Мақомоти Тоҷикистон барои пайдо кардани маълумот дар бораи як зиндонии фирорӣ 50 ҳазор сомонӣ ҷоиза таъйин кардаанд.

Мақомоти Тоҷикистон бо нашри акси ин маҳбуси фирорӣ дар бархе шабакаҳои иҷтимоӣ ва низ баъзе ҷойҳои ҷамъиятӣ дар вилояти Хатлон мегӯянд, ки “50 ҳазор сомонӣ мукофотпулӣ барои дарёфти ахборот нисбати фирорӣ Саидов Аҳмадбек Амробекович” таъйин кардаанд.

Мақомоти ҳифзи ҳуқуқи кишвар таъкид мекунанд, ки “шахсоне, ки оид ба маҳалли буду боши фирорӣ Саидов А.А. ба мақомоти ҳифзи ҳуқуқ бо рақамҳои 227-65-69, 557-58-00-10, 550-25-30-03, 918-80-44-00 хабар медиҳанд, бо 50 000 сомонӣ мукофотонида мешава(н)д.”

Гуфта мешавад, ин маҳбуси зиндонӣ дар оғози моҳи августи соли ҷорӣ аз Русия ба Тоҷикистон истирдод шуда буд ва ба қавли Радио Озодӣ “Аҳмадбек Саидови 35-сола шаби 18 ба 19-уми августи имсол аз як боздоштгоҳи Душанбе фирор кардааст.”

Донишкадаи давлатии забонҳои Тоҷикистон ба Донишгоҳи байналмилалии забонҳои Тоҷикистон ба номи Сотим Улуғзода тағйири ном мекунад.

27-уми сентябри соли 2022 Хадамоти матбуоти Президенти Тоҷикистон хабар дод, ки Эмомалӣ Раҳмон зимни суханрониаш дар ин донишкада пешниҳод кард, ки “номи донишкада ба Донишгоҳи байналмилалии забонҳои хориҷии ба номи Сотим Улуғзода табдил дода шавад.”

Ба қавли манбаъ, Эмомалӣ Раҳмон гуфтааст, “ба Вазорати маориф ва илм ва дигар вазорату идораҳо дастур дода мешавад, ки дар муддати 3 моҳ санадҳои меъёрии ҳуқуқии заруриро доир ба ин масъала таҳия ва ба Ҳукумати мамлакат пешниҳод намоянд.”

Гуфта мешавад, Донишкадаи забонҳои Тоҷикистон соли 1979 таъсис ёфтааст. Дар ҳоли ҳозир дар ин Донишкада аз рӯи 41 ихтисос 11 забони хориҷӣ мавриди омӯзиш қарор дорад. Ин Донишкада аз оғоз то кунун зиёда аз 14 ҳазору 200 нафар хатмкунанда доштааст.

Вазорати корҳои дохилии Тоҷикистон 29 шаҳрванди Афғонистонро барои вайрон кардани қоидаҳои будубош дар Тоҷикистон ҷарима кардааст.

Аз маркази матбуоти ВКД ба “Asia-Plus” гуфтаанд, ки шаҳрвандони Афғонистонро ҷарима бастаанд, аммо ихроҷи шаҳрвандони ин кишварро рад ва ё таъйид накарда, гуфтаанд, ки ихроҷи онҳо ба ВКД рабте надорад.

“Нисбати қоидавайронкунандагон протоколҳои маъмурӣ тартиб дода, ҷаримабандӣ кардем. Онҳо вобаста ба кирдори хеш ҷаримабандӣ мешаванд ва ҳаҷми ҷарима низ ба кирдори онҳо вобаста аст”, – гуфтанд аз ВКД.

Ҷарима бастани шаҳрвандони Афғонистон дар Тоҷикистон аз ҷониби ВКД дар ҳолест, ки чанде пеш расонаҳо аз ихроҷи иҷбории беш аз 200 шаҳрванди Афғонистон, ки баъди ба сари қудрат омадани Толибон дар Тоҷикистон паноҳанда шуданд, хабар дода буданд.

Он замон муҳоҷирони афғонистонӣ дар суҳбат бо расонаҳо гуфта буданд, ки онҳоро аз кӯчаву хонаҳояшон боздошт карда, ба марз мебаранд. Ба гуфтаи муҳоҷирон, аксаран кормандони пулис ва Кумитаи давлатии амнияти миллӣ паноҳандагонро боздошта ва мустақим то лаби марз мебаранду ба Афғонистон ихроҷ мекунанд.

Пас аз нашри ин хабарҳо, Намояндаи Комиссариати олии Созмони Милали Муттаҳид дар умури паноҳандагон (UNHCR) дар Тоҷикистон Мулугета Зевди бо мақомоти тоҷик мулоқот анҷом дод. Инчунин бо нашри изҳороте аз ин ҳолатҳо ибрози нигаронӣ намуда, аз Тоҷикистон хоста буд, ки афғонистониҳоро ба ватанашон ихроҷ накунанд.

Дар пасманзари ихроҷи паноҳандагони Афғонистон, Дабири кулли Созмони Милали Муттаҳид Антониу Гутерриш низ ду маротиба бо Раҳмон телефонӣ суҳбат кард, ки ба гуфтаи коршиносон, суҳбатҳо бештар ба масъалаи паноҳандагон рабт доштааст.

Баъд аз сари қудрат омадани Толибон афғонҳои зиёде аз тарси ҷон ба Тоҷикистон паноҳ оварда буданд, ки шуморашон он замон то 10 ҳазор гуфта мешуд, вале ҳоло тибқи оморҳои ғайрирасмӣ то 3-4 ҳазор боқӣ мондааст.