Вазорати корҳои дохилии Тоҷикистон (ВКД) гумонбарон дар ҳодисаи куштори пурсарусадои ноҳияи Ҷайҳунро боздошт кард.

18-уми август ВКД хабар дод, ки мақомоти ҳифзи ҳуқуқи ноҳияи Ҷайҳун пас аз ду моҳ тавонистанд қотилони сокини ноҳияи Ҷайҳун, Аҳлиддин Аҳмадов ва се фарзанди ноболиғи ӯро пайдо ва дастгир кунанд.

Гуфта мешавад, ки ягона шоҳиди бевоситаи ин ҷинояти мудҳиш ҳамсари марҳум Аҳлиддин Аҳмадов, Латофат Азизова буд, ки ӯ баъд аз ҳодиса дар бемористон бо захмҳои вазнин бистарӣ буд. Мақомот баъд аз беҳтар шудани вазъи саломатии Латофат Азизова тавонист сарнахи ҷиноятро пайдо кунад.

Ба иттилои дафтари матбуоти ВКД, бо нишондоди Латофат Азизова, гумонбарони ҳодиса Қиёмиддин Насриддинов соли таваллудаш 1984 сокини деҳаи Суғдиёни ноҳияи Ҷайҳун ва Маҳмадғаюр Ҳайбуллоҳев соли таваллудаш 1988 сокини деҳаи Орзуи ноҳияи мазкур будаанд, ки онҳо бо маслиҳати пешакӣ даст ба ин ҷинояти мудҳиш заданд.

Гумонбар Қиёмиддин Насриддинов дар навори ВКД нақл мекунад, ки дӯсташ Ҳайбуллоев Маҳмадғаюр Ҳайбуллоев сокини деҳаи Орзу ба ӯ гуфтааст, ки Маҳмадов Аҳлиддин бо ҳамсари ӯ робитаи маҳрамона дорад, инро шунида аз ҳисоби рашк  шаби 11 ба 12 июн ҳамроҳи Маҳмадғаюр ба хонаи Аҳлиддин рафта ӯ ва фарзандонашро ба қатл расонданд.

“Рӯзи ҳодиса оилаам хонаи хушдоманам рафт, шом ман ҳам хонаи хушдоманам рафтам. Дар ҳамон ҷо бо оилаам ҷанҷол шуд. Баъд рафта Аҳлиддинро фарёд кардем, ҷанҷол кардем. Аҳлиддин оилаашро кашид бурд, оилаи ман хонаам рафт, ман хонаи хушдоманам омадам. Соати 2 шаб хестам лабосҳоямро пушидам, ҳамроҳи Ҳайбуллоев Маҳмадғаюр ду табарро гирифта, хонаи Аҳлидлдин рафта, якум Аҳлиддина бо занашу як бачааш задем, аз онҷо баромада, дар хонаи дуюм бачаҳои дигарашро задем. Соляркаро чошида, хонаҳоро оташ задем”, – мегӯяд гумонбар Қиёмиддин Насриддинов.

ВКД мегӯяд, ки гумонбарон пештар дастгир шуда буданд, аммо 12 август Радиои Озодӣ хабар дод, ки наздикони Қиёмиддин Насриддинов ва Маҳмадғаюр Ҳайбуллоев, ки ҳамчун гумонбарони ин ҳодиса дастгир шуда буданд, гуфтанд, ки мақомот наздикони онҳоро шиканҷа карда, маҷбур сохтаанд, ки ҷиноятро ба гардан гиранд. Аммо мақомот шиканҷа шудани гумонбаронро бидуни додани тафсилоте рад кард.

Ёдовар мешавем, ки 12 июни соли ҷорӣ дар деҳаи Тарғоки ноҳияи Ҷайҳун (собиқ Қумсангир) чор узви як оила кушта шуданд, ки се нафари онҳо кӯдакони ноболиғи буданд.

Баъд аз ҳамлаи афроди номаълум, сарвари оила Аҳлиддин Маҳмадов бо 3 фарзандаш кушта шуда, ҳамсар ва як писараи 11-солааш бо ҷароҳатҳои вазнини ҷисмонӣ ба бемористон мунтақил шуданд.

Гуфта мешуд, ки ҳамаи қурбониён аз қисмати сар бо табар ё ашёи монанд ба он зарба хӯрдаанд.

Президенти Тоҷикистон шуморе аз аҳли зиё, фарҳангиён ва кормандони давлатиро мукофоти давлатӣ дод. Дар байни онҳо хеле аз чеҳраҳои пуркор ва заҳматкаши миллат дида намешавад.

18-уми август дар Қасри миллат Эмомалӣ Раҳмон ба муносибати истиқболи ҷашни 30-солагии Истиқлолияти давлатии Тоҷикистон ба 120 нафар аз аҳли зиё ва кормандони давлатӣ мукофот ва унвону ҷоизаҳои давлатӣ супорид.

Тибқи иттилои Хадамоти матбуоти Президент дар ин маросими мукофотбахшӣ 34 нафар бо унвони фахрии Корманди шоистаи Тоҷикистон, 2 нафар бо унвони фахрии Нависандаи халқии Тоҷикистон, 5 нафар бо унвони фахрии Ҳунарпешаи халқии Тоҷикистон, 1 нафар бо унвони фахрии Ҳофизи халқии Тоҷикистон, 5 нафар унвони фахрии Ҳунарпешаи шоистаи Тоҷикистон, 1 нафар бо ордени Дӯстӣ, 2 нафар бо ордени Шараф дараҷаи I, 13 нафар бо ордени Шараф дараҷаи II, 29 нафар бо медали Хизмати шоиста, 4 нафар бо медали ҷашнии “30-солагии Истиқлолияти давлатии Ҷумҳурии Тоҷикистон” ва 2 нафар бо Ифтихорномаи Ҷумҳурии Тоҷикистон мукофотонида шуданд.

Аммо дар байни онҳое, ки ба мукофотҳои давлатӣ қадрдонӣ шуданд, шахсияти фарҳангӣ ва драматурги маъруфи кишвар ба мисли Барзу Абдураззоқов, Абдуқодири Рустам, ва инчунин донишмандон ва ҳуқуқшиносоне ба монанди Шокирҷон Ҳакимов дида намешаванд.