҷ, Шуғнон, Мурғоб, Рӯшон, Ишкошим, Роштқалъа нақшаи даъватро дар рӯзи якум 100 дарсад иҷро намуданд.

Ҳамчунин сухангӯи раиси ВМКБ Ғолиб Ниятбеков қайд намудааст, ки пагоҳ яъне 3-уми апрел бахшида ба сафарбаркунии ҷавонон ба артиш маросими хос дар шаҳри Хоруғ бо ширкати раиси вилоят Ёдгор Файзов баргузор мегардад.

Ин соли сеюм аст, ки ВМКБ даъвати наваскаронро дар Тоҷикистон аввалин шуда иҷро мекунанд.

Соли гузашта фарзандони 32 нафар хидматчиёни давлатӣ аз вилояти Мухтори Кӯҳистони Бадахшон бо хоҳиши худ ба сафи Қувваҳои Муссалаҳи Тоҷикистон шомил шуданд.

Ёдовар мешавем чанде пеш дар Тоҷикистон қонуни нави ҳарбӣ қабул карда шуд, ки навгонии асосии он хизмати пулакӣ мебошад.

Тибқи ин қонуни ба тасвиб расида, агар пештар донишҷӯёне, ки дар кафедраҳои ҳарбии донишгоҳҳо мехонданд, аз хизмати ҳарбӣ озод буданд, тибқи тағйироти нав онҳо низ маҷбуранд як сол дар сафи Қувваҳои мусаллаҳ хизмат кунанд.

Ҳамчунин Тоҷикистон ба мисли Қазоқистон, Узбекистон ва Қирғизистон хизмати пулакиро ҷорӣ кард, аммо то ҳол маблағи он дақиқ нест.

Ҳоло дар Тоҷикистон шумораи умумии ҳарбиён 9 ҳазор нафар гуфта мешавад. Илова бар ин, 151,1 ҳазор ҷавонони Тоҷикистон ба синни сарбозӣ расидаанд.

Ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хидмат аз артиш мегурезанд ва мақомот бо тарзи маҷбурӣ ё “облава” ҷавононро ба артиш сафарбар мекунад, ки ин амали мақомдорон ҳамеша дар ҷомеа мавриди баҳс қарор мегирад.

Имрӯз даҳҳо нафар аз фаъолони тоҷики муқими Олмон назди сафорати Тоҷикистон бо талаби озодии Иззат Амон бо шиори “Иззати моро озод кунед” гирдиҳамоӣ барпо карданд.

Иззат Амон, фаъоли сиёсӣ ва ҳомии ҳуқуқи муҳоҷирон бино ба изҳороти Вазорати корҳои дохилаи Тоҷикистон дар рӯзи 27 март бо қарори Додгоҳи Тверской шаҳрвандияш лағв ва ба Тоҷикистон истирдод шуд. Пас аз он дар Душанбе аз ҷониби ин ниҳод боздошт шуд.

ВКД дар 26 март аз оғоз шудани парвандаи ҷиноятӣ нисбати Иззат Амон бо моддаи 247, қ.4 Кодекси ҷиноятии Ҷумҳурии Тоҷикистон (қаллобӣ) хабар дода буд. Аммо вакили мудофеи Иззат Амон дар суҳбат бо “Аздо тв” гуфт, нафареро, ки бо чунин ном додгоҳи Тверской шаҳрвандиашро бекор карда Изат Амон нест. Ба гуфтаи вакили дифоъ Кирилл Жаринов эҳтимолан ВКД-и Тоҷикистон маъуломтро дар вебгоҳи Додгоҳи Тверской дида ё чун мо фикр карданд ин шахс Иззат Амон аст ё бардуруғ онро ба Иззат рабт доданд”.

Аз он рӯз то кунун истирдоди ин ҳомии ҳуқуқи муҳоҷирон вокуниши зиёдеро дар байни муҳоҷирони тоҷик дар пай дошт. Муҳоҷирон ин амали маҳомти тоҷикро сахт зери танқид қарор доданд. Мақомоти Русия чанд рӯз пеш дар Маскав иддае аз муҳоҷиронро дар ҳамоишҳои ҷудогонае, ки дар назди сафорати Тоҷикстон доир карда ва озодии ӯро хоста буданд, боздошт кард, ки то ҳол сарнавишти баъзеяш норӯшан аст.

Ахиран раҳбари гуруҳе аз мухолифони тоҷик дар Аврупо Муҳиддин Кабирӣ ба қазияи Иззат Амон вокуниш нишон дод ва дар хитоби видиоие, ки дар шабакаҳои иҷтимоӣ нашр шуд, гуфт, рабудани Иззат Амон хатои бузурге буд, ки режими Раҳмон содир кард ва ҳар гуна хотимаи ин қазия ба зарари режим хоҳад буд. Дар зимн, ӯ аз мардум даъват кард то ширкатҳои хонаводаи Раҳмонро таҳрим (бойкот) кунанд.