Муовини сарвазири Русия Марат Хуснулин дар мусоҳибае бо шабакаи телевизиони “Русия 24” баён дошт, ки ширкатҳои сохтмонии Русия изҳори омодагӣ намудаанд, ки ба муҳоҷироне, ки барои кор ба Русия меоянд, барои гирифтани ваксина имкон фароҳам месозанд.

Марат Хуснулин афзуд, назди худ вазифа гузоштем, то ҳамаи муҳоҷирони кориро, ки ба Русия меоянд, бо ваксина таъмин намоем. Ширкатҳои сохтмонӣ низ худашон омодаанд воксинагириро ташкил ва баргузору маблағашро пардохт намоянд.

Ба гуфтаи муовини сарвазири Русия худи коргароне, ки масалан аз Белорус, Узбекистон ва Тоҷикистон меоянд низ ба он манфиатдоранд, ки дар инҷо кор карда маош гиранд. Шарти мо воксина гирифтан аст ва умедворем, ки онҳо ин шарти моро мепазиранд, илова кард муовини сарвазир.

Пештар муовини дигари сарвазири Русия Татьяна Голикова хабар дода буд, ки масалаи воксинагирии муҳоҷирони корӣ ва донишҷӯёни хориҷиро ҳукумати Русия дар ояндаи наздик ҳаллу фасл мекунад.

Аввали моҳи май раисҷумҳури Русия Владимир Путин изҳор дошта буд, ки дар бисёре аз соҳаҳои иқтисодии ин кишвар норасоии нерӯи корӣ ба назар мерасад ва ҳукумат аз тамоми имконоташ истифода менамояд то муҳоҷирони корӣ ба инчо омада худро роҳат ҳис кунанд.

Як рӯз пеш 15 июн Владимир Путин дар мавриди танзими ҳуқуқи хориҷиён дар давраи пандемияи Covid-19 фармонеро ба имзо расонд, ки бар асоси он муҳлати ҳузури муваққатии муҳоҷирон дар Русия бидуни таҳрим то 30 сентябри соли 2021 тамдид гардид.

Тибқи матни ин фармон агар хориҷиён ба қонуншиканӣ даст назада бошанд, онҳо то 30 сентябр ихроҷ карда намешаванд.

Раиси Шӯрои нозирони Фонди хоҷагии манзилӣ ва комуналӣ Сергей Степашин изҳор дошта, ки ҳудуди 300 ҳазор нафар муҳоҷирон ба наздикӣ ба сохтмонҳои Русия омада метавонанд.

Раиси Федератсияи муҳоҷирони Русия фармони раисҷумҳури Русия Владимир Путин дар мавриди муҳоҷирони меҳнатиро шарҳ дод.

Хабаргузории “Спутник” ба нақл аз президенти Федератсияи муҳоҷирони Русия Вадим Коженов навишта, ки бар асоси фармони ҷадид имтиёзҳои бештар барои шаҳрвандони кишварҳое, ки омаду рафт бо онҳо барқарор шуда аст то 90 рӯз пас аз оғози омаду рафт тамдид шуда аст.

Ба гуфтаи Коженов пас аз 90 рӯз аз оғози омаду рафт ин фармон дигар кор намекунад.

Парвозҳои мунтазам байни Тоҷикистон ва Русия 1 апрел оғоз шуда буданд ва аз ин бармеояд, ки ҳамаи имтиёзҳои қаблӣ то охири моҳи июн тамдид гардидаанд, яъне ҳамаи ҳуҷҷатҳои муҳоҷироне, ки то 15 марти соли 2020 қонунӣ буданд то охири моҳи июн амал хоҳанд кард.

Дар мавриди онҳое, ки солҳо ҳузурашон дар Русия ғайриқонунӣ будааст, дар фармони ҷадиди Путин имкон дода шуда, ки бидуни ихроҷи манъи вуруд будубоши худро қонунӣ кунанд.

Коженов тавзеҳ дод, ки то 30 сентябр мақомот ҳаққи ихроҷ ва манъи вуруд ба Русияро надоранд.

Ӯ ҳамчунин афзуд, муҳоҷироне, ки солҳо ҳузурашонро қонунӣ накардаанд, беш аз се моҳ вакт дар ихтиёр доранд, ки ба мақомоти муҳоҷират муроҷиат кунанд ва бо пардохти ҷарима ҳузурашонро қонунӣ намоянд депорт таҳдид намекунад, таъкид намуд президенти Федератсияи муҳочирони Русия

Коженов ҳамчунин гуфт, онҳое, ки дар варақаи муҳоҷираташон ҳадафи кор нишон дода нашудааст, то охири соли 2021 метавонанд барои патент муроҷиат кунанд.

Ин фармони ҷадиди Путин дар ҳоле мунташир шуд, ки тибқи иттилои расонаҳои русӣ, дар се ҳафтаи ахир дар кучаҳои назди марказҳои муҳоҷират пур аз муҳоҷиронест, ки шабро дар болои алафзорҳо рӯз мекунанд.