Ҷустуҷӯ кунед
Ҷустуҷӯ
14.9 C
Dushanbe
Хона блог саҳифа 448

Сафари Рустами Эмомалӣ ба Қазоқистон

Аз ҷониби
firuzihait
-
0

Рустами Эмомалӣ, Раиси Маҷлиси миллии Маҷлиси Олии Ҷумҳурии Тоҷикистон бо як сафари расмӣ шоми 28-уми март вориди Қазоқистон шуд.

Рустами Эмомалӣ, писари Раисҷумҳур Эмомалӣ Раҳмон барои иштирок дар ҷаласаи Шӯрои Ассамблеяи Байнипарламентии давлатҳои иштирокчии Иттиҳоди Давлатҳои Мустақил, ки ба муносибати 30-солагии таъсисёбии ин созмон баргузор мегардад, ба шаҳри Алмаатои Қазоқистон сафар кард.

Шоми 28-уми март писари Эмомалӣ Раҳмонро, ки раиси шаҳри Душанбе ва ҳамзамон Раиси Маҷлиси миллии Маҷлиси Олии Ҷумҳурии Тоҷикистон мебошад, дар фурӯдгоҳи байналмилалии шаҳри Алмаато, Сафири Тоҷикистон дар Қазоқистон ва намояндагони Сенати Парламенти ин кишвар пешвоз гирифтаанд.

Бино ба иттилои АМИТ “Ховар”, дар ин сафар Раиси Маҷлиси миллии Маҷлиси Олии Ҷумҳурии Тоҷикистонро раисони чанде аз кумитаҳои Маҷлиси миллӣ, роҳбари Дастгоҳи Маҷлиси миллӣ ва дигар шахсони расмӣ ҳамроҳӣ кардаанд.

Рустами Эмомалӣ имрӯз 29-уми март бо Раиси Сенати Парламенти Ҷумҳурии Қазоқистон Маулен Ашимбаев мулоқот намуда, муносибатҳои дуҷонибаро баррасӣ кардаанд.

Ҳамчунин Раиси Маҷлиси миллии Маҷлиси Олии кишвар дар ҷаласаи Ассамблеяи Байнипарламентии давлатҳои иштирокчии Иттиҳоди Давлатҳои Мустақил (АБ ИДМ) бахшида ба 30-солагии Ассамблея иштирок ва суханронӣ кардааст.

Боздошти боз яке аз наздикони марҳум Сайид Абдуллоҳи Нурӣ

Аз ҷониби
firuzihait
-
0

Мақомоти қудратии вилояти Хатлон домоди марҳум Сайид Абдуллоҳи Нурӣ, Сайвалӣ Ризоевро низ боздошт кардаанд. Дар ин бора Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) хабар дод.

Бино ба иттилои Кумита, Сайвалӣ Ризоев, шавҳари хоҳари муассиси ҲНИТ марҳум Сайид Абдуллоҳи Нурӣ дар боздоштгоҳи муваққати Вазорати корҳои дохилии шаҳри Душанбе қарор дорад.

Сабаби боздошти Сайвалӣ Ризоевро мақомот дар он гуфтаанд, ки писаронаш дар яке аз кишварҳои аврупоӣ қарор доранд ва барояш пул фиристодаанд.

Дар се моҳи ахир мақомот ду бародарзодаи марҳум Сайид Абдуллоҳи Нурӣ, Нусратулло Саидов ва Муҳибулло Нуриддинов ва бародари хурдиаш Нуруллоҳ Саидовро бо ҷурми “дарёфти пул аз хориҷ” боздошт кардаанд. Ва Ризоев инак нафари 4-ум аст, ки аз пайвандони раҳбари собиқи ҲНИТ боздошт мешавад.

Мақомот расман сабаби ин боздоштҳоро шарҳ намедиҳанд, аммо ба гуфтаи пайвандони боздоштшудагон, ҳамаи онҳо бо ҷурми “дарёфти пул аз хориҷ” муттаҳам шудаанд. Вале мақомот барои исботи ин иттиҳомот далоиле ироа накардааст.

Мақомот дар соли 2015 хоҳарзодаи марҳум Сайид Абдуллоҳи Нурӣ, Мӯсо Шеховро ба 7 сол ва бародарзодаи дигараш Сайдулло Саидовро ба 10 соли зиндон маҳкум карда буданд.

Болоравии қурби рубли русӣ дар баробари пули миллӣ-сомонӣ

Аз ҷониби
amrullokhi
-
0

Бонки миллии Тоҷикистон расман қурби пули миллӣ-сомониро дар баробари рубли русӣ поён бурд. Аммо бонкҳои тиҷоратии кишвар ҳар кадом дар алоҳидагӣ дар ин бозор ҳарфи худро доранд.

Имрӯз, 29-уми марти соли ҷорӣ Бонки миллии Тоҷикистон расман қурби 1 рубли русиро дар баробари пули миллӣ-сомонӣ 0,1393 сомонӣ эълон кард. Ба ибораи дигар, Бонки миллии Тоҷикистон эълон кард, ки қурби ҳар 1000 рубли русӣ ба 139 сомониву 30 дирам баробар аст.

Дар бонкҳои тиҷоратии Тоҷикистон хариду фурӯши арзҳои хориҷӣ, ба хусус рубли русӣ бо пули миллӣ-сомонӣ якхел набуда, балки аз ҳам фарқ мекунад.

Амонатбонк, бонки амонатгузории Тоҷикистон хариди 1000 (як ҳазор) рубли русиро барои шахсони воқеӣ 130 сомонӣ ва фурӯши онро 131 сомонӣ эълон кардааст. Аммо ин бонк хариди 1000 рубли русиро барои шахсони ҳуқуқӣ 134 сомонӣ ва фурӯши онро барои шахсони ҳуқуқӣ 145 сомонӣ таъйин кардааст.

Алифбонк, аз дигар бонкҳои тиҷоратии Тоҷикистон, ки тоза дар байни мардум ҷойгҳои худро мустаҳкамтар мекунад, хариди 1000 рубли русиро 130 сомонӣ ва фурӯши онро 148 сомонӣ эълон кардааст.

Ҳамзамон Ориёнбонк, бонки шинохтаи кишвар, ки раҳбариашро додараруси Эмомалӣ Раҳмон Ҳасан Асадуллозода бар уҳда дорад, бо вуҷуди эълони бонки миллӣ хариди 1000 рубли русиро 125 сомонӣ ва фурӯши онро 141 сомонӣ эълон кардааст.

Дар ин миён Бонки Эсхата аз дигар бонкҳои тиҷоратии шинохтаи Тоҷикистон хариди 1000 рубли русиро баробар ба 143 сомонӣ ва фурӯши онро баробар ба 148 сомонӣ таъйин кардааст.

Гуфтанист, пас аз оғози ҳамлаҳои Русия ба Украина ва ҷорӣ шудани таҳримҳои кишварҳои Ғарб алайҳи Русия якбора қурби рубли русӣ дар бозори арзҳои ҷаҳонӣ ба шиддат суқут кард, аммо аз замоне, ки Путин эълон кард, ки нафту гази кишварашро ба кишварҳои “ғайри дӯст” бо рубли русӣ мефурӯшад, дубора қурби рубли русӣ дар бозори арзҳои ҷаҳон боло рафатааст.

Пеш аз ин гурӯҳи кишварҳои санъатии ҷаҳонӣ маъруф ба G7 дар Берлин эълон карда буданд, ки – тавре Путин гуфта буд – гази Русияро бо рубли русӣ намехаранд, аммо баъди он 28-уми марти соли ҷорӣ Сухангӯи Путин эълон кард, ки Русия кишвар хайрия нест, ҳар кӣ мехоҳад газ бихарад, бояд пулашро бо рубли русӣ пардохт кунад.

Эълони аввали рӯзи рамазон дар Тоҷикистон

Аз ҷониби
amrullokhi
-
0

Шӯрои уламои Маркази исломии Тоҷикистон расман эълон кард, ки оғози моҳи мубораки рамазон дар Тоҷикистон 2-юми апрел оғоз мешавад.

Имрӯз, 29-уми марти соли 2022 Шӯрои уламои Маркази исломии Тоҷикистон бо содир кардани Қарори худ шанбеи 2-юми апрелро дар Тоҷикистон рӯзи аввали моҳи рамазон эълон кард.

Дар ин Қарори Шӯрои уламои кишвар омадааст:

“Мувофиқи ҳисоби илмӣ аввали моҳи шарифи Рамазон дар соли 2022 ба ҳисоби тақвимӣ рӯзи шанбе 2-юми апрел муайян карда шавад.

  1. Мувофиқи ҳисоби шаръӣ нисоби закот 35000 сомонӣ муқаррар карда шавад, ки аз он 875 сомонӣ закот дода мешавад.
  2. Садақаи фитр мувофиқи меъёри шаръӣ ба ҳисоби гандум 7 сомонӣ ва ба ҳисоби мавиз 80 сомонӣ (барои шахсоне, ки тавоноии молии бештар доранд) муайян карда шавад.
  3. Фидяи савм дар моҳи шарифи Рамазони соли 2022 барои соҳибони узри шаръӣ (шайхи фонӣ) ва бемороне, ки аз сиҳатшавии онҳо умеде нест ба миқдори 420 сомонӣ барои 30 рӯз муайян карда шавад.”

Рӯза гирифтани моҳи мубораки рамазон яке аз рукнҳои панҷгонаи дини ислом буда, мусалмонони ба синни балоғат расидаву сиҳатманд вазифадор ҳастанд, ки тӯли як моҳ аз дамидани субҳ то шом рӯза бигиранд.

Гуфта мешавад, тибқи маъмул рамазон бо дидани моҳи нав оғоз мешавад, аммо бо пешрафти илм ин имкон низ муяйсар шуда, донишмандон метавонанд пеш аз оғози моҳҳои қамарӣ низ оғозу анҷоми моҳҳоро муайян кунанд.

Тоҷикистон танҳо кишваре, нест, ки 2-юми апрелро аввали рамазон эълон кардааст, балки пеш аз он бархе донишмандони Ҷуҳурии арабии Миср ҳам 2-юми апрелро аввали моҳи мубораки рамазон эълон карда буданд.

Шикояти тоҷикони Иркутск аз набудани намаку шакар дар мағозаҳо

Аз ҷониби
AZDA TV
-
0

Дар аксар мағозаҳои хуроквории бузурги шаҳрҳои Русия шакару намак ёфт намешавад. Агар пайдо ҳам шавад, хеле гарон аст.

Акс аз навори фиристодаи корбарон гирифта шудааст

Гурӯҳе аз муҳоҷирони тоҷики муқими шаҳри Иркутски Русия дар тамос бо Аздо тв гуфтанд, дар мағозаҳо орду шакар ва ҳатто намак камёфт шудааст. Агар пайдо ҳам шавад, хеле гарон аст. Ба гуфтаи онҳо, орду шакар, ба мағозаҳо дер мерасад ва расидан баробар тамом мешавад.

Тавре корбарон мегӯянд, нархи як кг шакар дар мағозаҳои шаҳри Иркутск аз 34 рубл то ба 100 рубл расида, як кг намак аз 7 ба 22 рубл ва як халта орд аз 1200 рубл ба 1750 рубл расидааст.

Ҳамсуҳбатони мо гуфтанд, ҳатто ҳолате пеш омад, ки барои хӯроки субҳона аз мағозаҳо на намак пайдо карданд ва на шакар. “Бе намак хӯрокро хӯрдан хеле душвор будааст, ба ин ҳолат расиданро мо умуман тасаввур намекардем”, мегӯяд як ҳамсуҳбати Аздо тв.  

Аз наворҳои фиристодаи корбарон ба Аздо тв дида мешавад, ки дар рафҳои махсуси шакару нону намаки мағозаҳо ба ҷуз нархи навишташуда дигар чизе нест.

Аксари муҳоҷирони кории тоҷик, ки дар Русия кору зиндагӣ мекунанд, аз пеш омадани чунин вазъият нигарони ҳоли худ ва пайвандонашон ҳастанд ва мепурсанд, ки чунин вазъ чӣ қадар идома мекунад ва аксари онҳо дар тарси аз даст додани ҷойҳои корияшон ҳастанд.

Ёдовар мешавем, ки пас аз ҳамлаи Русия ба Украина Амрико ва кишварҳои аврупоӣ дар баробари Русия мавзеъи сахттаре гирифтанд ва барои таваққуфи ҷанг алаҳи ин кишвар таҳримҳои шидиде ҷорӣ карданд. Ва ҳамчунин ширкатҳои бузурги иқтисодӣ низ бозорҳои Русияро тарк карданд, ки дар натиҷа ҳазорҳо нафар ҷои кори худро аз даст дод. Ва аз рӯзҳои аввали ҷорӣ шудани таҳримҳо гароншавӣ ва ё камёфт шудани баъзе маҳсулоти хӯрока дар бозорҳои Русия эҳсос мешуд. Иқтисодшиносон бар ин назаранд, ки таъсири таҳримҳо пас аз гузашти 3-4 моҳ бештар эҳсос хоҳад шуд.  

Интиқоди сокинони селзадаи Дарвоз аз мақомоти кишвар

Аз ҷониби
AZDA TV
-
0

Бар асари ҷорӣ шудани сел чанд хона дар ноҳияи Дарвози Вилояти Мухтори Кӯҳистони Бадахшон хароб шуданд. Сокинон аз бетаваҷҷуҳии мақомот шикоят доранд.

Ҷорӣ шудани сел дар ноҳияи Дарвоз

Бино ба иттилои масъулони бахши вилоятии Куимтаи ҳолатҳои фавқулодда бар асари ҷорӣ шудани сел дар деҳаи Умараки ноҳияи Дарвоз хонаи ду сокини деҳа комилан ва хонаи се сокини дигар қисман хароб шудааст. Ба гуфтаи мақомоти дахлдори вилоят, сел ҳамчунин ба баъзе заминҳои наздиҳавлигӣ ва хоҷагиҳои ёрирасони деҳа зарар расондааст.

Аммо сокинон аз ноҳияи Дарвоз дар тамос бо Аздо тв маълумоти КҲФ-ро рад карда, мегӯянд, ки сел беш аз 12 хона ва боз чанд макони дигарро хароб кардааст. Аммо мақомот дар фикри онҳо нестанд.

Сокинон бо ирсоли чанд навор аз вуқуи сел ба Аздо тв ва хароб дода, гуфтанд, ки “Сел дар ноҳия 12 хона ва парки Шералӣ Кабир ва ҷойҳои зиёди дигарро хароб кардааст, касе дар фикри мо нест.”

Гуфта мешавад, комиссияи ҳолатҳои фавқулодаи ноҳия гуфта, ки айни замон то 15 хонаи дигарро хатари сел таҳдид мекунад ва мақомот барои кӯчонидани онҳо ба ҷойҳои амн чора меандешанд. Вале сокинон дар суҳбат ба Аздо тв гуфтанд, ҳоло вақти ҳарчи тезтар кумак расондан ба зарардидагон ва кӯчондани онҳо ба ҷойҳои бехавф аст, вақти чораандешӣ нест.

Қирғизистон марзҳояшро бо Тоҷикистон пурзӯр мекунад

Аз ҷониби
firuzihait
-
0

Қирғизистон барои тақвияти марзҳояш бо Тоҷикистон аз Туркия ҳавопаймоҳои бесарнишини “Байрақдор”, аз Имороти Муттаҳидаи Араб 40 мошини зиреҳпӯш, аз Русия  55 мошини зиреҳпӯши “Тигр” ва 50 мошини “КАМАЗ” харидааст.

Қамчибек Ташиев раиси КДАМ-и Қирғизистон дар суҳбат бо расонаҳо аз хатарнок будани вазъ дар марз бо Тоҷикистон таъкид кард ва гуфт, ки ин техникаҳои нав барои ҳимояи амнияти кишвараш ба вилояти Бодкенд фиристода мешаванд.

Ташиев мегӯяд, барои хариди техникаҳои нав аз будҷаи давлатӣ ҳудуди 2 миллиард сом (беш аз 20 миллион доллар) ҷудо шуда, аз касе барои хариди онҳо кумак нагирифтаанд.

Дар идома ӯ қайд кард, ки рӯзҳои наздик бо ҷалби ин техникаҳои нав, аз ҷумла ҳавопаймоҳои бесарнишини “Байрақдор”, машқҳои ҳарбӣ доир хоҳад кард.

Содир Ҷабборов президенти Қирғизистон, ки дар супоридани ин техникаҳо ба Хадамоти марзбонӣ ва Вазорати ҳолатҳои фавқулоддаи кишвараш иштирок дошт, гуфт, ки “Соли гузашта барои ин ҳадафҳо аз буҷет 7,5 миллиард сом ҷудо шуда буд. Имсол барои таҳкими ҳифзи сарҳад ҳудуди 3 миллиард сом ҷудо мекунем.”

Қирғизистон дар ҳоле марзбонҳояшро бо техникаҳои навизамонавӣ муҷаҳҳаз мекунад, ки пайваста дар марзи ин кишвар бо Тоҷикистон муноқишаҳои мусаллаҳона сурат мегирад ва дар як соли охир аз ҳарду ҷониб 58 нафар ба ҳалокат расида, 270 нафари дигар захмӣ шудаанд.

Корбарони шабакаҳои иҷтимоӣ суолгузорӣ мекунанд, ки Қирғизистон дар як соли охир нерӯҳои низомияшро дар марз бо техникаҳои нав муҷаҳҳаз карда, оё Тоҷикистон дар фикри пурқувват кардани марзҳояш ҳаст ва чаро дар ин бора чизе намегӯяд?

Беш аз сад тоҷикистонии фирории ҷанг ба Душанбе баргаштанд

Аз ҷониби
firuzihait
-
0

Як гурӯҳи тоҷикони иборат аз 110 нафар, ки баъд аз ҷанг дар Украина ба Лаҳистон фирор карда буданд, субҳи 26-уми март ба Душанбе расиданд.

Бино ба иттилои АМИТ Ховар, то имрӯз 413 шаҳрванди Тоҷикистон, аз ҷумла занон, пиронсолон ва ноболиғон ба Ватан баргардонида шудаанд.

Тавре қаблан хабар дода шуда буд, рӯзҳои 11-12-уми марти соли ҷорӣ, 303 шаҳрванди Тоҷикистон, ки ҳудуди Украинаро тарк карда буданд, тавассути ҳавопаймоҳои ширкати “Enter Air”-и Лаҳистон, аз Варшава ба Душанбе баргардонида шуданд.

Ба шаҳрвандони Ҷумҳурии Тоҷикистон, ки ҳуҷҷати тасдиқкунандаи шахсият надоранд, аз ҷониби кормандони сафорат дар фурудгоҳ, шаҳодатномаи бозгашт ба Ватан дода шудааст.

Шуруъ аз бомдоди 24-уми феврал нерӯҳои Русия бо фармони Путин ба хоки Украина ҳамларо оғоз каданд. Маскав ин ҳамларо “амалиёти махсус” ном мебарад, аммо Киев Путинро “ғосиб” хонд. Ва аз оғози ҷанг то имрӯз, ки зиёда аз як моҳ мешавад, беш аз 3 миллион украинӣ ватани худро тарк карданд ва ҳазорҳо нафар бо шумули ғайринизомиён, занону кӯдакон куштаву захмӣ шуданд. Дар миёни гурезагон, ки ба давлатҳои ҳамсоя бо Украина паноҳ бурданд, тоҷикон ва дигар миллатҳо низ зиёд буданд. Бештари онҳо вориди хоки Лаҳистон шудаанд.

Ёдовар мешавем, ки Паймони миллии Тоҷикистон – эътилофи гурӯҳе аз мухолифини тоҷик, ки дар хориҷ аз кишвар қарор доранд, дар Аврупо Ситоди кумак ба муҳоҷирони тоҷик, ки дар пайи ҷанг аз Укроин ба Аврупо паноҳ мебаранд, ташкил карда, ба садҳо муҳоҷири тоҷик, узбек ва қирғиз кумак карда буд.

Мувофиқати Путин барои музокироти Маскаву Киев дар Истанбул

Аз ҷониби
AZDA TV
-
0

Дар гуфтугӯи телефонии рӯзи якшанбе раисҷумҳури Туркия Раҷаб Тайиб Эрдуғон аз ҳамтои русаш Владимир Путин хостори оташбаси фаврӣ ва сулҳ миёни Русия ва Украина шуд.

Бино ба иттилои хабаргузории “Анадолу“, ва хабаргузории русии “ТАСС” Эрдуғон бо ҳамтои русаш дар бораи раванди сулҳ миёни Маскав ва Киев гуфтугӯ карда, бар зарурати оташбаси фаврӣ ва сулҳ миёни Маскаву Киев ва ҳамчунин беҳбуд бахшидани вазъи башардӯстона дар минтақа таъкид кардааст.

Гуфта мешавад, раисҷумҳурони Туркия ва Русия рӯзи якшанбе ба мувофиқа расиданд, ки мулоқоти навбатии ҳайатҳои музокиракунандаи Русия ва Украина дар Истамбул – пойтахти Туркия баргузор мешавад.

Аммо таърихи баргузории музокироти навбатӣ байни Маскав ва Киев ва инчунин дар кадом сатҳ анҷом шудани он чизе гуфта нашудааст.

Аз ин пеш 10-уми марти соли ҷорӣ музокироти вазирони корҳои хориҷии Русия ва Украина дар Истанбул доир гашт, ки онро вохӯрии баландтарин сатҳи ду ҷониб аз оғози ҷанг арзёбӣ карданд, вале бенатиҷа анҷомид.

Ва то ҳол аз музокироти анҷомшудаи ҳайатҳои ду ҷониб чандон натиҷаи хубе ҳосил нашудааст.

Чандест мақомоти Туркия талош доранд тарафҳои даргирро розӣ кунанд то музокироти онҳо дар сатҳи раисҷумҳурони Русия ва Украина баргузор шавад. Дар ин хусус раисҷумҳури Украина Владимир Зеленский борҳо дархости мулоқоти рӯ ба рӯ бо Путинро карда буд.

Дар ҳамин ҳол, рӯзи душанбе сухангӯи Кремлин Дмитрий Пасков гуфт, ки дар мавриди мулоқоти Путин бо Зеленский ҳеч пешрафте ба даст наомадааст.

Додгоҳи Шербинский беш аз 20 муҳоҷири тоҷику узбекро зиндонӣ кард

Аз ҷониби
AZDA TV
-
0

Рӯзи 25-уми март додгоҳи Шербинскии Маскав 43 нафарро бо гумони иштирок дар занозании гурӯҳии рӯзи сешанбе дар Маскави Нав

Гуфта мешавад, дар байни маҳкумшудагон беш аз 20 нафарашон зодагони Тоҷикистон ва Узбекистон ҳастанд.

Мақомоти Маскав гуфтаанд, дар ин занозании гурӯҳӣ муҳоҷирон бар зидди ҳамдигар аз корду калтакҳо истифода кардаанд, ки баъзеашон бо захмҳои зиёд ба бемористон мунтақил шуданд.

Тавре пештар расонаҳои русӣ хабар дода буданд, дар натиҷаи ин ҷанҷоли гурӯҳии байни муҳоҷирон дар Маскав як зодаи Тоҷикистон бо зарби корд аз ноҳияи қафаси сина ва пойи рост маҷруҳ шуда, дар бемористон бистарӣ шудааст.

Ёдовар мешавем, ки шоми 22-юми март дар хиёбони Скандинавский дар Маскави Нав задухурди гурӯҳии муҳоҷирон рух дод. Он замон хабар дода буданд, ки беш аз 20 нафар дар занозанӣ ширкат карда, чанд нафар захмӣ шудааст. Сабаби муноқиша баҳсҳои дохилӣ гуфта мешавад.

1...447448449...748саҳифаи 448 аз 748

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
15.1 ° C
15.1 °
15.1 °
82 %
2kmh
2 %
Sat
27 °
Sun
28 °
Mon
27 °
Tue
26 °
Wed
25 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст