Ҷустуҷӯ кунед
Ҷустуҷӯ
26.9 C
Dushanbe
Хона блог саҳифа 175

Кам шудани фурӯши барқ ба хориҷ

Аз ҷониби
AZDA-TV
-
0

Мақомоти тоҷик иддао доранд, ки фурӯши барқ ба кишварҳои ҳамсояро кам кардаанд, аммо сокинони кишвар аз бебарқӣ шикоят доранд.

Имрӯз, 10-уми августи соли ҷорӣ дар нишасти матбуотии ширкати “Барқи тоҷик”, ки дар шаҳри Душанбе баргузор гардид, дар бораи коҳиши фурӯши нерӯи барқ ба кишварҳои ҳамсоя хабар доданд. 

Ба иддаои муовини раиси ширкати “Барқи тоҷик” Абдулло Қурбонзода, ҳаҷми содироти нерӯи барқ ба кишварҳои ҳамсоя ​​дар нимсолаи аввали соли 2023 нисбат ба ҳамин давраи соли 2022 85,3 миллион кВт/соат кам шуда, 971,2 миллион кВт/соатро ташкил додааст.

Ба гуфтаи ӯ, харидорони аслии нерӯи барқи Тоҷикистон Афғонистон ва Узбакистон буда, соли 2023 ба Афғонистон 682 миллион кВт/соат ва ба Узбекистон 289 миллион кВт/соат нерӯи барқ ​​фурӯхта шудааст.

Намояндагони ширкат мегӯянд, ки Тоҷикистон дар фасли тобистон ба Афғонистон дар як шабонарӯз 9-9,5 миллион кВт/соат ва ба Узбекистон 6-6,5 миллион кВт/соат нерӯи барқ ​​интиқол медиҳад, дар фасли зимистон ин рақам то 30-40 МВт/соат коҳиш меёбад.

Ҳамин тариқ, Тоҷикистон ҳатто дар ҳоле ки худаш ба камбуди нерӯи барқ ​​дучор мешавад, содироти нерӯи барқро ба кишварҳои ҳамсоя ба хотири аз даст надодани бозор ва бекор наистодани таҷҳизоти энергетикӣ, қатъ намекунад. 

Инчунин муовини раиси ширкати “Барқи тоҷик” Қурбонзода гуфт, ки  ширкати афғонистонии “Da Afghanistan Breshna Sherkat” 28 миллион қарзашро пардохт кардааст. Аммо мақомдори тоҷик аз ҷузъиёти чӣ гуна ҳал шудани мушкили қарз, чизе нагуфт.

Мақомот лимити барқро дар кишвар ба боду ҳаво рабт доданд

Аз ҷониби
AZDA-TV
-
0

Ширкати “Барқи тоҷик” иллати ҷорӣ шудани “лимит” ё маҳдудият дар реҷаи интиқоли нерӯи барқ ба сокинонро дар фасли тирамоҳ ва зимистинон, ба боду ҳаво рабт дод. 

Имрӯз, 10-уми августи соли ҷорӣ нишасти хабарии ширкати “Барқи тоҷик” баргузор гардид. Дар ин нишаст намояндаи ин ширкат Тоҳиров Дустмурод ба рӯзноманигорон гуфт, ки лимити барқ дар фасли тирамоҳу зимистин бевоста ба обу ҳаво ва резиши об дар маҷрои дарёи Вахш рабт дорад. 

Ба гуфтаи Тоҳиров “агар дар маҷрои дарёи Вахш резиши об аз ҳадди миёна бисёртар гардад ва об ба обанбори Норак бештар ворид гардад, нотавозунӣ дар истеҳсолу истифодаи нерӯи барқ камтар мегардад”.

Аммо сокинони баъзе аз минтақаҳои кишвар мегӯянд, ки агар ҷорӣ шудани лимит ба камобӣ рабт дошта бошад, пас чаро дар фасли баҳору тобистон ҳам, рӯзона барои чанд соат дар хонаҳояшон барқ надоранд. 

Мақомдорон ҷорӣ шудани лимитро дар фасли гармо бештар ба хотири таъмир ва ё “корҳои профилактикӣ” рабт медиҳанд, аммо сокинон бар ин боваранд, ки ин маҳдудиятҳо ба хотири зиёд кардани фурӯши барқ ба хориҷи кишвар сурат мегирад.  

Камбуди барқ дар Тоҷикистон яке аз мушкилотест, ки аз замони ба сари қудрат омадани Эмомалӣ Раҳмон, давоми 30 сол то ҳол ҳалли худро пайдо накардааст. Аммо фурӯши он ба хориҷи кишвар бемушкилие идома дорад.

Ҷубронпулии Эмомалӣ Раҳмон ба ҷои “Фароз” дар Кӯлоб

Аз ҷониби
AZDA TV-2
-
0

Вазорати тандурустии Тоҷикистон мегӯяд, яке аз захмиҳои фоҷеаи Кӯлоб, ки дар ҳолати вазнин қарор дошт, вафот кардааст.

Бино иттилои расонаҳо, Мадинаи Ҷумъахони 15-сола, ки шоми 6-уми августи соли ҷорӣ дар пайи бархурди “дулан” бо мошинҳо ва хонаҳои сокинон дар шаҳри Кӯлоб захмӣ шуда буд, дар бемористон вафот кардааст.

Мақомоти прокуратураи Тоҷикистон таҳқиқоти худ дар бораи сонеҳаи шоми 6-уми августро ба охир нарасонидааст. Аммо пеш аз ин дар ҳамон соатҳои аввали сар задани ин ҳодиса Вазорати корҳои дохилӣ ва котиботи прзединет шитобон ин ҳодисаро ба сабаби аз кор мондани систамаи боздорандагӣ ва ё тормоз гуфта буданд.

Аммо рӯзе пеш Шарофиддин Гадоев, яке аз раҳбарони Паймони Миллӣ дар суҳбат ба Аздо тв иддаъо карда буд, ки барориши он “дулан”-и ба садама дучоршуда, ки дар гузашта моли ширкати онҳо будааст, соли 2011 аст ва тибқи меъёрҳои қабулшуда муҳлати истифодаи баъди панҷ сол, яъне дар соли 2016 ба поён расида буд.

Ин “дулан”-е, ки дар шаҳри Кӯлоб сабабгори марг ва ҷароҳати беш аз 20 нафар шудааст, дар ҳоли ҳозир ба яке аз ширкатҳои зертобеи “Фароз” таъаллуқ дорад. Ширкати “Фароз” моли домоди Эмомалӣ Раҳмон Маҳмадзоир Соҳибов аст.

Корбарони зиёде дар шабакаҳои иҷтимоӣ аз ҳукумат ва мақомоти кишвар хостанд, ки тамоми омилони ин ҳодиса, аз ҷумла, моликони ширкати “Кафолат, воридот ва содирот”, ки ин мошин ба онҳо таъаллуқ дорад, бояд муҷозот шаванд. Ширкати “Кафолат, воридот ва содирот” яке ширкатҳои зертобеи “Фароз” аст.

Аммо Эмомалӣ Раҳмон ба хотири пешгирӣ кардан ин даъво ва шикояти зардидаҳо аз ҳисоби буҷети давлатӣ ба 8 нафар аз соҳибони мошинҳои зардида, пайвандони фавтидаҳо ва ҷароҳатбардошташҳо “ҷубронпулӣ” дода аст.

Коршиносон мегӯянд, гунаҳкори асосӣ дар ин фоҷеа худи ҳукумати Эмомалӣ Раҳмон аст, ки ихтиёроти зиёдеро аз ҷумла, додани ҳуҷҷатҳои ронандагӣ, назорати техникии автомашинаҳо, қисман назорати роҳҳо ва дигар ихтиёроти зиёдеро ба ширкатҳои вобастаи домодҳояш супоридааст.

Гуфта мешавад, бо гузашти 4 рӯз то ҳол теъдоди дақиқи қурбониён ва осебдидагони ин ҳодиса бо зикри пурраи ному насаби онҳо эълон нашудааст. Мақомот расман теъдоди фавтидагонро дар ибтидо 10 нафар ва шумори маҷрӯҳонро 11 эълон карда буданд, вале расонаҳои мустақил ба “Радиои Озодӣ”, “Паём”, “СССР” ва дигарон теъдоди онҳоро бо шумули ронанда аз 10 то 16 нафар ва теъдоди маҷрӯҳонро беш аз 14 каси дигар гуфта буданд.

Патент 4 баробар қиммат мешавад?

Аз ҷониби
AZDA-TV
-
0

Кумитаи буҷа ва андози Думаи давлатӣ пешниҳод кардааст, ки ҳаҷми пешпардохтҳои сабтшуда, ки аз ҷониби шаҳрвандони хориҷӣ ҳангоми кор дар Русия пардохта мешавад, боло бурда шавад. 

Ин тағйирот ба қонунгузорӣ аз сӯи намояндагони ҳизби “Справедливая Россия” бо роҳбарии Сергей Миронов омода шудааст. Сергей Миронов борҳо дар расонаҳо ва дар Думаи давлатии Русия бар зидди муҳоҷирон суҳбат карда буд.

Тибқи ин лоиҳаи қонун, ҳаҷми пешпардохтҳои сабтшуда чаҳор маротиба афзоиш ёфта, аз 1200 рубли қаблӣ то 4800 рубл боло бурда мешавад. Нархи ниҳоии патент, ки ҳар моҳ пардохт мешавад дар шаҳру ноҳияҳоии Русия фарқ мекунад. Мисол дар шаҳри Маскав он 6600 рубл арзиш дошта, баъд аз тағйирот дар қонун он ба 14772 рубл баробар хоҳад шуд ва ба ҷайби муҳоҷирони кории тоҷик зарбаи калон мезанаду мушкилоташонро бештар хоҳад кард.

Сабаби яку якбора боло бурдани нархи патентро намояндагони ҳизби миллатгарои “Справедливая Россия” ба афзоиши нигаронии шаҳрвандони Русия аз теъдоди муҳоҷирони меҳнатӣ дар Русия ва ҳамчунин мушкилоти мутобиқшавии онҳо ба ҷомеа рабт додаанд. 

Зимнан, оморҳои расмӣ дар соли 2022 аз он ҳикоят мекунанд, ки беш аз 3 миллиону 47о ҳазор шаҳрванди хориҷии барои кор ба Русия рафтаанд, ки зиёда аз 90%-и онҳоро муҳоҷирони корӣ аз Ӯзбекистон, Тоҷикистон ва Қирғизистон ташкил додаанд.

Истиқрор ҳудуди 10 ҳазору нерӯи Лаҳистон дар марз бо Беларус

Аз ҷониби
AZDA TV-2
-
0

Нигарониҳои мақомот ва марзбонони лаҳистонӣ аз самти марзҳои муштараки ин кишвар бо Беларус то рафт зиёдтар мешавад.

Бино ба иттиллои расонаҳои лаҳистонӣ, Вазорати дифои ин кишвар тасмим гирифтааст, ки ҳудуди 10 ҳазор нерӯи ҷадид ба марзҳои шарқии ин кишвар ирсол намояд.

Вазири дифои Лаҳистон Мариюш Блашак ба расонаҳо гуфтааст, 4 ҳазор нафар аз ин нерӯҳо мустақим ба марзҳо фиристода мешаванд, то якҷоя бо нерӯҳои Хадамоти марзбонӣ назорат ва муҳофзати сарҳадҳоро пурзӯр намоянд ва боқӣ 6 ҳазор нафари дигар дар минтақаҳои назди марзӣ нигаҳдорӣ мешаванд.

Пеш аз ин дар оғози ҳафтаи ҷорӣ мақомоти лаҳистонӣ эълон карда буданд, ки ҳудуди 2 ҳазор нафар нерӯи иловагӣ барои пурзӯр кардани назорат ва муҳофизати марзҳо ба шарқи ин кишвар фиристода мешавад.

Хадамоти марзбонии Лаҳистон ҳам иттилоъ дода буд, ки дар чанд моҳи ахир вуруди муҳоҷирони ғайриқонунӣ аз тариқи марзҳои Беларус ба хоки ин кишвар зиёд шудааст. Афзоиши вуруди ғайриқонунии муҳоҷирон, ки аксари онҳо аз кишварҳои Ховари Миёна, Шимоли Африқо, Осиёи Миёна ва дигар кишварҳо мебошанд, мақомоти Лаҳистонро сахт нигарон кардааст.

Мақомоти лаҳистонӣ мегӯянд, тибқи оморҳои мавҷуд, дар соли ҷорӣ ҳудуди 19 ҳазор бор талоши убури ғайриқонунии сарҳад аз самти Баларус сабт шудааст, ки он нисбат ба ҳамин давраи соли гузашта наздик ба дубаробар зиёдтар аст. Лаҳистон дар соли 2022 ҳудуди 16 ҳазор бор талошҳо барои убури ғайриқонунии муҳоҷиронро сабт карда буд ва алакай дар беш аз 7 моҳи соли ҷорӣ ин теъдод ба 19 ҳазор бор афзоиш ёфтааст.

Ба бовари мақомоти Лаҳистон, ин эҳтимол вуҷуд дорад, ки бархе нерӯҳои зархариди “Вагнер”-и Русия, ки дар баъзе манотиқи наздисарҳадии Беларус бо Лаҳистон мустақар шудаанд, ҳамроҳ бо муҳоҷирони ғайриқонунӣ вориди хоки Лаҳистон шаванд ва суботу амнияти ин кишварро халалдор намоянд.

Гуфта мешавад, пас аз оғози ҷанги Русия бо Украина муносибат байни кишварҳои Лаҳистону Беларус низ то рафт сардтар мешавад. Беларус дар ҷанги Украина дар сафи муттаҳидони Русия қарор дорад ва Лаҳистон бошад дар сафи муттаҳидони Украина.

Тоҷикистон мизбони нишасти сарони кишварҳои Осиёи Марказӣ мешавад

Аз ҷониби
AZDA TV-2
-
0

Тоҷикистон барои баргузории панҷумин Нишасти сарони кишварҳои Осиёи Марказӣ дар шаҳри Душанбе омода мешавад.

Бино ба иттилои расмӣ, тайи рӯзҳои 9-10-уми августи соли 2023 намояндагони вазоратҳои корҳои хориҷии кишварҳои Осиёи Марказӣ дар шаҳри Душнабе ҷамъ шуда, дар бораи “Вохӯрии панҷуми ҷашнии машваратии сарони давлатҳои Осиёи Марказӣ” бо ҳам маслиҳат карданд.

Ба қавли сомонаи Вазорати корҳои хориҷии Тоҷикистон, тайи ин ду рӯз “лоиҳаҳои рӯзномаи Вохӯрии машваратӣ, Изҳороти муштараки сарони давлатҳо ва дигар санадҳое, ки баимзорасонии онҳо аз натиҷаи саммити Душанбе дар назар аст, баррасӣ шуданд.”

Гуфта мешавад, Вохӯрии панҷуми сарони кишварҳои Осиёи Марказӣ рӯзҳои 14-15-уми сентябри соли ҷорӣ дар шаҳри Душанбе баргузор мешавад. Инчунин дар ин рӯзҳо беш 12 чорбании ҳошиявии дигар аз он ҷумла “баргузории ҷаласаи навбатии Шӯрои сарони давлатҳои муассиси Фонди байналмилалии наҷоти Арал низ ба нақша гирифта шудааст.”

Занозании гурӯҳии муҳоҷирон дар Русия

Аз ҷониби
AZDA-TV
-
0

Дар пайи занозании гурӯҳии муҳоҷирон дар шаҳри Всеволожски вилояти Ленингради Русия ду зодаи Тоҷикистон ҷароҳатҳои гуногуни ҷисмонӣ бардоштаанд.

Бино ба иттилои расонаҳои русӣ, шоми 7-уми августи соли ҷорӣ дар Пугаревои Всеволожск миёни муҳоҷирон занозании оммавӣ рух додааст.

Баъд аз расидани иттилоъ дар бораи занозанӣ, кормандони мақомот ба ҷойи ҳодиса рафтаанд, аммо пеш аз он, ки мақомоти полис ба ҷои ҳодиса ҳозир шаванд, занозании онҳо ба охир расидааст. Пулис 40 нафар аз “иштирокчиён”-и ин занозаниро боздошт карда, аз онҳо 4 дона “гилза ва ду корд мусодира кардааст.

Дар натиҷаи ин занозанӣ, бо ҷароҳатҳои гуногун, аз ҷумла захми корд шаҳрванди 36-солаи Федератсияи Русия Абулазибек ва ду шаҳрванди Тоҷикистон Ҳасани 33-cола ва Рузимуроди 30-сола дар беморхона бистарӣ шудаанд.

Дар робита ба ин ҳодиса тибқи қисми 2 моддаи 111 (қасдан расонидани зарари вазнин ба саломатӣ) -и Кодекси ҷиноии Федератсияи Русия парвандаи ҷиноӣ боз шудааст.

То ҳол ҳеч гуна иттилои расмӣ дар бораи сабабҳои сар задани ин занозании гурӯҳӣ, назари боздоштшудаҳо дар ин бора ва чанд тан аз зодагони Тоҷикистон дар пайи ин ҳодиса боздоштшуда аст, маълум нест.

Имрон Хон барои 5 сол аз фаъолиятҳои сиёсӣ маҳрум шуд

Аз ҷониби
AZDA TV-2
-
0

Нахуствазири собиқи Покистон Имрон Хон барои 5 сол аз фаъолиятҳои сиёсӣ маҳрум шуд.

Бино ба иттилои расонаҳо, Кумитаи Интихоботи Покистон пас аз он, ки додгоҳе Нахуствазири собиқи Покистонро ба 3 соли зиндон маҳеки кард, Имрон Хонро барои 5 сол аз фаъолиятҳои сиёсӣ маҳрум кард.

Дар баёнияе, ки Кумитаи интихоботи Покистон нашр кардааст, таъкид шудааст: “Имрон Хон барои як давраи панҷсола радди салоҳият шудааст.”

Тибқи қонунгузории Покистон ҳар фарде, ки аз ҷониби додгоҳ маҳкум шавад, наметавонад бар асоси муддате, ки Кумитаи интихобот муайян кардааст, ба ҳеч як аз маснадҳои давлатӣ номзад шавад. Панҷ сол радди салоҳият шудан ин ҳадди аксари муддатесте, ки барои фарди маҳкумшуда, муайян карда мешавад.

Имрон Хон дар охирин суханронии худ барои ҳаводоронаш хитоб ба ҳукуматдорони Покистон гуфта буд, ҳар чӣ қадар фишор болои ҳаводоранашро ҳам зиёд кунанд, агар имсол ва ё соли оянда интихобот баргузор шуд, хоҳ ӯ дар озодӣ бошад ва хоҳ дар зиндон Ҳизби Таҳрики Инсоф, ки раҳбараш аст, пирӯз хоҳад шуд.

Гуфта мешавад, дирӯз, 8-уми моҳи ҷорӣ додгоҳе дар Покистон Нахуствазири собиқи Покистонро бо иттиҳоми аз ҷиноятҳои иқтисодӣ ба муддати се сол аз озодӣ маҳрум кард ва баъд қироат шудани ҳалномаи суд судиҷрочиён билофосила ӯро аз манзили зисташ боздошт ва боздоштгоҳе дар наздикии пойтахти ин кишвар, шаҳри Исломобод интиқол додаанд.

Имрон Хон яке аз маҳбубтарин чеҳраҳои сиёсӣ дар ин кишвар аст, ки бо вуҷуди фишорҳои зиёди мақомот ба пайравонаш то рафт теъдоди ҳаводорони ӯ зиёд мешаванд. Ҳаводорони Имрон бо баргузории як иқдом дар шабакаҳои иҷтимоӣ зери унвони “Имрон Хонро раҳо кунед” мардумро барои баргузории тазоҳуротҳои густарда дар шаҳру ноҳияҳои худ дар 10-уми августи соли ҷорӣ даъват доранд.

Тақвияти марзҳои Лаҳистон бо Беларус

Аз ҷониби
AZDA TV-2
-
0
Акс аз Интернет
Polska, listopad 2021 rok Straz Graniczna na granicy polsko bialoruskiej. Fot. materialy prasowe Strazy Granicznej

Мақомоти Лаҳистон тасмим гирифтаанд, ки ба хотири кам кардани хатарҳо ва пешгирӣ намудан аз таҳдидҳои хориҷӣ марзҳои муштараки худ бо Беларусро тақвият бахшанд.

Бино ба иттилои расонаҳо, мақомоти лаҳистонӣ дар мувофиқа бо Вазорати дифои кишвар қасд доранд, ки марзҳои муштараки худ бо Беларусро бо ирсоли ҳудуди 2 ҳазор афсар ва сарбози иловагӣ тақвият бахшанд.

Пеш аз ин Хадамоти марзбонии Лаҳистон иттилоъ дода буд, ки дар чанд моҳи ахир вуруди муҳоҷирони ғайриқонунӣ аз тариқи марзҳои Беларус ба хоки ин кишвар зиёд шудааст. Афзоиши вуруди ғайриқонунии муҳоҷирон, ки аксари онҳо аз кишварҳои Ховари Миёна, Шимоли Африқо, Осиёи Миёна ва дигар кишварҳо мебошанд, онҳоро нигарон кардааст.

Гуфта мешавад, аз замони оғози ҷанги Украина дар 24-уми феврали соли 2023 ва ҳамлаҳои Русия алайҳи он кишвар рӯз то рӯз муносибати кишварҳои Русия ва Баларус бо Лаҳистон, ки яке аз муттаҳидони Украина аст, сардтар мешавад.

Инчунин, пас аз он, ки гурӯҳи низомии “Вагнер” дар моҳи гузашта аз хоки Русия ба қаламрави Баларус табъид шуд, нигаронии мақомоти лаҳистонӣ афзоиш ёфт. Борҳо мақомоти баландпояи ин кишвар аз тариқи расонаҳо изҳори нигаронӣ карда гуфтанд, ки вуҷуди зархаридони “Вагнер” дар чанд километрии марзҳои ин кишвар метавонад амнияти онҳоро халалдор кунад.

Эмомалӣ Раҳмон ба Роғун рафт

Аз ҷониби
AZDA TV-2
-
0

Президенти Тоҷикистон дар раъси як ҳайати баландпояи кишвар ҷиҳати боздид аз корҳои сохтмонӣ дар Неругоҳи Оби Бақии “Роғун” ба шаҳри Роғун сафар кардааст.

Бино ба иттилои расмӣ, имрӯз, 9-уми августи соли 2023 Эмомалӣ Раҳмон Президенти Тоҷикистон дар раъси як ҳайати ҳукуматаш ба шаҳри Роғун рафтааст.

Дар рафти ин сафар нахуст аз рафти “корҳои азнавсозии роҳи мошингарди “Роғун-Обигарм-Нуробод” ва лоиҳаи сохтмони роҳи автомобилгард аз Неругоҳи барқи обии Роғун то Неругоҳи барқи обии Шӯроб” дидан кардааст.

Эмомалӣ Раҳмон сипас ба Неругоҳи барқи обии Роғун рафта бо хеле аз ширкатҳои сохтонӣ, ҷараёни корҳо дар майдончаҳои “Сойи оби шӯр”-у “Бинои технологӣ” ва корҳои сохтмонӣ дар сарбанди асосии Неругоҳи барқи обии “Роғун ва сохтмончиёни он дидору гуфтугӯ кардааст.

Гуфта мешавад, ҳар чанд мақомоти расмӣ дар Тоҷикистон дар бораи вазъи саломатии президент то ҳол ба расонаҳо чизе нагуфтаанд, аммо дар хеле аз ин аксу наворҳои нашршуда аз рафти сафараш ба шаҳри Роғун ва таҳаррукоти корвони ҳамроҳонаш дида мешавад, ки Эмомалӣ Раҳмони 71-сола хеле хаставу афгор менамояд.

1...174175176...677саҳифаи 175 аз 677

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
27.1 ° C
27.1 °
27.1 °
47 %
1kmh
20 %
Mon
42 °
Tue
43 °
Wed
42 °
Thu
42 °
Fri
38 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст