Як ҷавони 27-солаи тоҷик дар шаҳри Новосибирски Русия бо гумони куштани як ҷавондухтари 17-сола боздошт шуд. Дар ин бора расонаҳои маҳаллӣ хабар медиҳанд.

Гуфта мешавад, шоми сешанбе ин ҷавони тоҷик бар асари рашк духтари 17-соларо дар кӯча дастикам бо 15 зарби корд куштааст. Ва ҷасади духтар бо захмҳои зиёди корд шоми сешанбе дар кӯчаи Лесочная дар ноҳияи Советскии Новосибирск пайдо карданд.

Куштор дар навори сабти як мошини роҳгузар сабт шуда, дар шабакаҳои иҷтимоӣ паҳн шудааст. Дар он навор ба вузуҳ дида мешавад, ки марди муҳоҷим дар даст корд дорад ва дар кӯча аз паси ҷавондухтар медавад ва ӯро ба замин меандозаду бо корд чанд зарба мезанад.

Пулиси минтақавӣ дар шарҳи ин қазия мегӯяд, “муноқиша шоми сешанбе бар асари рашк сар зада, дар аввал байни гумонбар ва ҷабрдида муноқишаи лафзӣ рух медҳад. Сипас  ҷавони 27-сола бо корд ба духтар ҳуҷум карда, дастикам дар бадани ӯ 15 зарба мезанад, ки ҷабрдида бо ҷароҳатҳои вазнин дар ҷойи ҳодиса ба ҳалокат мерасад. Дар ин робита ба гумони куштор парванда боз шуда, таҳқиқот идома дорад.”

Гумонбар пас аз ҳодиса фирор мекунад, вале пулис ӯро аз ноҳияи Ленин боздошт кард. Ба гуфтаи пулиси маҳаллӣ, боздошшуда қасди тарки Русияро доштааст.

Mash Siberia дар телеграм-канали худ хабар дода, ки “ҳамлаи дирӯза ба духтари 17-сола дар Новосибирск аввалин ҳодисаи Хушнуд нест. Қаблан ӯро барои содир кардани ҷинояти мушобеҳ муҳокима мекарданд – он вақт ҷабрдидаро раҳгузарон наҷот дода буданд.”

Ба иттилои манбаъ, ҷавони боздоштшудаи тоҷик Ҳамроев Хушнуд ном дошта, борҳо дар кӯчаҳо ба ҷони духтар таҳдид карда ва ҳатто боре чанд корд ҳам задааст, ки духтар дар беморхона бистарӣ шудааст. Ва соли 2020 бо гумони таҳдид ба куштор ба ҷони ин духтар боздошт ва ба муддати як сол маҳкум шуда буд.

Гуфта мешавад, ҷавон дар аввал духтарро дӯст дошта, аз ӯ хостгорӣ намудааст, вале ӯ дархости ҷавонро рад кард. Сипас Хушнуд аз пайи ҷони духтар афтода ва шоми дирӯз ӯро куштааст.

Шабакаи телевизионии “Толк” дар як гузориши вежа хабар дод, ки адади муҳоҷирон дар кишвари Алтай якбора зиёд шудааст.

Олга Татарникова, сардори шӯъбаи ташкили бақайдгирии муҳоҷирати Сарраёсати Вазорати корҳои дохилии Русия дар кишвари Алтай гуфт, ки дар нимсолаи аввали соли ҷорӣ дар муқоиса бо ҳамин давраи соли гузашта ҳамагӣ сеяки шаҳрвандони хориҷӣ ба қаламрави Федератсияи Русия ворид шудаанд.

Тибқи омори давлатӣ, адади бештари шаҳрвандони хориҷӣ ба қаламрави Алтай аз Қазоқистон меоянд, вале аксари онҳо на барои фаъолияти меҳнатӣ, балки барои дидорбинӣ бо хешовандони худ сафар мекунанд.

“Ҷои аввалро байни муҳоҷирони меҳнатӣ муҳоҷирони тоҷикистонӣ ишғол мекунад. Ҳамчунин адади муҳоҷирони меҳнатӣ аз Узбакистон, Қирғизистон, Арманистон ва Озарбойҷон зиёд аст.”, хабар медиҳад шабакаи телевизионии “Толк”.

Манбаъ ҳамчунин қайд мекунад, ки адади дақиқи муҳоҷиронро касе намедонад. Тибқи омори ғайрирасмӣ, соли 2013 дар кишвари Алтай 15-20 ҳазор муҳоҷири ғайриқонунӣ кору зиндагӣ мекардаанд.

Тавре Сайдалӣ Хайлоев, роҳбари Ташкилоти ҷамъиятии “Диаспораи тоҷик” қайд кардааст, дар ин замона барои муҳоҷирони меҳнатӣ низ дар Русия осон нест.

“Барои он ки муҳоҷири меҳнатӣ ин ҷо биёяд, бояд дар даст ҳадди ақал 50 ҳазор рубл дошта бошад, то битавонад иҷозатномаи иқомат ва иҷозатномаи кор бигирад ва ҳамчунин хонае барои зистан пайдо кунад. Дар дигар кишварҳо шароитии корӣ нисбат ба Русия осонтар аст. Масалан, Аврупо, Куриёи Ҷанубӣ ё Имороти Араб. Муҳоҷирони мо ба он ҷойҳо низ мераванд”, – гуфтааст роҳбари диаспораи тоҷик дар Алтай.

Ҳамчунин гуфта мешавад, ки муҳочирони тоҷик кишварҳои пешрафтаи Осиёро мавриди ҳадаф қарор додаанд, зеро омӯхтани забон, хоҳ куриёӣ бошад ва хоҳ русӣ, барояшон яксон аст. Онҳо инчунин бо мушкилиҳои дигаре дар Русия рӯ ба рӯ мешаванд, масалан, агар ҷои зист ва қайд фарқ кунад, муҳоҷирро метавонанд ихроҷ кунанд ва ҷарима банданд.

Тибқи омори расмӣ, сеяки кормандони соҳаи сохтмонро дар ин кишвар муҳочирони меҳнатӣ ташкил медиҳанд. Ҳамчунин панҷяки кормандони соҳаи савдо ва соҳаи маиширо муҳочирони меҳнатӣ ташкил медиҳанд.

Ҳамчунин қайд шудааст, дар кишвари Алтай тақрибан 5000 нафар тоҷикистониён шаҳрвандии Русияро қабул кардаанд ва боз 5000 нафар иҷозати истиқомати доимӣ (вид на жительство) доранд.