Ҳомии ҳуқуқро ба хотири иқтибос овардан аз як шеъре бо номи “Падаре гуфт ба писар” дар саҳифаи фейсбукаш маҳкум ба зиндон карданд.

Додгоҳи ноҳияи Шоҳмансури шаҳри Душанбе рӯзи 14 июн ҳуқуқшиноси ҷавон, Ризоев Абдулмаҷидро бо иттиҳоми даъват ба ифротгароӣ муттаҳам намуда, барои 5 солу 6 моҳ равонаи зиндон кард. Дар ин бора сомонаи “Бомдод” аз қавли вакили дифои Ризоев, Дилафрӯз Самадова хабар дод.

Самадова дар саҳифаи фейсбукаш навишта, ки додгоҳ Ризоевро бо моддаи 307, иловаи 2, қисми 2-и Кодекси ҷиноии Ҷумҳурии Тоҷикистон (даъвати оммавӣ ба фаъолияти ифротӣ бо истифода аз матбуот ё шабакаи Интернет) гунаҳкор донистааст.

Аммо худи Ризоев ва вакили дифоаш аз ҳукми додгоҳ розӣ нестад ва гуфтаанд, ки ба зинаҳои болоӣ шикоят хоҳанд бурд. “Ягон ҳуқуқдон набояд барои иҷрои вазифаи касбиаш ба ҷавобгарии ҷиноятӣ кашида шавад, ягон нафар набояд барои озодии баён ба ҷавобгарӣ кашида шавад”, менависад Самадова.

Ҳуқуқдони маҳкумшуда, Ризоев зиндонӣ шуданашро тарҳрезишуда арзёбӣ кард ва гуфта, ки дар ин кор ширкати ҶДММ “Пӯлод Плаза” даст дорад.

“Онҳо ду рӯз пеш аз боздоштам бо ман мулоқот карда, таҳдид карда буданд, ки агар ман шикоятамро нагирам, маро ба зиндон меандозанд”, – гуфт дар рафти мурофиау Ризоев. Ӯ ҳамчунин изҳор дошт, ки “ман ҳеҷ гоҳ ифротгаро набудаму нестам, ман ҳуқуқдонам. Аз ман барои як шеъри “Падаре гуфт бо писар”, ки ман дар саҳифаам гузоштам, ифротгаро сохтанд. Ин шеъри машҳур аст ва онро ҳама – шоирон, ҳунарпешаҳо қироат мекунанд, он дар Ютуб ҳам нашр шудааст.”

Зиндонӣ шудани шаҳрвандони Тоҷикистон ба хотири “лайк” мондану ибрози андеша дар шабакаҳои иҷтимоӣ бори аввал нест. Як манбаъ аз вилояти Хатлон, ки нахост номаш зикр шавад дар суҳбат бо “Аздо тв” гуфт, ки дар вақти дар Русия буданаш боре ба амри маъруфи Эшони Нуриддин ва Ҳоҷӣ Мирзо дар шабакаи иҷтимоии “Одноклассник” “класс” мондааст.

Мақомот ӯро даъват намуда, таҳдидаш кардаанд, ки агар 50 ҳазор сомонӣ наорад 5 сол зиндонӣ мешавад. Вале ӯ мегӯяд, бо миёнаравҳо тавонист бо 10 ҳазор сомонӣ худро халос карда ба Русия равад.

Дирӯз 14 июн Радиои Озодӣ хабар дод, ки ҷасади ду сарбози қисми марзбонии кишвар, ки 8 моҳ пеш дар рудхонаи Бартанг дар ВМКБ ғарқ шуда буданд, пайдо шудааст.

Радиои Озодӣ аз як манбааш хабар дод, ки ҷасадҳо аввали моҳи июн ёфт шуданд, аммо шинохта намешуданд ва барои таҳқиқи ҷасадҳо 13 рӯз мақомот кор карда, аз рӯи ташхиси ДНК ҷасадҳоро шиносоӣ намуда, сипас ба хок супурдаанд.

Искандар Воҳидов, падари Қандилҷон Воҳидов рӯзи 14-уми июн дар суҳбат бо Радиои Озодӣ гуфта, ки ҷасади писари ӯро 36 километр ва ҷасади ҳамроҳаш, Сироҷиддин Ятимовро 6 километр поёнтар аз макони ғарқшавӣ пайдо кардаанд. Ӯ гуфт, ки об ҷасадҳоро зери қум карда будааст ва ҳоло бо поён шудани сатҳи оби рӯдхонаи Бартанг ҷасадҳо намудор шудаанд.

“Ҷасадҳо шинохта намешуданд. Қисме аз либосашон ва устухонҳояшон монда буд. 13 рӯз даркор шуд, ки тариқи ДНК исбот кунанд, ки ин ҷасади писари ман аст”,-гуфт ӯ.

Барои таҳқиқи масъала “Аздо тв” талош кард бо падари сарбозон тамос бигирад, аммо Искандар Воҳидов, падари сарбози ғарқшуда Қандилҷон Воҳидовро пайдо карда натавонист. Ба “Аздо тв” муяссар шуд, ки бо падари Сироҷиддин Ятимов, Сангин Ятимов тамос бигирад ва асли воқеаро ҷӯё бишавад.

Сангин Ятимов дар тамос бо “Аздо тв” гуфт:

“Аз ноҳияи Мурғоб ба мо тамос гирифта огоҳ карданд, ки ҷасадҳоро пайдо кардаанд ва барои ташхиси ДНК бояд хун бисупоранд. Ҳамсарам хун супорид, гуфтанд, ки фарзанди шумост, вале бо вуҷуди он натиҷаи ДНК-ро ба мо надоданд. Онҳо аз мо хостанд, ки болои тобутро накушоем ва фақат имзо гузорем, ки ҷасади фарзанди мо пайдо шудааст. Вале мо намедонем, ки онҳо кӣ ва чиро фарзанди мо гуфта ба хок супоридаанд, на ҷасадро дидем ва на қабул кардем ва имзо ҳам нагузоштем”.

Ӯ дар идома мегӯяд, ки ба хотири он ки мо дар расонаҳо чанд боре суҳбат кардем, аз ин ки мақомот аз “шарри” мо халос шаванд хостанд, чунин иқдоме бикунанд ва бо ҳамин амалиёти ҷустуҷӯро аз сарашон соқит кунанд.

Ба гуфтаи ӯ, агар аз хонаводаи онҳо барои озмоиши ДНК хун гирифта бошанд, аз хонаводаи Искандар Воҳидов аслан чизе нагирифтаанд. Фақат огоҳашон кардаанд, ки ҷасадро пайдо кардем ва ба хок супоридем.

Шакли пурраи мусоҳибаи “Аздо тв” бо Сангин Ятимов, падари сарбози ғарқшуда, Сироҷиддин Ятимовро метавонед дертар дар сомонаи “Azda.tv” бихонед ва ё дар канали ютубии мо шакли садоияшро бишунавед.

Ёдовар мешавем, ки тибқи иттилои расмӣ, Сироҷиддин Ятимов ва Қандилҷон Воҳидов, сарбозони қисми нерӯҳои марзбонӣ дар ноҳияи Рӯшон рӯзи 30 сентябри соли гузашта барои наҷоти як хонандаи мактаб, ки худро бо қасди худкушӣ ба дарё андохта буд, дар рудхонаи Бартанг ғарқ шуданд.

Ҷасади хонандаи мактабро рӯзи 30 сентябр пайдо карданд, аммо бо гузаштани моҳҳо ҷасади ду сарбоз ёфт нашуд.

ИНЧУНИН, БИХОНЕД: Падари сарбози ғарқшуда бо чанд далел фарзияи мақомотро дар мавриди ҳалокати фарзандаш шуҳбанок медонад

Ду сарбози ғарқшуда дар Тоҷикистонро чаро то имрӯз пайдо накарданд? (Садо)

Се гумонбар дар қатли бераҳмонаи чаҳор узви як оила боздошт шудаанд. Тибқи гузориши “Азия-Плюс” мақомоти ҳифзи ҳуқуқи ноҳияи Ҷайҳун эълом доштанд, ки нахустин гумонбарон дар куштори 4 узви оилаи Маҳмадовҳо дар деҳаи Таргокро боздошт намудаанд.

Ҳарчанд ангезаи ин куштори бераҳмона то ба ҳол маълум нест, шарҳи бештар дар ин замина аз ҷумла шахсияти гумонбарон, далелҳои мавриди шакку шубҳа қарор гирифтан ва дастгир шудани онҳо, ҳамчунин ангеза ва иллати куштори бераҳмонаи Аҳлиддин Маҳмадов ва 3 фарзанди ноболиғи ӯ рушан нест.

Мақомоти милиса ва додситонии ноҳияи Ҷайҳун, ки масъулияти таҳқиқи куштори субҳи 12 июн дар деҳаи Таргокро бар душ доранд, то кунун дар мавриди ин ҳодиса ва ҷараёни таҳқиқот ҳеч шарҳе надодаанд.

Маркази матбуотии Вазорати умури дохилаи Тоҷикистон, ки ҳанӯз рӯзи шанбе ваъдаи шарҳи ин ҳодисаи мудҳиш ва пурсарусадоро дода буд, то ҳол хомӯш аст.

Ёдовар мешавем, ки субҳи рӯзи шанбе 12 июн дар деҳаи Таргоки ноҳияи Ҷайҳуни вилояти Хатлон Аҳлиддин Маҳмадов як сокини 39 солаи Таргок, ки ба деҳқони машғул буд, ҳамроҳи 3 фарзанди ноболиғаш кушта шуд. Ҳамсари ӯ ва як духтараш тавонистаанд аз дасти қотилон фирор кунанд ва бо ҷароҳатҳои вазнини ҷисмонӣ дар бемористон бистарӣ шуданд.

Соли таваллуди фарзандони кушташудаи ин хонавода 2007, 2008, ва 2010 буд. Ба гуфтаи сокинони деҳаи Таргок ҳамаи онҳо аз ноҳияи сар ва ашёи кундмонанд ба табар зарба хурдаанд.

То ҳол далели бо чунин бераҳмии хос кушта шудани Аҳлиддин ва фарзандонаш, ки ҳамагӣ 11,13, ва 14 сол доштанд маълум нест.

Ноҳияи Ҷайҳун дар ҷануби Тоҷикистон дар наздикии марз бо Афғонистон қарор дорад ва аксари сокинони ин ноҳия ба шуғли деҳқонӣ машғуланд.

Ин ноҳия қаблан Қумсангир ном дошт ва дар соли 2016 ба Ҷайҳун тағйири ном кард.

Як корманди давлатӣ, ки дар шуъбаи заминсозии №1 КДФ “Бақайдгирии молу мулки ғайриманқул” дар ноҳияи Рӯдакӣ кор мекарда, бо иттиҳоми “қаллобӣ” аз ҷониби мақомоти ҳифзи ҳуқуқ дастгир шудааст.

Ожонсии зидди фасоди Тоҷикистон аз дастгиршуда Ҳотамов Шавкатҷон Гулмирзоевич ном бурда, қайд намуда, ки ӯ ҳамчун корманди шуъбаи мазкур аз шаҳрванд А. ҷиҳати омода кардани шиносномаи техникӣ ва шаҳодатномаи бақайдгирии манзили истиқоматии шаҳрванд Б. 5300 сомонӣ  талаб намуда, баъди омода гардидани шиноснома номабурда аз шаҳрванд “А” 1300 сомонӣ гирифта, ба ӯ ҳарчи тезтар овардани боқимонда маблағи 4000 сомониро талаб намуд.

Ҳангоми гузаронидани чорабиниҳои оперативӣ – тафтишотӣ Ҳотамов Ш.Г. баъди аз шаҳрванд “А” гирифтани маблағи 4000 сомонӣ дастгир карда шуда, маблағи мазкур аз ӯ ҳамчун далели шайъӣ ёфта гирифта шуд.

Гуфта мешавад, ки нисбати Ҳотамов Ш.Г. бо моддаи 247 қисми 2 бандҳои “в,г”-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди тасдиқи фикри айбдоркунӣ ба суд ирсол карда шуд.

Аммо дар хабари Ожонсӣ гуфта нашудааст, ки ин амал кай анҷом шудааст ва ҳамчунин назари худи айбдоршаванда ва вакили дифои ӯ, ё наздиконаш маълум нест.