Як ширкати ҳавонавардии нав хатсайрҳояшро байни Душанбе ва шаҳрҳои Русия барқарор карданист.
“Oблава” оғоз шуд. Рабудани як ҷавон дар шаҳри Ҳисор аз ҷониби Комиссарияти ҳарбии ин шаҳр.
Анҷумани ҳуқуқи инсон дар Осиёи Миёна: Австрия дар истирдоди Ҳизбуллоҳ Шовализода ба Тоҷикистон ба хато роҳ додааст.
Байни Бонки давлатии амонатгузории Ҷумҳурии Тоҷикистон “Амонатбонк” ва Бонки миллии фаъолияти иқтисоди хориҷии Ҷумҳурии Узбекистон Шартнома оид ба шартҳои умумии гузаронидани амалиёти банкнотӣ ба имзо расонида шудаст, ки ҳадафаш ба роҳ мондани амалиёти банкнотӣ миёни бонкҳо мебошад.
Санади мазкурро раиси Бонки давлатии амонатгузории Ҷумҳурии Тоҷикистон Сироҷиддин Икромӣ ва раиси Бонки миллии фаъолияти иқтисоди хориҷии Ҷумҳурии Узбекистон Алишер Мирсоатов, дар шаҳри Душанбе имзо карданд.
Ба навишти хабаргузории “Ховар” дар ҷараёни вохӯрӣ Сироҷиддин Икромӣ ва Алишер Мирсоатов масъалаҳои марбут ба таҳкими ҳамкории байнибонкии ду кишвар, афзоиш додани гардиши савдои байни ду давлат зиёд намудани ҳаҷми қарздиҳӣ ба соҳибкороне, ки ба воридоти молу маҳсулоти мавриди ниёзи мардум машғуланд ва масъалаҳои марбут ба коҳиши эҳтимолии фоизи қарзҳои байни бонкиро матраҳ намуданд.
Гуфта мешавад, Алишер Мирсоатов дар доираи ҷаласаи 7-уми Комиссияи байниҳукуматии Тоҷикистон ва Узбекистон оид ба ҳамкории тиҷоративу иқтисодӣ , ки дар Душанбе баргузор гардид, ташриф овардааст.
Анҷумани ҳуқуқи инсон дар Осиёи Марказӣ, як созмони қароргоҳаш дар Аврупо, гуфтааст, ки Австрия ҳангоми ихроҷи паноҳҷӯи тоҷик Ҳизбуллоҳ Шовализода ба Тоҷикистон ба хато роҳ додааст ва имкони баргардондани ӯро баррасӣ дорад. Дар ин бора Радиои Озодӣ хабар дод.
Надежда Атаева, раиси Анҷумани ҳуқуқи инсон дар Осиёи Марказӣ дар Аврупо, ба ин сомона гуфтааст:
“Вакилони мудофеъ дар Австрия маълумоти муфассалро дар бораи қазияи Ҳизбуллоҳ пешниҳод карданд. Маълум мешавад, мақомоти додгоҳии Австрия дар таҳқиқи қазияи ӯ беинсофона бархӯрд кардаанд. Инчунин, муносибати сарди мутахассисони идораи муҳоҷирати ин кишварро мушоҳида намудем.”
Ҳизбуллоҳ 29 сол дошта ӯро мақомоти Тоҷикистон ба узвият дар Ҳизби наҳзати исломӣ Тоҷикистон, хиёнат ба давлат ва ғайра муттаҳам намуда, ба мӯҳлати 20 сол равонаи зиндон кардаанд. Дар ҳоле, ки масъулони ҲНИТ мегӯянд Шовализода ҳеҷ гоҳ узви ин ҳизб набудааст.
Дар хусуси узви ҲНИТ набудани Шовализода, Надежда Атаева мегӯяд, ки
“таҳқиқоти ҳамаҷонибаи Анҷумани ҳуқуқи башар дар Аврупо нишон медиҳад, ки Ҳизбуллоҳ Шовализода узви ин ҳизб набудааст ва додгоҳи Австрия таҳти таъсири хабари мақомоти Тоҷикистон ва Интерпол қарор гирифтааст.”
Пештар додгоҳи федеролии Австрия, истирдоди паноҳҷӯ Ҳизбуллоҳ Шовализодаро аз Вена ба Тоҷикистон ғайриқонунӣ хонда, ҳукм содир намуд, ки ҳаққи вуруди ӯ ба ин кишвари аврупоӣ барқарор карда шавад.
Юсуф Раҳмон додситони кулли Тоҷикистон дар нишасти матбуотии рӯз 14-уми июл дар ҷавоб ба ин ҳукм гуфт, ки “қарори додгоҳи Австрия дар Тоҷикистон амал намекунад” ва қайд намуд, ки нисбати “Шовализода бар асоси далелҳои ҷамъоваришуда парвандаи ҷиноятӣ ва дар асоси кирдорҳои ғайриқонунии худ дар дохили Тоҷикистон ба ҷавобгарӣ кашида шуд”.
Шовализода пештар аз кишвари Утриш дархости паноҳандагӣ кард, вале дархосташ рад шуд ва ӯро рӯзи 5 март баъди ду моҳи нигоҳ доштан дар боздоштгоҳи Вена ба мақомоти Тоҷикистон таслим карданд. Фаъолони тоҷик дар шаҳри Вена барои насупурдани Шовализода ба Душанбе эътироз карданд, вале мақомоти Австрия ӯро рӯзи 4 март ба Истамбул ва аз онҷо ба Душанбе фиристод.
Фаъолон мегуфтанд, дар сурати бозпас фиристодани ӯ ба Душанбе ӯро шиканҷаву зиндон интизор аст. Мақомоти Тоҷикистон даъво доштанд, ки дар бораи гунаҳкор будани Ҳизбулло Шовализода ба мақомоти Австрия далелҳо пешниҳод кардаанд. Ба гуфтаи онҳо, номбурда чаҳорумин нафар аст, ки бо дархости онҳо ба Тоҷикистон истирдод шудааст.
Як сокини шаҳри Ҳисор бо ирсоли навор ба идораи “Аздо тв” хабар дод, ки дар шаҳри Ҳисор аз ҳоло маъракаи зуран ҷалб намудани ҷавонон ба хидмати ҳарбӣ ё худ “облава” оғоз шудааст.
Ин сокин мегӯяд, имрӯз 02. 10. 2020 дар маркази шаҳри Ҳисор назди бинои “Хуросон”, ки дар қабати шоҳроҳи Душанде – Турсунзода ҷойгир аст, як нуқтаи таъмири мошинҳо фаъолият мекунад, ки дар он таъмиргоҳ як ҷавон бо номи Алиҷон соли таваллудаш 2000 оиладор, ҳамчун устои мошинҳо кор мекардааст, имрӯз кормандони Комиссариати ҳарбии шаҳри Ҳисор омада ин ҷавонро зуран бо худ бурдаанд. Шоҳидон мегӯянд, ин ҷавон бо вуҷуди он ки асноди лозимаро барои хидмат накардан дар сафи қувваҳои мусаллаҳ доштааст, ба он нигоҳ накарда зуран ба мошин савор карда бурданд.
Масъалаи ҷалби ҷавонон ба сафи қувваҳои мусаллаҳ ба шакли иҷборӣ яке аз мушкилоти умдаи Тоҷикистон ба ҳисоб меравад. Ин раванд баъд аз оғози ҷангҳои дохилӣ солҳои 92 асри гузашта оғоз ёфт. То ҳол борҳо ин мавзӯъ дар доираҳои гуногун, ҳатто дар ҳузури худи раисҷумҳур баҳсу баррасӣ шудааст, аммо то ҳол ҳал ношуда боқӣ мондааст.
Ин дар ҳолест, ки дар мавсимҳои гузашта расонаҳои Тоҷикистон аз қонуншикании кормандони Комиссариатҳои ҳарбӣ зимни ҷалби наваскарон гузориш дода буданд. Дар яке аз гузоришҳо гуфта мешуд, дар шаҳри Исфара волидон шикоят кардаанд, ки Мақомот болояшон фишор овардаанд, то фарзандонашонро аз муҳоҷирати меҳнатӣ баргардонанду ба хидмати ҳарбӣ равон кунанд.
Агар намеоянд, бояд пул пардохт кунанд. Ба ҳамин монанд аз чанд шаҳру ноҳияҳои вилояти Хатлон низ гузоришҳо нашр шуда буд. Аммо Мақомот ҳамеша рад мекунанд, ки дар ин росто қонуншиканӣ накардаанд ва таъкид мекунанд, ки танҳо корҳои фаҳмондадиҳӣ барои зарурати анҷоми хидмати ҳарбӣ дар байни ҷавонон мегузаронанд.
Хабарҳои зуран тавассути “Облава” рабудани ҷавонон аз бозору кӯчаҳо ва лату кӯб шудани наваскарон аз ҷониби ҳамхидматонашон, ҳатто ба марг оварда расондани онҳо зиёд нашр мешавад. Ба гуфтаи коршиносон ин ва дигар омилҳо сабаб шудааст, ки мардум намехоҳанд фарзандонашонро ба хидмати ҳарбӣ фиристанд.
Ин дар ҳолест, ки дар Тоҷикистон ба хидмати ҳарбӣ танҳо фарзандони ба қавле мардуми “сатҳҳои поёнӣ” ё мардуми оддӣ мераванд. То ҳол боре нашудааст, ки фарзанди як маснабдор ба хидмати ҳарбӣ рафта бошад.
Дар назар аст, як ширкати ҳавопаймоии нав аз Тоҷикистон ба шаҳрҳои Русия парвҳзоро анҷом диҳад. Ин ширкат “Флай Юнион” ном дошта аз Бохтар ба дигар шаҳру минтақаҳои Русия парвоз анҷом медиҳад.
Радиои Озодӣ аз қавли Елена Михеева, сухангӯи “Росавиатсия”, идораи масъули танзими нақлиёти ҳавоӣ дар Русия, навиштааст:
“Ин кор мувофиқи шартномаи дуҷониба сурат мегирад, қарор аст, парвозҳо дар масири Бохтар-Маскав, Бохтар- Санкт-Петербург ва Бохтар-Екатеринбург анҷом шаванд”.
Михеева гуфтааст:
“Ин ширкати Тоҷикистон аст ва вақте, ки парвозҳои мунтазам миёни ду кишвар аз сар гирифта шаванд, ин ширкат ҳам ба мусофиркашонӣ дар ин масирҳо корро оғоз мекунад”.
Ба гуфтаи Михеева то ба имрӯз маълум нест, ки парвозҳои мунтазам миёни Тоҷикистону Русия кай барқарор мешаванд.
“Росавтиатсия” як ниҳоди иҷрогар аст ва тасмими азсаргирии парвозҳои мунтазам миёни Тоҷикистону Русияро ситоди мубориза бо COVID-19 дар Русия муқарар мекунад, гуфтааст, сухангуйи “Росавтиатсия”.
Чанде қабл Русия ба чанд кишварҳои ИДМ парвозҳои доимиро ба роҳ монд, ки номи Тоҷикистон дар рӯйхати он набуд.
Аз 20-уми марти 2020 парвозҳои мунтазам миёни Тоҷикистон ва Русия бинобар хуруҷи пандемияи короновирус баста шуданд. То ба имрӯз барои бозгардондани шаҳрвандони Тоҷикистон аз Русия даҳҳо парвози чартерӣ, аз тарафи ширкати “Сомон Эйр”, муталлиқ ба Ҳасан Асадуллозода додарарӯсӣ Эмомаплӣ Раҳмон анҷом шудааст.
Бино ба иттилои сафорати Тоҷикистон дар Русия, бо ин парвозҳои четерӣ 45 ҳазор шаҳрванди Тоҷикистон аз Русия ба ватан баргаштаанд, вале муҳоҷирон то ҳол аз шеваи номнавис ва фиребхӯрдану дарёфти билети бозашт ба кишвар ва мушкилоти дигар шикоят мекунанд.
Вазорати корҳои дохилии Тоҷикистон ҳодисаи сӯиқасд ва лату кӯби Раҳматилло Зойиров, раиси ҲСДТ-танҳо ҳизби мухолифи фаъол дар ватан аз тарафи афроди номаълумро такзиб кард.
Ин ҳодиса бегоҳи 22 сентябр дар наздикии манзили зисти ҷаноби Зойиров сурат гирифта буд. Вазорати дохилӣ бо интишори як баёнияи расмӣ изҳор дошт, ки раиси ҲСДТ-ро сагаш ба ҷуйбор афтондааст. Ва, бо ҳамин дурустии ҳодисаи ҳамла аз тарафи афроди номаълум ба ин сиёсатмадори мухолифи режими ҳоким дар кишварро таҳти шубҳа қарор дод.
Ин дар ҳолест, ки худи Зойиров баъди ду рӯз амали сӯиқасд ба ҷонашро ба мавзеъгириҳои ахири сиёсиаш дар робита ба интихоботи раёсати ҷумҳурӣ ва таҳрим эълон кардани он аз сӯи Шӯрои сиёсии ин ҳизб ва пайгирии сафарҳои ахири президент Раҳмон ба навоҳӣ, марбут донист:
“Дуруст, ҳизби мо ин интихоботро таҳрим кард, вале таҳрим кардан низ як навъи ширкат дар интихобот аст. Вақте шахс интихоботро таҳрим мекунад, вай метавонад сафар кунад, маълумот ҷамъ орад ва нишон диҳад, ки ин интихобот ғайриқонунӣ аст. Яъне, таҳрим ба маънии хомӯш нишастан дар як ҷой нест. Таҳрим низ як навъи ширкат дар интихобот, вале бар зидди ин интихобот аст. Мо ба хотири эътироф накардани натиҷаҳои интихобот дар он ба ин тарз ширкат мекунем.”
Раҳматилло Зойиров дар сӯҳбатҳояш бо хабарнигорон изҳор дошт, ки барои таҳқиқи ин сӯиқасд ба ниҳодҳои ҳифзи ҳуқуқ муроҷиат намекунад. Зеро ба гуфтаи ӯ ин як кори бидуни натиҷа ва ҳадар додани вақт аст. Чунки мегӯяд, дар се соли пеш ҳам айни ҳамин ҳодиса ба вуқӯъ пайваста буд ва он вақт ҳадди ақал ду нафар аз ҳамлагарон шиносоӣ шуданд, аммо мақомот то ба имрӯз коре ба иҷро нарасониданд ва тафтишотро бенатиҷа гузоштаанд. Аз ин рӯ, ӯ ин бор кадом даъво ва муроҷиате накардааст:
“Ман ба мақомоти ҳифзи ҳуқуқ бовар надорам. Ба ин хотир аризае ҳам нанавиштам. Ҳамин хабари ман дар шабакаҳои иҷтимоӣ ва расонаҳо худ бояд кофӣ бошад. Се сол пеш низ ҳамла сурат гирифта буд. Он замон бархе аз ҳамлагаронро шинохта будам, вале дар муддати се сол дар таҳқиқи ин ҳодиса ҳеч пешравӣ нест. Баръакс, мақомот ҷонибдорони ҳизб ва наздиконам ва ҳамсояҳои маро зери фишор қарор медиҳанд. Ба ин хотир, ба хулосае расидам, ки набояд бо аризаи нав вақти худро беҳуда сарф кунам. Бавижа, ки ман ҳатто чеҳраи ҳамлагаронро надидаам, танҳо медонам, ки ду нафар буданд ва яке зарба заду дувумӣ тела дод. Чеҳраҳояшонро надидам ва ҳатто намедонам чанд сола буданд.”
Бад-ин ҷиҳат баёнияи Вазорати корҳои дохилии кишвар дар робита ба ҳодисаи мазкур мақоли мардумии “девори намкаш”-ро ба ёди кас меоварад. Бубинед, агар Вазорати корҳои дохила девори намкаш набуд ва дахлу алоқае ба ин ҳодиса надошт, чаро баёнияи расмӣ содир кард?! Ин ҳам дар ҳоле аст, ки Зойиров бо сароҳат мегӯяд, ба мақомоти ҳифзи ҳуқуқ руҷӯъ накардааст. Мову шумо хуб медонем, ки Вазорати корҳои дохилаи Тоҷикистон дар чунин мавридҳо гӯшашро ба карӣ мезанад ва ҳамон баҳонаи сари забонии худ: “ба мо касе муроҷиат накардааст”, “шикояте ворид нашудааст”-ро пешкаш мекунад. Бахусус, агар чунин иттифоқот ба шахсиятҳое назири Зоиров, ки мухолиф ва мунтақиди режими ҳоким дар кишвар мебошанд, пеш ояд, тамоман сукут меварзанд, ингор чизе нашуда бошад.
Аммо ин бор чаро фук халонд? Гузашта аз ин баёнияи расмӣ содир карда ҳамсари Зойиров ва як ҳамсояи номаълуму ношиноси ӯро вориди қазия ва шоҳиди ҳодиса мекунад? То инки мардум бовар кунад, Зойировро сагаш озор ва осеб расонидаасту ончи ки ӯ ҳамла мегӯяд, дурӯғ аст.
Баёнияи Вазорати корҳои дохилии Тоҷикистон намунаи дигар ҳамон тавзеҳи бешармона ва таҳқиромези Вазорати адлияи кишвар дар мавриди аз нони заҳролуд ба ҳалокат расидани зиндониён дар дохили автозак ба ҳангоми интиқоли онҳо дар соли гузашта аст. Ба ин маъно, ки мо -ҳукумати Тоҷикистон- ин зиндониҳоро худамон куштем, аммо шуморо мегӯем, ки онҳо аз нон заҳролуд шуданд. Яъне, мо зӯр ҳастем. Мекушематон ва ҷавобатонро ҳам медиҳем. Аз дасти шумо чӣ меояд?
Дурусту дақиқ баёнияи Вазорати корҳои дохилии Тоҷикистон ҳам ҳамин мазмун, ҳамин маъно ва ҳамин паёмро дорад: “Ин худи мо, ин нақшаи мо, ин кори дасти мо аст ки Зоировро латту кӯб кардем. Чунки ӯ барои роҳати зиндагии мо ва ё зиндагии бароҳати мо мушкил эҷод карда истодааст”. Вагарна Вазорати дохилӣ ҳадди ақал як ҳафта ва ё даҳ рӯз мебоист таҳқиқ мекард, Зойировро мебурду бозҷӯӣ менамуд, маҳалли ҳодисаро медид, хулоса корҳои ба истилоҳ “фаврӣ-ҷустуҷӯӣ” анҷом медод, дурбинҳои мадорбастаи атрофро медид, роҳгузарҳоро мепурсид. Вале дафъатан баёния содир кардаву саги Зойировро гунаҳгор эълон кардану ӯро дурӯғгӯ баровардан чи маъно дорад?
Хуб, бигирем гуфту шумо, Зойировро саг кашола кард. Зойиров даст рӯи даст мешинад? (Аслан саги соқ, саги дастомӯз, ки содиқтарин ҳайвони аҳлӣ аст ба ҳеҷ ваҷҳ ба соҳибаш газанд намерасонад) Агар саг нофармонӣ карда занҷир ва ё ресмонашро кашола гирифт, чаро Зойиров то инки ба ҷуйбор афтад онро раҳо накард? Магар фаҳму фаросати як инсон ин қадар кам аст ки думодуми саг мераваду ба ҷӯйбор меафтад? Ҳамон занҷир ва ресмонро халос мекунаду ҷонашро раҳо кард, Магар ҳамин тавр не? Вале агар саг “қаҳраш” баромадаву хашмгин шудааст, пас чаро изи дандон ва ё нақши хароши чанголҳои он дар бадани Зойиров нест? Либосҳои аз изи дандони саг даридаи Зойировро Вазорати дохила муоина кардааст? Чаро сару рӯй ва ё дасту пойи Зоировро гоз нагирифтааст, хуншор накардааст? Ва ё саг тела доду ҳамла карду ба ҷубор афканд? Чаро он ҳамсояи беинсоф, ки шоҳиди ВКД аст омада Зойировро кӯмак накард? Аммо рафту ба ВКД “кӯмак” кард ва “алиби” сохт ва дар навор қироат кард? Кӣ ба ин “баёния”-и Вазорати умури дохилӣ-ҳимоятгари ҳуқуқу тартиботи шаҳрвандон ва ҷомеа бовар мекунад? Худи Вазорат ба ин баёнияаш бовар мекарда бошад? Қатъан ва абадан бовар намекунад. Дар асл мақсади нашри баёния ҳам ин аст ки бигӯянд, бале, Зойировро мо худамон задем! Ин аст паёми таҳтонӣ ва зимнии ин баёния, ки на танҳо ба Зойиров дахл дорад.
Зойиров як шахсияти матраҳ ва муътабари ҷомеа ва як мутахассиси умури ҳуқуқ, ки ба ҳайси вакили дифоъ дар садҳо мурофиаҳои додгоҳӣ ширкат варзида ва бо тамоми ҷузъиёти кори “оперативникҳо”-ву “следствия” ошност, чи тавр метавонад ба ҳақи худ тӯҳмат ва “кори саг”-ро бори дӯши одамон кунад? Ва, ҷолиб ин ҷост, ки ин саг бо забони одамӣ Зойировро таҳдид кардаст: “ба Ӯзбакистонат рав”. Агар Зойировро фиристоданиед ба Узбакистон бо боқии узбакҳои Тоҷикистон чи кор карданиед? Ин луқмаро ба даҳани ҳамлаварон бо чи мақсаду нақшае гузоштаед? Агар Зойиров Узбакистон рафт, чи хоҳад гуфт? Манро узбак гуфта аз Тоҷикистон пеш карданд? Як раҳ ба оина нигоҳ кунед, ки шумо ба узбакҳо “ухша” мекунед ё Зойиров? Ба қошу қавора, чашму бинӣ ва ба лабу даҳанатон хуб “синча” кунед. Ҳоло, ки дидед, пай бурдед, кӣ узбактар аст? Шумо ё Зойиров ва кӣ бояд ба Узбакистонаш биравад?
Ин “афроди номаълум”, ки сиёсатмадорони дигарандеш ва хабарнигорони озодро таййи солҳои ахир мавриди азияту шиканҷаи ҷисмонӣ қарор медиҳанд, кианд? Анҷоми ин гуна аъмоли хилофи қавонин ва худсарона ва бидуни муҷозотро дар Тоҷикистон чиҳо ва чаро роҳандозӣ мекунанд? Пушти ин лату кӯб ва азияту озори ҷисмонии рӯшанфикрон ва мухолифон кӣ меистад ва мисоли ин саволҳое дигар, ки чаро то кунун ҳеҷ яке аз ин маворид ошкоро намешавад ва омилин чаро барои ин аъмоли ғайриқонунӣ посух намедиҳанд? Аксарияти мардуми кишварро бар ин хулоса овардааст, ки ба ҷуз аз худи мақомот кӣ метавонад бошад? Ҳадаф ҳам мегӯянд маълум: эҷоди тарсу ваҳшат дар қалбу равони мардум ва идомаи ҳифзи ҳузур дар қудрат. Бо задани Зойиров ва афроди муътабари мухолиф ва мунтақиди ҳукумат, қасд доранд ҷомеа ва шаҳрвандони кишварро ихтор диҳанд, ки ҳамроҳ шудан бо онҳо ва тарафдорӣ аз онҳо чунин паёмад дорад. Осебпазир ва бепуштупаноҳ ва заифу нотавон нишон додани онҳо ҳам ба ин маъно аст, ки агар бо онҳо рафтед, ҳолатон чунин мешавад.
Бо чунин корҳо пушти нерӯҳо ва шахсиятҳои дигарандеш ва озодфикрро холӣ кардан мехоҳанд. Вале магар ин кори як давлат ва кори як ҳукумат аст? Магар идораи мулк ва раҳбари бо халқ бо чунин шева аст? Чӣ фарҳанге ва чӣ сиёсате ва чӣ давлату давлатдориеро ба намоиш мегузоранд? ВКД: “Раҳматилло Зойировро сагаш ба ҷӯй афтонд”. Магар мешавад? Зойиров чаро, агарки саг буд, чунин сӯҳбат мекунад? Аз ин чи манфиат мебинад? Ӯ, ки дар користони интихобот ҳузур надорад. Як сиёсатмадоре аст, ки камтарин таъсире ба равандро надорад, чаро бояд дурӯғ гӯяд? То ҳамин имрӯз ӯ кай дурӯғ гуфт?
Вазорати дохила чаро ба ин қазия ворид шуд? Барои он ба қазия ворид шуд, ки бигӯяд муаллиф ман ҳастам ва на танҳо аз дасти Ятимов чунин корҳо бармеояд. Бехабар аз онки кори рэкет, ки шӯрапушт, кори боевикҳои Фронти халқиро дорад идома медиҳад, аммо бо истифода аз абзори корманди ниҳоди давлатӣ ва ҳамин тавр обрӯ ва ҳайсияти як ниҳоди асосии давлатро ба хоки сияҳ менишонад. Мегӯяд, ки шӯрапуштҳо, муштамзӯрҳо, гушнапурзӯрҳо доранд ҳокимият мекунанд.
Аз сӯи дигар бо интишори ин баёния болои як ҷинояти мудҳиш сарпӯш гузошта масъулиятро аз дӯшаш холӣ кард. Масъулияти ҷустуҷӯ, таҳқиқу ошкорсозии ин қазияро. Ва ҳамин тавр “афроди номаълум”-ро пӯшонд. Ва ин корро қаблан ҳам карда буданд, аз ҷумла се соли пеш бо худи Зойиров ва ҳамин тавр бо афроди матраҳи ҷомеа Раҷаби Мирзо, Ҳикматулло Сайфуллозода, Муҳаммадалии Ҳайит, Далери Шариф, Абдуллоҳи Ғурбатӣ. То кунун ҳеҷ яке аз ин ҳамлаҳои ноҷавонмардона ошкор нашуд ва пурсиш ҳам ин аст, ки вазорати дохила (Ҳукумат) натавонист ва ё нахост? Агар натавонист чаро натавонист ва агар нахост ҳам чаро нахост? Ин дигар рӯшан аст, ки мехоҳанд охирин садоҳои эътирозӣ, охирин шахсиятҳои мухолиф дар ватанро сокит ва суқут диҳанд.
Субҳи ҷумъа 2 октябр президенти ИМА Доналд Трамп дар саҳифат Твиттераш эълом кард, ки натиҷаи озмоиши ӯ ва ҳамсараш дар хусуси доштани COVID-19 мусбат баромадааст. Вай шоми панҷшанбе гуфта буд, ки яке аз ёварони асосии тими интихоботии ӯ Ҳоп Ҳикс, ки дар маъракаи интихоботӣ Трампро ҳамроҳӣ мекард, ба бемории корона мубтало шудааст. Ва ӯ бояд аз ташхис гузарад.
Tonight, @FLOTUS and I tested positive for COVID-19. We will begin our quarantine and recovery process immediately. We will get through this TOGETHER!
— Donald J. Trump (@realDonaldTrump) October 2, 2020
Вай дар сафҳаи Твиттери худ навишт: “Натиҷаи озмоиши бонуи аввал ва ман имшаб мусбат баромад. Мо раванди қарантина ва беҳбудиамонро фавран оғоз мекунем. Мо якҷоя инро ҳам паси сар хоҳем кард.” Пизишки Кохи Сафед пас аз эълони Трамп изҳор дошт, ки президенти ИМА дар ҳолати “хуб” қарор дорад. Ба гуфтаи ӯ, президенти Амрико иҷрои вазифаҳои худро идома медиҳад. Қарор аст Доналд Трамп ва ҳамсараш бемории худро дар Кохи Сафед гузаронанд.
Президенти ИМА Доналд Трамп дар ҳоле аз гирифторияш ба COVID-19 хабар медиҳад, ки дар авҷи маъракаи интихоботӣ қарор дорад ва барои бозгашт ба Кохи Сафед талош мекунад. Ӯ дар саҳифаи Твиттери худ қаблан аз ёвари тими маъракаи интихоботияш Ҳоп Ҳикс ситойиш намуда навишта буд, ки ӯ ба вируси COVID-19 гирифтор шудааст ва ӯ марди хастанопазир буду беист кор мекард.
Ҳамзамон бонуи аввали ИМА Мелания Трамп ба ҳамин монанд дар Твиттер хабари натиҷаи мусбат будани озмоиши COVID-19-ро тасдиқ кард ва эълом дошт, ки ӯ дар хона қарантина шудааст ва ташрифоти ояндааш ба таъхир гузошта шудааст.
As too many Americans have done this year, @potus & I are quarantining at home after testing positive for COVID-19. We are feeling good & I have postponed all upcoming engagements. Please be sure you are staying safe & we will all get through this together.
— Melania Trump (@FLOTUS) October 2, 2020
Доналд Трамп расиҷумҳури чилу панҷуми ИМА ба ҳисоб меравад ва яке аз президентҳоест, ки тасмимҳояш дар ҷомеаи Амрико ва ҷаҳон баҳсҳои зиёдеро барпо кардааст. Мебоист дар ин рӯзҳо ӯ бо номзади ҷумҳурихоҳон Ҷо Бойден мунозираҳои рӯ дар рӯ анҷом диҳад. Аммо Трамп гуфтааст маъракаҳои интихоботияшро идома медиҳад. Қарор аст 3-юми ноябри соли ҷорӣ интихоботи президентӣ дар Амрико баргузор бишавад.
Бино ба иттилои хабаргузории “Sputnik”, Алаксендр Сёмин нафаре, ки дар қатли Ҳувайдо Тиллозода – духтарчаи панҷсолаи тоҷик гумонбар дониста мешавад, дар назар аст, пас аз ду моҳ ба додгоҳ кашида шавад.
Шавкат Умаров ҳимоятгари хонаводаи Тиллозодаҳо гуфтааст:
“табибон ҳолати равонии Сёминро хуб арзёбӣ карда гуфтаанд, дигар ба табобат ниёз надорад”.
Як сол қабл парвандаи куштори духтарчаи панҷсолаи тоҷик аз ҷониби додгоҳи вилояти Маскав ба хотири бемории руҳӣ доштани Александр Сёмин қатъ гардида буд, додгоҳ ӯро барои табобат ба беморхонаи касалиҳои руҳӣ фиристода буд.
Дар ҳамин ҳол ҳимоятгари ҳуқуқи хонаводаи тоҷик аз рӯйи ин қарор шикоят кард, додгоҳи шаҳри Сичевки табобати иҷбориро қатъ карда буд. Умаров гуфтааст, ҳамаи далелҳо ҷамъоварӣ шуданд, тафтишот ду моҳ тул мекашад, пас аз ду моҳ Сёмин дар додгоҳ муҳокима хоҳад шуд.
Ёдовар мешавем, ки дар таърихи 22 юми мюли соли 2018 Ҳувайдо Тиллозодаи 5-сола дар назди хонаашон дар шаҳри Серпухово аз майдончаи бозӣ нопадид шуда буд, пас як рӯз ҷасади ӯро дар борхалтаи варзишӣ дар назди роҳи оҳан пайдо карда буданд.
Вазорати корҳои дохилии Доғистон хабар дод, ки нерӯҳои интизомии ин кишвар рӯзи 30 сентябр 6 нафар маҳбусе, ки аз зиндони №2-и Доғистон фирор карда буданд, дастгир карданд.
Гуфта мешавад ин зиндониёни фирорӣ пас аз як ҳафтаи фирор дар ҳудуди ноҳияи бо Доғистон ҳаммарзи Лагани Қалмиқистон дастгир шудаанд.
Пештар Вазорати корҳои дохилии Доғистон хабар дода буд, ки шаби 23 сентябр 6 маҳбус тавассути нақбе, ки тӯли як сол канда шудааст, аз зиндони низомаш сахти №2 дар шаҳраки Шамхал дар канори Махачқалъа фирор карда буданд.
Бино ба хабарҳои расида, фирориён мехостаанд тариқи Қазоқистон ба Тоҷикистон фирор кунанд. Хабаргузории “Sputnik” аз қавли сардори Раёсати кофтукови ҷиноии Вазорати корҳои дохилии Доғистон, полковники милитсия Магомеднаби Одилхонов менависад:
“Мо тахмин мезанем, ки ҷинояткорон мехостанд Федератсияи Русияро тарк кунанд, ба Қазоқистон ва бо назардошти он, ки дар ин гурӯҳ ду шаҳрванди Тоҷикистон низ ҳастанд – минбаъд ба Тоҷикистон бираванд. Онҳо нақша доштанд, ки бо кадом роҳ шиносномаҳо ва ҳуҷҷатҳои қалбакӣ ба даст оранд, аммо нақшаҳои пешбиникардаашон амалӣ нашуд “.
Гуфта мешавад, аз ин зиндониёни фирорӣ ду нафарашон барои куштор ва 4 нафари дигар бо ҷурми қочоқи маводди мухаддир зиндонӣ шуда будаанд. Шомил Бойматови 29-сола аз ноҳияи Ёвон ва Маҳмадрасул Машрабов аз Душанбе дар Ҷумҳурии Қарачаю Черкес бо ҷурми қочоқи маводи мухаддир маҳкум шуда буданд.
Рӯзи 29 сентябр дар шаҳри Душанбе дар доираи ҷаласаи 7-уми Комиссияи байниҳукуматии Тоҷикистон ва Узбекистон бахшида ба ҳамкории тиҷоратию иқтисодӣ форуми муштарак миёни соҳибкорони Тоҷикистону Узбекистон баргузор гардид, ки зиёда аз 300 нафар аз ҳар ду ҷониб ширкат варзиданд.
Кумитаи давлатии сармоягузорӣ ва идораи амволи давлатии ҶТ хабар додааст, ки дар ин Форум миёни соҳибкорони Узбекистон ва Тоҷикистон қарордодҳои нав дар доираи тиҷорати ду кишвар ба имзо расидаанд.
Гуфта мешавад, дар ин Форум ба иштирокчиён дар бораи имконотҳои сармоягузорӣ дар соҳаҳои сайёҳӣ, саноат, энергетика, хизматрасонӣ ва дигар соҳаҳо дар Тоҷикистон маълумот дода шудаааст, ҷонибҳо лоиҳаҳои муштараки ҳамкориро баррасӣ намуданд.
Бино ба иттилои Кумитаи сармоягузории давлатии Тоҷикистон, пас аз анҷоми қисмати расмии Форум вохӯриҳои дуҷонибаи соҳибкорон дар шакли “соҳибкор бо соҳибкор” (B2B) баргузор гардида, санадҳои нави ҳамкорӣ ба имзо расонида шуд, ки ҳамаи бахшҳои иқтисодиро дар бар мегирад ва маблағи он 50 млн долларро ташкил медиҳад.
Рӯзи 29 сентябр дар доираи сафари сарвазири Узбенкистон Абдуллоҳ Орипов ба Тоҷикистон корхонаи муштараки истеҳсоли техникаи маишии «Артел Авесто Электроникс” ба истифода дода шуд, ки дар Тоҷикистон аз ҷониби “Авасто Групп”, таъсис додап шудааст. Бино ба гуфтаи баъзе манобеъ ин ширкат ба шаҳрдории Душанбе Рутами Эмомалӣ муталлиқ аст.
Қаблан гуфта мешуд, ки зимни сафари сарвазири Узбекистон ба Тоҷикистон дар баробари ифтитоҳи корхонаи муштараки истеҳсоли техникаи маишии Тоҷикистону Узбекистон – “Artel Avesto Electronics” масъалаи кушодашавии марзҳо низ баррасӣ мешавад.
Расонаҳои ҳарду ҷониб танҳо аз ҳамкории тиҷоратию иқтисодӣ, роҳу нақлиёт, ифтитоҳи “Artel Avesto Electronics” ва ғайра мегӯянд, аммо дар бораи боз кардани марзҳо ва дубора оғоз шудани парвозҳои мунтазам чизе гуфта нашешавад.
Ин дар ҳорлест, ки Ҷумҳурии Узбекистон шурӯъ аз имрӯз 1 октябр марзҳояшро бар рӯи кишварҳои дигар мекушояд ва ҳатто Тоҷикистон ҳам, аммо аз ҷониби Тоҷикистон то ҳанӯз дар ин бора иттилои расмие нашр нашудааст.
АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!
© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст