Писари Муҳаммадзариф Саидов, Муҳаммадҷон Саидов, дар як муроҷиати видеоӣ гуфтааст, ки маҳз бо талошҳои падараш ӯро аз мактаби душвортарбия, ки тақрибан як сол боз онҷо буд, барои як рӯз ба хонаашон ҷавоб додаанд.

Ӯ дар муроҷиати худ аз амалкарди падараш изҳори миннатдорӣ намуда, хоҳиш кардааст, ки ӯро аз он мактаби душвортарибия раҳо намуда ба мактабҳои оддӣ гузаронанд то ҳамроҳи ҳамсинфонаш таҳсилашро идома диҳад.

“Падар, ман намехоҳам, ки дигар дар он мактаби душвортарбия бихонам, ман мехоҳам ҳамроҳи ҳамсинфонам дар мактабҳои худамон бихонам”, мегӯяд Муҳаммадҷон

Ёдовар мешавем, ик чанде пеш Муҳаммадзариф Саидов, узви фаъоли ҲНИТ бо муроҷиати видеоие дар шабакаи фейсбук хабар дода буд, ки мақомоти амниятии Тоҷикистон фарзанди 14-солаи ӯ, Муҳаммадҷон Саидовро ба хотири фаъолиятҳои сиёсии худи Муҳаммадзариф як сол мешавад гаравгон гирифтаанд.

Дар нусхаи хаттии муроҷиати ин фаъоли сиёсӣ, ки ба дасти “Аздо тв” расида буд, гуфта мешуд, фарзанди 14-солаи ӯро маҳз мақомоти қудратии Тоҷикистон, бевосита бо дастури раиси КДАМ ва вазири КДТ барои фишор овардан болои Муҳаммадзариф дастгир намуда, дар як мактаби душвортарбия, ки асосан кӯдакони бероҳаву аз ҷиҳати руҳиву равонӣ носолим ба таҳсил фаро гирифта мешаванд, маҷбуран нигаҳдорӣ мекунанд. Ва намегузоранд, ки аз онҷо ба ҷои дигаре биравад.

Ба гуфтаи ин фаъоли сиёсӣ, ин ҳама фишорҳо ба хотири хомӯш кардани ӯ роҳандозӣ шудааст. Ӯ дар он муроҷиаташ аз тамоми созмонҳои ҳуқуқи башар, аз ҷумла созмонҳои ҳуқуқи кӯдак хоста буд, ки ба қазияи ӯ дахолат кунанд то мақомоти Тоҷикистон фарзанди ӯро раҳо кунанд, зеро кӯдак аз ҷиҳати ҷисмию равонӣ нуқсе надорад, ки дар чунин мактабҳо ба таҳсил фаро гирифта шавад.

Баъд аз баста гардидани ҲНИТ дар кишвар ва зиндонӣ шудани шуморе аз аъзоёни он, як қисме аз онҳо бар асари таъқибу озори мақомот ба давлатҳои аврупоӣ паноҳ бурданд. Аз он ҷо дар шабакаҳои иҷтимоӣ фаъол шуданд, ки ин боис шуд мақомоти амниятии кишвар барои хомӯш кунондани онҳо фишорро болои хонаводаҳояшон бештар кунад. Ва чанд ҳафтаи ахир хабарҳо дар бораи дастгиршудану мавриди бозҷӯӣ қарор гирифтани собиқ аъзоёни ин ҳизб зиёд нашр мешавад.

Муборизаи cокини шаҳри Хуҷанди вилояти Суғд, Холматова Маърифатхон барои дарёфти ҳақи худ бо мақомот идома дорад. Ӯ то ҳол ба тамоми мақомот дар шаҳри Хӯҷанд мактуб карда хостори расидагӣ ба қазияааш шуда аст. Аммо ҳамаи ин дархостҳо бенатиҷа будаанд.

Ӯ ба умеди он ки ниҳоди аз ҳама олии кишвар, Дастгоҳи раисҷумуҳури Тоҷикистон ба додаш мерасад, чанд бор ба унвони раиси он, Озода Раҳмон нома нома навишт, аммо багуфтаи худи ин сокини Хуҷанд, Озода Раҳмон ҳам ба қазияи ӯ расидагӣ накард.

Холматова Маърифатхон мегӯяд қасд дорад ба созмонҳои байнамиллаӣ муроҷиат кунад, чун дар дохили кишвар ҷуё шудани адолатро бефоида медонад.

Ба гуфтаи ин сокин, ҷавоби мақомот ҳамеша якҷониба буда, қазияро аз решааш намеомӯзанд. Аммо бо навиштани бештар аз 22 мактуб ба ниҳодҳои гуногун дар кишвар касе ба додаш нарисад ва ӯ мехоҳад, ки танҳо ҳақи худро чунон ки додгоҳ муқарар карда, ба даст биёрад.

Холматова аз молики “Бозори Сино”-и шаҳри Хуҷанд, шаҳрванд Юлдошев Азим шикоят мекунад. Ба қавли ин соҳибкорзан, молу мулки ӯ ва дигар тоҷирони “Бозори Сино”  чанд соли пеш бар асари сӯхтор несту нобуд шуд. Мақомоти дахлдор пас аз тафтишот муайян намуданд, ки сабаби сӯхтор хунукназарии худи молики бозор Юлдошев Азим будааст ва додгоҳ моликро муваззаф намуд, ки зарарро бояд ба тоҷирони бозор пардохт кунад.

Ин сокини Хуҷанд мегӯяд, бо вуҷуди он ки ҷиноятҳои Юлдошов А. тасдиқ шуда буд ва мебоист зарари тоҷиронро пардохт кунад, аммо пас аз чанде аз ҷониби муфаттишон ва прокуророн дидаву дониста ӯ бегуноҳ бароварда шуд ва баракс, ду ҷавонеро, ки аслан ба ин амали ҷиноятӣ ҳеч рабте надоштаанд, бо туҳмат онҳоро дар ин кор гунаҳкор дониста, зиндонӣ карданд.

Ба иддаои шаҳрванд Холматова барои он ки Юлдошевро бегуноҳ бароранд ва аз ҷавобгарии ҷиноятӣ озодаш бикунанд, бо маслиҳати пешакӣ прокурору муфаттишон қарор бароварданд, ки Юлдошев Азим молики “Маркази савдои Сино” набуда, ӯ наметавонад зарарҳоро барқарор кунад. Ӯ навиштаст:

“Прокурори шаҳри Хуҷанд Воҳидов Ҳ. С ба (араизаи шикоятии) ман санаи 26.10.2018 с таҳти рақами №12/323а-18 ҷавоб додааст, ки Юлдошов А. роҳбар набуда, балки иҷорагар аст. магар иҷорагир фармон мебарорад ё дар вилояти Суғд ин корҳо шуданаш мумкин?”

Ин дар ҳолест, ки Шӯъбаи тафтишотии РВКД вилояти Суғд дар парвандаи ҷиноятии №51900 дар ҷилди 11 пас аз санҷиши шиносномаи Юлдошев Азим соҳибмулк ва раиси “Маркази савдои Сино” буданашро тасдиқ намуда буд, – мегӯяд Холматова.

Ногуфта намонад, ки то ҳол дар дасти “Аздо тв” оиди ин қазия хабари як тараф расидааст. Дар сурати расидани хабари тарафи муқобил, онро низ нашр хоҳем кард.