Рҳматиллоҳ Зоиров раиси Ҳизби сотсиал демократи Тоҷикистон ва ягона ҳизби мухолифи ҳукумат донисташуда дар саҳифаи фейсбукаш навишта, ки номзадияшро бо чанд далел дар интихоботи президентӣ монданӣ нест.

Раҳматилло Зоиров, раиси Ҳизби мухолифи сосиал-демократи Тоҷикистон бо пахши як изҳорот рӯзи 24 август дар сафҳаи фейсбукии худ эълом кардааст, ки ба ҳайси номзад дар интихобот ширкат нахоҳад кард:

“Ман ҳамчун шаҳрванд,фарзанди халқи Тоҷикистон ва раиси ҲСДТ номзадии худро ба мақоми  Президенти Тоҷикистон пешбарӣ намекунам ва нияти ширкат дар интихобот ва машруият бахшидан ва ё қонунманд кардани интихоботи феълии ғайриқонунӣ, зиддиконститутсионӣ  ва зиддимардумии президенти Ҷумҳурии Тоҷикистонро надорам.”,- навиштааст Раҳматилло Зоиров, раиси ҳизби сосиал-демократи Тоҷикистон.

Зоиров иллати даст кашидан аз ширкат дар интихоботро ба масоили ҳуқуқӣ марбут донистааст.

Ӯ аз ҷумла гуфтааст, яке аз сабабҳо ин аст, ки раиси ҷумҳур Эмомалӣ Раҳмон ҳақ надорад, раиси ҳизб бошад ва раҳбарии ӯ дар Ҳизби халқии демократӣ системаи бисёрҳизбиро дар Тоҷикистон аз байн бурда ва “ҷумҳуриро ба низоми яккаҳизбӣ табдил додааст”. Ҳамчунин ин сиёсатмадори мухолифи тоҷик тағйири замони баргузории интихобот аз 6 ноябр ба 11 октябрро хилофи Қонуни асосӣ эълон кардааст.

Яке дигар аз сабабҳое, ки ба гуфтаи Раҳматилло Зоиров ӯро водор кард, дар интихобот ширкат наварзад, қабули Қонуни нав дар бораи Кумиссиёни марказии интихоботи Тоҷикистон дар соли 2019 аст. Ба гуфтаи ӯ, “бар асоси ин қонун намояндагони аҳзоби сиёсӣ ҳақ надоранд, ба комиссияҳои марказиву маҳаллии интихобот шомил шаванд ва онҳо аз ҳисоби намояндагони ҳукумати иҷроия ва Ҳизби ҳокими халқии демократӣ ташкил карда мешаванд.”

Ба гуфтаи Раҳматилло Зоиров, “аз 31 ҳазор узви комиссияҳои интихоботӣ дар ҳамаи сатҳҳо 25 500 нафари онҳо расман узви Ҳизби халқии демократии Тоҷикистон ҳастанд.” Зоиров ҳамчунин ҳукуматро ба он муттаҳам кардааст, ки дониста, механизми ҷамъоварии имзо барои сабти номи довталаби курсии раиси ҷумҳурро печида кардааст, то аҳзоби дигар 5 дарсади имзои тамоми раъйдиҳандагон ё 250 ҳазор имзо ҷамъ оварда натавонанд.

Интихоботи президентӣ дар Тоҷикистон рӯзи 11-уми октябри имсол баргузор мешавад. Зоиров навиштааст: “Умедворам, Шӯрои сиёсии Ҳизби сотсиал-демократ бо дастгирӣ аз баёнияи сиёсии ман, интихоботи раёсати ҷумҳурии соли 2020-ро таҳрим мекунад.”

Зоиров, ки дар гузашта мушовири ҳуқуқии раиси ҷумҳури Тоҷикистон буд, аз соли 2002 то кунун раиси Ҳизби сотсиал-демократ аст ва сиёсатҳои ҳукуматро пайваста танқид мекунад. Ӯ дар гузашта борҳо гуфтааст, Эмомалӣ Раҳмон, ки аз соли 1994 то кунун раиси ҷумҳури Тоҷикистон аст, ҳақ надорад, дар интихоботҳо ширкат кунад.

То кунун, Ҳизби аграрӣ, Ҳизби сотсиалистӣ, Ҳизби демократ ва Ҳизби ислоҳоти иқтисодӣ, раисони худро довталаби курсии раиси ҷумҳур эълон карданд. Мунтақидон мегӯянд, пешбарии номзадии ин афрод, саҳнасозӣ ва рақобатӣ вонамуд кардани интихоботи раёсати ҷумҳурӣ аст.Ҳизби халқии демократӣ то кунун номзади худро эълон накардааст ва як сол бештар мешавад, ки баҳсу тахминзаниҳо ҳаст, ки худи раиси ҷумҳур Эмомалӣ Раҳмон ва ё писари ӯ Рустами Эмомалӣ шояд дар интихобот ширкат кунанд. Ин ҳизб рӯзи 3 сентябр дар Анҷумани пеш аз интихоботии худ номзади худ ба мақоми раиси ҷумҳурии Тоҷикистонро пешбарӣ ва эълон мекунад.

Ҳикматуллоҳи Сайидиён, ки худро муовини раиси Ҳизби демократии Тоҷикистон мехонад, дар як суҳбат рӯзи 23 август гуфт, ки масъалаи пешбарии номзад ба президентӣ дар Анҷумани навбатии ҳизбаш ноодилона ва ғайридемократӣ гузашт.

Ба гуфтаи ӯ Сайидҷаъфар Усмонзода, раиси ин ҳизб бо тақаллуби ороъ дар Анҷуман худро ҳамчун баранда ҳисоб карду номзадияшро аз номи Ҳизби демократӣ ба интихоботи президентии Тоҷикистон, ки қарор аст 11 октябри соли равон баргузор гардад, пешниҳод кард.

Маҳмурод Одинаев, муовини раиси Ҳизби сотсиал-демократи Тоҷикистон дар саҳифаи фейсбукаш навореро нашр намуда, ки дида мешавад номбурда бо Ҳикматуллоҳ Сайидиён, собиқ раиси ҳизби сабтиномнашудаи “Ваҳдат” ва ҳоло муовини раиси Ҳизби демократии Тоҷикистон мусоҳиба анҷом дода, аз ӯ мепурсад, ки анҷумани доиршудаи Ҳизб оё тибқи оинномаи Ҳизб буд? Сайидиён дар ҷавоб мегӯяд, ки бале, ин Анҷуман тибқи оинномаи ҳизб буд. Ӯ дар хусуси чӣ гуна интихоб гардидани Сайдҷаъфар ҳамчун номзад ба президентӣ гуфт: “Мо 76 нафар вакил аз тамоми ноҳияҳои кишвар даъват карда будем, ки ҳама ҳузур дошт, дар рӯзномаи асосии Анҷуман масъалаи пешниҳоди номзад ба интихоботи президентӣ буд, ҳамроҳи раиси ҳизб инчунин номзадии Табаралӣ Зиё низ ба овоз гузошта шуда буд. Сайидҷаъфар Усмонзода аз байни 76 овози вакилон 33 овозро соҳиб шуд, аммо худро баранда эълон кард. Тибқи оинномаи Ҳизб бояд бештар аз 50 вакил аз номзадии Усмонзода пуштибонӣ мекард то ӯ баранда мешуд.

Мусоҳиби Маҳмурод дар идома афзуда, ки вақте номзадии Табаралии Зиёро пешбарӣ карданд, “ӯ нагузашт, сабаб маълум, барои ин шарҳи бисёр дарукор нест. Ва ман ҳайронам, ки аз 76 нафар 33 нафар пуштибонӣ карданд, чӣ гуна ӯ баранда ҳисоб шуд?”.

Ӯ мегӯяд аз шакли баргузории Анҷумани ҳизбаш розӣ нест ва рафти баргузории онро “ба шакли демократӣ баргузор нашуда” ҳисобид.

Аммо то ҳол назари худи Сайидҷаъфар Усмонзода дастрас нест, шояд ӯ бар ин дидгоҳи ҳамсаф ва муовинаш вокунише нишон бидиҳад.

Бино бар гузориши сомонаи “Паём” мақомоти амниятии Тоҷикистон Муслим Кузов, бародари Шоҳнаими Карим (Мирзораҳим Кузов)-ро шиканҷаи ҷисмониву равонӣ намуда, то ҳадди фалаҷи ҷисмӣ оварда расонданд. Манбаи “Паём” гуфта, ки қисми чапи бадани Муслим Кузов аз кор монда, биноияш ҳам сахт заъиф шудааст.

Гуфта мешавад, ки ин шиканҷаҳо ҳама ба хотири он аст, ки Муслим Кузов бояд алайҳи бародараш Шоҳнаими Карим изҳорот бидиҳад ва аз ин ки ӯ узви аршади ҲНИТ асту дар Аврупо паноҳ бурдааст, интиқод кунад. Наздикони Муслим Кузов мегӯянд, ки беш аз ним сол мешавад, бо ӯ вохӯрда наметавонанд.

Имрӯз худи Шоҳнаим Карим дар саҳифаи фейсбукаш суҳбати онлайнӣ доир намуда хабари мазкурро таъйид кард. Ӯ дар суҳбати худ амалкарди мақомоти амниятии кишваррро маҳкум карда афзуд, ки ин ҳама шиканҷа ба хотири чист? “Чаро бародармро барои ман шиканҷа мекунед? Ҳатто чаро бародарзодаам, Раббонӣ Кузуов, ки на узви ҲНИТ буду ҳаст ва на ба сиёсат коре дорад, бояд барои ман шиканҷа бишавад?”

Шоҳнаим Карим дар идомаи суҳбати мустақими худ аз мақомот хост даст аз ин таҳиду фишорҳо бардоранд, чун на худи ӯ  ва на наздиконаш гуноҳе надоранд, ки ин қадар мавриди азияту озор қарор бигиранд. Муовини ҲНИТ ин ҳама фишорҳоро ба фаъолияти сиёсияш рабт дода афзуд, ки фаъолияти сиёсӣ ва мухолифи ҳукумат будан, дар ҳеч қавонии байналмиллалие ҷурм дониста намешавад, чаро ҳукумати Тоҷикистон аз ин амал сахт метарсад ва барои бастани даҳони мухолифонаш даст ба озори онҳо ва ҳатто наздиконашон мезанад?

Муслим Кузов беш аз ним сол қабл бидуни эълони иттиҳом боздошт шуда буд ва ҳамин тавр бидуни эълони айб, номҳои додситону додрас ва бе ҳузури вакили дифоъ муҳокима шуд. Додгоҳ ӯро ба 18 соли зиндон маҳкум кардааст.

Тибқи иттилоъи мнабаъи Паём Муслим Кузов дар зиндони рақами 4, маъруф ба “1-ум Советский” нигоҳдорӣ мешавад ва иҷозаи тамос бо наздиконашро надорад.

Худи Шоҳнаими Карим низ бо дархости Интерпол се сол қабл зимни як сафар дар Афина, пойтахти Юнон боздошт шуда буд. Аммо додгоҳи ин кишвар парвандаи ӯро сиёсӣ дониста, озодаш кард.

Як сол қабл мақомоти амниятии Тоҷикистон хонаи Шоҳнаими Каримро, ки иборат аз 3 ҳуҷра буда, дар ноҳияи Синои шаҳри Душанбе, минтақаи 84-уми пойтахт ҷойгир аст, ғасб карданд.