Ҳамасола рӯзи 23 май дар Тоҷикистон, Рӯзи ҷавонон таҷлил карда мешавад. Ба муносибати ин рӯз, рӯзи 21-уми май Эмомалӣ Раҳмон бо ҷавонон мулоқот анҷом дод.

Дар оғози суханрониаш ӯ қайд кард, ки ӯ аввалин мулоқоти худро бо ҷавонон ба ҳайси роҳбари давлат 17 марти соли 1994 анҷом додааст. Ба гуфтаи Раҳмон, масъалаҳои асосӣ ва вазифаҳои он вохӯрӣ, хомӯш кардани оташи ҷанги шаҳрвандӣ ва муттаҳидсозии ҷавонон дар ин давраи хеле душвор ва ба фаъолияти эҷодӣ равона кардани онҳо буд.

Мисли ҳарвақта Раҳмон имрӯзро бо 30 соли пеш муқоиса намуда гуфт, ки агар дар соли 1992 дар кишвар ҳамагӣ 13 муассисаи таҳсилоти олии касбӣ буд, ки дар онҳо 70 ҳазор донишҷӯ таҳсил мекард, пас соли 2021 дар кишвар 41 муассисаи олии таълимӣ бо 245 ҳазор донишҷӯ фаъолият доранд.

Дар ин вохӯрӣ Раҳмон аз суиистифодаи фаровони гурӯҳҳои террористиву ифротӣ аз фанновариҳои навин ва бахусус имконоти Интернет гуфта қайд намуд, ки “солҳои охир 70 фоизи шахсони ба сафи ҷангиёни кишварҳои дигар, аз ҷумла Сурияву Ироқ шомилшуда аз байни муҳоҷирони меҳнатӣ тавассути шабакаҳои интернетӣ ҷалб ва истихдом гардидаанд.”

Бино ба иттилои Эмомалӣ Раҳмон, дар вақтҳои охир нисбат ба 1660 нафар шаҳрвандони то 30 – сола, ки 41 нафари онҳо ноболиғ мебошанд, барои иштирок дар задухӯрдҳои мусаллаҳона дар ҳудуди кишварҳои хориҷӣ парвандаҳои ҷиноятӣ кушодаанд.

Эмомалӣ Раҳмон сабабҳои асосии майл пайдо кардани одамон ба хурофот, ифротгароӣ ва радикализми диниро, ба бесаводӣ рабт дод.  

Дар ин робита ӯ гуфт, ки бояд ҳамкориҳоро байни мақомоти ҳифзи ҳуқуқ, Вазорати маориф ва илм, Кумитаи кор бо ҷавонон ва варзиш, волидон ва фаъолон тақвият додан лозим аст, то ҷинояткории ноболиғон ва ҷавонон пешгирӣ карда шавад.

Дар идома ӯ гуфт: “Шумо, фарзандони азиз, ҳеҷ гоҳ виҷдону имони худро нафурӯшед, ба Ватани маҳбубамон, миллати бостониамон ва давлати соҳибихтиёрамон ҳаргиз хиёнат накунед. Фаромӯш накунед, ки мардум хиёнат ва хиёнаткорро ба ҳеҷ ваҷҳ намебахшанд. Шумо бояд фахр кунед, ки шумо насли давраи истиқлол ҳастед ва дар як кишвари озод ва соҳибихтиёр зиндагӣ мекунед. Мо ба ҷавонон ҳамчун як нерӯи бузурги созанда такя мекунем ва итминон дорем, ки шумо рисолати бузурги таърихии ба зиммаи шумо супурдашударо бошарафона иҷро хоҳед кард”.

Дар ҳоле Раҳмон аз хиёнат мегӯяд, ки мухолифин фурӯхта шудани заминҳои Тоҷикистонро ба Чин хиёнат медонанд ва мегӯянд ин амал нобахшиданист.

Илҳомҷон Ёқубов яке аз фаъолони сиёсӣ дар саҳифаи фейсбукиаш зери ин хабар менависад, “Фаромӯш накунед, ки мардум хиёнат ва хиёнаткорро ба ҳеҷ ваҷҳ намебахшанд. Бале то қиёмат миллат замине,ки ба Чин фурӯхта шуд ва хиёнати бузурге анҷом шуд ва ҳоло ба Ворух хиёнат шуда истодааст ҳеҷ гоҳ фаромӯш намекунад”.

Вакилони Маҷлиси намояндагон ва хизматчиёни давлатии ин дастгоҳ, маоши панҷрӯзаи худро ба сандуқи хайрияи Кӯлоб гузарониданд. Дар ин бора расонаи ҳукуматии “Ховар” хабар медиҳад.

Ба навиштаи “Ховар” ин маблағ барои кумак ба сокинони аз офатҳои табиӣ зарардидаи шаҳру навоҳии Кӯлоб равона мешавад. Дар бораи миқдори маблағ чизе гуфта нашудааст, аммо қайд карда мешавад, ки он барои бунёди ду хонаи нав кифоят мекунад.

Ёдовар мешавем, ки рӯзи 11 май дар натиҷаи боронҳои шадид дар ҳудуди як қатор ноҳияҳои вилояти Хатлон ва ноҳияҳои тобеи ҷумҳурӣ селу обхезӣ ба вуҷуд омад, ки дар натиҷа боиси марги 9 нафар гардид.

Ҳамчунин дар натиҷаи он хонаҳои сокинони маҳаллӣ хароб гардида, роҳҳо ва дигар иншооти муҳимми иқтисодӣ осеб дидаанд.

Дар Тоҷикистон як Комиссияи ҳукуматӣ таъсис дода шудааст, ки хисороти воридшударо муайян ва ҳамаи паёмадҳои онро бартараф хохад кард.

Дар ҳайати ин комиссия роҳбарони Вазорати умури дохила, Кумитаи давлатии амнияти миллӣ ва Кумитаи ҳолатҳои фавқуллода ҳамчунин роҳбарони вазорату идораҳои марбутаи Тоҷикистон шомил ҳастанд.

Суди ноҳияи Калинини Уфа, шаҳрванди 35-солаи Ҷумҳурии Тоҷикистон Рустам Замоновро барои вайрон кардани режими будубош дар Русия 2 ҳазор рубл ҷарима кард. Дар ин бора “Коммерсант” хабар медиҳад.

Бино бар иттилои Идораи ФСБ дар Бошқирдистон, ӯ ба аъзои “Ҳизби наҳзати исломии Тоҷикистон” кумак мерасонидааст.

Тибқи иттилои хадамоти матбуоти муштараки додгоҳҳои Бошқирдистон, додгоҳ ӯро дар қонуншикании маъмурӣ гунаҳгор дониста, амр додааст, ки бо роҳи иҷборӣ аз марзи давлатӣ берун карда шавад.

Дар ҳоли ҳозир дар куҷо ва дар кадом ҳолат қарор доштани ин шаҳрванди Тоҷикистон маълум  нест.

То ҳол назари Замонов ва наздиконаш низ дар ин бора дастраси расонаҳо нашудааст.

Бо пайдо шудани маълумоти нав дар ин бора, мо онро нашр хоҳем кард.

Гурӯҳе аз шаҳрвандони Тоҷикистон, ки мехостаанд тариқи Белорус вориди Русия шаванд, нопадид гаштаанд. Шумори онҳо ҳудудан 42-45 нафар гуфта мешавад. Дар ин бора ҳомии ҳуқуқи муҳоҷирон дар Русия, Каримҷон Ёров дар саҳифаи фейсбукиаш хабар дод.

Ёров дар суҳбати видеоии худ аз корбарони шабакаҳои иҷтимоӣ хост дар пайдо кардани шаҳрвандони бедаракшуда кумак кунанд.

“Паём” аз қавли Ёров менависад: “Ҳудуди 42-45 нафар шаҳрвандони Тоҷикистон рӯзи 17 май аз Душанбе ба Минск парвоз мекунанд, то тавассути Белорус вориди Русия шаванд. Гурӯҳе аз тоҷикони “корчаллон” ба онҳо мегӯянд, ки шумо наметавонед бо роҳи қонунӣ аз роҳи заминӣ вориди Русия шавед, аммо мо метавонем кӯмакатон кунем то бо роҳи қочоқ вориди Русия шавед.

Ин гурӯҳ аз ҳар нафар 10 000 рублӣ мегиранд ва онҳоро ба мошинҳои сабукрав савор карда, ба шаҳри дигар мебаранд. Дар онҷо онҳоро ба дасти белорусҳо месупоранд. Белорусҳо муҳоҷирони тоҷикро ба минибусҳо савор карда ба бешае назди марзи Русия мебаранд ва дар онҷо ба нафари дигаре аз ҷониби Русяи месупоранд. Ӯ онҳоро дохилтар мебарад ва мегӯяд, ки сабр кунанд, то фурсати мувофиқ расад.

Муҳоҷирон баъди интизории чандсоата тасмим мегиранд ба гурӯҳҳои майда тақсим шуда ба самти Русия ҳаракат кунанд. Як гурӯҳи ҳаштнафара ва ду гурӯҳи сенафара муваффақ мешаванд ба Русия ворид шуда ба шоҳроҳ бароянд. Ду нафарро барои овардани дигарон мефиристанд, аммо онҳо боқимондаҳоро пайдо намекунанд. Дар тамоси телефонӣ мегӯянд, ки онҳоро ба Белорус баргардондаанд”.

Гуфта мешавад, гурӯҳе, ки вориди Русия шуда ба шоҳроҳ баромада буданд, баъди пурсидани роҳ, аз ҷониби кормандони Хадамоти амнияти федеролӣ (ФСБ) дастгир мешаванд. Онҳоро ҷабрдида эътироф карда ҷарима мекунанд ва ба Белорус бармегардонанд. Онҳо бо Каримҷон Ёров тамос мегиранд, аммо тақдири беш аз 30 нафари боқимонда маълум нест.

Ёров аз корбарони шабакаҳои иҷтимоӣ ва мақомоти дипломатии Тоҷикистон дар Белорусу Русия хоҳиш кард дар пайдо кардани ин гурӯҳи шаҳрвандон кумак кунанд. Ӯ ҳамчунин аз муҳоҷирон хост бо роҳи заминӣ аз Белорус ба Русия нараванд, чун ғайриқонунӣ маҳсуб мешавад.

Пештар муҳоҷирон тариқи Узбекистон ва Қирғизистон ба хотири арзон будани билетҳои парвоз ба Русия сафар мекарданд. Аммо бори аввал аст, ки тоҷикон бо роҳҳои ғайриқонунӣ ба ин кишвар мераванд. Коршиносон ба чунин роҳ рафтани муҳоҷирони тоҷикро дар гаронии аз ҳад зиёди билетҳои парвоз ва оварагию саргардонии шаҳрвандон дар фурудгоҳҳо медонанд.

Ин дар ҳолест, ки гурӯҳе аз шаҳрвандони Тоҷикистон беш аз 10 рӯз буд, ки дар фурудгоҳҳои Душанбе ва Хуҷанд билетҳо дар даст мунтазири парвоз ба Маскав ва Қазон буданд. Баъзе аз муҳоҷирон то 15 ҳазор сомонӣ билет дарёфт карда буд, аммо ширкати ҳавонавардии Тоҷикистон ба ширкати русии “Северный ветер”, ки муҳоҷирон аз он билет харида буданд, иҷозати парвоз надод ва дар натиҷа муҳоҷирон саргардон беш аз як ҳафта дар фурудгоҳҳо банд монднд. Аммо дирӯз қисме аз онҳо ба Русия бурда шуданд.