Ҷустуҷӯ кунед
Ҷустуҷӯ
23.9 C
Dushanbe
Хона блог саҳифа 244

Гузоришгари СММ аз вазъи ҳуқуқи инсон дар ВМКБ нигаронӣ кард

Аз ҷониби
AZDA TV
-
0

Гузоришгари вежаи Созмони Миллали Муттаҳид дар бораи ҳомиёни ҳуқуқ Мэри Лаулори аз вазъи ҳуқуқу озодӣ ва вакилони дифоъ дар ВМКБ изҳори нигаронӣ кард.

Ин Гузоришгари вежаи СММ имрӯз, 9-уми декабр дар шаҳри Душанбе аз рафти сафару вохӯриҳояш давоми ду ҳафта бо ҳоимиёни ҳуқуқу рӯзноманигорони зиндонӣ бо гузарондани нишасти матбуотие ба рӯзноманигорон гузориш дод.

Мэри Лаулори зимни ироаи гузориши худ аз он изҳори нигаронӣ кард, ки ҳукумати Тоҷикистон бо баҳонаи мубориза бо терроризм фишори аз ҳад зиёд болои мардуми Бадахшон ворид кардааст, ки ин амал ба озодии баён таъсири манфии расондааст.

Ӯ мегӯяд, вазъияти ҳуқуқӣ дар ВМКБ бисёр бад аст ва ин дар натиҷаи муомилаи нодурусти Ҳукумат бо мардуми ин вилоят ба вуҷуд омадааст. Ӯ ҳамчунин изҳори нигаронӣ кард, ки натавонистааст бо ҳомиёни ҳуқуқ дар Бадахшон вохурӣ кунад.

Аммо, ӯ шарҳ надод, ки бо кадом сабаб натавонистааст бо мудофеони ҳуқуқи инсон ва ё мардуми оддӣ дар ВМКБ вохӯрӣ кунда. Ба гуфтаи баъзе таҳлилгарон, ба эҳтимоли зиёд барои вохӯрӣ накардани ӯ бо мардум дар ВМКБ худи мақомоти Тоҷикистон монеъ шудаанд.

Гузоришгари вежаи СММ дар хитоб ба мақомоти кишвар таъкид кард, ки Тоҷикистон набояд уҳдадориҳои худро дар назди СММ ва созмонҳои ҳуқуқии дигари баналмилалӣ фаромӯш кунад. Ва аз Ҳукумати кишвар хост мувофиқи талаботи байналмилалӣ бояд ба номаву дархостҳои намояндагони СММ ва созмонҳои ҳомиёни ҳуқуқ сари вақт посух бигӯяд.

Баргузории нишасти сарони Иттиҳоди иқтисодии “АвруОсиё” дар Бишкек

Аз ҷониби
amrullokhi
-
0

Сарони кишварҳи узви Иттиҳоди иқтисодии “АвруОсиё” дар пойтахти Қирғизистон гирди ҳам ҷамъ шуда, дар бораи бурду бохтҳои ин созмон суҳбат мекунанд.

Имрӯз, 9-уми декабри соли 2022 сарони кишварҳои узви Иттиҳоди иқтисодии “АвруОсиё” дар шаҳри Бишкек ҷамъ шуда, дар бораи роҳҳои дур задани таҳримҳо ва тавсеаи ҳамкориҳои худ бо кишварҳои Манголия, Эрон, Индонезия, Миср ва Имороти Муттаҳидаи Арабӣ гап мезананд.

Президенти Қазоқистон дар ин нишаст бидуни ном гирифтани Русия дар бораи таъсири манфии таҳримҳо ба кишварҳои узви ин иттиҳодия суҳбат карда, гуфт, бояд ба ин амр аҳамият дода шавад ва роҳҳи бурунрафти онро ҳам ҷӯё шавем. Вай таъкид кард, Қазоқистон ба хотири тавсеи ҳамкориҳо музокироти худро бо Амороти Муттаҳидаи Арабӣ оғоз мекунад.

Нахуствазири Арманистону Президенти Беларус дар ин нишаст бештар дар бораи тавсеаи ҳамкориҳои иқтисодӣ ва энергетикӣ суҳбат карданд, вале раиси ҷумҳури Русия иддао кард, ки таваррум дар кишварҳои узви Иттиҳоди иқтисодии “АвруОсиё” нисбат ба кишварҳои узви Иттиҳоди Аврупо камтар аст.

Гуфта мешавад, Иттиҳоди иқтисодии “АвруОсиё” кишварҳои Русия, Баларус, Қазоқистон, Қирғизистон ва Арманистонро дар ин бахш бо ҳам муттаҳид мекунад ва кишвари Узбекистон дар ҳоли ҳозир узви нозир дар ин созмон аст.

Улфатхоним Мамадшоева ба 21 соли зиндон маҳкум шуд

Аз ҷониби
firuzihait
-
0

Улфатхоним Мамадшоева, рӯзноманигор ва фаъоли ҷомеаи маданӣ ба 21 соли зиндон маҳкум шуд. Дар ин бора Радиои Озодӣ дар истинод ба манобеаш хабар медиҳад.

Бино ба иттилои манбаъ, ҳукми ин рӯзноманигори тоҷикро, Додгоҳи олии Тоҷикистон аввали ҳафтаи ҷорӣ содир кардааст. Ҷузъиёти бештар аз рафти ин мурофиа дастраси расонаҳо нест. Мақомоти тоҷик мисли ҳамеша ин ҳукмҳои тӯлониашонро нисбати фаъолон шарҳ надодаанд.

Рӯзноманигор ва фаъоли маданӣ Улфатхоним Мамадшоева бо ҳамсари собиқаш Холбаш Холбашов собиқ сардори Раёсати Қӯшунҳои сарҳадии КДАМ-и Тоҷикистон дар ВМКБ, ки дертар ба ҳукми абад маҳкум шуд, дар як рӯз – 18 майи cоли ҷорӣ, пас аз тазоҳурот ва нооромиҳои моҳи майи имсол дар вилоят, ки бо марги даҳҳо нафар анҷомид, боздошт шуданд.

Парвандаи ин рӯзноманигорро Додситонии кул ва КДАМ таҳқиқ карда, нисбати Улфатхоним Мамадшоеваро бар асоси ҳашт моддаи Кодекси ҷиноятӣ, аз ҷумла “даъват барои сарнагун кардани ҳукумати қонунӣ” муттаҳам намуда буд. Аммо худи ӯ ва наздиконаш ин иттиҳомотро рад мекунанд.

Улфатхоним Мамадшоева, ягона рӯзноманигоре нест, ки мақомоти тоҷик равонаи зиндон карданд. Пештар аз ӯ Далери Имомалӣ ба 10 сол, Муҳаммади Султон ба 7 сол, Абдуллоҳ Ғурбатӣ ба 7,5 соли зиндон, Завқибек Саидаминӣ ба 7 сол, Раҳматуллоҳи Раҷаб ва Абдуқаҳҳори Давлат ба 28 солӣ, Ҳикматуллоҳи Сайфуллозода ба 16 сол, Маҳмадалӣ Ҳаит ба ҳукми абад ва чанд тани дигар  маҳкум ба зиндон шуданд. Инчунин чанд тан аз рӯзноманигорону блогерони дигар дар боздоштгоҳҳо мунтазири ҳукми додгоҳанд.

Боздошту зиндони кардани рӯзноманигорони тоҷикро созмонҳои ҷаҳонӣ ва ҳимояи рӯзноманигорон маҳкум карда, борҳо озодии бечуну чарои онҳоро аз Ҳукумати Тоҷикистон талаб карданд, вале мақомоти тоҷик мисли ҳамеша ин дархостҳоро нодида гирифт.

Сокинону меҳмонони пойтахт аз қарорҳои Рустами Эмомалӣ норозиянд

Аз ҷониби
amrullokhi
-
0

Сокинони шаҳри Душанбе вобаста ба қарорҳои ахири масъулини пойтахт дар хусуси танзими мошинҳои мусофиркашонӣ, Рустами Эмомалиро гунаҳкор медонанд.

Пас аз оғози “таксишикор” ва барчидани мошинҳое, ки бароришашон то соли 2016 аст ва дар шаҳри Душанбе ба мусофиркашонӣ машғул буданд, натанҳо эътирози таксиронҳову сокинони пойтахт, меҳмонон, сайёҳон, балки аз мубаллиғони режими Эмомалӣ Раҳмонро ҳам ба бор овардааст.

Дар ҷамъи касоне, ки ин эътирозҳоро бо шеваҳои мухталиф дар шабакаҳои иҷтимоӣ роҳандозӣ ва аз он ҷонибдорӣ мекунанд, иддае аз таблиғгарони сафи пеши ҳукумати Эмомалӣ Раҳмон, ба мисли

Ронанадаҳои таксӣ дар шаҳри Душанбе ин дарду нигарониҳои худро на танҳо барои тоҷикистониҳо қисса мекунанд, балки ба бархе меҳмонони хориҷӣ ҳам нақл мекунанд. Барои мисол, рӯзноманигори афғон Мухтор Вафоӣ, ки муқими яке аз кишварҳои аврупоӣ асту чанд рӯзи ахир дар шаҳри Душанбе меҳмон будааст, дар бахше аз ёддоштҳои худ ин қазияро чунин овардааст:

“Ронандаҳои таксӣ дар шаҳри Душанбе ин рӯзҳо андаке асабонианд. Ҳукумат дастур додааст, ки истифода аз мутарҳои тавлидшуда дар қабл аз 2016 мутаваққиф шаванд ва ронанҳои таксӣ, мутарҳои ҷадидеро, ки ба бозор арза шуда, таҳия кунанд. Ронандаҳо бо асабоният мегӯфтанд, тавоноии хариди мутари ҷадид надоранд ва ин судури ин дастур ононро нигарон сохтааст”.

Гуфта мешавад, Рустами Эмомалӣ бо вуҷуди имконоти зиёди дар ихтиёр доштанаш тайи беш аз панҷ соли ахир, ки шаҳрдори Душанбе аст, миллионҳо сомониро барои ба танзим ва тартиб даровардани кори нақлиёти ҷамъиятӣ харч кардааст, вале натиҷаи кораш ҳамоно ғайри қаноатбахш арзёбӣ мешавад.

Ба иборати дигар, касе, ки дар панҷ соли кориаш натавониста яке аз мушкилҳои асосии пойтахт, он ҳам ба танзим даровардани нақлиёти ҷамъиятиро сару сомон диҳад, ва ба гуфтаи Сайёфи Мизроб “бояд масъулини ин соҳа куллан иваз шаванд ва ҷои ҷавонҳои “креатив” мудгардида, ҳамун солхӯрдагони даврони шуравӣ, ки хушбахтона, бархе зиндаанд, ба кор ҷалб гарданд. 2х2 аст, агар аз БОЛО амр шавад.”

Амруллоҳи Низом, махсус барои Azda tv

Мулоқоти Вазири корҳои хориҷӣ бо Шоҳзода Раҳим Оқохон

Аз ҷониби
amrullokhi
-
0

Вазири корҳои хориҷии Тоҷикистон бо Шоҳзода Раҳим Оғохон дар шаҳри Париж, пойтахти Фаронса мулоқот кардааст.

Бино ба иттилои сомонаи Вазорати корҳои хориҷии Тоҷикистон имрӯз, 8-уми декабри соли 2022 Сироҷиддин Муҳриддин, вазири корҳои хориҷии Тоҷикистон бо Шоҳзода Раҳим Оқохон дар шаҳри Париж, пойтахти Фаронса мулоқот кардааст.

Ба қавли манбаъ, ин мулоқот “дар шаҳри Париж дар ҳошияи сафари корӣ ба Ҷумҳурии Фаронса вохӯрии вазири корҳои хориҷии Ҷумҳурии Тоҷикистон Сироҷиддин Муҳриддин бо Шоҳзода Раҳим Оқохон баргузор гардид.”

Вазорати корҳои хориҷии Тоҷикистон мегӯяд, дар ин мулоқот “ҷонибҳо ҳолати кунунӣ ва роҳҳои такмили абзори ҳамкориҳои дуҷониба миёни Ҷумҳурии Тоҷикистон ва Ташкилоти Оқохон оид ба рушдро мавриди баррасӣ қарор доданд.”

Гуфта мешавад, охирин дидори Эмомалӣ Раҳмон бо Карим Оқохони IV ҳангоми сафари Эмомалӣ Раҳмон соли 2019 ба Фаронса дар шаҳри Париж баргузор шуда буд, он замон ҳам гуфта мешуд, муносибатҳои ҳар ду ҷониб хеле хуб аст ва дар барои тавсеаи ҳамкориҳо суҳбат карданд, вале давоми соли ҷорӣ Президенти Тоҷикистон то тавонист алайҳи муассисаҳо ва ниҳодҳои молии марбут Оқохон дар Тоҷикистон фишор овард.

Вазорати корҳои хориҷии Тоҷикистон дар бораи дигар ҷузъиёти ин мулоқот чизе нагуфтааст, вале ба назар мерасад, пас аз ҳамлаҳои хунини мақомот дар шаҳри Хоруғ ва ноҳияи Рӯшони Вилояти Мухтори Кӯҳистони Бадахшон алайҳи эътирозгарон муносибати Карим Оқохон, раҳбари исмоилиёни ҷаҳон бо ҳукумати Эмомалӣ Раҳмон, хеле сард шудааст.

Мулоқоти намояндаи СММ бо Абдуллоҳ Ғурбатӣ ва Далери Имомалӣ

Аз ҷониби
AZDA TV
-
0

Гузоришгари вежаи Созмони Миллали Муттаҳид дар бораи ҳомиёни ҳуқуқ Мэри Лаулори дар Боздоштгоҳи муваққатии шаҳри Душанбе бо рӯзноманигорони зиндонӣ Абдуллоҳ Ғурбатӣ ва Далери Имомалӣ вохӯрӣ кардааст.

Ба гузориши хабаргузории “Азия-Плюс”, ин мулоқот ҳафтаи ҷорӣ доир гаштааст. Аммо тафсилоти ин мулоқот нашр нашудааст. Вале гуфта мешавад, ки рӯзноманигорон ба Гузоришгари СММ гуфтаанд, ки боздошти онҳо ба хотири фаъолияти рӯзноманигорияшон аст ва ҳаукми додгоҳро эътироф намекунанд.

Як ҳайати Гузоришгари вежаи СММ ба ин расона баргузор шудани вохӯриро таъйид карда, афзудааст, ки фардо, 9-уми декабр дар дафтари СММ дар Душанбе нишасти матбуотӣ баргузор мегардад ва аз додани тафсилот худдорӣ кардааст.

“Манбаи мо аз қавли гузоришгарони СММ гуфт, зимни суҳбат Абдуллоҳ Ғурбатӣ ва Далери Имомалӣ аз вазъи саломатии худ шикоят накардаанд ва танҳо гуфтаанд, наздиконашонро пазмон шудаанд.”, омадааст дар хабар.

Ҳамчунин гуфта мешавад, ки Абдуллоҳ Ғурбатӣ ва Далери Имомалӣ аз намояндаи вежаи СММ хостаанд, ки барои нигаҳдорӣ ҳардуро ба як ҳуҷра бигузаронанд.

Ёдовар мешавем, ки сафари кории Гузоришгари вежаи Созмони Милали Муттаҳид дар бораи ҳомиёни ҳуқуқи инсон Мэри Лоулор ба Тоҷикистон аз 28-уми ноябр оғоз шуда, то 9-уми декабр идома хоҳад кард.

Гуфта мешавад, Мэри Лоулор дар ин сафараш ба Тоҷикистон вазъи ҳомиёни ҳуқуқи башар, ҳамчунин мавзӯҳои муҳим ва мушкилоти ҷомеаи шаҳрвандиро баррасӣ мекунад.

 

Путин: Мумкин аст ҷанг дар Украина идома пайдо кунад

Аз ҷониби
AZDA TV
-
0

Валидимир Путин, раисҷумҳури Русия рӯзи чоршанбе дар як суханронии телевонӣ гуфт, эҳтимол ҷанг дар Украина тӯлонӣ шавад.

Путин, ки ҳечгоҳ дар мавриди идома ёфтани ҷанг дар Украина ибрози назар накарда буд, ин бор аз тӯлонӣ шудани ҷангу аз афзоиши таҳдиди оғози ҷанги ҳастаӣ низ ёдовар шуд.

Ӯ мегӯяд, барои расидан ба аҳдофаш маҷбур аст то муддати тӯлонитаре бо Украина биҷангад. Владимир Путин афзуд, ки айни замон барои басиҷи дигарбораи сарбозони захиравӣ ба артиш зарурате намебинад. Вале дар оянда шояд ин фармонро бори дигар содир кунад.

Раисҷумҳури Русия зимни суханронияш аз афзоиши эҳтимоли сар задани як ҷанги ҳастаӣ низ ёдовар шуд. Аммо, ба гуфтаи ӯ, артиши Русия бесабаб таҳдид ба истифода аз силоҳи ҳастаиро нахоҳад кард.

Владимир Путин таъкид кард, ки “мо маънои силоҳи ҳастаиро медонем ва девона нашудаем, ки онро монанди теғ дар дастамон гирифта, гирди дунё бидавем.“

Изҳороти ахири Путин дар бораи ҷанги ҳастаӣ дар ҳолест, ки чандест мақомоти кишварҳои ғарбӣ аз коҳиши таҳдидҳои ӯ дар бораи истифодаи ин силоҳи сангин мегуянд. Ва пештар борҳо аз ҷониби Русия ҳушдор дода шуда буд, ки дар ҳолати зарурат ин кишвар дар ҷанг бо Украина аз силоҳи ҳастаӣ истифода хоҳад кард.

Барқи Тоҷикистон ба берун содир мешавад, вале сокинонаш бебарқанд

Аз ҷониби
firuzihait
-
0

Тоҷикистон дар даҳ моҳи аввали соли ҷорӣ ба маблағи беш 101 миллион доллар нерӯи барқ ​​содир кардааст. Аммо аҳолии кишвар аз набуди барқ сахт ранҷ мекашанд.

Акс аз Азия-Плюс

Avesta.tj дар истинод ба оморҳои расмии кишвар хабар медиҳад, ки дар моҳҳои январ-октябри соли ҷорӣ нисбат ба ҳамин давраи соли гузашта, 10,7 дарсад бештар нерӯи барқ содир шуда, ҳиссаи нерӯи барқ 5,7 дарсади ​​ҳаҷми умумии содироти Тоҷикисонро дар ҳамин давра ташкил додааст.

Тоҷикистон дар моҳҳои январ-октябри соли 2021 ба маблағи беш аз 91,3 миллион доллар ба хориҷ нерӯи барқ содир кардааст.

Мувофиқи созишномаҳои басташуда, Тоҷикистон ба Афғонистон ва Узбекистон (дар давраи баҳору тобистон, май-август) нерӯи барқ ​​медиҳад.

Гуфта мешавад, даромад аз содироти нерӯи барқ ​​дар моҳи октябри соли ҷорӣ нисбат ба моҳи қаблӣ 13 баробар – аз 17,1 миллион доллар то 1,3 миллион доллар коҳиш ёфтааст.

Тибқи қарордоде, ки бо ширкати афғонистонии барқии “Da Afghanistan Breshna Sherkat (DABS)” баста шудааст, Тоҷикистон ба Афғонистон дар фасли тобистон дар як шабонарӯз то 400 МВт ва дар фасли тирамоҳу зимистон (сентябр-апрел) то 40 МВт нерӯи барқ медиҳад.

Бар асоси ин созишнома, Тоҷикистон дар соли 2022 бояд ба Афғонистон 1,5 миллиард киловатт-соат, ки арзиши ҳар киловатт-соат нерӯи барқ 4,67 сент муайян шудааст, содир кунад.

Пештар аз ин хабар дода шуда буд, ки дар 9 моҳи аввали соли ҷорӣ дар Тоҷикистон 16 миллиарду 342,2 миллион кВт/соат нерӯи барқ тавлид шуда, нисбат ба ҳамин давраи соли 2021 460,6 миллион кВт/соат бештар аст.

Бо вуҷуди бештар тавлид шудани нерӯи барқ ва дар фасли сармо кам содир шудани он ба хориҷ, сокинони манотиқи гуногуни кишвар аз набуди барқ дар ноҳияҳояшон ва ҷорӣ шудани лимит аз моҳи сентябр шикоят доранд. Ва суоли матраҳ миёни сокинони кишвар ин аст, ки барқи тавлидшудаи нерӯгоҳҳо агар ба хориҷ кам содир мешавад, боқимондаи он куҷо мешавад?

Яке аз корбарони шабаҳои иҷтимоӣ аз набуди барқ шикоят карда навиштааст, ки “Дар ҳамин шаҳр ШАҲРДОР ҳаст ё не? То кай мардум аз ин гуна ҳиллаи шабакаҳои барқӣ азоб мекашанд? Мардум дар хона як бемор, одами пиронсол, кӯдаки навзод доранд, наход ҳар рӯз садама шавад, боз дар шаб, шахсан ман кӯдаки 2 моҳа дорам азоб кашида истодаем. Фикри мардумро намекунед? Як рӯз мехезӣ обаш нест, дигар рӯз барқаш!”

Инчунин Омар Амониён, корбари шабакаҳои иҷтимоӣ дар саҳфаи фейсбукии худ навиштааст, ки “Мантиқи мебуд агар “Барқи тоҷик”-ро “Барқи торик” ном мекардем. Ҳам ба фаъолияти ин ширкат мутобиқ мебуду ҳам номи “тоҷик”-ро аз ин сиёҳкорӣ берун мекашидем”.

Ба чунин монанд навиштаҳо дар шабакаҳои иҷтимоӣ бисёранд, ки аз мушкилоти бебарқӣ дар кишвар мегӯянд.

Дар бештари ҳолатҳо мақомот вуҷуди маҳдудият дар интиқоли нерӯи барқро рад мекунанд ё онро ба корҳои таъмиру бозсозӣ рабт медиҳанд.

Вале Эмомалӣ Раҳмон, раисҷумҳури Тоҷикистон, ки ҳамеша дар паёмҳояш аз афсона шудани лимити барқ мегуфт, рӯзи 24-уми октябри соли ҷорӣ вақти суханронӣ дар назди фаъолону раҳбарони шаҳри Норак ғайричамдошт эътироф кард, ки дар кишвар маҳдудияти интиқоли барқ вуҷуд дорад ва аз сокинону корхонаҳо хост нерӯи барқро сарфакорона истифода кунанд. Раҳмон маҳдудиятро муваққатӣ номида, ҷорӣ шудани онро ба хотири дар фасли сармо бо барқ пурра таъмин намудани аҳолӣ гуфт.

Роҳи Душанбе-Чаноқ муваққатан баста шуд

Аз ҷониби
AZDA TV
-
0

Бахши тоҷикистонии ширкати “Инноветив Роуд Солюшнз ЛТД” (IRS) дар саҳифаи фейсбукияш хабар дод, ки роҳи Душанбе – Чаноқ муваққатан барои тамоми мошинҳо баста шудааст.

Ширкат сабаби қатъи ҳаракат дар ин шоҳроҳи бузургро рух додани садамаи мошинҳо гуфтааст.  

Тавре ин ширкат дар огоҳномаи худ менависад: “Бинобар рух додани садамаи нақлиётӣ дар километри 57 – уми роҳи Душанбе – Чаноқ ҳаракати тамоми намуди нақлиёт муваққатан маҳдуд карда шуд.”

Ба иттилои манбаъ, дар ин қисмати роҳи кӯҳӣ як мошини сабукрав ба қисмати оқиби мошини боркаш (Дулан) бармехӯрад ва хушбахтона, бар асари ин садама талафоти ҷонӣ ва ё захмӣ шудани касе ба қайд гирифта нашудааст.

Гуфта мешавад, “кормандони филиали Ширкат ва мутахассисони Кумитаи ҳолатҳои фавқулода ва мудофиаи граждании кишвар “барои ба канори роҳ баровардани нақлиёти зикргардида сафарбар шуда, дар наздиктарин фурсат ҳаракати пурраи нақлиёт таъмин хоҳад гашт.”

Роҳи Душанбе-Чаноқ аз бузургтарин шоҳроҳҳои пулакии Тоҷикистон ба шумор рафта, шимоли кишварро ба пойтахт ва ҷануби он мепайвандад. Назорати ин роҳ аз соли 2009 ба дасти ширкати (IRS), ки ба яке аз наздикони Эмомалӣ Раҳмон тааллуқ дорад, гузаштааст. Бо вуҷуди пулакӣ будани он, бо фаро расидани фасли сармо мушкилоти ронандагону мусофирон даҳчанд мешавад. Ронандагон бештар масъулони ин ширкати офшориро интиқод мекунанд, ки барои бехатарии мусофирон солҳост, ки пули ҳангуфт дарёфт мекунад, вале роҳҳро мувофиқи талабот бозсозӣ ва бехатар намегардонад.

Мулоқоти Мэри Лаулор бо раҳбарияти Вазорати адлия

Аз ҷониби
amrullokhi
-
0

Гузоришгари вижаи Созмони Миллали Муттаҳид бо раҳбарияти олии Вазорати адлияи Тоҷикистон дар шаҳри Душанбе мулоқот кард.

Бино ба иттилои бону Мэри Лаулор, гузоришгари вежаи Созмони Миллали Муттаҳид вай дар идомаи анҷоми корҳои хидматиаш дар шаҳри Душанбе бо Музаффар Ашӯриён, вазири адлияи Тоҷикистон ва муовинонаш мулоқот кардааст.

Гузоришгари вежаи Созмони Миллали Муттаҳид мегӯяд: “Ман дидор ва мулоқотҳои муҳими худро бо мақомоти давлатии Тоҷикистон, аз ҷумла дар Вазорати адлия, бо Нигина Ализода, муовини аввали вазир, Умаров Мансурҷон Ғаффорович, муовини вазир ва вазир Музаффар Ашӯриён идома дода истодаам.” Аммо Вазорати адлияи Тоҷикистон дар бораи ин дидору мулоқотҳо то ҳол расман бо расонаҳо чизе нагуфтааст.

Аз сӯи дигар иддае аз ҳомиёни ҳуқуқи башар, ки вазъияти ҳуқуқи инсон дар Тоҷикистонро пайгирӣ мекунанд, аз Гузоришгари Созмони Миллали Муттаҳид ва ҳайъати ӯ хостаанд, ки ба зиндонҳои шаҳри Душанбе ва Ваҳдат ҳам рафта, аз наздик бо аҳволи зиндониён шинос шавад. Зеро, ба гуфтаи онҳо, дар зиндонҳои Тоҷикистон бадрафторӣ, поймолкунии ҳуқуқу шиканҷаи зиндониён ва инчунин гирифтани ришваву вуҷуди фасод дар авҷи аъло аст.  

Инчунин аз Гузоришгари СММ оид ба ҳуқуқи инсон хоста шудааст, ки дар робита ба одамрабоӣ дар Русия ва истирдоди онҳо ба Тоҷикистон, боздоштҳои ғайриқонунӣ ва ба муддатҳои тӯлонӣ равонаи зиндон кардани фаъолони ҷомеаи шаҳрвандӣ аз Вилояти Мухтори Кӯҳистони Бадахшон, ки тайи чанд моҳи ахир дар Тоҷикистон суръати бештар ба худ касб кардааст, ошно шуда, сипас ба онҳо баҳои ҳуқуқӣ диҳад.

Гуфта мешавад, пеш аз ин Бунёди “Бузургмеҳр”, мақарраш дар Аврупо бо навиштани номае ба Гузоришгари вежаи СММ Мэри Лаулор гуфта буд, маълумоте, ки аз ҷониби мақомоти Тоҷикистон дар бораи ҳуқуқи башар барояш пешниҳод шудааст, дурӯғ ва тасдиқнашаванда аст.

Инчунин ин бунёд таъкид карда буд, ки дар кишвар ҷомеаи воқеии шаҳрвандӣ, судҳои мустақил, озодии баён ва озодии мазҳабӣ вуҷуд надорад ва адвокатура таҳти назорати қатъии давлат мебошад.

Дар панҷ соли ахир мақомоти кишвар чанд маротиба дар Тоҷикистон алайҳи зиндониён ошӯбҳои мухталиф ва мусаллаҳонаеро ташкил карда, ба ин васила даҳҳо зиндониро кушта ва захмӣ карданд. Бунёди “Бузургмеҳр” ҳам дар ин номаи худ таъкид карда, ки мақомот боз мехоҳанд, чунин ошӯбҳои сохта ва идорашавандаеро дар зиндонҳо ташкил карда, даҳҳо зиндонии дигарро аз ҳаёт маҳрум кунанд.

1...243244245...657саҳифаи 244 аз 657

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
24.1 ° C
24.1 °
24.1 °
53 %
2kmh
20 %
Tue
23 °
Wed
27 °
Thu
27 °
Fri
28 °
Sat
31 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст