Ширкати хусусии низомии “Вагнер”-и Русия барои харидани силоҳ бо Туркия гуфтугӯҳое анҷом додааст.

Рӯзноманигорони “The Washington Post” беш аз 50 саҳифаи санадҳои махфии ифшошудаи Пентагон ва Идораи марказии иктишофии Амрикоро хондаанд, ки дар он гуфта мешавад, дар аввалҳои моҳи феврали соли ҷорӣ ширкати хусусии низомии “Вагнер”-и Русия барои харидани яроқ ба ҷангиёнаш дар Малӣ ва Украина бо Туркия – кишваре, ки ба ҳайати НАТО дохил аст, гуфтушунид анҷом додааст.

Дар он гуфта мешавад, ки президенти муваққати Малӣ Ассими Гоита тасдиқ кардааст, ки кишвараш омода аст аз Туркия барои “Вагнер” силоҳ бихарад.

Аз ин санадҳо маълум нест, ки музокирот чӣ гуна анҷом ёфт ва мақомоти Туркия дар бораи онҳо чизе медонистанд ё на. Дафтари матбуоти ҳукумати Туркия ва сафорати Малӣ дар Вашингтон аз шарҳи хабар ба рӯзномаи “The Washington Post” худдорӣ карданд.

Дар санадҳо ҳамчунин мавқеи Чин нисбат ба ҷанги Украина оварда шудааст. Ба ба додаҳои истихбороти амрикоӣ, Чин ҷонибдори харобкории украиниҳо дар Русия аст. Зеро бо ин роҳ НАТО-ро таҷовузгар номида, кумак ба Русияро афзоиш медиҳад.

Дар санадҳо инчунин дар бораи барномаи ҳастаии Эрон ва озмоишҳои мушакии Куриёи Шимолӣ низ гуфта шудааст.

Инчунин ба навиштаи расонаҳои амрикоӣ санадҳои махфии ифшошудаи Пентагон дорои маълумоти тактикӣ дар бораи ҷанг дар Украина, аз ҷумла имконоти ҷангии ин кишвар аст. Дафтари президенти Украина ифшои санадҳои махфиро “фотошоп” номид.

Аммо шабакаи телевизионии “CNN” бо такя ба як манбаи наздик ба президенти Украина Владимир Зеленский хабар медиҳад, ки Киев ба далели ифшои асноди махфии Пентагон бархе аз нақшаҳои низомии худро тағйир додааст. 

Чун дар ин санадҳо харитаи амалиёти ҷангӣ дар Баҳмути Украина, таъмини силоҳ, инчунин дар бораи тамрин ва таҷҳизоти даҳҳо бригадаи наве, ки Украина барои ҳамла омода мекунад, тафсилот дода мешавад, аз ҷумла дар он ҳамаи тонкҳо, мошинҳои зиреҳпӯш ва силоҳҳои аз ҷониби ғарбиҳо ба Украина интиқолёфта номбар шудааст. 

Ёдовар мешавем, ки рӯзи 6 апрели соли ҷорӣ нашрияи амрикоии “The New York Times” хабар дод, ки санадҳои махфии низомие дар Твиттер ва Телеграм нашр шудааст, ки дар он аз нақшаҳои ИМА ва НАТО дар бораи рушди артиши Украина тафсилот дода шудааст. Аммо тадқиқотгарони “Bellingcat” муайян карданд, ки асноди махфии ахиран нашршуда рӯзҳои 1 ва 2 март дар сервери “Discord” бо номи “WowMao” паҳн шуда буданд, ва манбаи аслӣ метавонад онро аз ин ҳам пештар нашр карда бошад.

Баъдтар дар шабакаҳои иҷтимоӣ гурӯҳи нави асноди махфӣ пайдо шуд, ки эҳтимолан дар он аз сирри амнияти миллии Амрико дар бораи Украина, Ховари Миёна ва Чин тафсилот дода мешавад.

То ҳол манбаи асосоии ифшои ин санадҳо муайян нашудааст. Тавре дар хабарҳо гуфта мешавад, санадҳои нашршуда барои мансабдорони воломақоми ИМА, аз ҷумла фармондеҳи нерӯҳои мусаллаҳ генерал Марк Милли пешбинӣ шудаанд.

Вазорати адлияи ИМА рӯзи 9-уми апрели соли ҷорӣ аз оғози таҳқиқи ифшо шудани санадҳои махфии Пентагон ва Идораи марказии иктишофии Амрико хабар дод.