Бо пас фаро хонадани ҳайатҳои Исроил ва Амрико аз Қатар бархе коршиносон мегӯянд, ки музокироти фаластиниҳо бо исроилиҳо бо шикаст мувоҷиҳ шудааст.
24-уми июли соли 2025 Стив Витков, фиристодаи махсуси ИМА ба Ховари Миёна аз Итолия эълом кард, ки тими музокиракунандаи Амрикоро аз Қатар барои машварат фарохондааст. Ба дунболи он, Исроил ҳам эълом кард, ки ҳайати музокиракунандаи худро аз Давҳаи Қатар барои машварат кардан ба Телавив даъват мекунад.
Ин иқдоми ИМА ва Исроил намояндаҳои кишварҳои Мисру Қатарро, ки мизбони музокироти ғайри мустақими Исроил ва Ғазза дар Давҳа мебошанд, сахт нороҳат кардааст. Зеро пеш аз ин як намояндаи Стив Витков ва ҳатто Доналд Тромп аз посухи ахири Ҳамос истиқбол карда буданд.
Ҳамос ҳам эълон кард, ки вақте посухи ахири худро ба миёнравҳо аз Мисру Қатар дар Давҳа тақдим кард, онро ба хубӣ қабул карданд ва ҳама бовар доштанд, ки ин дафъа музокироти оташбас дар зудтарин фурсат анҷом хоҳад меёбад.
Аммо, Стив Витков бидуни он, ки нисбат ба Исроил чизе бигӯяд, ин дафъа ҳам Ҳамос ва дигар гурӯҳҳои фаластиниро ба “надоштани ҳусни ният” дар бораи оташбас муттаҳам карда, гуфт, ки ИМА ба хотири боз гардондани гаравгонҳо роҳҳои дигареро ҷустуҷӯ мекунад.
Имрӯз, Бенямин Натаняҳу, нахуствазири Исроил ҳам бо тасдиқи изҳороти Стив Витков иборз дошт, ки Телавив ҳамроҳ бо Вашингтон “имконоти иловагӣ”-ро барои баргардонидани гаравгонҳо аз Ғазза ба кишварашон баррасӣ мекунанд.
Аммо бархе коршиносон мегӯянд, ки эҳтимол дорад, Исроил ва Амрико бо пас фарохондани тимҳои музокиракунандаи худ аз Қатар қасд доранд, ки бо ин тариқ Ҳамос ва дигар гуруҳҳои фаластиниро маҷбур намоянд, то аз хостаҳои худ, ки хурӯҷи тамоми нерӯиҳои исроилӣ аз Навори Ғазза ва ба дунболи он қатъи комил ҷанг аст, на оташбаси муваққат мебошад, даст бардоранд.
Аз сӯи дигар, бархе коршиносони исроилӣ ҳам таъкид мекунанд, бар асоси парвандаҳои фасоди молие, ки Бенямин Натаняҳу дар додгоҳҳои Исроил дорад, аз қудрат барканор ва зиндонӣ хоҳад шуд. Ба ҳамин хотир, Нахуствазири Исроил мехоҳад аз рухсатии тобистонаи вакилони исроилӣ дар парлумони он кишвар истифода карда, барои ҳифзи ҷойгоҳ ва курсии худ ҷангро дар Ғазза идома бидиҳад.
Гуфтанист, пеш аз ин Абуубайда, сухангӯи Қассом, шохаи низомии Ҳамос хитоб ба ҷиноҳҳои сиёсии фаластиниҳо эълон карда буд, ки ҳар чӣ зудтар қазияи гаравгонҳоро тамом кунед, ва мардумро аз гуруснагӣ наҷот диҳед, вагарна низомтён сафҳаи гаравгонҳоро баста, дар ин шароит дигар ба он барнамегарданд.
Созмонҳои кумакрасон ва ҳомии ҳуқуқи башар хостори таъсиси фаврии як каридори гуманитарӣ шудаанд, то кӯмакҳои башардӯстона ба таври амн ва босуръат ба мардуми Ғазза расонида шаванд. Онҳо таъкид карданд, ки ҷилавгирӣ аз вуруди кӯмак ҳамчун як шакли ҷангӣ алайҳи шаҳрвандоним мулкӣ метавонад ҳамчун ҷинояти ҷангӣ арзёбӣ шавад.
Ҳамзамон беш аз 30 кишвари дигар, аз ҷумла Бритонияи Кабир, Ҷопон ва Фаронса ва ғайра низ бо нашри як изҳороти расмӣ аз мақомоти исроилӣ хостаанд, ки роҳи вуруди кумакҳои инсонӣ, аз ҷумла маводи хӯрока ва дорувориро бидуни қайду шарт ба Навори Ғазза боз кунад, аммо Тел-авив ба ин ҳама дархостҳо то ҳол посухи мусбат надодааст.
Кишварҳои Мисру Исроил муҳосираи Навори Ғаззаро соли 2007 оғоз карда, то имрӯз онро идома медиҳанд. Дар муддати ин 18 соли ахир ҳама намуди рафту омад ва содироту воридоти молу колоҳои мухталиф ба Навори Ғаззаро ин ду кишвар зери назорати шадиди худ қарор додаанд.
Исроил як рӯз баъд аз ҳамалоти нерӯҳои фаластинӣ ба мақарраҳои низомии артиши Исроил ва атрофи Ғазза, 8-уми октябри соли 2023 ҳамлаҳои навбатии худ алайҳи Навори Ғаззаро оғоз карда, ки то ҳол идома дорад. Дар натиҷа, тай ин ин муддат наздик ба 60 ҳазор нафар аз фаластиниён, ки теъдоди аксари онҳоро занону кӯдакон ташкил медиҳанд, кушта шуда, зиёда аз 150 ҳазор каси дигар захмӣ шудаанд. Мақомоти фаластинӣ дар Навори Ғазза теъдоди касоне, ки зери оворҳо мондаанд ва ё нафароне, ки бар асари бомбборонҳои шадид беномунишон гаштаандро ба даҳҳо ҳазор нафар баробар арзёбӣ мекунанд.
