Мақомоти зиндонҳо рӯзноманигор ва блогери шинохтаи тоҷик Далери Имомалиро аз боздоштгоҳи муваққатӣ ба зиндони маъруф ба “1-ум Советский” интиқол додаанд.

Пайвандони Далери Имомалӣ дар суҳбат бо “Asia-Plus” гуфтаанд, ки ин рӯзноманигори зиндонӣ рӯзи 10-уми октябр аз СИЗО ба Муассисаи ислоҳии №4, воқеъ дар маҳаллаи “1-ум Советский”-и шаҳри Душанбе интиқол ёфтааст ва онҳо аз ин кор огоҳ набудаанд. Ин дар ҳолест, ки тибқи қонунҳои мавҷуда вақте зиндонӣ ба дигар муассиса интиқол меёбад, бояд ба наздиконаш хабар дода шавад.

Наздикони Далери Имомалӣ гуфтаанд, ки “Ҳоло дар роҳем, баъзе лавозимоти заруриро барои эҳтиёҷаш мебарем. Умедворем, ки бо ӯ вохӯрда метавонем”.

Интиқоли ин рӯзноманигори тоҷик ба зиндон дар ҳолест, ки ҳафтаи пеш Додгоҳи шаҳри Душанбе ҳукми Додгоҳи ноҳияи Шоҳмансури пойтахтро, ки 17-уми октябри соли ҷорӣ Далери Имомалиро ба 10 сол маҳкум карда буд, бетағйир гузошт.

Пеш аз ин Далери Имомалӣ бо фиристодани номае аз зиндон ба унвони Эмомалӣ Рамҳон ҳукми додгоҳро эътироф накарда, гуфта буд, ки тафтиши парвандаи ӯ “пур аз дурӯғу буҳтон ва духӯрагиҳо” аст. Ҳамчунин ҳамсараш ба Эмомалӣ Раҳмон нома навишта, озодии ин рӯзноманигорро хоста буд.

Инчунин мақомоти Тоҷикистон Далери Имомалиро барои як суҳбати кӯтоҳаш бо яке аз аъзои ҳаракати сиёсии “Гурӯҳи -24” муттаҳам карданд, ки ҳам худи Далер ва ҳам ин ҳаракати сиёсӣ иддаои мақомотро рад карданд.

Гуфта мешавад, мақомоти додгоҳӣ ҳар ду мурофиаҳоро пушти дарҳои баста дар Боздоштгоҳи муваққатии шаҳри Душанбе (СИЗО) баргузор карданд ва нагузоштанд, ки назидкону пайвандони ин журналист дар ҷаласаҳои додгоҳӣ ширкат кунанд.

Ёдовар мешавем, ки мақомоти қудратии Тоҷикистон дар пайи як амалиёти махсус Далери Имомалӣ ва чанд тан аз рӯзноманигорон ва блогероне, ки каму беш аз мушкилоти мардум мегуфтанд ва камбуди фаъолияти масъулонро фош мекарданд, боздошту бо баҳонаҳои сохта барои солҳои тӯлонӣ равонаи зиндон карданд.

Дар пайи зиндонӣ кардани рӯзноманигорони тоҷик аксари созмонҳои ҳуқуқи башарӣ ва ҳомиёни рӯзноманигорон, аз ҷумла Мэри Лоулор, ки бо сафари корӣ дар Тоҷикистон қарор дошт, садо баланд карда, озодии онҳоро аз мақомоти кишвар талаб карданд. Аммо мақомот ин гуфтаҳои созмонҳоро мисли ҳамеша нодида гирифт.

Фаромуз Иргашев, ҳуқуқшинос ва собиқ довталаби номзад ба мақоми раёсатҷумҳурӣ ба муҳлати 30 сол аз озодӣ маҳрум карда шуд.

Дар ин бора Гулчеҳра Акимбекова, ҳамсари Фаромуз Иргашев дар саҳифаи Инстаграмаш хабар додааст.

Ҳамсари Фаромуз Иргашев навиштааст, ки зоҳиран 30 соли оянда ва ё “то охири умр” бо суолҳои “чаро ва барои кадом коре” зиндагӣ хоҳад кард. Ӯ афзудааст: “Суолҳое, ки на аз Худованд ва на аз инсоне барои онҳо ҷавоб гирифта наметавонам.”

Маълум нест ҳукми додгоҳ кай эълон шудааст ва ин фаъоли маданиро айнан ба чӣ гуноҳ ва кадом моддаҳои КҶ айбдор кардаанд. Мақомоти кишвар низ дар ин бора чизе намегӯянд.

Пештар аз ин, хабаре нашр шуд, ки гуфта мешуд, Додситонӣ Фаромӯз Иргашевро ба ҷиноятҳои сангин аз ҷумла ташкили иттиҳоди ҷиноӣ муттаҳам намуда, аз додрас хостааст, ки ин ҳуқуқшиноси ҷавонро ба 30 соли зиндон маҳкум кунад.

Фаромуз Иргашев, фаъоли ҷомеаи маданӣ ва узви “Комиссияи 44″ дар Вилояти Мухтори Кӯҳистон Бадахшон” буд, ки ба хотири миёнҷигарӣ байни мардум ва мақомот ва пешгирӣ аз хунрезиҳои оммавӣ дар шаҳри Хоруғ кор мекарданд.

“Комиссияи 44” тобистони соли ҷорӣ фаъолияташро қатъ кард, вале баъдтар бо иттиҳоми даст доштан дар беназмиҳои Хоруғ қариб тамоми аъзои он зери пайгарди қонунӣ қарор гирифта, мавриди боздошту бозпурсиҳо қарор гирифта ва сипас қисме аз онҳо ба муддатҳои тӯлонӣ равонаи зиндон шуданд.