Mega Menu - Page 236 of 657

Вазорати хориҷаи Эрон сафири Фаронсаро эҳзор кард

Аз ҷониби
AZDA TV
-

05/01/2023
0

Давлати Эрон дар пайи интишори карикатураҳои марбут ба воқеаҳои ахири ин кишвар ва раҳбари он Алӣ Хоманаӣ дар нашрияи фаронсавии “Шарли Эбдо” вокуниш кард.

Вазорати корҳои хориҷаи Ҷумҳурии исломии Эрон субҳи имрӯз бо нашри изҳороте хабар дод, ки дар пайи нашри карикатураҳо дар нашрияи “Шарли Эбдо” сафири Фаронса дар Теҳрон Никола Рош ба Вазорати корҳои хориҷа эхзор шуда, нусхаи эътирознома ба дасти ӯ супорида шудааст.

Носир Канъонӣ, сухангӯ ва раиси Маркази дипломатии умумии Вазорати корҳои хориҷаи Эрон эълом дошт, ки дар ҷараёни ин эҳзор ба сафири Фаронса гуфта шуда, ки Эрон “тавҳин ба муқаддасот ва арзишҳои исломӣ, мазҳабӣ ва миллиро намепазирад.”

Вазорати хориҷаи Эрон бо нашри изҳороте масъулияти ин иқдомро ба дӯши давлати Фаросна гузошта мегӯяд: “Фаронса ҳақ надорад бо баҳонаи озодии баён иҳонат ба муқаддастони дигар кишварҳо ва миллатҳои мусалмонро тавҷеҳ намояд.“

Инчунин мақомоти ин кишвар хабар дод, ки дар як иқдоми талофиҷӯёна “Анҷумани эроншиносӣ”-и Фаронса дар Теҳронро мебандад. Ва ҳамзамон мақомот гуфта, ки рӯи муносибатҳои фарҳангии Эрону Фаронса бознигарӣ мешавад.

Дар пайи эҳзори сафири Фаронса дар Теҳрон вазири корҳои хориҷаи Фаронса Катрин Колонна бо нашри изҳороте гуфт, “Давлати Эрон бояд қабл аз интиқод аз Фаронса ба ончи ки дар кишвараш мегузарад, нигоҳ кунад.”

Ҳамчунин вазири корҳои хориҷаи Фаронса мегӯяд: “Дар Фаронса бар хилофи Эрон озодии матбуоти вуҷуд дорад. Ва ин озодӣ тавассути як қозӣ, ки дар чорчӯби як системаи қазоии мустақил аст, назорат мешавад. Чизе, ки бидуни шак Эрон аз он чизе намедонад.”

Вокуниши Эрон дар пайи он сурат гирифта, ки маҷалаи танзии “Шарли Эбдо” шумораи охирашро ба воқеаҳои ахири ин кишвар бахшида, бо нашри 35 карикатура раҳбарияти ин кишвар, ба хусус раисҷумҳур Иброҳим Раисӣ ва раҳбари он Алӣ Хоманаиро ба танз кашидааст.

Ин нашрия қаблан ҳам бо нашри чунин карикатураҳо нисбати Паёмбар Муҳаммад (с) ва дини ислом борҳо ба вокунишҳои ҷаҳонӣ ва ҷаҳони ислом рӯбарӯ шудааст.

Раиси вилояти Хатлон ва муовини сарвазир низ аз вазифаҳояшон барканор шуданд

Аз ҷониби
firuzihait
-

05/01/2023
0

Имрӯз 5-уми январ муовини аввали сарвазири Тоҷикистон ва раиси вилояти Хатлон аз вазифаҳояшон барканор шуда, ба вазифаҳои нав таъйин карда шудаанд.

Бино ба иттилои нашрияи “Пайк”, Ҳакимзода Қурбон, ки аз моҳи январи соли 2019 ба ҳайси раиси вилояти Хатлон кор мекард, аз ин вазифа барканор шуда, вазири кишоварзии кишвар таъин шудааст.

То ҳол маълум нест, Саъдӣ Каримзода, ки моҳи январи соли гузашта вазири кишоварзии Тоҷикистон таъйин гардида буд, баъди барканориаш аз ин вазифа ба кадом кори нав мегузарад.

Инчунин Давлаталӣ Саид, ки аз моҳи ноябри соли 2013 муовини аввали сарвазири кишвар буд, ба ҷойи Ҳакимзода Қурбон раиси вилояти Хатлон таъйин шуд. Гуфта мешавад, Давлаталӣ Саид яке аз пайвандони раисҷумҳур Эмомалӣ Раҳмон мебошад.

Имрӯз чанд тағйироти кадрии дигар дар вазорату кумитаҳои кишвар сурат гирифтааст, аммо расонаҳои марбут ба Ҳукумат то ҳол ин фармонҳоро нашр накардаанд.

Коршиносон тағйироти кадрӣ дар вазорату кумитаҳои Тоҷикистонро танҳо ҷойивазкунӣ меноманд, чун аксар мақомдорон аз як вазифа барканор шуда, бидуни дар назар гирифтани дастовардҳои шахсӣ ва донишу маҳорат ба вазифаи дигар таъйин мегарданд.

Тағйироти кадрӣ. Ширин Амонзода аз вазифааш барканор шуд

Аз ҷониби
AZDA TV
-

05/01/2023
0

Дар Ҳукумати Тоҷикистон имрӯз 5-уми январи соли 2023 дар манасбҳои гуногун тағйироти кадрӣ сурат гирифт. Аммо расонаҳои марбут ба Ҳукумат то ҳол ин фармонҳоро нашр накардаанд.

Дар тағйироти имрӯза Амонзода Ширин, вазири меҳнат, муҳоҷират ва шуғли аҳолии Тоҷикистон аз мақомаш барканор шуд. Ба курсии ӯ Ҳасанзода Гулнора Кенҷа, собиқ вазири Агентии омори кишвар такя зад. То ҳол маълум нест Амонзода ба кадом вазифа таъйин карда шуд.

Тавре “Азия-Плюс” аз манобеаш хабар медиҳад, дар тағйироти кадрии имрӯза ҳамчунин ба мансаби вазири Агентии омор Ҷамшед Нурмаҳмадзода, собиқ раиси Бонки миллии Тоҷикистон таъйин када шудаст.

Абдуфаттоҳ Шарифзода, сухангӯи Президенти Тоҷикистон тағйироти кадрӣ дар мақомоти кишварро тасдиқ карда, вале гуфтааст, “ҳоло расман фармонҳоро дар даст нагирифтем ва аз ин рӯ, мушаххас чизе гуфта наметавонем.”

Тибқи маъмул дар Тоҷикистон ҳар сол моҳи январ тағйироти кадрӣ сурат мегирад, аммо аксари коршиносон ин тағйиротро шаклӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисосу донишу маҳоратро меъёр қарор намедиҳад, балки меъёр дар интихоби кадрҳо бештар шинос будану наздик будан ба хонавода аст.

Амалӣ кардани 200 тарҳи сармоягузорӣ дар се сол

Аз ҷониби
firuzihait
-

04/01/2023
0

Ҳукумати Тоҷикистон қасд дорад то соли 2025, яъне давоми се соли оянда дар кишвар беш аз 200 тарҳи давлатии сармоягузориро амалӣ намояд.

“Аvesta.tj” дар истинод ба сохторҳои дахлдори блоки иқтисодии кишвар хабар медиҳад, ки аз ин 200 тарҳ, танҳо ба бахши воқеӣ ва зербиноӣ беш аз 82 миллиард сомонӣ, ҳудуди беш аз 8 миллиард доллар сармоягузорӣ хоҳад шуд.

Гуфта мешавад, ҷалби ин маблағҳо аз ниҳодҳои молиявии байналмилалӣ, кишварҳои алоҳида ва ҳамчунин аз сармоягузории мустақим дар назар буда, маблағҳои қарзӣ барои татбиқи лоиҳаҳои давлатӣ бо шартҳои имтиёзнок ва дарозмуддат ҷалб карда мешаванд.

Бино ба иттилои манбаъ, аз соли 2002 ба ин сӯ ба кишвар беш аз 152 миллиард сомонӣ сармояи хориҷӣ, аз ҷумла 60 миллиард сомонӣ сармояи мустақим ҷалб шуда, зиёда аз 36 миллиард сомонӣ сармоягузории мустақим ба рушди соҳаи саноат равона карда шудааст. Бо вуҷуди сармоягузориҳо ва таъкидҳои Эмомалӣ Раҳмон барои рушди соҳаи саноат, ин соҳа дар Тоҷикистон хеле заифу ақибмонда аст.

Дар гузашта низ мақомоти кишвар аз даҳҳо тарҳи давлатии сармоягузорӣ гуфта буданд, аммо аксари он тарҳҳо то имрӯз амалӣ нашудаанд.

Қарзи $750 ҳазори БАТР ба боғпарварони Тоҷикистон

Аз ҷониби
amrullokhi
-

04/01/2023
0

Бонки аврупоии таҷдид ва рушд барои пешгирӣ аз хавфҳо ва рушди соҳаи боғдорӣ дар Тоҷикистон 750 ҳазор доллари амрикоӣ қарз ҷудо кардааст.

Антон Усов, сухангӯи Бонки аврупоии таҷдид ва рушд (БАТР) дар Осиёи Марказӣ ва Муғулистон дар саҳфаи Твиттриаш хабар додааст, ки ин бонк барои ҳамоят аз нахустин пружаи боғдорӣ дар Тоҷикстон 750 ҳазор доллар қарз ҷудо кардааст.

Ба қавли манбаъ, ин маблағҳо барои пешгирӣ аз хатари хавфҳо (рискҳо) тавассути Бонки ЭСХАТА ба боғпарварони кишвар тақдим карда мешаванд.

Антон Усов гуфтааст, Бонки аврупоии таҷдид ва рушд дар қадами аввал ба ширкатҳои “Зерновая компания” ва корхонаи “Меваҳои суғд”, ки ба боғпарварӣ ва содироти мева машғул ҳастанд, маблағ ҷудо кардааст.

Гуфта мешавад, ин ду ширкати боғдорӣ айни замон дар Тоҷикистон ба боғпарварӣ ва содироти меваҳои тару хушк ба хориҷи кишвар машғул мебошанд.

Дидори вазирони мудофиаи Тоҷикистону Беларус

Аз ҷониби
amrullokhi
-

04/01/2023
0

Вазири мудофиаи Тоҷикистон дар раъси як ҳайъати баландпоя бо сафари корӣ ба шаҳри Минск, пойтахти Беларус сафак кардааст.

Бино ба иттилои расмӣ, Шералӣ Мирзо, вазири мудофиаи Тоҷикистон 3-уми январи соли 2023 ба шаҳри Минск, пойтахти Беларус сафар кардааст, то дар бораи ҳамкорҳои соли ҷорӣ бо ҳамтои беларусиаш Виктор Хренин дидору гуфтугӯ кунад.

Валерий Ревенко, сардори департаменти байналмилалии ҳамкориҳои ҳарбии Беларус ва ёвари вазири мудофиаи ин кишвар дар саҳфаи Твиттриаш дар бораи сафари кории генерал-полковник Шералӣ Мирзо ба шаҳри Минск хабар дод. Аммо ӯ нагуфта, ки вазири мудофиаи Тоҷикистон бо чӣ ҳадафе ба Баларус сафар кардааст.

Пеш аз ин АМИТ “Ховар” ба нақл аз сухангӯи Вазорати мудофиаи Тоҷикистон Фаридун Маҳмадализода иттилоъ дода буд, ки генерал-полковник Шералӣ Мирзо, вазири мудофиаи Тоҷикистон дар ҷараёни вохӯриҳо бо ҳамтои белорусияш “нақшаи ҳамкории ҳарбиро барои соли 2023 ба имзо расониданд.”

Гуфта мешавад, Тоҷикистону Беларус бо вуҷуди ҳамкориҳои хуби дуҷониба доштан ҳамчунин дар доираи барномаҳои созмони Иттҳоди давлатҳои мустақил, Созмони Паймони амнияти дастаҷамъӣ ва ғайра ҳамкорӣ мекунанд.

Акнун ВКД аризаҳои шаҳрвандонро электронӣ қабул мекунад

Аз ҷониби
AZDA TV
-

04/01/2023
0

Вазорати корҳои дохилии Тоҷикистон бо роҳандозии саҳифаи нави электронӣ хабар дод, ки аризаҳои шаҳрвандон дар бораи ҷиноятро ба тариқи Интернет қабул мекунад.

Тавре хабаргузории давлатии “Ховар” иттилоъ медиҳад, фаъолияти қабули электронии аризаи шаҳрвандон дар доираи “Барномаи ислоҳоти милитсия барои солҳои 2021-2025” роҳандозӣ шудааст.

Гуфта мешавад, ин барнома барои осон кардани кори муроҷиаткунандагон ва сари вақт пешгирӣ кардан аз ҷиноятҳо роҳандозӣ шудааст. Чунин иқдом дар Тоҷикистон аз иқдомҳои аввалин дар самти истифода аз абзори электронии муосир дар кори давлатдорӣ ба шумор меравад.

Дар замони Интернету технологияҳои муосир аксари кишварҳои дунё барои осон кардани кор барномаҳои ҳукумати электрониро пеш гирифтаанд, ки ин барнома метавонад аз ҳама ҷиҳат барои шаҳрвандон муфид ва самаранок бошад. Аммо Тоҷикистон бо вуҷуди пиёда кардани барномаи мазкур дар ин самт пешравии чашмрасе надорад.

Ҷузъиёти куштори Розиқов дар боздоштгоҳи шаҳри Кӯлоб

Аз ҷониби
AZDA TV
-

03/01/2023
0

Наздикони Абдуқаҳҳор Разоқов гуфтанд, 4 нафар аз кормандони пулиси шаҳри Кӯлоб соати 2-и шаби 3-уми январ ӯро аз хонааш дастгир карда, соати 4-и субҳ ҷасадашро ба сардхона бурданд.

Яке аз наздикони Абдуқаҳҳор дар тамос бо Azda tv бидуни зикри номаш гуфт, ки марҳумро дар боздоштгоҳи шаҳри Кӯлоб барои имзо гузоштан зери кадом парвандаи ҷиноятие маҷбур мекунанд, вале ӯ имзо намекунад. Аз ин рӯ, ӯро 4 ё 5 нафар аз кормандони пулис дар барқ мемонанд ва то дами марг шиканҷаи сахт мекунанд. Пас аз ҷон бохтан онҳо бо мақсади рӯпӯш кардани ин ҷинояташон ӯро ба беморхона ва аз онҷо ба сардхона бурда худ фирор кардаанд. “Ҳатто сабти дурбинҳои мадорбастаи сардхонаро пок кардаанд то пайдо нашавад, ки ҷасадро кӣ ба онҷо овардааст”, мегӯяд манбаъ.

Манбаъ 4 нафар аз кормандони пулиси шаҳри Кӯлобро, ки дар ин ҷиноят гумонбар дониста мешаванд, бо номҳои Шамшод, Шорух, Зафар ва Кароматов Ҷамшед ном бурд.

Ӯ ҳамчунин афзуд, ки сардори пулиси шаҳри Кӯлоб, ки аз наздикони Рустами Эмомалӣ аст, ба зердастонаш барои тамоми корро кардан иҷозат додааст ва ҳатто ба онҳо гуфта, ки “ҳар тавре ки дилатон мехоҳад рафтор кунед, ҳатто бизанеду бикушед ҳам ман посухашро мегӯям.”

Гуфта мешавад, айни замон ин 4 пулис дар додситонии шаҳри Кӯлоб боздошт шудаанд, аммо маълум нест парвандаи онҳо таҳқиқ мешавад ва онҳо ба ҷавобгарӣ кашида мешаванд ва ё на. Ба гуфтаи наздикони марҳум, ин чанд нафар пулиси ҷавон вақтҳои охир дар шаҳри Кӯлоб бо мардум бисёр рафтори ноҷо ва мағрурона доштанд, “чунки онҳоро сардори пулиси шаҳри Кӯлоб Қунғуротзода Фотеҳ ҳимоят мекард ва ҳаркоре дилашон мехост даст мезаданд.”

Инчунин ба иттилои ин хеши Абдуқаҳҳор, яке аз ҳимоятгаронии аслии пулисҳои номбаршуда яке аз домодҳои Нуриддин Раҳмонов, бародари Эмомалӣ Раҳмон будааст. Сокинони Кӯлоб мегӯянд, наздикони Эмомалӣ Раҳмон дар шаҳри Кӯлоб мардумро ба дод овардаанд.

Манбаъ мегӯяд, яке аз ин пулисҳо, ки номаш Ҷамшед аст, боре бо ҷинояти фурӯши маводи мухаддир дастгир ва аз кор ронда шудааст, аммо боз бо шиносбозӣ дубора пулиси минтақа таъйин мешавад.

Ёдовар мешавем, ки пас аз марги Абдуқаҳҳори 37-сола нафарони зиёде дар назди шуъбаи пулиси Кӯлоб ҷамъ омада, аз мақомот хостанд, онҳое, ки дар қатли марҳум гумонбар мешаванд, боздошт ва ба ҷавобгарӣ кашида шаванд. Аммо гуфта мешавад, пас аз таҷаммуи хешу наздикони Розиқов дар назди идораи пулиси шаҳри Кӯлоб беш аз даҳ нафари онҳо боздошт шуданд, ҳатто тибқи хабарҳои таъйидношуда пас аз боздошти пайвандони Абдуқаҳҳор як нафари дигар ҳам дар натиҷаи шиканҷаи пулис ҷон бохтааст. Аммо то ҳол Azda tv дурустии ин хабарро аз манбаъҳои дигар таъйид накардааст.

Дар ҳамин ҳол рӯзи 3-уми январ Вазорати корҳои дохилии Тоҷикистон сабаби марги Абдуқаҳҳор Розиқовро истеъмоли зиёди “маводи сахттаъсири навъи амфетамин (кристалл)” гуфтааст, аммо наздиконаш инро рад мекунанд.

1...235236237...657 саҳифаи 236 аз 657