Сардори раёсати Хадамоти оташнишонии вилояти Хатлон, Садриддинхон Султонзода дар нишасти хабарӣ гуфт, ки нисбати раиси бозори марказии Шаҳритус Насим Каримов бо иттиҳоми “риоя накардани қоидаҳои бехатарӣ аз сӯхтор” парвандаи ҷиноятӣ оғоз гардида, ба суд исрол шудааст.

Харабгузории “Asia-Plus” аз қавли Султонзода менависад:

“Баъд аз сӯхтор мутахассисони мо санҷида, маълум карданд: сӯхтор аз хати барқи иловагии бозор сар задааст, ки барои равшанидиҳӣ ва таъмини яхдонҳо бо барқ кашида шудааст. Дар рафти санҷиш маълум шуд, ки тахминан 10 рӯз қабл сӯхтори хурде рух додааст, вале онро аз мо пинҳон кардаанд. Аз натиҷаи санҷиш нисбат ба сарвари бозор Насим Каримов ва барқчии он Маҳмадулло Давлатов бо моддаи 192 қисми 2 КҶ ҶТ (Риоя накардани қоидаҳои бехатарӣ аз сӯхтор) парвандаи ҷиноятӣ оғоз карда шудааст. Тафтишоти парвандаи ҷиноятӣ ба анҷом расида, ба суд фиристода шудааст”.

Лозим ба зикр аст, ки дар бозори марказии ноҳияи Шаҳритус 24 майи соли ҷорӣ сӯхтор ба вуқуъ пайваста дуконҳои зиёде аз он сӯхтор ба коми оташ рафт ва зарари он 4 миллон сомонӣ гуфта шуда буд.

Ба гуфтаи раиси ноҳияи Шаҳритус Ғаффор Ҷабборӣ, азнавсозии ин бозорро “Тоҷикматлубот” бар уҳда гирифта, нуқтаҳои савдоро барқарор хоҳад кард.

Бо нашри як муроҷиатнома ҳукумати Тоҷикистон аз ҷорӣ кардани маҳдудият дар интиқоли неӯи барқ хабар дод, ки расман аз 28 июл амалӣ шудааст. Дар Муроҷиати ҳукумати Тоҷикистон, ки дар сомонаҳои расмии ҳукумат, ба нашр расидааст, иллати ин амр камбуди об дар обанборҳои нерӯгоҳҳо гуфта мешавад.

“Тирамоҳу зимистони соли 2019-2020 дар минтақаҳои ташаккулёбии маҷрои дарёҳои Вахш ва Панҷ боришоти барф бениҳоят кам буд ва 50 фоизи ҳаҷми солҳои гузаштаро ташкил кард.Чунин вазъият дар таърихи Тоҷикистон бори аввал ба вуҷуд омад.Имрӯзҳо об дар маҷрои дарёи Панҷ нисбат ба солҳои гузашта 2 ҳазор метри мукааб, аз ҷумла дар дарёи Вахш 800 метри мукааб, яъне 50 фоиз кам аст.Чунин ҳаҷми об нишонаи равшани он аст, ки дар кӯҳҳо захираи барф кам мебошад. Имрӯзҳо дар обанбори Норак захираи об нисбат ба соли гузашта 17 метр кам аст. Агар чунин вазъият идома пайдо кунад, захираи об дар обанбор ниҳоят кам шуда, дар фасли зимистон барои бо барқ таъмин намудани аҳолӣ ва соҳаҳои иқтисоди миллӣ мушкилоти бисёр ҷиддӣ пеш меояд”, – омадааст дар муроҷиати ҳукумати Тоҷикистон.

Дар идомаи ин муроҷиати худ ҳукумати Тоҷикистон гуфтааст, ки ба иллати коҳиши оби рудхонаҳо ҳатто “маҷбур шудем, ки пеш аз муҳлатҳои дар шартномаҳои байнидавлатӣ зикршуда интиқоли нерӯи барқро ба Ҷумҳурии Ӯзбекистон ва Ҷумҳурии Исломии Афғонистон қатъ намоем”. Бад-ин манзур аз мардуми кишвар даъват шудааст,ки “маҳдудияти интиқоли барқро, ки аз ҷониби Ширкати «Барқи Тоҷик» ҷорӣ карда мешавад, дуруст дарк намоянд”.

Як рӯзи пеш масъулони арсаи энержии Тоҷикистон аз қатъи интиқоли нерӯи барқ ва содироти он хабар дода буданд ва имрӯз хабарҳо ҳокист, ки Кобул-пойтахти Афғонистон, ки аз Тоҷикистон нерӯи барқ дарёфт мекард ба торикистон бадал шудааст. Афғонистон камбуди барқи Тоҷикистонро аз ҳисоби Узбакистон таъмин карданист.

Зимнан ин барои бори аввал аст ки дар фасли гармо неруи барқ ба аҳолӣ  тибқи реҷа дода мешавад. Аз ин рӯ, барои мардуми кишвар, ки аслан чунин омодагиро надоштанд, ин як мушкилоти дигарро дар канори мушкилоти иқтисодӣ пеш меоварад. Аз тарафи дигар мардуми кишвар аз он нигарон аст ки агар дар тобистон неруи барқ бо лимит дастрас бишавад авзоъ дар тирамоҳу зимистон чи гуна хоҳад буд? Ин ҳам дар ҳоле аст, ки Эмомалӣ Раҳмонов ҳангоми ба истифода додани чархаи аввали нерӯгоҳи Роғун дар ду соли қабл шодиёна гирифта буд, ки дигар лимит ба афсона табдил шуд.

Бар зидди шуморе аз масъулони “Агроинвестбонк” аз сӯи Оҷонсии назорати давлатии молиявӣ ва мубориза бо коррупсияи Тоҷикистон парвандаи ҷиноятӣ боз шудааст. Ин масъулон ба он муттаҳам мешаванд, ки дар додани қарзҳо ба “қонуншиканӣ” роҳ додаанд. Ному насаби ин афрод то ба ҳол эълон нашудааст ва маълум нест, ки худи онҳо дар ин робита чӣ назар доранд.

Сулаймон Султонзода, раиси Оҷонсии назорати давлатии молиявӣ ва мубориза бо коррупсияи Тоҷикистон рӯзи 28-уми июл зимни нишасти хабарӣ гуфт, ҳаҷми ин маблағҳои қарзӣ 391 миллион сомониро ташкил медиҳад. Ба гуфтаи Оҷонсӣ, дар баробари масъулони ин бонк, алайҳи намояндагони бархе аз ширкатҳо, ки аз “Агроинвестбонк” қарз гирифтаанд, низ парвандаи ҷиноятӣ боз шудааст. Масъулони Оҷонсӣ шумораи афродеро, ки алайҳи онҳо парванда боз шудааст зикр накарданд ва танҳо гуфтанд, ки дар ин бора баъдан маълумот хоҳанд кард.

Соли гузашта низ Оҷонсии назорати давлатии молиявӣ ва мубориза бо коррупсияи Тоҷикистон бо дастури Дастгоҳи иҷроияи раёсати ҷумҳурӣ дар “Агроинвестбонк” тафтиш гузаронда, даҳҳо миллион сомонӣ зарарро ошкор карда буд. Зимнан, Оҷонсии назорати давлатии молиявӣ ва мубориза бо коррупсия соли 2018 Муродалӣ Алимардонов, раиси “Агроинвестбонк”-ро бозпурсӣ карда буд.

“Агроинвестбонк” тақрибан панҷ сол боз бо бӯҳрон рӯбарӯст ва наметавонад беш аз 730 миллион сомонӣ амонати мардумро баргардонад. Қутбиддин Сафарзода як масъули Оҷонси мубориза бо фасод дар ин нишасти хабарӣ гуфтааст, дар доираи ин парванда, тақрибан 40 нафар мансабдорони воломақоми ин бонк (аз ҷумла кормандони собиқ) ва инчунин роҳбарони як қатор ширкатҳои Тоҷикистон бозпурсӣ мешаванд. Номбурда гуфт, ҳангоми таҳқиқи парвандаи ҷиноии зикршуда, ният доранд, далелҳои додани қарзҳои ғайриқонунӣ ва азхудкунии онҳоро ошкор кунанд. Ӯ гуфт, баъзе ҷузъиёти парванда бояд ифшо карда нашаванд, “зеро дар пеш кори тӯлониву пурмашаққате доранд”.

Муродалӣ Алимардонов, собиқ раиси Агроинвестбонк, ки дар гузашта таййи даҳ сол аз соли 1995- то 2005 раёсати Бонки миллиро бар ӯҳда дошт барои ғайримақсаднок истифода кардани вомҳои Сандуқи байналмилалии пул муқассир шинохта шуда буд. Аммо он замон ӯро аз раёсати Бонки миллӣ барканор вале муовини сарвазир дар умури кишоварзӣ таъйин карданд.

Он замон Алимардон гуфта буд, ки ин миқдори қарзро барои ширкат ва воҳидҳои кишоварзӣ додааст. Ва,аммо давлати Тоҷикистон маҷбур шуд,ки ин қарзҳоро бо баҳрааш баргардонад. Он вақт гуфта мешуд, ки Алимардон аз ёрони наздики раиси ҷумҳурӣ аст ва имкон надорад, ки ин ҳам пул бидуни ризояти шахси аввал нобууд шуда бошад.

Аммо феълан дар пасманзари муфлис ва инак ба ҷавобгарӣ кашидани Агроинвестбонк ва ҳамин тавр мушкил шудани кор дар Тоҷиксодиротбонк, вале ҳамзамон арсаи бонкдоpиро ишғол кардани Спитаменбонк, Коммерсбонк, Бонки байналмилалии Тоҷикистон,ки ба домодҳои раиси ҷумҳурӣ тааллуқ доранд, бештари коршиносон бар ин назаранд, ки ин бонкҳо ба таври маснӯӣ аз бозори пули кишвар ба берун зада шудаанд.

Раиси Оҷонсии зидди фасоди Ҷумҳурии Тоҷикистон дар нишасти матбуотии имрӯз 28 июл гуфт, ки дар давоми 6 моҳи ахир 1218 ҷинояти хусусияти корупсиёнидошта ба қайд гирифта шудааст.

Масъулони ин ниҳод дар посухи суоли марбут ба пулситонии табибон зимни муолиҷаи вируси COVID-19 ва ҳолатҳои фурӯхтани кумакҳои башардӯстон гуфтанд, ки аз оғози интишори COVID-19 то ҳол аз ҷониби табибон ҳолатҳои пулситонӣ барои табобати каронавирус мушоҳида нашудааст.

Аммо хабари пулситонии табибонро аксари корафтодагон ва гирифторони бемории вируси COVID-19 тасдиқ карда буданд ва ин дар расонаҳо нашр шуда буд.

Ҳамзамон муовини аввали директори Оҷонсии зидди фасод, Аҳмадзода Музаффар гуфт, ки ҳолатҳои ба фурӯш баровардани кумакҳои башардӯстона умуман дар Тоҷикистон сабт нашудааст.

Ин дар ҳолест, ки аз рӯзи аввали боздошт шудани шаҳрдори Кулоб, Баҳром Иноятзода расонаҳо навиштанд, ки ӯ бо ҷурми фурӯхтани кумакҳои башардӯстона дастгир шудааст. Вале баъдан ин иттҳомро мақомот инкор кард ва гуфт, ки ӯ ба гирифтани пора дар ҳаҷми 400 ҳазор сомонӣ муттаҳам мешавад.