Раиси Вилояти Мухтори Кӯҳистони Бадахшон (ВМКБ) дар посух ба номаи модари Гулбиддин Зиёбеков гуфтааст, ки “касе ҳақ надорад писари ӯро ҷинояткор номад.”

5-уми майи соли 2022 Певистамоҳ Абдулмӯъминова, модари Гулбуддин Зиёбеков дар суҳбат бо “Радиои Озодӣ” иттилоъ дода, ки дар посух ба номаи ӯ Алишер Мирзонаботов, раиси ВМКБ гуфтааст, “тибқи Конститутсия касе ҳақ надорад, писари ӯро ҷинояткор номад, чун ҳеч додгоҳе ҳоло ӯро гунаҳкор эълон накардааст.”

Певистамоҳ Абдулмӯъминова, модари Гулбуддин Зиёбеков аз замони қатли писараш дар 25-уми ноябри соли 2021 то кунун додхоҳӣ мекунад ва чандин номаҳо ба раҳбарони кишвар, аз он ҷумла ба раиси вилоят, Додгоҳи олӣ, Дастгоҳи Прзедидент ва худи Президенти кишвар Эмомалӣ Раҳмон ирсол кардааст, аммо то кунун талаботи ӯро қонеъ накардаанд.

Модари Гулбиддин Зиёбеков дар охирин муроҷиати худ, ки 4-уми майи соли ҷорӣ дар шабакаҳои иҷтимоӣ нашр шуд, мегӯяд:

“Писарамро бераҳмона куштанд. Навиштам, онҳое, ки ғайриқонунӣ писарамро куштаанд, ба ҷавобгарӣ кашида мешаванд ё не. Ба ман ҷавоб медиҳанд, ки тафтиш мекунем, лекин панҷ моҳ шуд, ягон натиҷааш маълум нест. Фақат мегӯянд, ки писарат пистолет дошт. Гуфтам, исбот нашудааст, ки писарам пистолет дошт. Ӯ надошт,”

Тибқи қонунгузории Тоҷикистон пеш аз содир шудани ҳукми суд ҳеч касе ҳақ надорад, ки касеро ҷинояткор эълон кунад, аммо ин банди қонунгузории кишвар пайваста дар нисбати мухолифини ҳукумати Эмомалӣ Рамҳон тавассути мақомот ва расонаҳои давлатӣ нодида гирифта мешавад.

Хонум Певистамоҳ Абдулмӯъминова, модари Гулбуддин Зиёбеков ҳам иддао дорад, ки дар муддати 5 моҳе, ки аз қатли писараш мегузарад, телевизиони расмии ВМКБ ва дигар расонаҳои вобаста ба ин вилоят хилофи қонунгузории кишвар писарашро ҷинояткор эълон мекунанд.

25-уми ноябри соли 2022 Гулбиддин Зиёбеков тавассути кормандони мақомоти қудратии Тоҷикистон дар зодгоҳаш, дар деҳаи Тавдеми ноҳияи Роштқалъаи Вилояти Мухтори Кӯҳистони Бадахшон бидуни муҳокимаи додгоҳӣ дар кӯча ба тавари ваҳшиёна ба қатл расонида шуд.

Қатли Гулбиддин Зиёбеков боис шуд, ки дар маркази маъмурии ин вилоят ба муддати 3 рӯз, яъне 25-ум то 28-уми ноябри соли 2021 мардум гирдиҳамоӣ ва додхоҳӣ кунанд, аммо мақомоти қудратии кишвар ба ҷои посух додан ба мардум болои онҳо оташ кушоданд ва дар натиҷа дасти кам 2 каси дигар кушта ва 17 нафар аз иштирокчиёни ин гирдиҳамоиҳо захмӣ шуд.

Рӯзноманигор Анора Саркорова, ки дар хориҷ аз кишвар зиндагӣ мекунад ва аз режими кунунии Тоҷикистон интиқод менамояд, ба “паҳн кардани маълумоти нодуруст ва иғвоангез” муттаҳам мешавад.

Дар ин бора саҳифаи фейсбукии INFO VMKB хабар додааст. Ин саҳифа ҳамчун блоги шахсӣ муаррифӣ шудааст, аммо аз маълумоте, ки нашр мекунад метавон хулоса кард, ки ба мақомоти иҷроияии Вмлояти мухтори Кӯҳистони Бадахшон таъаллуқ дорад.

“Паҳн кардани маълумоти беасос ҷавобгарии ҷиноӣ дорад. Нисбати шаҳрванд Саркорова Анора дар асоси паҳн намудани маълумоти нодуруст ва иғвоангез парвандаи ҷинояти оғоз карда шуд. Номбурда дар шабакаҳои иҷтимоӣ ҳаргуна маводҳои иғвоангез во нодурустро паҳн намуда мардумро ба бадбини нисбати  Ҳукумати қонунии мамлакат даъват менамояд” — омадааст дар иттилоияи ин саҳифа.

Дар ҳамин ҳол сабаби боз шудани парванда нисбати Саркороваро на навиштаҳои интиқодиаш дар бораи мақомдорони вилоят, балки нашри “маводҳои беасос оиди вазъи муассисаи таълимии №34 ноҳияи Ишкошим эълон шудааст:

“Аз ҷумла номбурда санаи 4 майи соли 2022 маводҳои беасос оиди вазъи муассисаи таълимии #34 ноҳияи Ишкошим дар шабакаи иҷтимоии Фейсбук инъикос намуда мардумро фиреб менамояд, ки муассисаи мазкур дар ҳолати хеле валангор қарор дорад. Дар асли муассисаи мазкур дар ҳолати хуби корӣ қарор дорад. Вобаста ба ин нисбати номбурда аз тарафи  мақомоти ҳифзи ҳуқуқ парвандаи ҷинояти оғоз гардида ба ҷавобгарии ҷинояти кашида мешавад”.

Зоҳиран мақомот нахостаанд парвандаи рӯзноманигори ВВС чун сиёсӣ муаррифӣ шавад.

Манбаъ: Паём.net