Ҷустуҷӯ кунед
Ҷустуҷӯ
25.9 C
Dushanbe
Хона блог саҳифа 58

Муфтии Тоҷикистон дар намози ҷумъа ҳамла ба худашро шарҳ дод

Аз ҷониби
AZDA.TV
-
0

Саидмукаррам Абдулқодирзода, раиси Шӯрои уламои Маркази исломии Тоҷикистон дар хутбаи намози ҷумъаи рӯзи 18-уми октябр қазияи ҳамла ба худашро шарҳ дод.

Абдулқодирзода суханронии рӯзи ҷумъаашро дар мавзуи “ифротгароӣ” бахшида, зимни суҳбатҳояш гуфт, шахси ҳамлагареро, ки моҳи пеш бо корд ба ӯ ҳамла карда буд, намешиносад. Танҳо барояш гуфтаанд, ки падараш муаллими кадом мактаб будааст ва модараш ҳам дар ҳамон мактаб фаррош кор мекардааст.

Муфтии ҷумҳурӣ дар суҳбаташ гуфт, ки “Аз ман пурсидан бародаро, ки чӣ кораш кунем, гуфтам, Худованд ҳидояташ кунад тамом.” Вале, Вазорати корҳои дохилӣ пас аз ҳодиса гуфта буд, ки муҳоҷим бо иттиҳоми “Авбошӣ” боздошт шудааст. Ва ҳоло парвандаи ӯ то куҷо расида ва боз ба кадом ҷурм муттаҳам шудааст, маълум нест.

Муфтӣ бо интиқод аз гурӯҳҳои тундрав гуфт, ки онҳо шахсони бесаводанд ва бо ин корашон гӯё хидмат ба ислом кардаанд. “Ҳамин гурӯҳҳои тундрав, аслашонро бубинед, мусалмон нестанд. Инҳоро ба воситаи Интернет, шабакаҳои иҷтимоӣ даъват мекунанд. Инҳоро ба воситаи Интернет, шабакаҳои иҷтимоӣ даъват мекунанд. Ҳомон одамҳоеро, ки инҳоро даъват кардаанду супориш доданду инҳо анҷом доданд, аз пеш дидагӣ нестанд.“, таъкид кард Абдулқодирзода.

Раиси Шӯрои уламо мегӯяд, кори ҳамешагии гурӯҳҳои тундрав куштану пароканда кардани мусалмонҳост. Аммо мегӯяд, ки бо онҳо дар робита аст. Ӯ чунин афзуд: “Аз ҳамин гурӯҳҳои тундрав як нафаашро мешиносам, гоҳ-гоҳ мешинем суҳбат мекунем. Кораш фақат олими динро танқид кардан аст.”

Абдулқодирзода аз он шиносаш “шайтон дар сурати инсон” тавсиф кард, ки ба гуфтаи ӯ, “кораш ҳамеша дар ҷомеа фитна андохтану пароканда кардани мардуми мусалмон аст.” Вале ӯ дар ҳоле мегӯяд, ки бо чунин гурӯҳҳо шиносоӣ ва робита дорад, ки мақомоти кишвар бо баҳонаи тундгароӣ робита доштан бо чунин гурӯҳҳо садҳо ҷавонро муттаҳам карда, зиндонӣ намудаанд.

Ёдовар мешавем, ки 11-уми сентябри соли ҷорӣ баъди адои намози аср дар масҷиди марказии шаҳри Душанбе ба ҷони Сайидмукаррам Абдулқодирзода, раиси Шӯрои уламои Макарзи исломии Тоҷикистон сӯиқасд анҷом шуд. Дар натиҷа ӯ аз пешонияш захмӣ гашт, ки то ҳол дар ин навор осори он захм дида мешавад.

Вазорати корҳои дохилии Тоҷикистон фардои он рӯз хабар дод, ки шахси ҳамлагар боздошт шудааст, вале ҳувияти ӯ ва ангезаи асосии ҳамларо шарҳ надод.

Оғози Намоишгоҳи байналмилалии “Китоби Душанбе”

Аз ҷониби
AZDA TV-2
-
0

21-уми октябри соли ҷорӣ дар Осорхонаи миллии Тоҷикистон Намоишгоҳи байналмилалии “Китоби Душанбе” баргузор шуд.

Гуфта мешавад, дар ин намоишгоҳи китоб зиёда аз 40 ношири дохиливу хориҷӣ ширкат карданд. Аз ҷумла, аз кишварҳои хориҷӣ ношироне аз Туркия, Эрон, Чин, Ҳиндустон, Русия, Туркманистон ва Узбекистон ҳузур доштанд.

Ҳадаф аз баргузории ин намоишгоҳ муаррифии китобҳо ва таҳкими робитаҳои фарҳангии Тоҷикистон бо давлатҳои дигар арзёбӣ мешавад.

Дар ин намоишгоҳ ноширон беш аз 5 ҳазор китоби тозанашри худро, аз ҷумла адабиёти бадеӣ, илмӣ, таърихӣ ва фалсафӣ ба алоқамандони китоб пешниҳод шудаанд. Ин намоишгоҳ то 24 октябр идома хоҳад дошт.

Аммо аз сӯи дигар, баъзе аз фаъолони ҷомеаи маданӣ бар ин назаранд, ки агарчи баргузории чунин намоишгоҳҳо хеле хуб аст, вале Вазорати фарҳанг ва дигар ниҳодҳои зертобеи он дар муаррифӣ кардан ва табғили китобҳои олимону адибони Тоҷикистон дар ҷомеа камкорӣ мекунанд, дар ҳоле, ки бояд дар ин росто хеле фаъол бошанд.

Дар ин чанд соли ахир борҳо олимону адибон ва нависандагони Тоҷикистон аз кам будани теъдоди хонанда ва ба фурӯш нарафтани китобҳои худ дар байни мардум гила карда, ҳукуматро ба камкорӣ дар ташвиқу тарғиби китобхонӣ дар ҷомеа муттаҳам кардаанд.

Гуфта мешавад, ин чорабинӣ дар ҳоле баргузор мешавад, ки худи ҳукумат бо баргузории чунин намоишгоҳҳои китоб ноширони дохиливу хориҷиро ба нашри китобҳои ҷадид даъват мекунад, вале аз сӯи дигар, олимону нависандаҳои саршиносро бо иттиҳомоти дурӯғин боздошту зиндонӣ мекунад.

Тамдиди тафтиши парвандаи чеҳраҳои шинохта дар Тоҷикистон

Аз ҷониби
AZDA-TV
-
0

Додситони кулли Тоҷикистон муҳлати тафтиши парвандаи ҷиноии чанд чеҳраи маъруфи сиёсии кишварро барои ду моҳи дигар дароз кард.

Дар ҳоли ҳозир шаш нафар аз ин чеҳраҳои маъруф, ки дар боздоштанд, ба табадулоти давлатӣ муттаҳам мешаванд. Аз ҷумла, вакили собиқи парлумон ва собиқ раиси Ҳизби демократии Тоҷикистон Саидҷаъфар Усмонзода ва муовинаш Аҳмадшоҳ Комилзода, инчунин собиқ раиси Шӯрои Олии Тоҷикистон Акбаршоҳ Искандаров, собиқ вазири корҳои хориҷӣ Ҳамрохон Зарифӣ, ҳуқуқдони шинохта ва муовини раиси ҲСДТ Шокирҷон Ҳакимов ва собиқ консули Тоҷикистон дар шаҳри Кундузи Афғонистон шомили ин парванда ҳастанд.

Радиои Озодӣ дар истинод ба манобеаш менависад, ки парвандаи ин афрод бояд дар моҳи сентябр ба Додгоҳи олӣ фиристода мешуд, аммо он дигарбора баррасӣ ва “тафтишу бандубасти қазия нокофӣ” дониста шуда, ба тафтиши дигарбора фиристода шудааст.

Гуфта мешавад, Саъидҷаъфар Усмонзода, Акбаршоҳ Искандаров, Аҳмадшоҳ Комилзода ва Шокирҷон Ҳакимов ба талош барои ғасби қудрат (моддаи 306-и Кодекси ҷиноятӣ) муттаҳам мешаванд ва илова бар ин алайҳи чанде аз ин чеҳраҳои шинохта бо иттиҳоми барангехтани кинаю адовати милливу мазҳабӣ (моддаи 189-и Кодекси ҷиноӣ) ҳам парванда боз шудаааст. Муовини раси ҲСДТ Шокирҷон Ҳакимов ин иттиҳомотро пурра рад кардааст.

Ҳоло маълум нест, ки нисбати Хамрохон Зарифӣ ва Абдулфайз Атоӣ бо кадом моддаҳо парванда боз кардаанд. Чун парвандаи онҳо махфӣ ва сирри давлатӣ эълон шудааст.

Пештар расонаҳо хабар дода буданд, ки Ҳамрохон Зарифӣ, вазири собиқи корҳои хориҷии Тоҷикистон пас аз як моҳи зиндон ба озодӣ баромадааст, аммо манобеи Azda.tv мегӯянд, ки ӯ аз моҳи июн дар боздошт қарор дорад ва ба озодӣ набаромадааст.

Гуфта мешавад, боздошти ин чеҳраҳои шинохта пас аз боздошти Саидҷаъфар Усмонзода, раиси собиқи ҲДТ ва вакили собиқи парлумон, ки мақомот ӯро рӯзи 12-уми июни соли ҷорӣ бо иттиҳоми “ғасби ҳокимият” дастгир карда буд, оғоз ёфт. Додситони кулли кишвар Юсуф Раҳмон вақте аз парлумон бекор кардани дахлнопазирии вакилии ӯро дархост мекард, гуфта буд, ки парвандаи ҷиноятӣ бо иттиҳоми “ғасби ҳокимият” ба зидди Саидҷаъфар Усмонзода ва “дигарон” кушода шудааст.

Наздикони боздоштшудагон хабар додаанд, ки пайвандонашон дар боздоштгоҳи муваққатӣ (ИВС) нигоҳ дошта мешаванд ва чанд рӯзи пеш аз муоинаи тиббӣ гузаштаанд ва саломатияшон хуб арзёбӣ шудааст. Бо вуҷуди ин, баъзе аз боздоштшудагон то ҳол вакили дифоъ надоранд ва аз рӯзи боздошт то ҳол иҷозати мулоқот бо аъзои оилаашонро нагирифтаанд.

Пирӯзии Тоҷикистон бар Афғонистон

Аз ҷониби
AZDA TV-2
-
0

Дастаи миллии волейболи Тоҷикистон дар бозиҳои қаҳрамонии Осиёи Марказӣ бар тими миллии Афғонистон пирӯз шуд.

Бино ба иттилои расонаҳо, имрӯз, 22-уми октябр дастаи миллии волейболи Тоҷикистон бо ҳисоби 3 бар 2 бар дастаи миллии волейболи Афғонистон ғалаба кард.

Гуфта мешавад, ин бозиҳо бо шумули панҷ кишвари Осиёи Марказӣ бо иловаи Афғонистон дар шаҳри Тошканд, пойтахти Узбекистон як ҳафта қабл оғоз шуда, то ҳол идома доранд.

Ҳуҷум ба як муҳоҷири тоҷик бо корд

Аз ҷониби
AZDA.TV
-
0

Гурӯҳе аз ҷавонони рус ба як муҳоҷири тоҷик дар рӯзи равшан ва дар байни сокинони маҳаллӣ ҳамла карда, 8 кордаш зананд.

Рӯзи сешанбе, 22-юми октябр як манбаъ аз Русия ба Azda TV гуфт, ки ин муҳоҷири тоҷик Қадриддин ном дошта, сокини вилояти Хатлон аст. Ва ҳоло ӯ пас аз ҳамлаи гурӯҳӣ дар бемористон бистарӣ шудааст.

Наворе, ки ба дасти Azda TV расид, дида мешавад, ки як ҷовони тоҷик назди дари як хона меравад ва занги дарро мезанад то пайк (курьер)-ро расонад. Дар ҳамин ҳол 3-4 ҷавони рус ба ӯ ҳамла мекунанд ва ӯро аввал бо гази ашковар ва сипас зоҳиран бо корд мезананд.

“Ин ҳодиса дар микрорайони Горскии шаҳри Новосибирск рӯзи 20-уми октябр рух дод. Ҷавонҳои рус ӯро бар иловаи мушту лагад 8 корд заданд. Хушбахтона ҷавон зинда аст ва ҳоло дар бемористон бистарӣ аст ва вазъи саломатиаш низ беҳтар шудааст.“, афзуд манбаъ.

Сабаби аслии ҳодиса маълум нест, вале манбаъ афзуд, ки чандест дар ин шаҳр ҷавонони рус бо чеҳраҳои пӯшида ба муҳоҷирон ҳамла мекунанд.

Дар ҳамин ҳол бархе расонаҳои русӣ низ навиштаанд, ки Сарраёсати Вазорати корҳои дохилии Русия дар вилояти Новосибирск вобаста ба ҳодистаи рухдода бо иттиҳоми “Ғоратгарӣ бо истифода аз зӯроварӣ” ва “суиқасд ба ҷони шахс аз тарафи гурӯҳи шахсон бо маслиҳати пешакӣ” парванда боз карда, тафтишот оғоз шудааст.

Гуфта мешавад, пулис аллакай муайян карда, ки чаҳор навҷавони маҳаллӣ дар ин ҳодиса даст доранд. Онҳо баъд аз ҳамла ба ҷони ин муҳоҷири тоҷик телефони ӯро низ дуздидаанд.

Имрӯз Марианна Глушкова, котиби матбуотии Раёсати додгоҳии вилояти Новосибирск ба расонаҳо хабар дода, ки 4 муттаҳами парванда боздошт шудаанд, ки се нафарашон хонандагони синфҳои 8-10-и мактабҳои Новосибирск будаанд ва як нафари дигар донишҷӯи 16-солаи яке аз коллеҷҳо будааст.

“Додгоҳи минтақавии вилояти Новосибирск 22-уми октябри соли 2024 бо дархости муфаттиши парванда ба се хонандаи мактаб то 20-уми декабри соли 2024 ҳабси пешакии хонагӣ таъйин кард, аммо нисбат ба донишҷӯи 16-солаи коллеҷ то 20-уми декабри ҳамин сол ба ҳабси пешакии дар зиндон мондан ҳукум содир кард.”, – гуфтааст Марианна Глушкова.

Ёдовар мешавем, ки давоми чанд моҳи ахир ҳамла ба ҷони муҳоҷирони тоҷик дар Русия ба таври чашмрас афзоиш ёфтааст. Ҳамарӯза расонаҳо аз боздошту истирдоди муҳоҷирони тоҷик ва инчунин аз сахттар шудани қавонини будубош дар ин кишвар барои муҳоҷирон хабар медиҳанд.

Афзоиши ҳаҷми содироти Эрон ба Тоҷикистон

Аз ҷониби
AZDA TV-2
-
0

Мақомоти расмии Эрон мегӯянд, ки дар соли ҷорӣ ҳаҷми содироти ин кишвар бар Тоҷикистон ҳудуди 50 дарсад афзоиш ёфтааст.

Тавре расонаҳои эронӣ иттилоъ медиҳанд, Ҳасан Нуризода, муовини ҳамоҳангии иқтисодии устони Хуросони Ризавӣ гуфтааст, ки ҳаҷми содироти Эрон ба Тоҷикистон наздик ба 50% афзоиш ёфтааст.

Ба қавли манбаъ, тибқи оморҳои муқоисавии шаш моҳи аввали соли ҷорӣ нисбат ба соли гузашта, содироти Эрон ба Тоҷикистон аз лиҳози вазн 55% ва аз лиҳози арзиш 45% афзоиш ёфтааст.

Ҳасан Нуризода гуфта, ки дар ин давра ҳаҷми содироти Эрон ба Тоҷикистон 98 миллион долларро ташкил медиҳад ва гардиши умумии савдои ду кишвар ба 200 миллион доллар мерасад.

Гуфта мешавад, Тоҷикистон ва Эрон пас аз як давраи рукуди доду гирифтҳои тиҷоратӣ ва иқтисодӣ инак тайи 5 соли ахир рушди тиҷорат ва содироту воридот байни ду кишвар хеле рушд кардааст.

Аммо ба гуфтаи бархе огоҳон, рушди содироту воридоти молу колоҳои тиҷоратӣ байни Тоҷикистон ва дигар кишварҳо маънои онро надорад, ки сатҳу сифати кор ва муносибати мақомоти тоҷик бо соҳибкорону тоҷирон нисбатан беҳтар шудааст. Пора гирифтани мақомот аз соҳибкорони маҳаллӣ ва ғайра ҳамоно вуҷуд дорад ва сафи порагирҳо низ камтар нашудааст.

Ба ин хотир, дар ҳоли ҳозир хеле аз тоҷирону соҳибкорони ватанӣ ва хориҷӣ аз тарси он ки мабодо моликият ва дороиҳояшонро ба ноҳақ ғасб накунанд, дар кишварҳои ҳамсоя ва минтақа маконҳои амнтареро ҷустуҷӯ доранд, то бахше аз сармоҳои худро аз Тоҷикистон хориҷ карда, ба ҷойҳои дигар интиқол диҳанд.

Рушди иқтисоди Тоҷикистон дар солҳои оянда коҳиш меёбад

Аз ҷониби
AZDA TV-2
-
0

Бонки ҷаҳонӣ бо нашри як гузориш гуфтааст, ки рушди иқтисоди Тоҷикистон дар солҳои 2025 ва 2026 нисбат ба чор соли ахир наздик ба 3,0 дарсад коҳиш меёбад.

Ин бонк ҳамчунин дар гузоришаш мегӯяд, ки тайи 4 соли ахир кишварҳои Тоҷикистон ва Узбекистон нисбат ба дигар кишварҳои минтақа рушди иқтисодии беҳтаре доштаанд.

Дар гузориш таъкид мешавад, ки пас аз буҳронҳо дар кишварҳои рушдёбандаи минтақаи Аврупо ва Осиёи Марказӣ, иқтисодиёт тадриҷан устувор шуда истодааст, аммо суръати рушди иқтисодӣ нисбат ба аввали солҳои 2000-ум хеле пасттар аст.

Бонки ҷаҳонӣ мегӯяд, иқтисоди Тоҷикистон дар соли 2021 9,4 дарсад, соли 2022 8,0 дарсад, соли 2023 8,3 ва дар назар аст, то охири соли 2024 7,2 ва интизор меравад соли 2025 5,5% ва соли 2026 5,0% рушд кунад. Яке аз иллатҳои коҳиши рушди иқтисоди кишвар дар солҳои оянда бозпардохти қарзҳо ва фоизҳои қарзҳои гирифтаи ҳукумат мебошад.

Дар ин гузориш низ таъкид шудааст, ки рушди иқтисоди кишвари Узбекистон дар соли 2021 8,0% дар соли 2022 6,0%, соли 2023 6,3%, ва интизор меравад то охири соли ҷорӣ 6,0%, инчунин пешбинӣ мешавад, ки соли 2025 5,8% ва соли 2026 низ 5,9% рушд дошта бошад.

Тибқи пешгӯиҳо, рушди иқтисодӣ дар ин минтақа имсол то 3,3% коҳиш хоҳад ёфт, дар ҳоле, ки соли гузашта он 3,5% буд. Дар соли 2025 ин нишондиҳанда метавонад то 2,6% коҳиш ёбад. Ин ба таври назаррас аз сатҳи миёнаи солҳои 2000-2009, ки 5,1% буд, камтар аст. Инчунин ин суръат барои кишварҳои дорои сатҳи даромади миёна кофӣ нест, то онҳо дар тӯли ду насли оянда ба мақоми кишварҳои дорои сатҳи даромади баланд бирасанд.

Дар маҷмуъ, гузориш нишон медиҳад, ки сармоягузорӣ ба таҳсилот, аз ҷумла такмили барномаҳои илмҳои табиатшиносӣ, технология, муҳандисӣ ва риёзӣ метавонад омили асосии рушд дар солҳои наздик бошад.

Дар гузоришаш Бонки ҷаҳонӣ таъкид мекунад, ки беҳтар кардани сифати маориф, бахусус дар соҳаи таҳсилоти олӣ, барои эҷоди сармояи инсонӣ ва қуваи кории лозим барои барқарор кардани рушди иқтисодӣ нақши калидӣ мебозад. Бо муваффақ шудан ба ислоҳоти омӯзишӣ, кишварҳои минтақа метавонанд қуваи инсонӣ ва имконоти рушди худро афзоиш диҳанд ва дар рушди устувори иқтисодӣ саҳм гузоранд.

Даргузашти Фатҳулло Гулен

Аз ҷониби
AZDA-TV
-
0

Фатҳулло Гулен, раҳбари ҷараёни “Гуленӣ”, руҳонии шинохта ва чеҳраи сиёсии турк дар умри 83-солагӣ даргузашт.

Бино ба иттилои расонаҳо, вазъи саломатии ӯ чанд вақти ахир вахим буда, рӯзи 20-уми октябри соли ҷорӣ дар яке аз бемористонҳои штати Пенсилванияи Амрико вафот кардааст.

Фатҳулло Гулен, муассиси мактабҳои туркӣ дар чанд кишвар, аз ҷумла Тоҷикистон ба шумор меравад. Ин мактабҳо дар миёни сокинони Тоҷикистон нуфузу обрӯ пайдо карда буданд, аммо мақомоти кишвар пас аз соли 2016 ба бастан ва давлатӣ кардани ин мактабҳо оғоз карданд.

Гуфта мешавад, ӯ соли 1941 дар оилаи рӯҳонӣ дар Эрзуруми Туркия ба дунё омада, дар 24 солагӣ ба унвони эмом дар шаҳри Измири Туркия ба фаъолият шуруъ карда буд.

Дертар дар солҳои 1969-1970 ӯ Ҷунбиши “Хизмат”-ро таъсис дод, ки дар хориҷ ва дохили Туркия пайравони зиёдеро дорад.

Ин созмон дар аввал аз сиёсатҳои Эрдуғон ҳимоят мекард ва Фатҳулло Гулен ба унвони муттаҳидони раисҷумҳури Туркия шинохта мешуд. Аммо дар соли 2013 Эрдуғон муборизаеро алайҳи ин ҷунбиш оғоз кард ва онро “давлат дар дохили давлат” номид ва садҳо мадрасаи вобаста ба ин созмонро баста буд.

Танишҳо миёни ҳукумати Туркия ва Фатҳулло Гулен пас аз кудетои нофарҷоми 15-уми июли соли 2016 дар ин кишвар, ки дар он 400 нафар кушта ва беш аз 2000 нафар захмӣ шуда буданд, ба авҷи худ расид.

Давлати Туркия Гулен ва тарафдорони ӯро ба барномарезии ин кудето муттаҳам намуда, ҳазорон нафар аз пайравони ӯро дастгир ва барои солҳои тӯлонӣ равонаи зиндон карда. Аммо Фатҳулло Гулен иттиҳоми даст доштан дар ин кудеторо рад карда буданд.

Гуфта мешавад, ин руҳонии шинохта аз соли 1999 дар Амрико мезист ва фаъолияти худро дар табъид идома медод.

Рӯйхати “сиёҳ”-и муҳоҷирон дар Русия

Аз ҷониби
AZDA TV-2
-
0

Мақомоти Русия бо нашри чанд феҳрист гуфтаанд, ки дар байни касоне, ки бархе қонуну қоидаҳои ин кишварро роия намекунанд, зиёда аз сад ҳазор тоҷикистонӣ низ вуҷуд дорад.

Бино ба иттилои расмӣ, Вазорати меҳнат, муҳоҷират ва шуғли аҳолии Тоҷикистон бо нашри як “хабари фаврӣ” гуфтааст, ки Вазорати корҳои дохилии Русия “низоми махсуси ихроҷ (депортатсия)-ро ҷорӣ намудааст”.

Ба қавли манбаъ, дар байни касоне, ки Вазорати корҳои дохилии Русия онҳоро “ҳамчун қонунвайронкунанда” дар ҳудуди ин кишвар сабти ном кардааст, “зиёда аз 123 ҳазор шаҳрванди Ҷумҳурии Тоҷикистон” низ ҳузур доранд.

Вазорати меҳнат, муҳоҷират ва шуғли аҳолии Тоҷикистон ба хитоб касоне, ки дар ин рӯйхатҳои “сиёҳ”-и Русия қарор гирифтаанд, ё ихроҷ шудаанд ва ё хатари ихроҷ аз ҳудуди ин кишвар онҳоро таҳдид мекунад, тавсия додааст, ки “нусхаи шиносномаи хориҷии худро бо нишон додани муҳри убури сарҳад бо мақсади аз рӯйхати мазкур баровардан ба мақомоти муҳоҷирати ҷойи зисти худ дар шаҳру ноҳияҳои ҷумҳурӣ пешниҳод  намоянд.”

Инчунин ин вазорат ба касоне, ки “дорои душаҳрвандӣ- Ҷумҳурии Тоҷикистон ва Федератсияи Россия ҳастанд ва ё қонунӣ фаъолияти меҳнати менамоянд ва дар ин рӯйхати “сиёҳ” қарор гирифтаанд, низ тавсия додааст, ки “ҳатман нусхаи шиносномаи худро ба Намояндагии Вазорат дар ФР оид ба муҳоҷират пешниҳод намоед.” 

Дар байни касоне, ки дар ин рӯйхати сиёҳ қарор гирифтаанд, ки сокинони вилояти Хатлон бо 53 ҳазору 703 нафар дар мақоми аввал, сокинони шаҳру ноҳияҳои тобеи марказ бо 31 ҳазору 604 нафар мақоми дувум, сокинони вилояти Суғд бо 26 ҳазору 385 нафар дар ҷои сеюм, сокинони шаҳри Душанбе бо 7 ҳазору 828 нафар зинаи чорум ва сокинони Вилояти Мухтори Кӯҳистони Бадахшон ҳам бо 3 ҳазору 563 нафар дар ҷоии ахир қарор гирифтаанд.

Гуфта мешавад, мақомоти Русия пас аз ворид кардани тағйиру иловаҳо ба қонунҳои федералӣ дар бораи будубоши шаҳрвадони хориҷӣ дар Русия интизор меравад, ки иҷрои ин қонунҳо аз 5-уми феврали соли 2025 эътибори қонунӣ пайдо кунанд. 

Боздошти як муҳоҷири тоҷик барои пайкрасонӣ дар Маскав

Аз ҷониби
AZDA.TV
-
0

Пулиси Маскав як муҳоҷири тоҷикро барои он ки дар минтақаи Рублевкаи Маскав ба пайкрасонӣ (курьер) машғул буд, боздошт кард.

Хабаргузории “Настоящее время“, ки рӯзи 21-уми октябр ин гурзоришро нашр кардааст, аз ин муҳоҷири тоҷик Ҳошимҷон ном мебарад ва мегӯяд, ду ҳафта мешавад ӯ дар боздоштгоҳ аст ва хатари истирдод ӯро таҳдид мекунад.

Ба нақли манбаъ, 8-уми октябри соли ҷорӣ пулиси роҳ Ҳошимҷонро боздошт карда, ҳуҷҷат мепурсад, вақте мефаҳмад, ки ин муҳоҷири тоҷик ба Рублевка пайк (курьер) мебарад, гуфтааст, ки муҳоҷирон ҳақ надоранд дар минтақаи мазкур кор кунанд. Ин муҳоҷир мегӯяд, дар онҷо кор намекунад, танҳо пайк мебарад ва вазифаашро анҷом медиҳад. Аммо пулис ӯро ҳамчун қонуншикан сабти ном карда, ба боздоштгоҳ мебарад.

Гуфта мешавад, Ҳошимҷон дар ширкати “Яндекс” ҳамчун пайкрасон кор мекард, аммо пас аз боздошташ ин ширкат барои раҳоии ӯ коре накардааст. Ҳошимҷон ҳоло дар боздоштгоҳ ва мунтазири истирдодаш ба Тоҷикистон аст.

Гуфта мешавад, Рублевка як минтақаест наздик ба Маскав, ки онҷо аксаран сарватмандон ва коргарони баландмақоми ҳукумати Русия онҷо зиндагӣ мекунанд, аммо минтақаи мамнуъа нест.

Чандест пулиси Русия бо андактарин баҳонаҳо муҳоҷирон, бахусус шаҳрвандони Тоҷикистонро боздошт ва ба Ватан истирдод мекунад. Ин вазъият дақиқан баъд аз ҳамлаи маргбори ” Крокус Сити Ҳолл”, ки муҳоҷимони асосии он шаҳрвандони Тоҷикистон гуфта мешаванд, шадидтар шудааст.

1...575859...675саҳифаи 58 аз 675

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
26.1 ° C
26.1 °
26.1 °
31 %
1kmh
0 %
Sat
38 °
Sun
38 °
Mon
38 °
Tue
39 °
Wed
39 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст