Суди ноҳияи Файзобод Шобидин Табаровро барои вайрон намудани қонун «Дар бораи танзими анъана ва ҷашну маросимҳо» ба ҷавобгарии ҳуқуқвайронкунӣ кашидааст. Дар ин бора раиси суди ноҳия Бахтиёр Холиқзода ба  “Ховар” хабар дод.

Ба навиштаи “Ховар” Шобиддин Табаровро, ки сокини деҳаи Арзановаи ҷамоати деҳоти “Ҷавонон”-и  ноҳия Файзобод мебошад, барои гузаронидани маъракаи  «сол»-и  модари марҳумаш бо додани таом бо моддаи 481-и  Кодекси ҳуқуқвайронкунии маъмурии Ҷумҳурии Тоҷикистон гунаҳкор дониста,  бо дастрасии  моддаи 48,  қисми 5-и Кодекси ҳуқуқвайронкунӣ ба андозаи панҷоҳ нишондиҳанда, баробар ба ду ҳазору нуҳсад сомонӣ ҷарима таъйин шудааст.

Ҳолатҳои ҷарима бастани шаҳрвандони оддӣ барои вайрон намудани қонуни танзими анъана бисёр аст. Як манбаъ дар суҳбат бо “Аздо тв” гуфт, бештарин ҳолатҳои вайрон намудани қонуни танзим ба хешу табор ва наздикони мансабдорон рост меояд. Вале ҳолати ба ҷавобгари кашидани мансабдорон ангуштшумор аст. Соли 2017 Сайфиддин Назарзода, раиси собиқи Китобхонаи миллии Тоҷикистон барои вайрон намудани қонуни танзим ба маблағи 12000 сомонӣ ҷарима шуда буд. Аммо худи Назарзода гуфта буд аз ҳукми додгоҳ розӣ нест ва ба назари ӯ, дар системаи судӣ нуқсҳои хеле ҷиддӣ нуҳуфтааст. Он замон Сайфиддин Назарзода маъмурони Оҷонсии зиддифасодро, ки туйи писари ӯро наворбардорӣ кардаанд ба дахолат ба зиндагии шахсии шаҳрвандон муттаҳам кард. Ва кори кормандони Оҷонсии зиддифасодро фармоишӣ хонда буд.

Ба назари коршиносон бо қабули қонун «Дар бораи танзими анъана ва ҷашну маросимҳо дар Ҷумҳурии Тоҷикистон» ҳолатҳои коррупсионӣ баръакс бештар шудааст.

Саломати Баҳром Иноятзода, раиси пешини Кӯлоб дар боздоштгоҳ бад шудааст. Наздикони ӯ гуфтаанд,ки баъди аз беморхона ба СИЗО мунтақил шудани ӯ вазъи сиҳҳатиаш дубора вазнин шудааст.

Аммо манобеъ дар мақомот гуфтаанд, ки бо далели беҳ шудани вазъи саломатиаш ӯро дубора ба СИЗО ё тавқифгоҳи муваққатӣ бурданд. Муҳаббат Иззатова, хоҳари Баҳром Иноятзода, рӯзи 25-уми август дар суҳбат бо Радиои Озодӣ гуфтааст, “пас аз табобат ёфтан аз коронавирус, хуни бародарам ғафс шудааст, пойҳояш варам кардаанд ва дилаш дард мекунад”.Вай иддао кард, ба пизишконе, ки бародарашро қаблан табобат мекарданд, иҷозаи вуруд ба боздоштгоҳро надодаанд:

“Ба ягон нафар аз наздикон ҳам иҷозаи вохӯрӣ надоданд. Вазъияташ дубора нохуб шуд. Худашон як духтурро бурдаанд ва мо то ҳол намедонем, саломатиаш беҳтар шудааст, ё не. На писар ва на ҳамсарашро ба назди ӯ роҳ надоданд”, – мегӯяд Муҳаббат Иззатова, хоҳари Баҳром Иноятзода.

Хабари бемории раиси пешини Кулоб дар ҳоле аст ки шоеъоте дар мавриди даст ба гуруснашинӣ задани ӯ ҳам дар шабакаҳои маҷозӣ давр мезанад. Як манбаи Радиои Озодӣ низ дар мақомоти интизомӣ гуфтааст, “ҳафтаи гузашта Баҳром Иноятзода се рӯз гуруснанишинӣ кард”. Манбаъ мегӯяд, раиси собиқи Кӯлоб ба ин васила хостааст, баъзе иттиҳомот аз парвандааш берун ва худаш бо табобати дуруст фаро гирифта шавад. Муҳаббат Иззатова, хоҳари Баҳром Иноятзода, гуфтааст аз гуруснашинии бародараш хабар надорад, вале тасдиқ кард, ки ӯ се рӯз аз гирифтани хӯроки бурдаи наздикон даст кашидааст.

Хусрав Аюбӣ, вакили мудофеи Баҳром Инотязода дар суҳбати кӯтоҳ гуфт, рӯзи 25-уми август бо нафари таҳти ҳимояташ вохӯрд ва ӯ аз саломатиаш шикоят надошт. Вакили мудофеъ тафсилот надод ва гуфт, ҳаққи суҳбат дар бораи парвандаро надорад, чун ба мақомот дар бораи фош накардани ҷузъиёт забонхат додааст.Иноятзода 8-уми июни имсол бо иттиҳоми гирифтани “пора” боздошт шуд. Ӯро пас аз мубтало шудан ба коронавирус дар шифохонаи сироятии шаҳри Кӯлоб бистарӣ карда буданд. Ба гуфтаи додситон, нисбат ба Баҳром Иноятзода бо қисми 4-и моддаи 319-и Кодекси ҷиноӣ ё гирифтани ришва дар ҳаҷми калон ва аз ҷониби роҳбари мақомоти маҳаллӣ парванда кушода шудааст. Дар сурати тасдиқи ин иттиҳом ба Иноятзода то 12 соли зиндон таҳдид мекунад.

Баҳром Иноятзода дар гузашта раиси шаҳри Истаравшан ва вакили Маҷлиси миллӣ буд ва моҳи майи соли гузашта раиси шаҳри Кӯлоб таъйин шуд. Номи ӯ дар моҳи феврали соли равон, замоне пурсарусадо шуд, ки моликони ширкати “Комил-2010”, мансуб ба писари Бег Сабур, раиси Хадамоти алоқа ва қудои президенти Тоҷикистонро танқид кард.

Бархе аз коршиносон муътақиданд,ки иллати асосии ба маҳкама кашидани раиси пешини Кулоб ҳамин фошкориҳои ӯ нисбати қудои президент ва интиқомкашии вай аст.Ва,агарки мегӯянд онҳо ин парванда “заказной” ё фармоишӣ набуд,бо барканорӣ аз мақом қаноат мекарданд.Ва,дигар ҳам ин аст ки бо ришва то ҳамин акнун касе дар сатҳи раиси як шаҳр ва ё ноҳия ба маҳкама кашида нашудааст.

Қарор аст дар Тоҷикистон рӯзи 30 августи соли равон бо ташаббуси Вазорати кишоварзии ин кишвар дар Маҷмааи савдои «Меҳргон»-и шаҳри Душанбе Иди каду, харбуза ва тарбуз доир шавад. Дар ин бора хабаргузории давлатӣ “Ховар” бо истинод ба маркази матбуотии Вазорати кишоварзии Тоҷикистон хабар дод.

«Дар  Маҷмааи савдои «Меҳргон» кишоварзон аз шаҳру  ноҳияҳои мамлакат маҳсулоти полезии худро ба намоишу фурӯш мегузоранд. Инчунин аз ҷониби кишоварзон дастархон бо анвои маҳсулоти полезӣ оро дода мешавад. Дар ин рӯз ярмарка — фурӯши маҳсулотҳои кишоварзӣ ташкил мегардад, ки сокинону меҳмонони  пойтахт метавонанд маҳсулотҳои кишоварзиро бо нархи дастрас харидорӣ намоянд»,-омадааст дар хабри Оҷонсии “Ховар”.

Гуфта мешавад, ки ҳамасола Иди каду ва хабарбузаву тарбуз ҳар кадом дар алоҳидагӣ гузаронида мешуд, вале имсол бо дарназардошти вазъияти пандемия ва паҳншавии бемории сироятии COVID-19 тасмим гирифта шудааст, ки идҳои мазкур дар якҷоягӣ таҷлил карда шаванд.

Шуруъ аз соли 2018 тибқи як фармони Раисҷумҳури кишвар дар хусуси иду маросимҳо ва ҳунарҳои мардумӣ дар Тоҷикистон ҳар сол рӯзи якшанбеи ҳафтаи охири моҳи август Иди каду рӯзи шанбеи ҳафтаи аввали моҳи сентябр Иди харбуза ва тарбуз баргузор мешавад.

Ҷашнгирии Иди каду ва ё маҳсулоти кишоварзии дигар дар Тоҷикистон чанд солест ривоҷ пайдо кардааст. Солҳои гузашта ҳангоми баргузории ин гуна идҳо мардум дар шабакаҳои иҷтимоӣ масхараомез менавиштанд, ки аз баргузории ин ид мо чӣ суд мебарем. Ҳатто баъзе эълони чунин идҳоро хандаовар унвон карда буданд.

Аммо ба назари коршиносон таҷлил аз Иди каду ва ё харбузаву тарбуз агарчи дар баъзе давлатҳои дигар гузаронида мешавад, аммо тақлиди Тоҷикистон аз онҳоро дар ин бора ба маврид намедонанд. Онҳо мегӯянд, Тоҷикистон фақиртарин давлати пасошӯравӣ ба ҳисоб меравад ва зиёда аз якуним млн шаҳрвандаш дар хориҷи кишвар кор мекунанд, бо ин шароити пасти иқтисодӣ бояд шумори ҷашнҳои пурмасрафашро кам кунад ва барномаҳои рушди иқтисоди миллиро рӯй даст бигирад ва инчунин берун шудан аз ин бунбасти иқтисодиро дар мадди аввали барномаҳои худ гузорад.

“Вақте давлатҳои аврупоӣ ва пешрафта аз каду ва ягон мевае ҷашн мегиранд, онҳо иқтисоди баланд доранд ва масорифи ҷашнҳояшон низ кам аст, аммо давлати мо дар чунин ҷашнҳо ё соҳибкоронро маҷбур месозад ва ё аз буҷаи давлат масраф мекунад ва ё аз мардуми гирду атрофе, ки ҷашн онҷо баргузор мешавад, ҷамъоварӣ мекунанд, ки дар ҳама сурати зикршуда зарар бар иқтисоди шахс ва давлат дида мешавад”,- мегӯяд як коршинос бо шарти зикр нашудани номаш.