Ҷустуҷӯ кунед
Ҷустуҷӯ
17.9 C
Dushanbe
Хона блог саҳифа 616

Муҳокимаи додгоҳии қотили Ҳувайдои 5-сола оғоз мешавад

Аз ҷониби
shukhrat
-
0
Сурат: ТАСС, Сергей Бобылев

Бино ба иттилои хабаргузории “Sputnik”, Алаксендр Сёмин нафаре, ки дар қатли Ҳувайдо Тиллозода – духтарчаи панҷсолаи тоҷик гумонбар дониста мешавад, дар назар аст, пас аз ду моҳ ба додгоҳ кашида шавад.

Шавкат Умаров ҳимоятгари хонаводаи Тиллозодаҳо гуфтааст:

“табибон ҳолати равонии Сёминро хуб арзёбӣ карда гуфтаанд, дигар ба табобат ниёз надорад”.

Як сол қабл парвандаи куштори духтарчаи панҷсолаи тоҷик аз ҷониби додгоҳи вилояти Маскав ба хотири бемории руҳӣ доштани Александр Сёмин қатъ гардида буд, додгоҳ ӯро барои табобат ба беморхонаи касалиҳои руҳӣ фиристода буд.

Дар ҳамин ҳол ҳимоятгари ҳуқуқи хонаводаи тоҷик аз рӯйи ин қарор шикоят кард, додгоҳи шаҳри Сичевки табобати иҷбориро қатъ карда буд. Умаров гуфтааст, ҳамаи далелҳо ҷамъоварӣ шуданд, тафтишот ду моҳ тул мекашад,  пас аз ду моҳ Сёмин дар додгоҳ муҳокима хоҳад шуд.

Ёдовар мешавем, ки дар таърихи 22 юми мюли соли 2018 Ҳувайдо Тиллозодаи 5-сола дар назди хонаашон дар шаҳри Серпухово аз майдончаи бозӣ нопадид шуда буд, пас як рӯз ҷасади ӯро дар борхалтаи варзишӣ дар назди роҳи оҳан пайдо карда буданд.

Фирориёни зиндонии Доғистонро боздошт карданд

Аз ҷониби
shukhrat
-
0

Вазорати корҳои дохилии Доғистон хабар дод, ки нерӯҳои интизомии ин кишвар рӯзи 30 сентябр 6 нафар маҳбусе, ки аз зиндони №2-и Доғистон фирор карда буданд, дастгир карданд.

Гуфта мешавад ин зиндониёни фирорӣ пас аз як ҳафтаи фирор дар ҳудуди ноҳияи бо Доғистон ҳаммарзи Лагани Қалмиқистон дастгир шудаанд.

Пештар Вазорати корҳои дохилии Доғистон хабар дода буд, ки шаби 23 сентябр 6 маҳбус тавассути нақбе, ки тӯли як сол канда шудааст, аз зиндони низомаш сахти №2 дар шаҳраки Шамхал дар канори Махачқалъа фирор карда буданд.

Бино ба хабарҳои расида, фирориён мехостаанд тариқи Қазоқистон ба Тоҷикистон фирор кунанд. Хабаргузории “Sputnik” аз қавли сардори Раёсати кофтукови ҷиноии Вазорати корҳои дохилии Доғистон, полковники милитсия Магомеднаби Одилхонов менависад:

“Мо тахмин мезанем, ки ҷинояткорон мехостанд Федератсияи Русияро тарк кунанд, ба Қазоқистон ва бо назардошти он, ки дар ин гурӯҳ ду шаҳрванди Тоҷикистон низ ҳастанд – минбаъд ба Тоҷикистон бираванд. Онҳо нақша доштанд, ки бо кадом роҳ шиносномаҳо ва ҳуҷҷатҳои қалбакӣ ба даст оранд, аммо нақшаҳои пешбиникардаашон амалӣ нашуд “.

Гуфта мешавад, аз ин зиндониёни фирорӣ ду нафарашон барои куштор ва 4 нафари дигар бо ҷурми қочоқи маводди мухаддир зиндонӣ шуда будаанд. Шомил Бойматови 29-сола аз ноҳияи Ёвон ва Маҳмадрасул Машрабов аз Душанбе дар Ҷумҳурии Қарачаю Черкес бо ҷурми қочоқи маводи мухаддир маҳкум шуда буданд.

Соҳибкорони Тоҷикистону Узбекистон 15 созишнома и $50 миллиондолларӣ ба имзо расониданд

Аз ҷониби
shukhrat
-
0
Сурат: Озодӣ

Рӯзи 29 сентябр дар шаҳри Душанбе дар доираи ҷаласаи 7-уми Комиссияи байниҳукуматии Тоҷикистон ва Узбекистон бахшида ба ҳамкории тиҷоратию иқтисодӣ форуми муштарак миёни соҳибкорони Тоҷикистону Узбекистон баргузор гардид, ки  зиёда аз 300 нафар аз ҳар ду ҷониб ширкат варзиданд.

Кумитаи давлатии сармоягузорӣ ва идораи амволи давлатии ҶТ хабар додааст, ки дар ин Форум миёни соҳибкорони Узбекистон ва Тоҷикистон қарордодҳои нав дар доираи тиҷорати ду кишвар ба имзо расидаанд.

Гуфта мешавад, дар ин Форум ба иштирокчиён дар бораи имконотҳои   сармоягузорӣ дар соҳаҳои сайёҳӣ, саноат, энергетика, хизматрасонӣ ва дигар соҳаҳо дар Тоҷикистон маълумот дода шудаааст, ҷонибҳо лоиҳаҳои муштараки ҳамкориро баррасӣ намуданд.

Бино ба иттилои Кумитаи сармоягузории давлатии Тоҷикистон, пас аз анҷоми қисмати расмии Форум вохӯриҳои дуҷонибаи соҳибкорон дар шакли “соҳибкор бо соҳибкор” (B2B) баргузор гардида, санадҳои нави ҳамкорӣ ба имзо расонида шуд, ки ҳамаи бахшҳои иқтисодиро дар бар мегирад ва маблағи он 50 млн долларро ташкил медиҳад.

Рӯзи 29 сентябр дар доираи сафари сарвазири Узбенкистон Абдуллоҳ Орипов ба Тоҷикистон корхонаи муштараки истеҳсоли техникаи маишии  «Артел Авесто Электроникс” ба истифода дода шуд, ки  дар Тоҷикистон аз ҷониби “Авасто Групп”, таъсис додап шудааст. Бино ба гуфтаи баъзе манобеъ ин ширкат ба шаҳрдории Душанбе Рутами Эмомалӣ муталлиқ аст.

Қаблан гуфта мешуд, ки зимни сафари сарвазири Узбекистон ба Тоҷикистон дар баробари ифтитоҳи корхонаи муштараки истеҳсоли техникаи маишии Тоҷикистону Узбекистон – “Artel Avesto Electronics” масъалаи кушодашавии марзҳо низ баррасӣ мешавад.

Сурат: podrobno.uz

Расонаҳои ҳарду ҷониб танҳо аз ҳамкории тиҷоратию иқтисодӣ, роҳу нақлиёт, ифтитоҳи “Artel Avesto Electronics” ва ғайра мегӯянд, аммо дар бораи боз кардани марзҳо ва дубора оғоз шудани парвозҳои мунтазам чизе гуфта нашешавад.

Ин дар ҳорлест, ки Ҷумҳурии Узбекистон шурӯъ аз имрӯз 1 октябр марзҳояшро бар рӯи кишварҳои дигар мекушояд ва ҳатто Тоҷикистон ҳам, аммо аз ҷониби Тоҷикистон то ҳанӯз дар ин бора иттилои расмие нашр нашудааст.

Нархи гази моеъ дар Тоҷикистон боз боло рафт

Аз ҷониби
shukhrat
-
0

Нархи гази моеъ дар Тоҷикистон боз боло рафт. Дар ин бора “Sputnik” хабар дод. Ба навиштаи ин сомона, дар аксар нуқтаҳои фурӯши сӯзишворӣ дар шаҳру навоҳии Тоҷикистон, ду рӯзи охир нархи газ то 10 дарсад боло рафта ба 4,4 ва 4,5 сомонӣ баробар шудааст.

Сабаби боло рафтани нархи онро таъминкунандагони фурӯши сӯзишворӣ ба мушкилиҳо дар марз бо Қазоқистон рабт додаанд. Ба гуфтаи таъминкунандагони сӯзишворӣ, чанд рӯзи охир наметавонанд аз Қазоқистон газ ворид кунанд ва ин маводи сӯхтро ҳоло аз Русия ба Тоҷикистон ворид карда истодаанд, ки аз сабаби дур будани роҳ ва зиёд шудани хароҷот, нархи газ ҳам боло рафтааст.

Аввалҳои моҳи сентябр баъд аз хабари боло рафтани нархи газ, хадамоти зиддиинҳисории Тоҷикистон 9 ширкати воридкунандаи газро ба маблағи 1 млну 200 ҳазор сомонӣ ҷарима намуда буд. Баъд аз ҷарима шудани ширкатҳо нархи ин навъи сӯзишворӣ 18 дарсад поён рафт. Гази моеъ дар Тоҷикистон аз замони баъди хатми карантин боло рафт.

То он замон нархи газ ба 2.5 сомнӣ баробар буд. Сар аз моҳи июн то нимаҳои моҳи август нарх 55% боло рафта, ба 4.7 сомонӣ баробар шуда буд, ки нигаронии мардумро ба вуҷуд овард. Маводи сӯхт дар Тоҷикистон аз хориҷа ворид карда мешавад. Соли гузашта бино ба маълумотҳои омории гумрук, беш аз 430 ҳазор тон гази моеъ, қариб 180 ҳазор тон бензин ва ҳудуди 250 ҳазор тон маводи дизелӣ ба Тоҷикистон ворид шудааст.

Бино ба иттилои дарёфтӣ, дар Тоҷикистон яке аз воридкунандагони асосии маводи сӯхт ширкати “Фароз”-и Шамсулло Соҳибов аст, ки бозор сӯзишвориро пурра зери назорат дорад. Ҳар ширкати дигаре, ки мехоҳад ба кишвар маводи сӯхт ворид кунад, бояд аз “Фароз” иҷозатнома гирад ва сари ҳар тоннаи ворид кардааш маблағ месупорад. Ба назари огаҳони умур, инҳисори бозори маводи сӯхт аз ҷониби “Фароз” сабаби боло рафтани нархи сузишворӣ дар кишвар гардидааст.

Чаро рақобатҳои пешазинтихоботии номзадҳо дида намешавад?

Аз ҷониби
shukhrat
-
0

То интихоботи президентии Тоҷикистон бештар аз 1 ҳафта боқи мондааст боқӣ мондааст. То ҳол номзадҳое аз ҳизбҳои амалкунанда пешбарӣ шудаанд, барномаҳои худро пурра ба ҷомеа нарасондаанд.

Яке  аз ин номзаҳо Рустам Латифзода мебошад, ки соли 2014 баъд аз марги Амир Қароқулов раиси ҲАТ интихоб шуд. Баъд аз 1 соли раисии ӯ, ҳизбаш муваффақ шуд то дар интихоботи парлдумонии соли 2015 баъд аз ҲХДТ бештарин курсиҳоро соҳиб шавад ва бо 7 вакил вориди парлумон шуд. Дар ҳоле, ки ҲНИТ ва ҲКТ натавонистанд камтарин овозро ба даст оранд ва вориди парлумон шаванд.

Рустам Латифзода то раиси ҳизб интихоб шуданаш ба ҳайси усто, инженер ё муҳандиси калони идораи “Тоҷикводстрой”, сардори шуъбаи Кумитаи ҳифзи муҳити зист ва сармутахассиси шуъбаҳои кишоварзӣ, экология ва ҳолатҳои фавқулодаи Дастгоҳи иҷроияи президенти Тоҷикистон кору фаъолият кардааст. Баъд аз пешниҳод шудани ӯ ба ҳайси номзад аз ҲАТ ӯ тавонист дар муддати кӯтоҳ имзоҳои лозимаро ҷамъоварӣ намояд, ки ин боис шуд дар интихоби Латифзода шаку шубҳаҳо зиёд шавад.

Бештари коршиносон ва мухолифон бар ин боваранд, ки барои демократӣ нишон додани интихобот ӯро ба ин маъракаи сиёсӣ роҳ додаанд. Коршиносон мегӯянд, ки дар 5 соли вакил буданаш Рустам Латифзода дар масоили доғи кишвар боре ҳам садо баланд накардааст. Ба монанди Латифзода инчунин Абдуҳалим Ғаффоров, яке аз номзадҳо ба курсии президентӣ мебошад. Гуфта мешавад, Ғфаффоров соли 2004 аз ҷониби вазорати адлия ҳамчун раиси ҲСТ шинохта шуд.

Ба назари мухолифон ӯ низ аз ҷониби ҳукумат барои пуррақобат нишон додани интихобот, ҳамчун номзад “пешбарӣ” шудааст. Худи Ғаффоров ин ҳамаро рад мекунад. Раиси ҲСТ бо барномаҳои пеш аз интихоботии худ, ки гуфт дар Душанбе метро месозад ва ворид шудан ба Душанберо пулакӣ мекунад, вирди забонҳо шуд ва барномаҳои ӯ вокуниши ҷомеъаро ба бор овард. Дар шабакаҳои иҷтимоӣ баъзе аз корбарон барномаи пешазинтихоботии ӯро ба масхара кашиданд.

Ба интихоботи президенти Тоҷикистон 5 номзад аз ҲАТ, ҲСТ, ҲКТ, ҲИИТ ва ҲХДТ роҳ ёфтанд. Номзади худпешбар Фаромуз Иргашев натавонист имзоҳои зарӯриро ҷамъоварӣ намояд ва аз сабқати интихоботӣ канор рафт. Саидҷаъфар Усмонзода, ки иддао дошт, ҳизбаш имзоҳои заруриро ҷамъоварӣ карда, ба КМИР пешниҳод намудааст, аммо бо вуҷуди он натавонист ба интихобот роҳ ёбад.

Коршиносон мегӯянд бо роҳ надодани Саидҷаъфар Усмонов ба интихобот, Ҳукумат хост нишон диҳад, ки КМИР ниҳоди мустақил аст ва гӯё раванди ҳисобкунии имзоҳоро ҷиддӣ мегирад, вале ба инҳам муваффақ нашуд. То шурӯи интихоботи президентӣ дар Тоҷикистон ҳамагӣ 10 рӯзи дигар боқӣ мондааст, вале рақабатҳои пешазинтихобии номзадҳо ба чашм намехӯрад.

Ба гуфтаи коршиносон дар тамоми давлатҳои демократӣ баҳси номзадҳо ва барномаи пешазинтихобтии онҳо то шурӯи интихобот хеле гарм мешавад, аммо дар Тоҷикистон чунин баҳсҳое дида намешавад, чунки аллакай президент кист ва чӣ қадар овозро аз худ мекунад, аз ҳоло маълум аст. Номзадҳое ки дар баробари Эмомалӣ Раҳмон дар интихобот иштирок мекунанд, аз худи Раҳмон таърифу тавсиф мекунанд ва кушиш мекунанд камбудиҳои ҳукуматро нагӯянд.

Дар Белорус як тоҷик низ дар рӯйхати таҳримшудаҳои Иттиҳоди Аврупо ворид карда шуд

Аз ҷониби
shukhrat
-
0
Акс: censor.net

Бритониёи Кабир ва Канада бархе аз намояндагони Ҳукумати Белорусияро барои нақз кардани ҳуқуқи башар ва истифодаи зургарӣ ба эътирозгарон   таҳрим кардаанд, ки дар раъси таҳримҳо Александр Лукашенко президенти эътироф нашудаи ин кишвар аз ҷониби ҷомеаи ҷаҳонӣ қарор дорад.

Дар рӯйхате, ки давлати Канада таҳрим кардааст, 11 нафарро дар бар мегирад ва аз Британиё шомилӣ 8 нафар аст, ки номи як тоҷик низ дар ин таҳрим зикр гардидааст. Атобеков Ҳазалбек Бахтибекович тоҷикест, ки дар баробари Лукашенко дар рӯйхати шахсони мавриди таҳрими Бритониё қарор гирифтааст.

Акс: belnovosti.by

Бино ба маълумоте, ки дар Википедия – Атобеков дар он саҳифа дорад – навишта шудааст, ӯ рутбаи сарҳанг (полковник) дошта, аз соли 2018 ҳамчун муовини фармондеҳи нерӯҳои дохилии Белорус фаъолият доштааст. Ҳамчунин тибқи маълумоти Википедия аз соли 2012 Атобековро Иттиҳодияи Аврупо низ таҳрим кардааст.

Дар шарҳи ҳоли Атобеков омадааст, ки ӯ тоҷик аст ва соли 1990 Омӯзишгоҳи олии ҳарбиву сиёсии Минскро хатм кардааст. То соли 2009 дар симатҳои гуногуни нерӯҳои дохилии Белорус хидмат кардааст.

Аз соли 2009 то 2012 фармондеҳи яке аз зербахшҳои муҳим – Бригадаи 3-юми таъиноти вижаи нерӯҳои дохилии ВКД ва баъдан муовини сардори раёсати омодагии низомӣ ва фаврии Сарраёсати фармондеҳии нерӯҳои дохилии ВКД Белорус кор кардааст.

Атобеков пас аз пароканда кардани эътирозгарон дар моҳи декабри соли 2010  дар Минск ба далели фармони “нерӯҳои аз ҳад зиёд” дар рӯйхати таҳримшудаҳои давлатҳои Иттиҳоди Аврупо ворид гардид, ки дигар наметавонад ба қаламрави ин давлатҳо сафар кунад.

Аз 22 майи 2018 Атобеков Ҳазалбек ба ҳайси муовини фармондеҳи неруҳои дохилии Вазорати корҳои дохилии Белорус фаъолият дорад. Моҳи август соли равон  аз сӯйи Александр Лукашенко дар пасманзари муқовиматҳои шаҳрвандӣ ба медали дараҷаи 5 “Барои хидмати бенуқсон” қадрдонӣ шудааст.

Бархе расонаҳои Белорусия навиштаанд, ки Атобеков ҳамсари белорусӣ ва аз он се фарзанд дорад.

Мо террорист набудем ва нестем. Гумонбарон иттиҳоми бар зиддашон эълоншударо рад мекунанд

Аз ҷониби
shukhrat
-
0
Акс: regiony.tvp.pl

Рӯзи 28 сентябр дар расонаҳои кишвари Лаҳистон ва баъд аз он дар расонаҳои дигар хабаре нашр шуд, ки 5 шаҳрванди Тоҷикистонро Мақомоти амниятии ин кишвари аврупоӣ бо иттиҳоми “терроризм” дастгир карда, 3 тани онҳоро ба Тоҷикистон истирдод кардаанд ва муҳокимаи ду танаи дигари гумонбарон идома дорад.

Дар хабар гуфта мешуд, ки авоили моҳи майи соли равон чаҳор нафари онҳо аз сӯи нерӯҳои марзбонӣ ва Хадамоти амнияти дохилӣ боздошт шуданд. Ва нафари панҷуми ин гурӯҳ охири моҳи июн боздошт шуд.

Бино ба гуфтаи муфаттишон, ин гурӯҳ, навмусалмононро барои анҷоми ҳамлаҳои террористӣ дар Лаҳистон ташвиқ мекардаанд. Дар моҳи декабри соли 2019 манзили иҷоравии сардори ин гӯруҳро кофтукоб карданд.

Хадамоти амнияти дохилии ин кишвар мегӯяд, онҳо робитаи ин гурӯҳи тоҷиконро бо созмони террористии ба ном “Давлати исломӣ” исбот намуда, ҳамзамон ҳайати гурӯҳ ва аҳдофу фаъолияти онҳоро низ муайян кардаанд.

Дар натиҷаи таҳқиқи хабари мазкур ба “Аздо тв” муяссар шуд бо як нафари онҳо, ки ҳоло ихроҷ шудаву дар Душанбе қарор дорад, суҳбат кунад. Ба гуфтаи ҳамсӯҳбати мо яке аз айбҳое, ки дар парвандаи онҳо дарҷ гардидааст, ин бар зидди фаъолони мухолифин, ки ҳоло дар ин кишвар паноҳандаанд, фаъолияти ҷосусӣ бурдан аст.

Аммо худи ӯ инро рад мекунад ва мегӯяд, ки чунин қасде надошт ва инро худи тоҷикони Лаҳистон медонанд. Ӯ ҳамчунин мегӯяд баъд аз бозгашт чанд рӯзе дар боздоштгоҳ қарор дошт ва баъд аз онки Лаҳистон расман иттиҳомномаро ба мақомоти Тоҷикистон фиристод ӯро озод карданд. Барои ихроҷи онҳо Сафорати Тоҷкистон дар Олмон низ кӯмак карда будааст.

Ӯ ба иттиҳомоти мақомоти амниятии Лаҳистон розӣ нест ва мегӯяд амали тарҳрезӣ шуда бар зидди онҳо будааст. Ӯ мегӯяд, дар Душанбе дар озодист ва мушкил надорад. Ва ду нафари дигари ин гурӯҳ низ дар озодӣ буда яке аз онҳо дар Донишкадаи тарбияи ҷисмонӣ таҳсили худро идома медиҳад.

КМИР хабарнигорони “Азия-Плюс”-ро барои инъикоси интихоботи дарпешистода сабти ном накард

Аз ҷониби
shukhrat
-
0

Сомонаи “Азия-Плюс” хабар дод, ки дар таърихи 25 сентябр ба унвони Комиссияи марказии интихобот ва раъйпурсӣ барои ба қайд гирифтани 9 хабарнигор бо мактуб муроҷиат кардааст, вале ҷавоби рад доданд, КМИР қайди давлатии ин расона дар Вазорати фарҳангро талаб кардааст.

“Азият-Плюс” навиштааст, ки 13 август барои сабти ном ба Вазорати фарҳанг тамоми ҳуҷҷатҳои лозимиро пешниҳод намудем ба ҷуз як маълумотнома аз Кумитаи давлатии амнияти миллии Тоҷикистон, ба ҳамин хотир то ба имрӯз моро сабти ном накардаанд, дар Вазорати фарҳанг маълумотномаи КДАМ-ро талаб доранд.

Расонаҳои мустақили Тоҷикистон бояд ҳар се сол худро дар Вазорати фарҳанг ба қайд гиранд, ки соли 2017 “Азия-Плюс” худро ба қайд гирифта будааст.

Ин хабагузорӣ менависад: “Аз 14 августи соли 2020 ба КДАМ барои дарёфти маълумотнома муроҷиат карда будем, вале то кунун ҳеч посухе дарёфт накардардаем. Рӯзи 28 август, аз Вазорати фарҳанг посух дарёфт намудем, ки то ҳол санадҳои пешниҳод намудаи мо дар баррасӣ қарор доранд”.

Дар идома навиштааст, ки барои сабти ном шудан дар Комиссияи марказии интихоб ва раъйпурсии Ҷумҳурии Тоҷикистон “бар сари шаҳодатномаи сабти номи “Азия-Плюс” аз Вазорати фарҳанг пойфишорӣ мекунанд, зоҳиран, бовар надоранд, ки чунин як расона дар ҳақиқат дар Тоҷикистон вуҷуд дорад”.

Хабаргузории “Азия-Плюс” яке аз расонаҳои матраҳи Тоҷикистон ба ҳисоб меравад ва солҳост дар Тоҷикистон хабарҳои дохил ва хориҷро бо забонҳои тоҷикӣ ва рӯсӣ пӯшиш медиҳанд. Се сол пеш бо сабабҳои номаълум сомонаи ин расона дар ҳудуди Тоҷикистон масдуд шудааст. Мақомот сабаби масдуд шудани сомонаи расонаро “мушкили фаннӣ” гуфта буд, вале аз он се сол мегузараду то ҳол ин “мушкилӣ фаннӣ” бартараф нашудааст ва сомона ҳамоно масдуд боқӣ мондааст.

Дар идораи пулис муҳоҷирони тоҷикро маҷбур кардаанд, ки фаршҳои биноро бишӯянд

Аз ҷониби
shukhrat
-
0
Акс: аз видеои Озодӣ

Шаби 28 сентябр зиёда аз 40 муҳоҷири тоҷикро дар ноҳияи Одинтсовои Маскав пулис дастгир кард.

Як муҳоҷир ба Радиои Озодӣ гуфтааст: шоми гузашта ба Шуъбаи пулис бурда, маҷбур кардаанд, фаршҳои биноро бишӯем.

“Аз гуруснагӣ мадори аз ҷо боло шудан надорем. Хеле вазъиятамон бад аст”.

Аз боздошти муҳоҷирон консулгарии Тоҷикистон огоҳ будаанд, гуфтаанд, аз доираи қонун ба онҳо ёрӣ мерасонанд.

Як фаъоли хуқуқ Муҳаммад Собиров, ки ин қазияи боздошти муҳоҷиронро пайгирӣ мекунад, ба Радиои Озодӣ гуфтааст:

“муҳоҷиронро ба додгоҳ буранд ва аксарияти боздоштшудаҳо патенти Маскав доранд, ки бо он кор кардан дар Одинтсово мумкин нест”.

Тибқи қонунҳои Руссия  муҳоҷироне, ки дар як шаҳр патент мегирад, кор кардан дар дигар минтақа мумкин нест.  Гуфтааст, Собиров.

Ба гуфтаи Собиров “Бар асоси қонун онҳоро панҷ ҳазор рубл ҷарима мекунанд, вале то моҳи декабр ҳақ надоранд, аз Русия ихроҷ намоянд. Муҳоҷирон баъди ҷарима шудан метавонанд, аз нав патент кунанд ва кор кунанд”.

Ин бори аввал нест, ки муҳоҷирон аз ҷониби Пулиси Русия дастгир мешаванд, рӯзи 9-уми сентябр низ ҳудуди 50 муҳоҷири тоҷик дар ноҳияи Шербинкаи вилояти Маскав, субҳи барвақт аз тарафи шахсоне, ки дар тан либоси кормандони дастаи зудамал ё ОМОН-и Русияро доштанд лату кӯб гардида буданд, ки  навори боздошти онҳо дар шабакаҳои иҷтимоӣ интишор гардида буд.

Аммо он муҳоҷирон аз тарси ихроҷ нагардидан аз ин кишвар ба ҷое шикоят накарда буданд, ки мақомоти Русия ба онҳо чап мешаванд, дар сурати исбот нагардидан онҳоро аз Русия ихроҷ мекунанд. Дар шароите, ки ҳоло дар Тоҷикистон ҳукмфармост, пайдо кардани кор як мушкилии дигар барояшон мешавад.

Хабари бемории саратони Рустами Эмомалӣ фейк ё ҳақиқат?

Аз ҷониби
AZDA TV
-
0

Мудири Маркази тиббии “Herzliya Medical Center” Дани Энгел – яке аз муассисаҳои тиббии маъруфи Исроил дар саҳифаи Твиттераш аз табобати Рустами Эмомалӣ, раиси Маҷлиси миллии Маҷлиси олии Тоҷикистон дар соли 2019 дар ин бемористон хабар дод.

Хабаргузории “STAN RADAR” бо такя ба навиштаи Дани Энгел хабар медиҳад, ки Рустами Эмомалӣ як сол қабл дар ин Марказ аз саратон табобат гирифта, ҷарроҳӣ низ шудааст.

Мудири Марказ навиштааст, ки “аз аввали соли 2020 мақомоти расмии кишварҳои гуногун аз маркази мо дидан карданд. Рустами Эмомалӣ, раиси Маҷлиси миллии Тоҷикистон, ки дар баданаш саратони рӯдаи рост (рак кишечника, rectal cancer) ташхис шуда буд, соли 2019 дар бемористони мо бистарӣ карда шуд ва баъди ҷарроҳӣ табобат гирифт”.

Энгел дар идома навиштааст, ки Ҳукумати Тоҷикистон аз Вазорати тандурустии Исроил ба хотири табобати Рустами Эмомалӣ изҳори сипос намуд. Ин изҳоротро Дани Энгел рӯзи 28 сентябр дар саҳифаи Твиттераш нашр кард.

То ҳол мақомоти Тоҷикистон дар мавриди табобат ва ҷарроҳӣ шудани Рустами Эмомалӣ – нафари дуввуми Ҳукумати Тоҷикистон, ҳеҷ иттилоеро нашр накардаанд. Ҳатто баъди нашр гардидани изҳороти Энгел ин мавзӯро ҳанӯз тасдиқ ва ё рад накардаанд.

Ин изҳорот дар ҳолест, ки 11 октябр дар Тоҷикистон интихоботи президентӣ баргузор мегардад, дар аввал гуфтугузорҳое буданд, ки интиқоли қудрат аз падар ба писар мешавад, вале чунин нашуд. Рустами Эмомалӣ соли 2017 дар 29-солагиаш ба курсии шаҳрдории Душанбе таъйин гардид, соли 2020 дар синни 32-солагӣ раиси Маҷлиси миллӣ интихоб шуд.

“Аздо тв” барои таъйиди хабар ба унвони Мақомоти иҷроияи ҳокимияти давлатии шаҳри Душанбе нома ирсол намуд ва баъдан тамос гирифт, навбатдори ин ниҳод, ки худро Масамиев Осим ном бурд, аз нашри хабар изҳори беиттилоотӣ намуда гуфт, ки ӯ дар ин бора чизе гуфта наметавонад.

Пас аз чанд соате Мақомоти шаҳри Душанбе бо ирсоли нома ба “Аздо тв” хабарро рад намуда, гуфтанд, ки Рустами Эмомалӣ сиҳату саломат аст ва чунин беморие надорад:

“Ин хабар ягон асоси воқеӣ надорад. Бояд зикр намуд, ки Раиси шаҳри Душанбе муҳтарам Рустами Эмомалӣ ба ягон беморӣ гирифтор нашудааст ва соли 2019 ба Исроил низ сафар накардааст. Маълумоти мудири бемористони Исроил дар бораи бемории муҳтарам Рустами Эмомалӣ ва ҷарроҳиву табобаташ дар маркази “Herzliya Medical Center”-и Исроил ва изҳори сипоси мақомоти расмии Тоҷикистон ба вазорати тандурустии Исроил ва аҳли “Herzliya Medical Center” комилан дуруғ буда, асоси воқеӣ надорад.”

Аммо дар хусуси ҳақиқат доштани чунин номе “Дани Энгел” ҳамчун мудири кулли беморхонаи “Herzliya Medical Center” “Аздо тв” таҳқиқ гузаронд ва маълум гардид, ки дар ҳақиқат Дани Энгел мудири ин беморхона буда, муълумоти он дар вебсайти беморхона дарҷ гардидааст.

Мо барои таҳқиқи хабар ба беморхонаи “Herzliya Medical Center” тамос гирифтем, ва масъулони ин беморхоа дар тамоси телефонӣ ба “Аздо тв” гуфтанд, ки он саҳифаи твиттерие, ки хабарро нашр кард, ҷаълӣ буда ба ҷаноби “Дани Энгел” тааллуқ надорад. Ва чунин маълумоте аз ин беморхона дар ин хусус нашр нагардидааст.

Акс аз сомонаи бемористони “Herzliya Medical Center”
1...615616617...668саҳифаи 616 аз 668

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
18.1 ° C
18.1 °
18.1 °
68 %
2kmh
8 %
Sun
36 °
Mon
38 °
Tue
40 °
Wed
42 °
Thu
38 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст