Дастёри вежаи вазири хориҷаи Амрико дар умури Осиёи Ҷанубӣ ва Марказӣ Доналд Лу ҳафтаи ҷорӣ ба минтақа, ба хусус ба Тоҷикистон сафар хоҳад кард.
Сафари Дастёри вазири хориҷаи Амрико ба Тоҷикистон
ВКД: 19 рӯшониро ба “терроризм” муттаҳам кард
Вазорати корҳои дохилии Тоҷикистон 19 нафар аз сокинони ноҳияи Рӯшонро ба “терроризм” муттаҳам карда, ки дар раъси онҳо ду нафар собиқ узви ҲНИТ будаанд.
Имрӯз, 23-уми майи соли 2022 Вазорати корҳои дохилии Тоҷикистон бо як иттилоия гуфтааст, ки онҳо дар тазоҳуроти рӯзҳои 15-18-уми майи соли 2022 дар ноҳияи Рӯшон иштирок кардаанд ва “бо ихтиёри худ ба мақомот ҳозир шудаанд”.
Вазорати корҳои дохилии Тоҷикистон ин нафарҳоро ба “гурӯҳҳои муташаккили ҷиноятӣ ва экстремистӣ-террористӣ” муттаҳам карда, гуфтааст, ки аксари онҳо узви “гуруҳи ҷиноятии Холбашев Холбаш” будаанд.
Мақомоти корҳои дохилии Тоҷикистон тамоми ин афродро ба он айбдор мекунанд, ки дар тазоҳуротҳои ахир дар ин ноҳия иштирок кардаанд. Дар парвандаи баъзе аз ин афрод гуфта шудааст, ки “иштирокчии тазоҳуроти соли 2012 дар ҳудуди ВМКБ мебошад”.
Ин 19-нафаре, ки ВКД онҳоро ба “гурӯҳи ҷиноятӣ ва экстримистӣ-террористӣ” муттаҳам кардааст, зиёда аз 70 дарсади онҳо дар гузашта, ҷузви одамҳои хилофкор набудаанд ва доғи судӣ ҳам надоштаанд.
Инчунин ба гуфтаи ВКД, дар байни касоне, ки худро ба мақомот таслим кардаанд, ду нафари онҳо собиқ узви Ҳизби наҳзати исломии Тоҷикистон ва раисони маҳалии ин ҳизб дар ноҳияи Рӯшон будаанд.
Гуфта мешавад, тазоҳуроти 15-18-уми майи соли ҷорӣ дар шаҳри Хоруғ ва ба дунболи он дар ноҳияи Рӯшон асосон ба хотири додхоҳӣ аз мақомот дар ба хотири боздошт ва муҷозоти қотилони тазоҳуротгарон дар моҳи ноябри 2021, талаби истеъфои раиси ВМКБ ва раиси шаҳри Хоруғ ва озод кардани боздоштшудаҳои ғайриқонунӣ баргузор шуда буд, вале мақомот ин тазоҳуроти осоиштаро ғайриқонунӣ дониста, ба сӯи мардум тир кушод ва то дирӯз дасти кам 25 нафарро ба қатл расонида, даҳҳо каси дигарро захмӣ ва беш аз 140 нафарро ҳам боздошт кардаанд.
Номаи саркушода ва тундлаҳни ПМТ ба СММ ва кишварҳои кафили сулҳ
Паймони миллии Тоҷикистон, эътилофи гурӯҳе аз ҳизбу ҳаракатҳои мухолифи дар хориҷбуда, бо ирсоли номаи саркушода ба СММ ва кишварҳои кафили сулҳ аз онҳо ҷиддан талаб намудааст, ки пеши роҳи ҷинояткориҳои Эмомалӣ Раҳмонро бигиранд.
ПМТ дар пай қатлу боздошти шаҳрвандон дар Вилояти Мухтори Кӯҳистони Бадахшон аз ҷониби мақомоти интизомии кишвар, аз Созмони Миллали Муттаҳид (СММ) ва кишварҳои кафили сулҳ (Русия, Қазоқистон, Узбекистон, Тукманистон, Қирғизистон, Афғонистон, Эрон ва Покистон) талаб намудааст, ки ба тааҳҳудоти худ ба таври ҷидди амал анмуда, пеши роҳи ҷинояткориҳои Эмомалӣ Раҳмонро бигиранд.
Дар изҳороти ПМТ гуфта мешавад, ки Эмомалӣ Раҳмон бад аз имзои сулҳ ба бандҳои он амал накард ва аҳдшиканӣ намуда, раҳбарони Иттиҳоди Нерӯҳои Опозитсияи Тоҷик (ИНОТ), ба хусус раҳбарони ҲНИТ ва дигаронро боздошту зиндонӣ намуд.
“Бале, ҳамаи ин иттифоқоти талх дар пеши чашмони Шумо – зоминҳо иттифоқ афтод ва Шумо мутаассифона вокунише ба онҳо накардед. Балки баръакс аҳёнан бар ИНОТ фишор ворид кардед, ки шартҳои Эмомалӣ Раҳмонро бипазирад.”, омадааст дар изҳорот.
Дар идома гуфта мешавад, ки хомӯшии кишварҳои кафили сулҳ ва маҷбур сохтанҳои ИНОТ, ки ба хостаҳои Раҳмон розӣ шаванд, сабаб шуда, ки ӯ даст ба ҷиноёти бештар бизанад.
ИДОМАИ МАТЛАБРО ДАР МАТНИ КОМИЛИ НОМАИ САРКУШОДАИ ПМТ БИХОНЕД:
Номаи саркушода
ба Созмони Милали Муттаҳид,
ба кишварҳои зомини “Созишномаи умумии истиқрори сулҳ ва ризоияти миллӣ дар Тоҷикистон”: Федератсияи Русия, Ҷумҳурии Қазоқистон, Ҷумҳурии Ӯзбекистон, Ҷумҳурии Туркманистон, Ҷумҳурии Қирғизистон, Ҷумҳурии Исломии Покистон, Ҷумҳурии Исломии Афғонистон ва Ҷумҳурии Исломии Эрон,
аз тарафи Паймони Миллии Тоҷикистон, эътилофи аҳзоб ва гурӯҳҳои опозитсияи Тоҷикистон.
Олиҷанобон!
Бо арзи дуруд,
Огоҳед, ки дар моҳи июни соли 1997 бо миёнҷигарии Созмони Милали Муттаҳид (СММ) ва кишварҳои дар боло зикршуда, миёни ҳукумати Тоҷикистон ба риёсати Эмомалӣ Раҳмон ва Иттиҳоди Нерӯҳои Опозитсияи Тоҷик (ИНОТ) ба раҳбарии марҳум устод Сайид Абдуллоҳи Нурӣ, “Созишномаи умумии истиқрори сулҳ ва ризояти миллӣ дар Тоҷикистон” ба имзо расид.
Ва ҳамчунин, Шумо ба унвони зомини иҷрои муҳтавои ин санади байналмилалӣ, нек огоҳед, ки ИНОТ барои таҳаққуқи сулҳ ва барқарории оромиш дар кишвари азизамон, нерӯҳои мусаллаҳи худро водор ба гузоштани силоҳ ба замин ва фармонбардорӣ аз тамоми он чи ҳукумат ва раисиҷумҳури Тоҷикистон, Эмомалӣ Раҳмон мехоҳад, намуд. Ва низ ҳамаи шартҳои ҳукумат аз ҷумла, бақои Эмомалӣ Раҳмон ба унвони раисиҷумҳури Тоҷикистон то як муддати замониро пазируфт, то бо фароҳам шудани заминаи мусоид, ҳам интихоботи порлумон ва ҳам интихоботи риёсати ҷумҳурӣ ба сурати озод ва шаффоф ва бо назорати тамоми атроф яъне ҳам ИНОТ ва ҳам кишварҳои зомин баргузор ва мунтахабони мардум дар порлумон ва низ дар раъси ҳукумати Тоҷикистон қарор бигирад.
Вале бо камоли таассуф, Эмомалӣ Раҳмон на танҳо ба муҳтавои созишнома амал накард, балки баъд аз гузаштани замоне кӯтоҳ, шурӯъ ба ҳазф ва аз байн бурдани раҳбарон ва афроди вобаста ба ИНОТ намуд. Ва на танҳо нерӯҳои опозитсияро, балки ҳамразмҳо ва ҳамроҳони худ аз “Фронти халқӣ”-ро низ, ки дар воқеъ ӯро ба қудрат расонда буданд, аз байн бурд. Инҳо ҳама мустанад аст ва дар расонаҳо омада ва мо дар ин нома ба хотири тӯлонӣ нашудан, фақат ба ишора ба куллиёти он ҳодисаҳои талх басанда кардем. Ва итминон дорем, Шумо – кишварҳои зомини иҷрои “Созишномаи умумии истиқрори сулҳ ва ризояти миллӣ дар Тоҷикистон”, ба онҳо огоҳед.
Бале, ҳамаи ин иттифоқоти талх дар пеши чашмони Шумо – зоминҳо иттифоқ афтод ва Шумо мутаассифона вокунише ба онҳо накардед. Балки баръакс аҳёнан бар ИНОТ фишор ворид кардед, ки шартҳои Эмомалӣ Раҳмонро бипазирад. Ин мавқеъи шумо, хусусан мавқеъи кишварҳои таъсиргузор мисли Федератсияи Русия ва Ҷумҳурии Исломии Эрон, ба Эмомалӣ Раҳмон ин боварро дод, ки ҳар коре, ки дилаш мехоҳад, бикунад. Ӯ итминон намуд, ки аҳаде монеъи сари роҳи ӯ дар ҳазфи рақибонаш аз саҳнаи сиёсии Тоҷикистон намешавад, балки баръакс ба ин корҳои вай розӣ ҳастанд.
Саранҷом, дар соли 2011 Эмомалӣ Раҳмон ва як иддаи ангуштшумор аз ҳамроҳонаш, протоколи сиррии маъруф ба 32-20-ро, ки алорағми иродаи Раҳмон расонаӣ шуд, пазируфт. Эмомалӣ Раҳмон дар ин санади нангин дар воқеъ нақшаи роҳи ҳазфи куллии рақибони худ аз матни ҷомеаи Тоҷикистонро тарсим кардааст. Бар асоси ҳамин санад буд, ки аввал фаъолияти ҲНИТ-ро – ки ҳизби асосӣ ва меҳварӣ дар ИНОТ буд – манъ ва сипас раҳбарон ва аъзои онро бидуни анҷоми муҳокимаи одилона вориди зиндон кард. Ва аҷибаш он аст, ки на танҳо раҳбарон ва фаъолони ҲНИТ-ро, балки вакилони мудофеъи онҳоро низ ба зиндон афканд.
Эмомалӣ Раҳмон ҳамаи ин ҷиноятҳоро фақат ба хотири тазмини бақои худ бар қудрат ва низ меросӣ кардани он ва нишондани яке аз фарзандонаш бар арши ҳукмронӣ дар Тоҷикистон намуд. Такрор мекунем, ҳамаи ин ҷиноятҳо дар пеши чашмони шумо – кишварҳои зомини сулҳ дар Тоҷикистон ва бо огоҳии комили шумо сурат гирифтанд ва Шумо ҳеч чизе нагуфтед.
Охирин коре, ки ба назари Эмомалӣ Раҳмон анҷоми он барои тазмини меросӣ ва хонаводагӣ кардани қудрат дар Тоҷикистон зарурат дошт ва монеъ аз таҳаққуқи орзуҳояш буд, ин таслими бе чуну чарои мардуми Вилояти Мухтори Кӯҳистони Бадахшон (ВМКБ) аст. Ва бо ин ки мардуми ин минтақа қонунмадортарин мардуми Тоҷикистон буда ва саъй кардаанд, тамоми ҳаракоту саканоташон дар чорчӯби Қонуни асосии Тоҷикистон бошад ва асосан, фарҳанги қонунмадорӣ бо хуну пӯсту ин мардум аҷин аст, бо ин ҳама, Раҳмон ба онҷо ҳамлаи низомӣ кард.
Тибқи ахбори расмӣ, дар амалиёте, ки дар ҳафтаи гузашта Эмомалӣ Раҳмон дар ин минтақаи амн ва осоишта анҷом дод, 21 кас кушта ва садҳо нафари дигар захмӣ шудаанд. Бино бар ахбори расонаҳо, шумори воқеии қурбониён зиёд аст. Тибқи гузоришҳо, вазъият дар ноҳияи Рӯшони ВМКБ пас аз он печида шуд, ки гурӯҳе аз сокинон ба кӯчаҳо баромада, роҳи низомиёнро аз Душанбе ба самти Хоруғ бастанд. Мақомот дар таърихи 18-уми май гуфтанд, дар онҷо амалиёти “зиддитеррористӣ” мегузаронанд ва норозиёнро ба доштани силоҳу муҳиммот муттаҳам карданд. Бар пояи ахбор, мардум мегӯянд, ҳеч аслиҳае надоштанд ва ба пуштибонии ҳуқуқи худ ва пешгирӣ аз даргирии бештар дар Хоруғ роҳро бастанд. Мардум мегӯянд, онҳо “зери тарсу фишори равониянд ва бештар барои пайдо кардани наздиконашон мушкилӣ доранд.” Дар рӯзҳои амалиёт даҳҳо нафар боздошт шуданд ва наздиконашон аз сарнавишти онҳо дарак надоранд. Азбаски ҳамчунон интернет нест ва алоқаи мобилӣ ҳам дуруст кор намекунад, сокинон аз хориҷи кишвар барои тамос бо пайвандон мушкил доранд.
Лозим ба зикр аст, ки дар тирамоҳи соли пешин (2021) низ нерӯҳои вобаста ба Раҳмон 3 шаҳрванди ин минтақаро кушт ва 17 нафарро захмӣ намуд.
Паймони Миллии Тоҷикистон (ПМТ) ба унвони меросбари ИНОТ, аз кишварҳои зомини иҷрои “Созишномаи умумии истиқрори сулҳ ва ризояти миллӣ дар Тоҷикистон” ва ба хусус Созмони Милали Муттаҳид (СММ), тақозо мекунад, ба таъаҳҳудоти худ амал ва монеъи идомаи наслкушии Раҳмон ва ҷиноятҳои ӯ шаванд.
Мо ба сурати ҷиддӣ аз тарафҳои зомин тақозо мекунем, ин бор танҳо ба “тавсия” ва “содир кардани баёния” ва “изҳори таассуф” аз он чи дар кишвари азизи мо, Тоҷикистон дар ҳоли вуқӯъ аст, басанда накунанд, балки бо иқдомҳои амалӣ монеъи идомаи фоҷеа дар Тоҷикистон шаванд.
Ба умеди пирӯзии ақл ва мантиқ!
Бо ташаккур,
Паймони Миллии Тоҷикистон
21.05.2022
Тафсилоти кушта шудани Мамадбоқиров ва баста шудани роҳҳо дар Хоруғ
Имрӯз 23-юми май маросими ҷанозаи Мамадбоқир Мамадбоқиров, яке аз раҳбарони мардумии Бадахшон, ки аз ҷониби мақомот кушта шуд, дар маҳаллаи Бархоруғи шаҳри Хоруғ ҷараён дорад. Аммо шаҳр баста аст ва сокинони дигар маҳаллаҳо наметавонанд дар ин маросим ширкат кунанд.
Бино ба иттилои Pamir Daily News, садҳо низомии мусаллаҳ дар постҳо қарор дошта, чорроҳаи марказӣ, пул (Кирин Йед), гузаргоҳи маҳаллаи УПД ва гузаргоҳи нав дар даромадгоҳи Чинакро бастаанд.
Шаҳри Хоруғ аз минтақаҳои Шуғнон, Роштқалъа, Рӯшон ва Ишкошим баста аст.
Гуфта мешавад, дар гирду атроф “снайперҳо” ҷойгир шуда, касеро намегузоранд аз дигар манотиқ ба маросими ҷанозаи Маҳмадбоқиров биёянд ва танҳо сокинони маҳаллаи Бархоруғ ва УПД метавонанд ширкат кунанд.
Мамадбоқир Мамадбоқиров, яке аз раҳбаронии мардумии Бадахшон 22-юми майи соли ҷорӣ дар шаҳри Хоруғи Вилояти Мухтори Кӯҳистони Бадахшон, дар наздикии “Бойнӣ” аз сӯи хадамоти махсуси Тоҷикистон кушта шуд.
Вазорати корҳои дохила сабаби кушта шудани Боқировро “муноқишаи байни ҳамдигарӣ” гуфтаанд. Аммо тарафдорон ва наздиконаш ба ин фарзияи мақомот бовар надорад.
Дар ҳамин ҳол Анора Саркорова, рӯзноманигори шинохта, дар истинод ба манбааш хабар дод, ки Мамадбоқир Мамадбоқиров вақте аз хонааш берун мебарояд, дар маҳҳалаи “Бойнӣ” аз ҷониби 4 афсари хадамоти махсуси Тоҷикистон тирборон мешавад.
Тибқи навиштаи Саркорова, “полковник Мамадбоқир Мамадбоқиров тахминан соати 17:00 аз манзилаш воқеъ дар маҳаллаи Бархоруғ, берун мебарояд. Барои он ки диққати зиёд ҷалб нашавад ва наздиконашро зери хатар нагузорад, ба касе иҷоза намедиҳад то бо ӯ биёянд. Ӯ даъвати оила ва тарафдоронашро ба андешидани чораҳои эҳтиётӣ нодида гирифта мегӯяд, ки мехоҳад танҳо дар кӯчаҳои кӯдакиаш сайр кунад.”
Дар идома Саркорова менависад:
“Дар мавзеи маъруф бо номи “Бойнӣ” як мошин ба таври ғайричашмдошт ба сӯи Мамадбоқирови бесилоҳ, ки роҳ мерафт, баромад ва аз дохили он 4 афсари хадамоти махсуси Тоҷикистон берун шуданд. Онҳо полковникро иҳота карда, бидуни огоҳӣ сӯяш тир кушоданд. Дар натиҷа Мамадбоқиров ҷароҳатҳои гуногун бардошта, дар ҷойи ҳодиса ба ҳалокат мерасад”.
Гуфта мешавад, ки дар пайи ин ҳодиса яке аз наздиконаш, ки пинҳонӣ аз паси ӯ мерафт, сахт ярадор шуда, дар бемористон аст.
Ба иттилои Саркорова як сокини дигари маҳаллӣ, ки шоҳиди ин ҳодиса буд ва мехост Мамадбоқировро наҷот диҳад, низ аз тири мақомот кушта шудааст.
Хабаргузории “Бомдод” дар истинод ба манбааш фарзияи дигареро нашр кардааст, ки дар он гуфта мешавад:
“Мамадбоқир Мамадбоқиров нимаи дуюми рӯзи 22 май аз тири мерганҳо (снайперҳо), ки чанд рӯз боз дар маҳаллаи Бойне хайма гузошта, камин гирифта буданд, кушта шуд. Мерганҳо аз камингоҳи худ Боқир ва ду тан аз ёронашро замоне ҳадаф қарор доданд, ки онҳо бо мошин дар дохили маҳаллаи Бархоруғ ҳаракат мекарданд.”
Хабарҳое низ нашр шуданд, ки дар пайи кушта шудани Мамадбоқиров мардум дар маҳаллаҳои гуногуни Хоруғ ҷамъ шуда, мехостанд ба маҳаллаи Бархоруғ раванд, аммо мақомот дар кӯчаҳо шумори зиёди нирӯҳои низомиро мустақар карда, роҳҳои ба тарафи Бархоруғро бастаанд.
Оҷил! Мамадбоқир Мамадбоқиров аз ҷониби кормандони мақомот кушта шуд
Чанд дақиқа пеш дар шаҳри Хоруғи Вилояти Мухтори Кӯҳистони Бадахшон, дар наздикии маҳаллаи Бойне Мамадбоқир Мамадбоқиров, яке аз раҳбаронии мардумии Бадахшон аз сӯи хадамоти махсуси Тоҷикистон кушта шуд. Дар ин бора Pamir Daily News дар истинод ба манбааш хабар дод.
Манбаи Azda.tv низ аз Хоруғ хабари кушта шудани Мамадбоқировро тасдиқ кард, аммо аз додани маълумоти бештар дар ин бора худдорӣ кард.
То ҳол маълум нест, ки ин раҳбари мардумии Бадахшон дар кадом ҳолат аз ҷониби мақомот кушта шудааст.
Аммо АМИТ “Ховар” сабаби кушта шудани Боқировро “муноқишаи байни ҳамдигарӣ” гуфтааст.
Чанде пеш хабарҳои зиёде аз эъзоми гурӯҳи қотилон аз хадамоти махсус барои аз байн бурдани Мамадбоқир Мамадбоқиров расонаӣ шуда буд.
Дар сурати пайдо намудани маълумоти бештар хабар такмил мешавад.
Гузоришгари вежаи СММ аз Тоҷикистон хост ба саркӯби помириҳо поён диҳад
Рӯзи 20 май соли ҷорӣ гузоришгари вежаи Созмони Миллали Муттаҳид (СММ) дар умури ақалиятҳо Фернанд де Вареннест аз Тоҷикистон хост, ба саркӯби маргбор бар зидди сокинон дар Вилояти Мухтоир Кӯҳистони Бадахшон поён диҳад.
Дипломати СММ аз вазъияти ба амаломада изҳори нигаронӣ намуда, ҳамчунин ҳушдор дод, ки дар ҳоли идомаи саркӯбгариҳои мақомот алайҳи ақаллиятҳо дар ВМКБ бо баҳонаи “амалиёти зидди террорситӣ” боиси нооромиҳои густардатар ва хушунатҳои бештаре гардида, метавонад вазъро аз контрол берун кунад.
Ин коршиноси гуфт: “вокуниши сахти Ҳукумат барои саркӯби эътирозҳои ақалиятҳои помирӣ аз тариқи боздошт, истифодаи беш аз ҳад ва ғайриқонунии аз зӯр ва дахолати артиш ғайримуносиб ва амиқан озордиҳанда аст”Ман аз ҳама тарафҳои мехоҳам, ки хештандори кунанд ва талош шавад, ки вазъият аз контрол хориҷ нашвад”.
Дар идома ҷаноби Фернанд де Вареннест аз мақомоти Тоҷикистон хоста, ки бо ақалияти помириҳо гуфтугӯи созанда ва ошкор дошта бошад. Гузоришгари вежаи СММ аз Ҳукумати Тоҷикистон даъват намуд, ки фавран иқдомоти пешгирӣ аз даргирӣ, аз ҷумла ҳифозат аз ақалияти помириро, ки мутобиқ ба меъёрҳои байналмилалии ҳуқуқи башар аст, иҷро кунад.
Қаблан намояндагии дипломатии Иттиҳодияи Аврупо, сафоратҳои Фаронса, Олмон, Британияи Кабир ва ИМА дар Тоҷикистон, Дабири Кулли Созмони Амният ва Ҳамкории Аврупо, хонум Ҳелга Мария Шмит, созмони Дидбони ҳуқуқи башар ва Мариус Фоссум намояндаи Кумитаи норвежии Ҳелсинкӣ аз воқеаҳои охири ВМКБ изҳори нигаронӣ карда буданд.
Ёдовар мешавем, ки аз 16-уми май ба ин тараф вазъ дар шаҳри Хоруғ ва ноҳияи Рӯшони ВМКБ печида аст. Дар пайи эътирози сокинони Хоруғу Рӯшон, аз ҷониби мақомот беш аз 30 сокини маҳаллӣ бераҳмона кушта шуда, 124 нафари дигар боздошт шудаанд.
Абдулқодирзода: Кабирӣ эълони ҷанг кардааст, ҳушёр бошед!
Имрӯз, 20-уми май Саидмукаррам Абдулқодирзода, раиси Шӯрои уламои Тоҷикистон ҳангоми хутбаи намози ҷумъа гуфт, ки Муҳиддин Кабирӣ эълони ҷанг кардааст ва мардум бояд ҳушёр бошанд.
Раиси Шӯрои уламои Тоҷикистон имрӯз ба намозгузорон гуфта, ки Муҳиддин Кабирӣ, раиси Паймони миллии Тоҷикистон (ПМТ) дар дохили кишвар ҷиноҳи низомӣ ташкил кардааст ва мехоҳад вазъро ноором кунад.
Иттиҳоми Абдулқодирзода алайҳи Муҳиддин Кабирӣ дар ҳоле садо медиҳад, ки ӯ худ дар суҳбат бо Azda.tv ва баъдан дар Радиои Озодӣ ташкили ҷиноҳи низомӣ дар дохили кишварро рад карда буд.
Аммо гуфт, ки фишору таъқибҳои мақомоти кишвар болои сокинони осоишта, мардумро ба чунин хулоса расондааст, ки барои сохтани як ҷомеаи демократии озод, ин режимро танҳо бо қувваи силоҳ мешавад аз қудрат канор зад.
Хабари ташкили ҷиноҳи низомии мухолифони тоҷикро 6-уми май Андрей Серенко, журналисти рус дар телеграм-канали худ нашр карда буд.
Ин рӯзноманигори рус дар хабараш аз ҳеч гурӯҳи мухолифине мушаххас ном набурдааст, аммо бо такя ба манбааш бо номи “Умар”, ки худро намояндаи ҷиноҳи низомии мухолифини тоҷик гуфтааст, навишта, ки “тасмим дар бораи гузаштан ба усулҳои ҳарбӣ рӯзи 4-май аз ҷониби гурӯҳе аз ҷонибдорони мухолифин, ки бефоида ва нокифоя будани усулҳои танҳо сиёсии муборизаро дарк мекунанд, гирифта шуд”.
Баъди изҳороти Кабирӣ дар мавриди ин хабар дар доираҳои ҳукуматӣ ва ғайри он вокунишҳои гуногуне сурат гирифт.
Боздошти 124 нафар ва идомаи таҳдидҳо болои сокинони Хоруғ
Роҳи Хоруғ-Қулма субҳи имрӯз, 20-уми май баъди гуфтушунидҳои дуру дарози тарафҳо кушода шуд. Аммо роҳи маҳаллаи Бархоруғ баста боқӣ мемонад. Дар ин бора Pamir Daily News хабар дод.
Ба навиштаи манбаъ, мақомот ва нерӯҳои амниятӣ уҳдадор шудаанд, ки сокинони ноҳияи Рӯшонро, ки ба таври оммавӣ боздошт шуда буданд, раҳо кунанд. Инчунин нерӯҳои амниятӣ ваъда додаанд, ки снайперҳоро аз баландиҳо дар Хоруғ берун бурда, техникаи низомиро аз канораҳои шаҳр ба ҷойҳои истиқрори доимии худ мебаранд.
Дар ҳамин ҳол Анора Саркорова рӯзноманигори шинохта дар саҳфаи
Нигаронии Гуттериш аз куштори сокинон дар Бадахшон
Дабири кулли Созмони Милали Муттаҳид Антониу Гутерриш аз афзоиши ташаннуҷ ва хушунат дар Вилояти Мухтори Кӯҳистони Бадахшон (ВМКБ)-и Тоҷикистон изҳори нигаронӣ кардааст.
Сухангӯи СММ Стефан Дуярич рӯзи 19-уми май дар нишасти матбуотӣ аз нигаронии Гутерриш ба рӯзноманигорон хабар дод.
Ба гуфтаи Дуярич, Дабири кули СММ аз тарафҳо хостааст, ки тамоми кӯшишро барои ба таври осоишта ҳал кардани вазъияти ҳозира ба кор баранд. Ӯ ҳамчунин афзуда, ки СММ вазъиятро бодиққат пайгирӣ хоҳад кард.
Қаблан намояндагии дипломатии Иттиҳодияи Аврупо, сафоратҳои Фаронса, Олмон, Британияи Кабир ва ИМА дар Тоҷикистон, Дабири Кулли Созмони Амният ва Ҳамкории Аврупо, хонум Ҳелга Мария Шмит, созмони Дидбони ҳуқуқи башар ва Мариус Фоссум намояндаи Кумитаи норвежии Ҳелсинкӣ аз воқеаҳои охири ВМКБ изҳори нигаронӣ карда буданд.
Ёдовар мешавем, ки аз 16-уми май ба ин тараф вазъ дар шаҳри Хоруғ ва ноҳияи Рӯшони ВМКБ печида аст. Дар пайи эътирози сокинони Хоруғу Рӯшон, аз ҷониби мақомот беш аз 30 сокини маҳаллӣ бераҳмона кушта шуда, 124 нафари дигар боздошт шудаанд.