Бино ба иттилои Маркази матбуоти Агентии назорати давлатии молиявӣ ва мубориза бо коррупсияи Тоҷикистон Ҳафизова Фотима Маҳмадиевна сардори Кооперативии тиҷоратии «Акбархуҷа»-и ноҳияи А.Ҷомии вилояти Хатлон бо иттиҳоми қаллобӣ боздошт шуда, нисбаташ парвандаи ҷиноятӣ оғоз шудааст.

Агентии зидди фасод менависад, ки Ҳафизова моҳи июни соли 2020 бо роҳи фиреб ва суистифодаи боварӣ аз шаҳрванд Қарақулова К.Б. барои аз ҳисоби заминҳои хоҷагии деҳқонии “Акобир”-и ноҳияи А.Ҷомӣ ҷудо карда додани 0,10 га. қитъаи замин, маблағи 4500 сомонӣ талаб карда гирифта, тасарруф намудааст.

Агентӣ ба ҳамин асос нисбати Ҳафизова Ф.М. бо моддаҳои 247 қисми 2 бандҳои «в,г» ва 338 иловаи 1 Кодекси ҷиноятии Ҷумҳурии Тоҷикистон парвандаи ҷиноятӣ оғоз намуда, он баъди анҷоми тафтиши пешакӣ ба суд фиристода шудааст.

Боздошти кормандони вазорату идораҳои давлатӣ бо иттиҳоми қаллобӣ бори аввал нест. Тақрибан ҳар моҳу ҳар ҳафта хабарҳо нашр мешавад, ки мақомдоре бо ҷурми ғайриқонунӣ фурӯхтани замин боздошт шудааст. Вале бо вуҷуди боздоштҳои зиёд боз ҳам дида мешавад, ки кормандони ниҳоду идораи давалатӣ даст ба заминфурӯшии ғайриқонунӣ мезананд.

Сомонаи “Бомдод” аз боздошти Домулло Абдулҳақ, сархатиби масҷиди марказии ноҳияи Шоҳмансури шаҳри Душанбе хабар дод. Гуфта мешавад, сархатиб шоми 19 апрел аз ҷониби кормандони шуъбаи Кумитаи давлатии амнияти миллӣ дар ноҳияи Фирдавсии пойтахт боздошт шудааст.

Шарҳи расмӣ то ҳол дар ин бора вуҷуд надорад, аммо “Бомдод” аз қавли манбеаш дар мақомоти амниятӣ сабаби боздошти домуллоро ба мавъизаи маросими дафни Домулло Ҳикматуллоҳи Тоҷикободӣ рабт додаанд. Домулло Абдулақ дар он маъиза Домулло Ҳикмаутуллоро аз пешвоҳои “бузурги мо” гуфтааст.  

“Имрӯз мову шумо мебинем, ки яке аз пешвоҳои бузурги мо, яке аз олимҳое, ки васфи ӯро бузургон худашон медонанд, ҳам олими раббонӣ, ҳам муршид, ҳам ҳофизи Каломуллоҳ, дорои тамоми сифатҳои хуб, имрӯз аз миёни мо рафт. Вақте ки чунин инсонҳо дар миёни мардум боқӣ намонд, Худованд олимеро боқӣ нагузошт, мардум дигар пешвоёни ҷоҳил ва нодонро барои худ пешво мегиранд”.

Ҳамсуҳбатони “Бомдод” гуфтаанд, ки мақомоти амниятӣ дар ин муқоиса гӯё ишораҳо ба президенти кунунии Тоҷикистон Эмомалӣ Раҳмонро дидаанд, ки соли 2016 бо қабули як қонуни вижа “Пешвои миллат” эълон шуд.

Аммо яке аз афроди наздик ба Домулло Абдулҳақ гуфта аст, мавъизаи ӯ дар маросими дафни Домулло Ҳикматуллоҳ ягон паёми сиёсӣ надошт ва манзураш аз  “пешвоҳои ҷоҳилу нодон” танҳо он ходимони дине буда, ки аз Домулло Ҳикматуллоҳ дар илму дониш камтаранд, вале бо вуҷуди камилмӣ боз фатво содир мекунанд.

Ба гуфати баъзе манобеъ ба “Аздо ТВ”, инчуин маъмурони амниятӣ чанд хатиби дигарро низ пас аз маросими дафни Домулло Ҳикматуллоҳ боздошт кардаанд, аммо ҳоло аз ҷои дигар ин хабар тасдиқи худро наёфта аст. Дар ҳоли дастрасии маълумоти дақиқ мо онро нашр хоҳем кард.

Мақомоти шаҳри Душанбе эълом дошта, ки соҳибкорони ватанӣ ва хориҷӣ метавонанд “Боғи ҳайвонот”-ро ҳамчун моликияти хусусӣ бунёд кунанд. Албатта, он бо пешниҳоди лоиҳаи дахлдор ва ё дар асоси лоиҳаи таҳиягардида бояд сурат бигирад.

Ба иттилои хабаргузории ҳукуматии “Ховар” ин иқдом аз ҷониби мақомоти шаҳри Душанбе дастгирӣ меёбад.

Гуфта мешавад, барои бунёди “Боғи ҳайвонот” дар асоси Қарори Раиси шаҳри Душанбе Рустами Эмомалӣ аз 14 декабри соли 2020 дар буриши хиёбонҳои Рӯдакӣ ва Ҳофизи Шерозии ноҳияи Исмоили Сомонии шаҳри Душанбе 13 гектар қитъаи замин ҷудо карда шудааст.

Сарраёсати меъморӣ ва шаҳрсозии пойтахт лоиҳаи боғи мазкурро аз рӯи технологияи муосир ва бо назардошти фикру мулоҳизаҳои мутахассисони аврупоӣ таҳия намудааст.

Дар хабар қайд шуда, ки мавзеи ҷудогардида барои ташкили ҳама гуна имконияти нигоҳдорӣ, аз ҷумла ҷойгиронии ҳайвонот, парандаҳо ва хазандаҳо мувофиқ буда, инчунин фароҳам овардани шароити озоди гашту гузори ҷонварон, ки талаботи замони муосир мебошад,  ба назар гирифта шудааст.

Мақомти марбута шумораҳои телефони худро низ нашр карда (221-94-38, 221-27-19) аз хоҳишмандон хоста, ки барои огоҳӣ ёфтан аз маълумоти муфассал метавонанд бо ин шумораҳо тамос бигиранд.

“Боғи ҳайвонот”-и шаҳри Душанбе аз замони Шуравӣ боқӣ монда он соли 1960 бунёд гардида, то ҳол чандон таъмиру бозсозии хуберо надидааст. Ба гуфтаи сокинон шароити нигаҳдории ҳайвонот дар боғи мазкур номусоид буда, ба талаботи муосир ҷавобгӯ нест. То солигузашта дар ин боғ тақрибан ҳазор сар ҳайвонот нигоҳдорӣ мешуд.

Кумитаи ҳолатҳои фавқулодда ва мудофиаи граждании назди ҳукумати Тоҷикистон бо такя ба маълумоти Агентии обуҳавошиносии кишвар дар бораи бад шудани обу ҳаво хабар медиҳад.

Тибқи маълумоти Агентии обуҳавошиносии кишвар, 21-22 апрели соли 2021 дар ҷумҳурӣ ҳавои номусоид дар шакли борон пешбинӣ шудааст (шабона дар баландии зиёда аз 2500 метр шояд барф борад), дар баъзе ноҳияҳо дар ҷойҳо раъду барқ ​​ва жола пешгӯӣ карда мешавад.

Болоравии сатҳи об дар дарёҳои Қизилсу, Яхсу, Вахш (Сурхоб) ва Обихингоб пешбинӣ шудааст. Аз сабаби боришот ва баланд шудани сатҳи об дар дарёҳо то 22 апрел эҳтимоли фаромадани сел дар баъзе ноҳияҳои кӯҳӣ ва наздикӯҳии тобеи ҷумҳурӣ аз ҷумла вилоятҳои Суғд ва Хатлон ва ноҳияҳои ғарбии ВМКБ вуҷуд дорад.

Дар робита ба ин , Кумитаи ҳолатҳои фавқулодда ва мудофиаи граждании Тоҷикистон ба шаҳрвандоне, ки дар манотиқи доманакӯҳ ва кӯҳистон зиндагӣ мекунанд муроҷиат намуда, тавсия медиҳад, ки ҳарчи бештар эҳтиёткор бошанд.

Бо мақсади пешгирии рух додани тасодуфҳои марбут ба офатҳои табиӣ ва оқибатҳои онҳо, Кумита тавсия медиҳад, ки шаҳрвандон қоидаҳои бехатарии шахсиро риоя намуда, аз сайругашт дар кӯҳҳо, чаронидани чорво ва ҷамъоварии ҳосил дар минтақаҳои кӯҳӣ худдорӣ кунанд.

Инчунин Кумита тавсия медиҳад, ки дар ин рӯзҳо кудаконро  беназорат нагузоред ва ба шаҳрвандон мегӯяд,ки ба назди обанборҳо нараванд, моҳидорӣ накунанд. Ҳангоми ҳаракат дар роҳҳои кӯҳӣ тавассути нақлиёти автомобилӣ масофа ва суръатро риоя кунед.

Бо мақсади пешгирии аз зери об мондани хонаҳо, Кумитаи ҳолатҳои фавқулодда инчунин ба аҳолӣ тавсия медиҳад, ки тамоми ҷӯйборҳо ва ҷойҳои ҷамъшавии обро дар назди хонаҳояшон тоза кунанд.

Вақти ба вуҷуд омадани ҳолати фавқуллода, ҳар як шаҳрванд метавонад ба рақамҳои 112, 93 880 28 19 ё 223-13-11 занг зада муроҷиат намояд, хабар медиҳад Кумитаи ҳолатҳои фавқулода.