Ҷустуҷӯ кунед
Ҷустуҷӯ
34.9 C
Dushanbe
Хона блог саҳифа 14

Лимити барқ дар Тоҷикистон бардошта мешавад?

Аз ҷониби
AZDA-TV
-
0

Дар як-ду рӯзи оянда “лимит” ё маҳдудияти интиқоли нерӯи барқ дар Тоҷикистон муваққатан бардошта мешавад.

Ба иддаои Муҳаммад Ғуломов, мудири Раёсати назорати тақсимоти барқ дар ҶСК “Шабакаҳои тақсимоти барқ” бардоштани лимит дар пайи гарм шудани ҳавову боришоти борон ва зиёд шудани оби дарёи Вахш фароҳам омадааст.

Ғуломов инчунин дар суҳбат бо расонаҳо гуфтааст, ки бояд маҳдудият имрӯз, 10-уми апрел бардошта мешуд, вале бо баъзе сабабҳо каме ба таъхир афтодааст.

Дар ҳамин ҳол Қурбон Аҳмадзода, сухангӯи ҶСК “Барқи тоҷик” бидуни зикри рӯзи муайяне тасдиқ кард, ки бекор кардани маҳдудияти интиқоли барқ барои сокинон мавриди баррасӣ қарор дорад.

Бояд гуфт, дар гузашта пас аз чунин эълонҳо сокинон аз идома ёфтани “лимит” дар кишвар шикоятҳои зиёде карда буданд ва маълум нест, ки имсол мақомот қарори худро иҷро хоҳанд кард ё на.

Ёдовар мешавем, ки ширкати “Барқи тоҷик” бо пахши изҳороте хабар дод, ки дар Тоҷикистон аз 22-уми сентябри соли 2024 “лимит”-и нерӯи барқ ҷорӣ шудааст.

Ва ин ширкат мисли ҳамеша эълон карда буд, ки маҳдудият дар интиқоли нерӯи барқ ба сокинон ба “камшавии захираҳои об” ва “зиёд шудани талабот ба нерӯи барқ” рабт дорад.

Солҳои пеш “Барқи тоҷик” вуҷуди маҳдудият дар интиқоли барқро дар рӯзҳои аввал эътироф намекард, аммо бо фарорсии фасли зимистони гузашта, шикояти сокинон ва интиқоди раисҷумҳур акнун аз оғози маҳдудияти интиқоли барқ ба сокинон расман хабар медиҳад.

Гуфта мешавад, камбуди барқ дар Тоҷикистон яке аз мушкилотест, ки аз замони ба сари қудрат омадани Эмомалӣ Раҳмон, беш аз 30 сол аст, ки идома дорад ва то ҳанӯз ҳалли худро наёфтааст. Сокинон мегӯянд, чанд соли охир маҳдудият дар интиқоли нерӯи барқ моҳҳо тӯл мекашад, ҳатто давоми сол то 8 моҳ ҳам идома меёбад.

Худи Эмомалӣ Раҳмон ҳангоми ба истифода додани чархаи аввали нерӯгоҳи “Роғун” дар соли 2018 шодиёна гирифта буд, ки “дигар лимит ба афсона табдил шуд”. Аммо масъулони “Барқи тоҷик” дар моҳи июли соли 2024 гуфтанд, ки то нерӯгоҳи “Роғун” пурра ба кор надарояд, “лимит”-и барқ дар кишвар боқӣ мемонад.

Мақомот барои ҳалли ин мушкилот чораҳои ҷиддӣ наандешида, ба сокинон роҳҳои алтернативиро пешниҳод мекунанд, аз ҷумла вазири энержӣ ва захираҳои оби Тоҷикистон Далер Ҷумъа зимни нишасти матбуотӣ дар моҳи июли соли гузашта аз мардум хоста буд, ки ангишт захира кунанд.

Сокинони кишвар бар ин боваранд, ки дар Тоҷикистон ба ҳадди кофӣ барқ истеҳсол мешавад, вале мақомдорон онро ба кишварҳои ҳамсоя, аз ҷумла Афғонистону Узбекистон ва Қирғизистон бо нархҳои арзонтар мефурӯшанд.

Дар баробари ранҷ кашидани сокинон аз норасоии барқ, Ҳукумат маҳудидятҳои нав ба навро дар истифодаи нерӯи барқ ҷорӣ карда истодааст.

Аз ҷумла, ҳафтае пеш вакилони кишвар қонунеро қабул карданд, ки тибқи он сокинон барои истифодаи “ғайриқонунӣ” ва “напардохтани пули нерӯи барқ” аз 27000 то 90000 сомонӣ ҷарима ва ё аз 3 то 10 сол ба зиндонӣ мешаванд.

Инчунин муштариёне, ки зиёда аз 10 ҳазор киловат соат дар як моҳ барқ истифода мебаранд, арзиши барқ бо нархи корхонаҳои тиҷоратӣ барояшон ҳисоб карда мешавад ва то имрӯз мақомот 250 чунин муштаририро номнавис кардааанд.

Ва тибқи қарори нави Ҳукумати кишвар, аз 1-уми апрели соли 2025 арзиши нерӯи барқ низ боло рафт. Сокинон барои ҳар киловат соат барқ ба ҷойи 30,37 дирам 35,36 дирам пардохт хоҳанд кард.

Фаронса давлати Фаластинро эътироф мекунад

Аз ҷониби
AZDA.TV
-
0

Қарор аст дар моҳи июни соли ҷорӣ кишвари Фаронса давлати Фаластинро ба расмият шиносад.

Президенти Фаронса Эммануэл Макрон эълом кард, ки кишвараш омодааст дар моҳи июни соли 2025 давлати Фаластинро ҳамчун давлати мустақил ба расмият шиносад. Эҳтимол меравад, ин тасмим дар чорчӯби як конфронси байналмилалии Созмони Милали Муттаҳид, ки моҳи июни соли ҷорӣ дар шаҳри Ню-Йорк бо раёсатии муштараки Фаронса ва Арабистони Саудӣ баргузор мешавад, амалӣ гардад.

Макрон рӯзи чоршанбе аз ин тасмими кишвараш дар мусоҳибае бо шабакаи “Франс 5” хабар дод. Ӯ дар ин мусоҳиба гуфт: “Замони он расида, ки мо бояд давлати Фаластинро эътироф кунем ва ин корро дар моҳҳои наздик анҷом хоҳем дод. Ҳадафи мо он аст, ки дар конфронси моҳи июн якҷо бо чанд кишварҳои дигар қадаме барои эътирофи давлати Фаластин гузорем.”

Раисиҷумҳури Фаронса афзуд, ки барои ташкили чунин иқдоме як ҳаракати муштарак ва васеъ зарур аст. Ӯ гуфт, ин иқдом шароитро пеш меорад, ки ҷонибдорони Фаластин ба таври мутақобил ҳаққи мавҷудияти давлати Исроилро ҳам эътироф намоянд.

Дар вокуниш ба ин изҳороти Макрон, вазири корҳои хориҷии Исроил Гидеон Саар ин иқдомро “мукофот ба терроризм” номида, дар шабакаи “X” (собиқ Twitter) навишт: “Эътирофи якҷонибаи давлати Фаластин дар шароити кунунӣ танҳо боиси тақвияти ҲАМОС ва дуршавии сулҳу субот аз минтақа мешавад”.

Дар ҳамин ҳол вазири корҳои хориҷии давлати Фаластин Форсин Ағабкиян Шоҳин аз тасмими Фаронса истиқбол кард ва онро “қадами дуруст” номид. Ӯ гуфт, ки эътирофи давлатҳо ба сулҳи пойдор дар минтақа ва ҳифзи ҳуқуқи миллати Фаластин мусоидат хоҳад кард.

Гуфта мешавад, то кунун наздики 150 кишвари ҷаҳон давлати Фаластинро эътироф кардаанд. Танҳо дар соли 2024 кишварҳои Ирландия, Норвегия, Испания ва Словения ба ин рӯйхат пайвастанд.

Бархе коршиносон бар ин назаранд, ки ягона роҳи ҳалли низоъҳо байни Исроил ва Фаластин эътирофи ҷаҳонии Фаластин ҳамчун кишвари мустақил аст. Ба назари онҳо, давлати Фаронса дар Аврупо аз кишварҳои пурқудрат ва таъсиргузор аст, агар ин кишвар давлати Фаластинро ба расмият шиносад, эҳтимол дигар кишварҳое, ки то ҳол эътироф накардаанд, инро бипазиранд.

Яман паҳподи амрикоиро сарнагун кард

Аз ҷониби
AZDA.TV
-
0

Гурӯҳи ҳусиҳои Яман эълон кард, ки рӯзи чаҳоршанбе як ҳавопаймои бесарнишини амрикоии “MQ-9”-ро бо мушаки маҳаллии сохташуда дар вилояти ал-Ҷавф сарнагун карданд.

Ба иттилои ин гурӯҳ, дар давоми даҳ рӯзи ахир ин севумин ҳавопаймои чунин навъ ва ҳаждаҳумин аз оғози амалиёти “Ҷиҳод муқаддас”, ки дар ҳимоят аз мардуми Ғазза анҷом шуд, ба ҳисоб меравад.

Яҳё Сариъ, сухангӯи низомии ҳусиҳо ба расонаҳо гуфт: “Дар ҷавоб ба таҷовузи доимии Амрико ба кишвари мо ва қатли ваҳшиёнаи мардум, дифои ҳавоии мо тавонист як ҳавопаймои амрикоии навъи “MQ-9″-ро, ки дар фазои вилояти ал-Ҷавф дар ҳоли иҷрои амалиёти душманона буд, бо мушаки сохташудаи маҳаллӣ сарнагун кунад.” Вале ин мақомдори ҳусиҳо навъи мушакро зикр накардааст.

Вай афзуда, ки ҳамлаҳои амрикоӣ ба Яман ҳоло ҳам идома дорад. Дар соатҳои гузашта чандин ҳамлаи ҳавоӣ ба минтақаҳои гуногун анҷом дода шуд, ки дар натиҷа чанде аз шаҳрвандон кушта ва захмӣ гашта, хеле аз хонаҳои мардум ба харобазор табдил шуданд.

Ҳамзамон ин гурӯҳ мегӯяд, дар пайи ҳамлаҳои ҳавоии Амрико 8 ғайринизомӣ дар вилояти Ал-Ҳудайда кушта ва 16 нафар захмӣ шуданд.

Аз 15-уми март то ҳол, ба гуфтаи ҳусиҳо, садҳо ҳамлаи ҳавоии Амрико ба Яман сурат гирифта, ки дар натиҷа 78 нафар кушта ва 196 каси дигар захмӣ шудаанд.

Ҳамлаи низомии Амрико бо фармони Доналд Трамп, раисҷумҳури Амрико оғоз шуд. Ин ҳамлаҳо ба Яман дар пайи амалиёти низомии ҳусиҳо ба Исроил ва киштиҳое, ки ба сӯи ин кишвар дар баҳри Сурх равона буданд, сурат мегирад.

Аммо гурӯҳи ҳусиҳо мегӯянд, ки амалиёти низомии онҳо ба Исроил ва ҳамла ба киштиҳои он дар баҳри Сурх дар пуштибонӣ аз Ғазза анҷом мешавад ва он то замоне ки Исроил ҳамлаҳои худро ба Ғазза поён надиҳад, идома хоҳад ёфт.

КҲФ: Рӯзҳои оянда хатари сел манотиқи кишварро таҳдид мекунад

Аз ҷониби
Azda TV
-
0

Куитаи ҳолатҳои фавқулоддаи Тоҷикистон ба сокинон ҳушдор дода, ки рӯзҳои оянда эҳтимоли номусоид шудани обу ҳаво ва омадани сел дар баъзе минтақаҳои кишвар вуҷуд дорад ва эҳтиёт кунанд.

КҲФ мегӯяд, рӯзҳои оянда ба далели боду ҳавои номусоид дар вилояти Хатлон, навоҳии кӯҳии вилояти Суғд ва аксари ноҳияҳои тобеи ҷумҳурӣ хатари вуқуи ҳодисаҳои табиӣ, боришоти шадид, бодҳои тунд, ҳатто зери об мондани баъзе минтақаҳои аҳолинишин пешбинӣ мешавад.

Ин ниҳод рӯзи чоршанбе бо истинод ба гузориши Агентии обуҳавошиносӣ гуфтааст, ки чунин вазъи номусоид рӯзҳои 9-10-уми апрел пешбинӣ мешавад.

Ҳаминтавр фаромадани тарма, зери об мондани қитъаҳои алоҳидаи роҳҳо, болоравии сатҳи об дар рӯдхонаҳои хурд, ки дар натиҷа метавонад оби барзиёд аз соҳилҳо берун шуда ба хонаву ҳавлиҳои сокинон ворид гардад ва ё роҳҳоро барои ҳаракати мошинҳо номумкин кунад ва ҳаминхел зери об мондани киштзорон эҳтимол дода мешавд.

Инчунин ҳушдор дод шудааст, ки раъду барқ низ ҳамроҳ бо боришот ва шамол метавонад сабаби ҳаводиси ҳамчун, хароб гардидани хатҳои интиқоли қувваи барқ, шикастану рӯи роҳ афтодани дарахтон, зарар дидани бомпӯшҳои сокинон, шикастан ва ё афтодани сутунҳои сустниҳоди рекломҳо шаванд.

Кумитаи ҳолатҳои фавқулода хитоб ба сокинон гуфта, ки дар ин чанд рӯзи оянда ба чорвочаронӣ, доманакӯҳҳо, шикор ва соҳилҳо нараванд ва ҳаминтавр аз рафтани ба чидани занбӯруғҳо, ҳезуму гиёҳҳои шифобахш ва ғайра худдорӣ кунанд. 

Вазъи вахими Маҳмурод Одинаев дар зиндон

Аз ҷониби
AZDA-TV
-
0

Маҳмурод Одинаев, зиндонии сиёсӣ ва собиқ муовини раиси ҲСДТ дар зиндон аз дарди сахти сутунмуҳра, фишори хун ва мушкили пешобдон ранҷ мекашад.

Пайвандонаш ба Сарраёсати иҷрои ҷазои ҷиноятии Вазорати адлияи Тоҷикистон ба таври хатӣ муроҷиат кардаанд, то Одинаевро дар шифохонаи зиндони шаҳри Ваҳдат барои табобат ҷойгир кунанд, аммо то ҳол дархости онҳо иҷро нашудааст.

Ҳабибули Ризоев, писари ин маҳбуси сиёсӣ дар суҳбат бо расонаҳо гуфтааст, ки падарашро як моҳ пеш дар зиндон дида буд ва ӯ басахтӣ роҳ мегашту аз дарди сутунмуҳра ба по рост истода наметавонист.

Худи Маҳмурод Оданиев низ дар мулоқот аз пайвандонаш хостааст, ки ариза нависанд, то ӯро дар шифохона бистарӣ кунанд.

Пайвандонаш инчунин мегӯянд, ки вазъи Одинаев аз соли 2021 вахим буда, ба ӯ ҳар чанд вақт дору мебаранд.

То ҳол мақомоти Тоҷикистон ба хабари вазъи бади саломатии Маҳмурод Одинаев дар зиндон вокунише накардаанд.

Маҳмурод Одинаев аз замони боздошт то кунун аз саломатияш ҳамеша шикоят кардааст. Ба гуфтаи наздикон, вазъаш то ҳадде бад шуда буд, ки гиряву нола мекард, вале мақомот ба табобати ӯ таваҷҷуҳи ҷиддӣ намекунанд.

Созмонҳои ҳомии ҳуқуқ борҳо аз мақомоти зиндонҳои Тоҷикистон талаб карда буданд, ки вазъи бади саломатии Маҳмурод Одинаевро ба назар гирифта, режими зиндонашро ба ҳабси хонагӣ иваз кунанд.

Ёдовар мешаем, ки моҳи декабри соли 2020 Маҳмурод Одинаев, собиқ муовини раиси ҲСДТ аз тарафи мақомот дастгир ва бо иттиҳоми авбошӣ ва даъват ба сарнагун сохтани ҳокимияти конистутсионӣ гунаҳкор дониста, ба 14 соли зиндон маҳкум шуд. Дертар мақомот дар моҳи сентябри соли 2021 Маҳмурод Одинаевро шомили афв карда, аз 14 соли ҳукми зиндони ӯ 3 солашро кам кардаанд. Аммо худи Одинаев афвро напазируфт ва хостори раҳоияш шуда буд.

Маҳмурод Одинаев 20-уми ноябри соли 2020 ва баъди дархости гирдиҳамоӣ нопадид шуд. Ӯро баъд аз ду ҳафта дар ҳудуди шаҳри Душанбе дастгир карданд.

Пеш аз боздошти Одинаев писараш Шайхмуслиҳиддин Ризоев низ боздошт шуда буд. Мақомот Шайхмуслиҳиддинро бо иттиҳоми “авбошӣ” ва “кӯшиши таҷовуз ба номус” барои 6 сол аз озодӣ маҳрум кард.

Пайвандони Маҳмурод Одинаев ӯ ва писарашро бегуноҳ медонанд ва боздошти онҳоро фармоишӣ ва ба хотири фаъолиятҳои сиёсии Одинаев арзёбӣ мекунанд.

Ҳукумат мубаллиғи худро зиндонӣ кард

Аз ҷониби
AZDA-TV
-
0

Додгоҳи шаҳри Бохтар Идибеки Мардон, маъруф ба “Идибеки Бохтарӣ”-ро, ки яке аз мубаллиғони ашаддии Ҳукумат дониста мешуд, ба як соли зиндон маҳкум кард.

Бино ба иттилои Радиои Озодӣ, ҳукмро додрас ҳафтаи гузашта содир карда, он то ҳол қувваи қонунӣ нагирифтааст.

Мақомот ӯро дар “истифодаи зӯроварӣ нисбат ба намояндаи ҳокимият” гунаҳкор кардаанд.

То ҳол назари худи ӯ ва пайвандону вакили дифоаш дар ин бора дастрас нест ва маълум нест аз болои ҳукми додгоҳ шикоят хоҳанд бурд ё на.

Чанд моҳи пеш Идибеки Мардон аз мақомдорони Тоҷикистон шикоят карда, бо оби дида Тоҷикистонро тарк намуда буд. Дертар ӯ бо нашри наворе аз раиси шаҳри Бохтар (собиқ Қурғонтеппа) Абдулмаҷид Муминзода гила карда, иддао дошт, ки маҳз ӯ ба тарки Ватан маҷбураш сохтааст.

Ӯ дар ин навораш шаҳрдори Бохторро дашномҳои қабеҳ карда, гуфт, ки “ӯ фармон додааст, ки миёни Бохтариро шикананд.” Акнун маҷбур аст кишварро тарк кунад. Бохтарӣ низ ишора карда буд, ки 80-90% ҷавонон аз дасти чунин мансабдорон кишварро тарк мекунанд ва ба гурӯҳҳои мухолифин мепайванданд.

Қарори ҳабси “Идибеки Бохтарӣ” маҳз пас аз нашри ин навор дар моҳи сентябри соли 2024 ғоибона содир шуда буд.

Идибек, ки баъди он навор тарки Тоҷикистон карда буд, маълум нест, ки худаш моҳи феврали соли ҷорӣ ба кишвар баргаштааст ё ӯро истирдод кардаанд, аммо дар Додгоҳи Бохтар иддао карда буданд, ки ӯ “баъди бозгашт ба Тоҷикистон дастгир шуд.”

Ин блогер пештар бо гузоштани риши дароз ва наворҳои интиқодӣ алайҳи мухолифони ҳукумати Эмомалӣ Раҳмон шуҳрат пайдо карда буд. Аммо яку якбора худи ӯ бо мақомдорон дар Бохтар дарафтод ва иддао кард, ки маълумоти зиёде дар бораи фасодкорӣ ва ҷинояту амалҳои ғайриқонунии раиси шаҳри Бохтар ва дигар мақомдоронро дар даст дорад ва дар ҳолати зарурӣ онҳоро нашр хоҳад кард.

Амрико ва Эрон музокиротро оғоз карданд

Аз ҷониби
Azda TV
-
0

Дар пайи шиддат гирифтани танишҳо миёни Амрико ва Эрон Доналд Трамп ба таври ғайримунтазира аз баргузории музокирот бо эрониҳо хабар дод.

Расонаҳои Теҳрон ҳам ин хабарро нашр карда, менависанд, ки ин музокирот дар Уммон сурат мегирад.

Бино ба гузориши сомонаи “Rtuters” 7-уми апрели соли ҷорӣ, Доналд Трамп раисҷумҳури Амрико зимни мулоқоте, кӣ бо Бинямин Натанёҳу нахуствазири Исроил дар Вашингтон дошт, ба расонаҳо гуфт, ки музокироти мустақим ва дар сатҳи боло бо Эрон аллакай шуруъ шудааст. Вазири умури хориҷии Эрон низ тавофуқ барои музокиротро дар саҳифаи “Х”-и худ тасдиқ кард.

Трамп дар суҳбат бо хабарнигорон гуфтааст, рӯзи шанбе 12-уми апрел ҷаласаи муҳимме дар сатҳи олӣ бо мақомдорони Эронӣ сурат мегирад ва муътақид аст, ки ҳарду тараф расидан ба як созишномаро тарҷиҳ медиҳанд.

Аммо ӯ таҳдидҳояш болои эрониҳоро ҳифз карда афзудааст, ки Эрон набояд ҳастаӣ шавад ва дар сурати даст наёфтан ба тавофуқ дар ин масъала вазъият барои онҳо хатарнок хоҳад шуд.

Ба иттилои расонаҳо, Аббос Ироқчӣ, вазири корҳои хориҷии Эрон низ тасдиқ карда, ки музокирот байни Эрон ва Амрико сурат хоҳад гирифт, вале он ба шакли ғайримустақим ва дар кишвари Уммон баргузор мешавад.

Коршиносон пешбинӣ мекунанд, ки дар ин музокирот аз тарафи Эрон Ироқчӣ, вазири корҳои хориҷӣ ва аз тарафи Амрико Стив Уитков фиристодаи махсуси Амрико дар умури Ховари Миёна ширкат мекунанд.

Аммо изҳороти ахири Теҳрон ва Вашингтон ба таври ғайримунтазира дар ҳоле пахш мешавад, ки равобити миёни ин ду кишвар ба тиратарин ҳадди худ дар чанд соли ахир расидааст. Чанде пеш Алии Хоманаӣ, роҳбари олии Эрон ба мактуби Трамп дар бораи оғози зудҳангоми музокироти мустақим ва созиш оид ба барномаи ҳастаии ин кишвар посухи рад дод, Амрико таҳдид кард, ки ин кишварро бомборон хоҳад кард.

Пас аз ин раддубадалҳои лафзии шадид, расонаҳо аз ҷобаҷокунии силоҳҳо ва техникаҳои низомии ИМА дар Ховари Миёна ва ирсоли аслиҳа ба Исроил хабар доданд. Ҳамин тавр рӯзномаи “Newsweek” имрӯз, 8-уми апрел бо такя ба тасовири ҷадиди моҳвораӣ гузориш додааст, ки киштии ҳавопаймобари амрикоии “USS Carl Vinson”, ки дар ибтидо дар ғарби Уқёнуси Ором мустақар буд, ҳоло дар роҳи пайвастан ба Ховари Миёна аст.

Ба гуфтаи таҳлилгарон, ин таҳаррукоти низомии Амрико дар минтақа ба он хотири сояи тарсро ба кишвари Эрон ва атрофи он ҷорӣ карданист ва бо ин кораш мехоҳад Эронро ба мизи музокира кашонад.

Ҳамзамон чанд тан аз мақомҳои баландпояи Эрон аз ҷумла, Муҳаммад Боқирӣ, раиси Ситоди кулли нерӯҳои мусаллаҳи Эрон пас аз монуврҳои Амрико, омодагии худро барои ҳаргуна муборизае эълон крданд.

Бар илова Эрон ба кишварҳои ҳамсояаш, ҳушдор дода буд, ки агар аз қаламрав ё ҳарими ҳавоии онҳо барои ҳамла ба Эрон истифода шавад, ин кор “амали душманона арзёбӣ мешавад” ва паёмадҳои сангин хоҳад дошт.

Ташдиди танишҳои миёни Амркио ва Эрон кишварҳои ҳамсояи Эолн ва минтақаро нигарон кардааст. Ҳамзамон Русия дар миёни ин бесуботӣ ва беназмии ҳоким дар минтақа изҳори нигарони карда гуфтааст, ки дар сурати ҳамлаи низомии Амрико ба Эрон, ин кишвар ба Эрон кумаки низомӣ нахоҳад кард. Муовини Вазорати хориҷии Русия мегуяд, мо аз роҳи дипломатӣ талош мекунем то ин низоъ ҳал шавад, вале дар сурати ҳамлаи низомӣ ба Эрон ба ин кишвар кумаки низоми нахоҳем кард.

Тамринҳои зиддитеррористии Тоҷикистону Русия

Аз ҷониби
AZDA-TV
-
0

Нерӯҳои мусаллаҳи Тоҷикистон ва Русия дар вилояти Хатлон тамринҳои муштараки зиддитеррористиро оғоз карданд.

Ин машқҳои низомӣ дар тамрингоҳи “Ҳарб-Майдон”, ки 20 километр дуртар аз сарҳади миёни Тоҷикистону Афғонистон ҷойгир аст, рӯзҳои 7 то 11-уми апрели соли ҷорӣ баргузор мешаванд.

Бино ба иттилои Вазорати дифои Русия, тамрини нерӯҳои низомии ду кишвар бештар ба амалҳои муштарак дар нобудсозии гурӯҳҳои террористӣ дар шароити душворгузари кӯҳистонӣ, идоракунии воҳидҳо дар ҷараёни ҳифзи сарҳад ва нобуд сохтаи гурӯҳҳои ҷиноӣ равона гаштааст.

Дар ин тамринҳо аз ҷониби Русия қисмҳои пойгоҳи 201-уми ҳарбии Ҳавзаи ҳарбии марказӣ, бо шумули воҳидҳои тирандоз, гурӯҳи сарнишинони авиатсионӣ дар чархболҳои зарбазани Ми-24, нақлиёти ҷангии Ми-8МТВ5-1, мутахассисони алоқа, операторони FPV-дронҳо, дастгоҳҳои иктишофии бесарнишин ва гурӯҳҳои зудамали муқовимати радиоэлектронӣ иштирок мекунанд.

Аммо дар иттилоияи Вазорати дифои Русия гуфта нашудааст, ки дар тамринҳо кадом ҷузъу томҳои Вазорати дифои Тоҷикистон ширкат мекунанд.

Инчунин ҷониби Русия мегӯяд, ки ҳадаф аз ин тамринҳо баланд бардоштани сатҳи ҳамбастагии ҷангӣ ва таҳкими амнияти минтақавӣ дар марзҳои ҷанубии СПАД мебошад.

Пойгоҳи низомии 201 мустақар дар Тоҷикистон бузургтарин пойгоҳи низомии Федератсияи Русия дар хориҷ аз кишвар ба шумор меравад. Бино ба баъзе маълумотҳо, то 7 ҳазор афсару сарбоз дар ин пойгоҳ адои хидмат мекунанд ва тибқи тавофуқоти Душанбе ва Маскав то соли 2042 дар хоки кишвар бидуни пардохти молиёт боқӣ хоҳанд монд.

Ба назари мухолифон ҳузури густардаи низомии Русия дар Тоҷикистон истиқлолу тавоноии нерӯҳои кишварро зери суол мегузорад.

Мавқеи зидди толибонӣ ё муқтазои замон? Ихроҷи ҳазорҳо афғонистонӣ аз Покистон

Аз ҷониби
AZDA.TV
-
0

Мақомоти давлати Покистон тайи чанд рӯзи ахир ҳазорҳо афғонистониро маҷбуран аз ин кишавар ихроҷ карданд.

Дар пайи ин иқдоми Покистон ҳукумати сарпарасти Афғонистон бо роҳбарии Толибон вокуниш нишон дода, чанде аз мақомдорони он дар изҳороти ҷудогона бо маҳкум кардани ихроҷи муҳоҷирони Афғонистон аз Покистон гуфтаанд, ки рафтори Покистон “хилофи усули исломӣ ва ҳамсоягӣ аст.”

Забиҳуллоҳи Муҷоҳид, сухангӯи ҳукумати сарпарасти Толибон, рӯзи душанбе дар изҳороте бо ҳузури дигар намояндагони ин ҳаракат гуфт: “Бархурди давлати Покистон бо муҳоҷирони Афғонистон ғайри исломӣ ва ғайри инсонӣ аст.”

Мақомоти Толибон дар хитоби вежа ба мардум ва уламои динии Покистон гуфтаанд, ки “Аҳзоби сиёсӣ, уламо ва чеҳраҳои бонуфуз бояд пеши роҳи ин иқдомоти кишварашонро бигиранд ва масъулияти динӣ ва ҳамсоягии худро адо кунанд.”

Ҳамзамон Толибон таъкид мекунанд, ки бо иҷбор ихроҷ кардани муҳоҷирони Афғонистон аз ин кишвар метавонад ба зарари ҳарду кишвар тамом шавад.

Ҳамзамон расонаҳои афғонистонӣ хабар медиҳанд, ки Иморати исломӣ рӯзи гузашта бо мақсади расидагӣ ба мушкилоти муҳоҷирони ихроҷшуда нишасти махсусеро бо ҳузури сарвазир Мулло Муҳаммад Ҳасан Охунд ва дигар мақомҳои аршади Толибон баргузор кард.

Гуфта мешавад, мақомоти Иморати исломӣ дар ин нишаст аз Созмони Милали Муттаҳид ва дигар созмонҳои байналмилалӣ хостанд, то масъулияти худро дар баробари муҳоҷирони ихроҷшуда аз Покистон адо кунанд.

Ин нишасти Толибон дар ҳоле баргузор мешавад, ки рӯзи гузашта расонаҳои покистонӣ гузориш доданд, ки танҳо дар давоми ҳафта наздик ба ҳафт ҳазор шаҳрвандони Афғонистонро ба таври иҷборӣ аз Покистон ихроҷ кардаанд.

Дар ҳамин ҳол наворҳое дар шабакаҳои иҷтимоӣ нашр шуда, ки дида мешавад, пулис ва дигар мақомҳои Покистон ба хонаҳо даромада, мардону занони муҳоҷирони афғонро бо зарбу лат зӯран берун мекунанд. Гуфта мешавад, пулис муҳоҷиронро аз хонаҳо боздошт карда, мустақим ради марз мекунанд.

Ин сиёсати Покистон нисбати муҳоҷирони Афғонистон пас аз омадани Толибон ба сари қудрат дар ин кишвар тундтар шудааст. Мақомоти Покистон дар чандин амалиёт ва таҳаррукоти низомӣ Толибони Афғонистон муттаҳам медонад, аммо Толибон тамоми иттиҳомоти Покистонро рад мекунад.

Эмомалӣ Раҳмон боз ба ширкатҳои наздиконаш сабукӣ дод

Аз ҷониби
AZDA.TV
-
0

Ҳукумати Тоҷикистон бо сардории Эмомалӣ Раҳмон ду ҳавопаймои ширкати “Сомон -Эйр”-ро аз пардохти боҷи гумрукӣ ва андоз аз арзиши иловашуда озод кард.

Раидои Озодӣ хабар дод, ки 7-уми апрел қарори ҳукуматро дастрас кардааст. Ва дар он муҳлати ворид кардани ду ҳавопайморо, ки ширкати “Сомон Эйр” бояд имсол ворид мекард, тамдид кард. Дар қарор омадааст, “ширкати “Сомон Эйр” ҳақ дорад, ду ҳавопаймои “Боинг 737-800”-ро то 30-юми августи соли 2026 ба кишвар биорад.”

Дар зимн, ҳукумати кишвар бо ин қарор таъкид карда, ки ширкати “Сомон Эйр”, ки марбут ба додараруси Эмомалӣ Раҳмон Ҳасан Асадуллозода аст, “аз пардохти боҷи гумрукӣ ва андоз аз арзиши иловашуда ҳангоми овардани ҳавопаймоҳо озод аст.”

Маълум нест, маблағи андоз аз арзиши иловашуда ва боҷи гумрукии ду ҳавопаймо чӣ миқдор аст ва Ҳукумат ҳам дар қарораш мисли ҳамеша онро мушаххас накардааст.

Ин бори аввал нест, ки Ҳукумати Тоҷикистон ба ширкатҳои бузурги марбут ба наздикони хонаводаи Эмомалӣ Раҳмонро аз пардохти андозҳои ҳангуфт озод мекунад. Аз ин пештар чанд маротиба Ҳукумат меҳмонхонаи “Исмоили Сомонӣ”, ки ба Раҳматуллоҳ Саъдуллоев, додараруси дигари Эмомалӣ Раҳмон ва бародари Ҳасан Асадуллозода таттллуқ дорад, аз андоз озод карда буд.

Меҳмонхонаи “Исмоили Сомонӣ”, ки дар хиёбони Рӯдакии шаҳри Душанбе воқеъ аст, беш аз 18 сол аст, ки аз андози арзиши иловашуда, андоз аз даромад ва боҷи гумрукӣ озод аст.

Тавре маълум аст, ҷараёни сохтмони бинои ин меҳмонхона, ки аз моҳи марти соли 2006 идома дорад ва ҳоло ҳам маълум нест, ки он ба охир расидааст ё на, вале Ҳукумати кишвар ҳар сол онро аз пардохти боҷу андозҳо озод мекунад, дар ҳоле, ки соҳибкорон ва ширкатҳои дигар чунин имтиёзе надоранд.

Харҷи сохтмони бинои меҳмонхона 30 миллион доллар арзёбӣ шуда ва он бояд дар якуним сол сохта ва ба истифода дода мешуд. Ва то ҳанӯз маълум нест ба куҷо анҷомид.

Бархе таҳлилгарон мегӯянд, ширкатҳои наздикони Эмомлаӣ Раҳмон дар Тоҷикистон бо вуҷуди миллионҳо сомонӣ қарздор будан аз барқу андоз, боз ҳам барояшон имтиёзҳои зиёде дода мешавад, ки дигар ширкатҳо ва соҳибкорон аз он маҳруманд.

1...131415...666саҳифаи 14 аз 666

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
35.1 ° C
35.1 °
35.1 °
17 %
1kmh
20 %
Sun
35 °
Mon
35 °
Tue
35 °
Wed
35 °
Thu
36 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст