Додгоҳи шаҳри Душанбе ҳукми ду гумонбар дар қатли ду духтари ҷавон дар ноҳияи Варзобро содир кардааст. Дар ин бора сомонаи додгоҳи шаҳри Душанбе хабар дод.

Бино ба навиштаи сомонаи додгоҳи пойтахт, додгоҳи шаҳри Душанбе рӯзи 22 – декабр ҳукм алайҳи ду сокини 28-солаи пойтахт – Дониёр Сафаров ва Саъдулло Раупов, ки дар куштори ду духтар Ҳайдарова Замирамоҳ ва Меҳрафрӯзи Холмирзоро, ки бо бераҳмии махсус содир шудааст, айбдор мешаванд, эълон кард.

“Ҳамин тариқ, бо ҳукми суд Сафаров Дониёр Каримович дар содир намудани ҷиноят бо моддаи 104 қисми 2 бандҳои “в, з” Кодекси ҷиноятии Тоҷикистон ба маҳрум сохтан аз озодӣ ба муҳлати 22 сол бо адои ҷазо дар колонияи ислоҳии низомаш сахт ва Раупов Саъдулло Абдуллоевич бо моддаи 104 қисми 2 бандҳои “в, з, п” Кодекси ҷиноятии Тоҷикистон ба якумра аз озодӣ маҳрум сохтан, бо адои ҷазо дар колонияи ислоҳии низомаш махсус маҳкум карда шуданд”

Пештар ВКД аз пайдо шудани ҷасади ду ҷавонзани гумшуда, ки аз онҳо Ҳайдарова Замирамоҳ ва Меҳрафрӯзи Холмирзо ном мебаранд хабар дод. Ин ду духтар дар пайи озори ҷинсӣ ба қатл расонда шудаанд.

Тибқи иттилои ВКД, Ҳайдарова Замирамоҳ, соли таваллудаш 1991, сокини кӯчаи Алишер Навоии шаҳри Душанбе ҳанӯз моҳи январи соли 2018 ва Меҳрафрӯзи Холмирзо, сокини 18-солаи ноҳияи Исмоили Сомонӣ моҳи апрели соли равон бедарак шуда буданд. Ҷасади ҳардуяшон ахиран дар як ғоре дар теппаҳои болои деҳаи Харангони ноҳияи Варзоб пайдо карда шуд.

Гуфта мешавад, баъд аз тафтишот муайян карда шуд, ки дар қатли ин ду духтар Дониёр Сафаров ва Раупов Саъдулло даст доранд.

Дар 11 моҳи соли равон кормандони Вазорати корҳои дохила дар вилояти Суғд нисбати волидайни наврасону ноболиғон 1837 санад тартиб додаанд.

Гуфта мешавад, ба 749 нафар шаҳрвандон огоҳӣ дода шуда, 948 нафар ҷарима гардида, 136 санад дар додгоҳҳои шаҳру ноҳияҳои вилоят дар зинаи баррасӣ қарор доштааст.

Акбар Шарифов сардори маркази иттилоотии Раёсати Вазорати корҳои дохилии Ҷумҳурии Тоҷикистон дар вилояти Суғд ба “Ховар” гуфтааст:

“Кормандони шуъбаи пешгирии ҳуқуқвайронкунӣ байни ноболиғон ва ҷавонони ВКД дар шаҳри Хуҷанд чанде пеш ҳангоми гузаронидани санҷишҳои шабонаю рӯзона дар толорҳои бозӣ ва нуқтаҳои хизматрасонӣ далелҳои риоя накардани талаботи Қонуни Ҷумҳурии Тоҷикистон “Дар бораи масъулияти падару модар дар таълиму тарбияи фарзанд”-ро ошкор намуданд”.

Дар идома гуфтааст, шомгоҳон се шогирди гимназияи №4 ва як хонандаи мактаби рақами 13-и шаҳри Хуҷанд дар утоқи бозиҳои компютерӣ буданд.

Инчунин 7 нафар толибилмони гимназияи №4 шаҳри Хуҷанд рӯзона низ дар муассисаҳои ба ин монанд ва бозиҳои мамнӯъ бозӣ мекарданд.

Ҳамчунин зикр намудааст, ки дар ин утоқҳои бозӣ ва марказҳои хидматрасонӣ ба ҷуз наврасон донишҷӯёни донишгоҳҳои гуногуни шаҳр низ ҳузур доштаанд, ки аз ҷумла, 13 донишҷӯи факултетҳои физика, иқтисод ва технологияи ДДХ ба номи академик Б. Ғафуров, 1 донишҷӯи факултаи молия ва баҳисобгирии ДДХ, 3 донишҷӯи литсейи касбии N31 шаҳри Хуҷанд ва 7 донишҷӯи Коллеҷи тиббии шаҳри Гулистон низ ба қайд гирифта шуданд.

Ҳамчунин аз ҳолати марказҳои компютерӣ изҳори нигаронӣ намудааст, ки тавсияи табибонро оиди пешгирӣ аз коронавирус риоя намекунанд ва ба ҳеч талабот ҷавобгӯй нестанд, ҳатто муштариёни ин марказҳо фосилаи иҷтимоӣ ва ниқоби тиббӣ надоштаанд.

Дар Вилояти Мухтори Кӯҳистони Бадахшон дар 11 моҳи соли 2020 541 ҷиноят ошкор гардида, 304 силоҳи гуногун мусодира шудааст.

Шабаки “ТВ Бадахшон” суханронии Рустам Мирзомуродзода сардори Раёсати корҳои дохилии ВМКБ-ро нашр кард, ки номбурда дар гузориши солонаи худ оиди ҷиноёти содиршуда дар ҳудуди вилоят гуфта, “дар якҷоягӣ бо ММИҲ вилоят аз гурӯҳҳои муташаккили ҷиноятӣ ва шахсони алоҳида дар шаҳру ноҳияҳо 304 силоҳи оташнишон, аз ҷумла 36 силоҳи оташнишони тамғаи автомат Калашников, як адад грантамёти зидди тонкӣ, 24 адад писталети Макаров, 28 адад карабин, 99 адад ТОЗ, 80 адад милтиқи шикорӣ ва 8 адад найзакорд мусодира карда шудааст”.

Ба гуфтаи сардори Раёсати корҳои дохилии ВМКБ дар 11 моҳи сипаригардида «миқдори зиёди лавозимоти ҷангӣ: аз қабили 2460 тирҳои гуногун, 87 тирдон, 39 нориҷак, 7 снайради гуногун, 32 кг маводи тарканда, 12 адад капсулаҳои тарконанда, 3 адад гулӯлаи тарконанда, 3 адад аманит, 1 адад амунал ва дигар лавозимоти ҷангӣ мусодира карда шудааст”.

Тибқи омори ироа кардаи Мирзомуродзода, дар маҷмӯъ дар ВМКБ давоми соли ҷорӣ 541 ҷиноят сабт шудааст. Дар ин миён 10 нафар шахсоне, ки дар ҷустуҷӯи расмӣ қарор доштан дастгир гардидаанд, ки 15 дарсади ҷинояткорони дастгиршуда сокинони шаҳри Хоруғ будаанд.

Ҳамчунин дар идома зикр гардидааст, ки нисбати 13 нафар парвандаи ҷиноятӣ боз карда шудааст, ки он нафарон дар ин давра 12 ҳолати дахолат ва монеъ гардидан ба фаъолияти кормандони ҳифзи ҳуқуқ, махсусан дар дидбонҳои амалкунандаи БДА ба қайд гирифта шудааст.

Гуфта мешавад дар вилоят дар робита ба гардиши маводи нашъадор 22 ҷиноят ба қайд гирифта шудааст, ки дар натиҷаи он 86 кг 110 грамм мавод дарёфт шудааст.

Дар шабакаи Ютуб зери ин хабари шабакаи телевезионӣ мардум вокунишҳои зиёде нишон додаанд. Корбарон иддао доранд, ки коррупсия дар Бадахшон зиёд аст, чаро дар бораи он омор намедиҳанд. Ба қавли онҳо, чун худи мақомоти қудратӣ дар он даст доранд, барои ҳамин омор намедиҳанд.

Инчунин як корбари дигар менависад, ки шумо куҷоро назорат доред? Мардум силоҳро бекумаки шумо аз куҷо пайдо мекунад?

Дар ноҳияи Ёвон як ҷавони 21 соларо бо иттиҳоми авбошӣ ба се соли зиндон маҳкум кардаанд. Дар ҳукмномаи суди ноҳия гуфта шудааст, ки шаҳранди 21 сола зодаи ноҳияи Ёвон кӯчаи Абдураҳмони Ҷомӣ Эсанов Исфандиёр бо моддаи 237 қисми 2 банди “б”-и Кодекси ҷиноятии Ҷумуҳурии Тоҷикистон бо маҳрум сохтан аз озодӣ ба муҳлати се сол ҷазо дода шавад.

Банди “б” қисми 2-и моддаи 237 авбошӣ аз ҷониби шахсон ё гурӯҳи шахсон бо маслиҳати пешакӣ ё муташаккил ё такроранро дар назар дорад. Адои муҳлати ҷазои ин ҷавон дар муассисаҳои ислоҳоти низомаш сахт муқаррар шудааст. Аммо хешовандони ҷавон ба ҳукми суд розӣ нестанд ва даъво доранд, ки ӯро ғайри одилона муҳокима карда ба қавле “говсуд” кардаанд.

Яке аз павандони наздики Эсанов Исфандиёр ба “Аздо тв” гуфт, ки муфаттиш аризаро тағйир дода ба додрас нишон додааст. Моҷаро ба қавли пайвандони ин ҷавони маҳкумшуда аз он ҷо сар зад, ки кӯдакон ҳангоми бозӣ дар кӯча дасти якдигарро газидаанд. Ин боис шуда, ки байни ду оила моҷаро сар бизанад ва дертар марди ҳамсоя ин ҷавонро як шаппотӣ задааст.

Пайвандонаш мегӯянд, танҳо пас аз задани шаппотӣ ӯ худро нигаҳ дошта натавониста, зарбаи ҷавобӣ медиҳад. Марди ҳамсоя пас аз ин ба сари ҷавон силоҳ мекашад ва таҳдиди паррондан мекунад. Манбаи мо мегӯяд, шоҳидон тамоми ин моҷароро дидаанд ва ӯ дар ҳайрат аст, ки чигӯна бо вуҷуди силоҳ кашидан ӯ боз аз болои Исфандиёр ба пулис шикоят бурдааст ва оё бо худ силоҳ доштани ин мард қонунӣ аст?

Марди ҳамсоя, ки тақрибан 45 сол дорад Саттор ном дошта, вале манбаи “Аздо тв” насаби ӯро намедонад. Гуфт, ӯ дар бозор нигаҳбон кор мекунад. Ба қавли пайвандон, муфаттиш парвандаро якҷониба ва бидуни он ки гуфтаҳои шоҳидонро биёрад, онро ба додгоҳ бурдааст.

Онҳо мегӯянд, ҳоло вакили дифоъ кироя кардаанд ва аз болои муфаттиш, Ниёзов Комил ба Дастгоҳи Президент ва Додситони кул шикоят бурдаанд. Ҳоло ҷавоби ин ду ниҳодро мунтазиранд ва умед доранд, ки Исфандиёр озод мешавад, чун ба қавли онҳо ӯ гуноҳе надорад. Аммо дар ин қазияи назари муфаттиш ва ҷониби дигар дастрас нест.