Ҷустуҷӯ кунед
Ҷустуҷӯ
19.9 C
Dushanbe
Хона блог саҳифа 298

Кумакхоҳии Шамсиддин Саидов аз созмонҳои ҳомии ҳуқуқи башар

Аз ҷониби
amrullokhi
-
0

Шамсиддин Саидов, узви аршади ҲНИТ аз созмонҳои ҳомии ҳуқуқи инсон дар Тоҷикистон хостааст, ки барои дарёфти маълумот дар бораи писараш ба ӯ кумак кунанд.

Ирмӯз, 28-уми феврали соли 2023, Шамсиддин Саидов, яке аз раҳбарони Ҳизби наҳзати исломии Тоҷикистон бо нашри як навор дар шабакаҳои иҷтимоӣ аз созмонҳои ҳомии ҳуқуқи инсон ва корпусҳои дипломатии муқими Тоҷикистон хостааст, ки барои дарёфти маълумоти дақиқ дар бораи писараш Абдуллоҳи Шамсиддин ба вай кумак кунанд.

Падари Абдуллоҳи Шамсиддин мегӯяд, “вазири корҳои дохилӣ ва прокурори генералӣ аз макони буду боши ӯ, аслан аз (вуҷуд доштани) Абдуллоҳ эълони бехабарӣ намуданд ва Кумитаи давлатии амнияти миллии Тоҷикистон ҳам муҳри сукут бар даҳон задааст.“

Ин фаъоли сиёсии Тоҷикистон мегӯяд, умедҳо дар бораи зиндаву саломат будани Абдуллоҳи Шамсиддин хеле кам шудааст “ва бо расидани баъзе хабарҳои ахир, ки эҳтимолан зери фишорҳо саломатиашро комилан аз даст додааст ё ҳатто зинда набуданаш моро фаро мегирад.“

Ин узви арашди Ҳизби наҳзати исломии Тоҷикистон бо таъкид мегӯяд: “Аз тамоми созмонҳои байналмилалӣ, ташкилотҳои ҳуқуқи башарӣ, сафоратҳое, ки дар Тоҷикистон вуҷуд доранд, хоҳиш мекунм, ки барои пайдо кардани фарзанди ман Абдуллоҳи Шамсиддин дар Тоҷикистон кумак намоянд.”

Гуфта мешавад, мақомоти Олмон 18-уми январи соли ҷорӣ фаъоли сиёсии тоҷик Абдуллоҳи Шамсиддинро аз тариқи Туркия бо ҳавопаймо ба Тоҷикистон ихроҷ карданд ва дар фурӯдгоҳи байналмилалии шаҳри Душанбе мақомот ӯро боздошт ва ба ҷои номаълум бурданд ва то кунун дар бораи ӯ ҳеч иттилое надодаанд.

Иқдоми нави мухолифин дар бораи Абдуллоҳи Шамсиддин

Аз ҷониби
amrullokhi
-
0

Ҷамъе аз мухолифини ҳукумати Эмомалӣ Раҳмон дар хориҷи кишвар бо роҳандозии як иқдом аз мақомоти Тоҷикистон мехоҳанд, ки макони нигаҳдории #Абдуллоҳи_Шамсиддинро эълон кунад.

Гурӯҳе аз мухолифини Эмомалӣ Раҳмон, ки муқими кишварҳои аврупоӣ мебошанд, бо баргузории як иқдоми ҳамагонӣ дар шабакаҳои иҷтимоӣ мехоҳанд, таваҷҷуҳи мардум ва мақомоти Тоҷикистонро ба қазияи фаъоли сиёсӣ Абдуллоҳи Шамсиддин, писари яке аз раҳбарони Ҳизби наҳзати исломии Тоҷикистон ҷалб кунанд.

Пеш аз ин, пайвандони Абдуллоҳи Шамсиддин дар суҳбат ба Azda tv гуфта буданд, вай 18-уми январи соли 2023 пас аз ихроҷ аз Олмон дар дохили ҳавопаймо дар Фурӯдгоҳи байналмилалии шаҳри Душанбе тавассути мақомоти тоҷик боздошт ва ба ҷои номаълум бурда шуд.

Аммо чанд рӯз пеш вақте хабарнигорон дар нишсатҳои матбуотӣ аз вазири корҳои дохилӣ ва прокурори генаралии Тоҷикистон пурсиданд, ки Абдуллоҳи Шамсиддин дар куҷост, онҳо изҳори бехабарӣ карда, гуфтанд, ки намедонанд.

Гуфта мешавад, ин бори аввал нест, ки мақомоти корҳои дохилӣ ва прокуратураи Тоҷикистон иттилоот дар бораи макони боздошт ва нигаҳдории фаъолони сиёсӣ ва мухолифини ҳукуматро аз чашми мардум ва расонаҳо пинҳон медоранд.

Дар гузашта вақте марҳум Каромат Шарифов, Шарофиддин Гадоев, Иззат Амон ва баъдтар даҳҳо нафари дигар, аз ҷумла вақте фаъолони бадахшониро боздошту ва ба ватан истирдод карданд, мақомот сари вақт дар бораи боздошт ва макони онҳо иттилоъ намедоданд.

Инчунин пеш аз онҳо дар сентябри соли 2015 замоне, ки раҳбарони зиндонии Ҳизби наҳзати исломии Тоҷикистонро боздошт карда буданд, дар ибтидо замони парвандасозӣ алайҳи онҳо талош мекарданд ҳама гуна иттилоотро аз чашми мардум ва дурбини расонаҳо пинҳон нигаҳ бидоранд.

Ба ҳамин хотир, имрӯз вақте вазири корҳои дохилӣ, прокурори генералӣ ва дигар мақомоти масъул мегӯянд, ки дар бораи ин фаъолои сиёсӣ, ки беш аз 40 рӯз мешавад расман вориди Тоҷикистон шудааст, хабар надоранд, ҳеч касе аз мухолифин ва хеле аз мувифиқон ҳам ба гапи онҳо бовар намекунанд.

Аз сӯи дигар, бархе аз наздикону пайвандони Абдуллоҳи Шамсиддин, ки беш аз 40 рӯз ин ҷониб бо тамоми тавон талош доранд дар бораи макони нигаҳдории ӯ маълумоти мувассақеро ба даст оварда, аз аҳволи ӯ бо хабар шаванд, ба ин боваранд, ки ба эҳтимоли зиёд ин фаъоли сиёсӣ дар Боздоштгоҳи муваққатии Кумитаи давлатии амнияти миллӣ дар шаҳри Душанбе қарор дорад ва аз тарси Саймумин Ятимов ҳеч касе аз мақомоти қудратӣ ҷуръат намекунад, ки дар ин бораи чизе бигӯяд.

Варзишгарони тоҷик ба Тошканд мераванд

Аз ҷониби
firuzihait
-
0

Дар мусобиқаи ҷудои “Tashkent Grand Slam 2023” аз Тоҷикистон 13 варзишгар дар вазнҳои гуногун иштирок хоҳанд кард.

Мусобиқаи ҷудои “Tashkent Grand Slam 2023” дар пойтахти Узбекистон рӯзҳои 3-5-уми марти соли ҷорӣ баргузор мегардад. Дар ин мусобиқа 384 варзишгар, 205 мард ва 179 зан аз 52 кишвари ҷаҳон қувваозмоӣ хоҳанд кард.

Бино ба иттилои сомонаи Кумитаи миллии олимпӣ, Тоҷикистонро дар ин мусобиқа 13 варзишгар, аз ҷумла Шоҳида Қаландарова (то 57 кг) ва Шукрона Қарчиева (то 48 кг) миёни занон намояндагӣ мекунанд.

Дар миёни мардон бошад, аз варзишгарони тоҷик Муҳаммадсолеҳ Қувватов (то 60 кг), Эмомалӣ Нуралӣ ва Шаҳбоз Саидабуроров (-66 кг), Беҳрӯз Хоҷазода ва Маҳмадшариф Наҷмиддинов (-73 кг), Сомон Маҳмадбеков, Муҳаммаҷон Абдуҷалилов (-81 кг), Ҷаҳонгир Маҷидов ва Комроншоҳи Устопириён (-90 кг), Иброҳим Элмуродов ва Темур Раҳимов (+100) қувваозмоӣ хоҳанд кард.

Ғолибону ҷоизадорон дар баробари медал бо ҷоизапулӣ, аз ҷумла дар баробари медали тилло 5000 евро,  барои барандагони медали нуқра 3000 ва брои медали биринҷӣ 1500 евро дода мешавад.

Сардори Агентии назорати маводи мухаддири Хатлон боздошт шуд

Аз ҷониби
firuzihait
-
0

Кормандони Кумитаи давлатии амнияти миллии Тоҷикистон раиси Агентии назорати давлатии маводи нашъаовари вилояти Хатлонро боздошт кардаанд.

Полковник Нодир Муродзода, сардори Раёсати назорати давлатии маводи нашъаовар дар вилояти Хатлон рӯзи 10-уми феврал ҳамроҳ бо чор зердасташ бо иттиҳоми “қаллобӣ” ва гирифтани 150 ҳазор сомонӣ пора аз наздикони як гумонбар дар кочоқи маводи мухаддир, боздошт шудааст.

То ҳол мақомот расман боздошти ин полковникро шарҳ надодаанд. Назари худи Муродзода ва наздиконаш дар ин бора дастраси расонаҳо нест.

Дар ҳамин ҳол Радиои Озодӣ дар истинод ба манобеаш аз мақомоти тафтишотӣ менависад, ки “Нодир Муродзода дар ҳамкорӣ бо кормандони КДАМ дар Хатлон як кочоқбарро боздошт мекунад ва тафтиши парвандаи онро бар дӯш мегирад, вале бар хилофи далелҳо талош мекунад, то ӯро аз ҷавобгарӣ раҳо созад ё ҷурмашро камтар нишон диҳад”.

Гуфта мешавад нисбати полковник Муродзода бар асоси моддаи 247, қисми 4-и Кодекси ҷиноятӣ, яъне “қаллобӣ ба миқдори махсусан калон” парвандаи ҷиноӣ боз шуда, ӯ барои тағйири парвандаи як кочоқбар ва гирифтани пора дар ҳаҷми беш аз 150 ҳазор сомонӣ айбдор мешавад.

Ин моддаи Кодекси ҷиноятӣ аз 94 ҳазор сомонӣ то беш аз 140 ҳазор сомонӣ ҷарима ё аз 8 то 12 соли зиндонро пешбинӣ мекунад.

Ҳоло Нодир Муродзода дар боздоштгоҳи КДАМ дар Душанбе нигаҳдорӣ шуда, парвандаи ӯ ва зердастонашро Кумитаи давлатии амнияти миллӣ ва Додситонии кулли кишвар таҳқиқ доранд.

Ин бори аввал нест, ки дар Тоҷикистон мақомдоре бо иттиҳоми гирифтани пора ва қаллобӣ боздошт мешавад. Аммо дар аксар ҳолат онҳо бо супоридани ҷарима ва ё воситабозӣ аз ҷавобгарӣ озод карда мешаванд.

Марзбонони тоҷик 3 қочоқбари афғонро куштанд

Аз ҷониби
AZDA TV
-
0

Ба гузориши расонаҳои Афғонистон, 3 қачоқбари маводи мухаддир, ки шаҳрвандони ин кишвар буданд, пас аз ворид шудан ба хоки Тоҷикистон тавассути марзбонон кушта шуданд.

Расонаҳои маҳаллии Афғонистон иттилоъ доданд, ки рӯзи шанбе, 25-уми феврали соли ҷорӣ 3 шаҳрванди Афғонистон аз масири деҳаи Бӯстони вулусволии Дарқади вилояти Тахор бо қочоқи 20 кило маводи мухаддир вориди хоки Тоҷикистон шуданд. Пас аз убури марз мавриди ҳадафи марзбонони тоҷик қарор гирифта, кушта шуданд.

Дар ҳамин ҳол бархе расонаҳои маҳаллии ин кишвар менависанд, ки амалиёти қочоқи маводи мухаддир тавассути 4 нафар: 2 толиб ва 2 узви гурӯҳи террористии “Ансоруллоҳ”, ки аксари аъзои он шаҳрвандони худи Тоҷикистон ҳастанд, сурат гирифтааст.

Ин дар ҳолест, ки аксар расонаҳои Афғонистон қочоқбаронро 3 нафар гуфтаанд, аммо аз ҳувияти онҳо ва ба кадом гурӯҳҳо тааллуқ доштанашон хабаре надодаанд.

То ҳол дар ин бора гузоришҳои расмӣ вуҷуд надорад. Ҳам ҷониби Тоҷикистон ва ҳам Толибон ин ҳодасаро шарҳ намедиҳанд.

Дар роҳи Душанбе-Чаноқ 3 нафар зери тарма монд

Аз ҷониби
AZDA TV
-
0

Рӯзи якшанбе, 26-уми феврали соли 2023 дар роҳи Душанбе-Чаноқ резиши тарма рух дод, ки дар натиҷа 3 нафар ба ҳалокат расида, як нафари дигар ба бемористон интиқол ёфтааст.

Акс аз саҳифаи фейсбукии (IRS)

Ширкати Innovative road solutions (IRS) иттилоъ дод, рӯзи 26-уми феврали соли ҷорӣ дар километри 157-уми роҳи Душанбе-Чаноқ (ағбаи Шаҳристон) тарма фаромад, ки дар натиҷа 3 нафар зери тарма монда ҷони худро аз даст доданд. Наҷотдиҳандагон тавонистанд як нафари дигарро наҷот дода ва ба бемористон интиқол диҳанд.

Дар хабар гуфта мешавад, ки ин 4 нафар ҳама мусофирони мошини сабукрави тамғаи “Мусо” буда, ҳангоми ҳаракат дар роҳ ба ин мусибат гирифтор шуданд.

Вале то ҳол аз ҳувияти ҳалокшудагон ва сокини кадом шаҳру навоҳии Тоҷикистон буданашон маълумоте нашр нашудааст.

Ҳамзамон, то нашри ин матлаб, Кумитаи ҳолатҳои фавқулодда ва мудофиаи граждании Тоҷикистон низ дар ин бора иттилои расмие надодааст.

Ёдовар мешавем, ки ширкати IRS аз соли 2009 масъулияти нигоҳубини роҳи Душанбе-Чаноқро бар дӯш дорад ва аз ҳар ронанда барои убур аз он маблағ мегирад. Вале ронандагон аз сатҳи хидмарасонии ин ширкат шикоят мекунанд. Ба гуфтаи онҳо, ҳамасола дар ин роҳ садҳо ҳодисаи нохуш рух медиҳад, вале масъулини ин ширкат аз пеш чорае намеандешанд.

Зеленский дар солрӯзи ҳамлаи Русия ба кишвараш чӣ гуфт?

Аз ҷониби
AZDA TV
-
0

Имрӯз, 24-уми феврали соли 2023 аз ҳамлаи Русия ба Украина як сол гузашт. Расиҷумҳури Украина Владимир Зеленский дар нахустин солрӯзи таҳоҷуми Русия ба кишрвараш гуфт: “Мо ҳамро шикаст медиҳем”.

Зеленский рӯзи ҷумъа дар як навори видеоии 15-дақиқӣ аз ҳамлаи яксолаи Русия ба кишвараш натиҷагирӣ кард. Ӯ зимни хитоб ба шаҳрвандон ва сарбозони кишвараш таъкид кард, ки украиниҳо “соли шикастнопазир”-ро паси сар карданд.

“Натиҷаи асосии ин ҳамла ин аст, ки мо сабр кардем. Мо мағлуб нашудем. Ва мо ҳама корро мекунем, ки имсол ғалаба кунем!” – гуфт Зеленский.

Ӯ ҳамчунин афзуд: “Мо қавӣ ҳастем. Мо барои ҳар чизе омодаем. Ҳамаро шикаст хоҳем дод. Ингуна 24-уми феврали соли 2022 оғоз шуд. Рӯзе, ки тӯлонитарин рӯзи зиндагӣ ва сахттарин рӯзи торихи ахири мо буд. Мо зуд аз хоб бедор шудем ва аз он ба баъд нахобидем.”

Раисҷумҳури Украина дар паёми видеоии рӯзи ҷумъааш Русияро “террорист” хонда, гуфт: “Нӯҳ сол пеш ҳамсоя ба таҷовузкор табдил ёфт. Як сол пеш ин таҷовузкор ба ҷаллод, ғоратгар ва террорист табдил шуд.”

Ёдовар мешавем, ки субҳи 24-уми феврали соли 2022 якбора ҳуҷуми Русия болои шаҳрҳои Украина оғоз шуд. Аз он рӯ то ин дам беш аз 8 миллон украинӣ хонаҳои худро тарк карда, ба дигар кишварҳои ҳамсоя паноҳ бурданд. Даҳҳо ҳазор аз сарбозону сокинони осоишта кушта шуда ва садҳо ҳазор нафари дигар дар дохили ин кишвар овара гаштаанд.

Ҳамчунин давоми ин як соли гузашта тибқи баъзе оморҳо, 146 ҳазор сарбози Русия кушта шудаасту даҳҳо ҳазор тонку туп ва дигар олоти ҷангияш аз байн рафтааст.

Худдории Тоҷикистон аз овоздиҳӣ алайҳи Русия дар СММ

Аз ҷониби
firuzihait
-
0

Маҷмаи умумии Созмони Милали Муттаҳид бо қабули қатъномае аз Русия даъват кард, ҷангиро хотима дода, нирӯҳояшро аз қаламрави Украина берун барад.

Маҷмаи умумии СММ ин қатъномаро шаби 23 ба 24-уми феврал дар яксолагии ҳамлаи бедалели Русия ба Украина баррасӣ кард ва ба овоз гузошт.

Ба тарафдории ин қатънома аз 193 кишвари ширкаткунанда 141 кишвар раъйи мусбат доданд. Ҳафт кишвар – Русия, Беларус, Сурия, Кореяи Шимолӣ, Эритрея, Мали ва Никарагуа зид овоз доданд.

32 кишвар, аз ҷумла Тоҷикистон, Узбекистон, Чин, Ҳинд, Эрон, Покистон, Қазоқистон, Куба, Арманистон ва ғайра аз раъйдиҳӣ худдорӣ карданд.

Ин қатънома бо аксарияти овозҳо қабул карда шуд. Баъд аз қабули санади мазкур Президенти Украина Владимир Зеленский ва вазири корҳои хориҷии ин кишвар Дмитрий Кулеба дар саҳфаи твиттериашон навиштанд, ки “қатънома паёми қавии ҳимояти ошкори ҷаҳонӣ аз Украина аст” ва “бо гузашти як сол аз оғози ҷанг ҳимоятҳои ҷаҳонӣ аз Украина қавӣ боқӣ мондааст”.

Соли гузашта низ Тоҷикистон дар қатори 35 давлати дигари ҷаҳон аз овоздиҳӣ дар қабули қатънома алайҳи Русия худдорӣ карда буд.

Русия қатъномаро “нобаробар ва зиддирусӣ” хонда, аз кишварҳои ҷаҳон хост, дар сурати ислоҳ накардани қатънома, ба он раъйи манфӣ диҳанд.

Василий Небензя, намояндаи доимии Русия дар СММ, ҳангоми тарҳи қатънома онро “зидди Русия ва зараровар”, “якҷониба ва аз воқеият дур” хонда буд. Илова бар ин, Небензя таъкид карда буд, ки ин санад имкон намедиҳад низоъ дар Украина бо роҳи мусолиҳатомез ҳал карда шавад.

Гуфта мешавад, намояндаи Беларус дар СММ талошҳои зиёде барои тағйири матни қатънома анҷом додааст, аммо дар ниҳоят кӯшишҳояш бенатиҷа анҷомид.

Оё заминларзаи сахте дар пеш аст? Пешгӯйҳои олими ҳоландӣ дар бораи Тоҷикистон

Аз ҷониби
AZDA TV
-
0

Пажӯҳишгар ва олими зилзилашиноси ҳоландӣ аз эҳтимоли вуқуи заминларзаи шидидтар дар ҳафтаи аввали моҳи марти соли ҷорӣ дар Тоҷикистон хабар медиҳад.

Баъд аз заминларзаи 6,8 баллии субҳи 23-уми феврали соли ҷорӣ дар Тоҷикистон, пажӯҳишгар ва олими геологии ҳоландӣ Франк Ҳугербитс (Frank Hoogerbeetc) дар бораи бори дигар ба вуқуъ пайвастани заминларзаи шиддатноктар аз рӯзи гузаштаро дар минтақаи Тоҷикистон ва Чин аз эҳтимол дур намедонад.

Чанде пеш ин пажӯҳишгари ҳоландӣ, ки пешгӯиҳояш дар бораи вуқуи заминларза дар саросари олим сарусадоҳои зиёдеро ба бор овардааст, заминларзаи ҳалокатбори Туркия ва Сурияро пешбинӣ карда буд.

Франк Ҳугербитс дар ин навор аз эҳтимоли вуқуи зилзилаи начандон қавӣ дар минтақа рӯзҳои 25 ва 26-уми феврал ва қавитар дар ҳафтаи аввали моҳи март ҳушдор медиҳад.

Ин дар ҳолест, ки худи ӯ дар посух ба суоли як корбар, ки пурсидааст: “мегӯянд, ки имрӯз заминларзаи ҳалокатборе мешавад, оё ин дуруст аст?”, мегӯяд: “Ҳеч кас дақиқ гуфта наметавонад, ки заминларзаи бузурге рух медиҳад.” Ва дар идома меафзояд: “Ба овозаҳо бовар накунед.”

Бархе корбарон пешгӯиҳои ин олими ҳоландиро дар бораи зилзилаҳо, ба пешгӯиҳои ситорашиносон монанд карда, фарзияҳои пешниҳод намудаи ӯро чандон қавӣ ва илмӣ намедонанд.

Ҳамзамон аксар олимони зилзилашинос бар ин назаранд, ки то ҳол илми ин соҳа чандон пешрафт накарда, ки битавон вуқуи заминларзаро пеш аз ҳодиса пешгӯӣ кард. Аммо аз боби таҳлилҳои илмӣ, вобаста ба мавқеи геологии як минтақа имкони ҳадс задани чунин воқеаҳо бидуни ташхиси замон ва макони дақиқи он вуҷуд дорад.

Вохӯрии вазирони корҳои хориҷии Осиёи марказӣ ва Амрико

Аз ҷониби
firuzihait
-
0

Нишасти вазирони умури хориҷии кишварҳои Осиёи Марказӣ ва Амрико дар шакли С5+1 дар шаҳри Остона, пойтахти Қазоқистон баргузор мешавад.

Сомонаи “vlast.kz” дар истинод ба Вазорати корҳои хориҷаи Қазоқистон хабар медиҳад, ки 28-уми феврали соли ҷорӣ котиби давлатии Амрико Энтони Блинкен бо як сафари расмӣ ба Қазоқистон меояд.

Дар ҷараёни сафараш дар Остона Котиби давлатӣ бо президент Қосим-Ҷомарт Тоқаев ва бо муовини сарвазир, вазири корҳои хориҷии Ҷумҳурии Қазоқистон Мухтор Тлеуберди мулоқот хоҳад кард.

Худи ҳамон рӯз дар Остона нишасти вазирони умури хориҷии кишварҳои Осиёи Марказӣ ва ИМА дар шакли С5+1 бо ширкати Блинкен баргузор мегардад.

Гуфта мешавад, дар ин нишаст масъалаҳои рушди минбаъдаи ҳамкориҳои минтақавӣ ва шарикӣ бо Иёлоти Муттаҳида баррасӣ хоҳад шуд.

То ҳол ҷониби Тоҷикистон расман хабар надодааст, ки дар ин нишаст ширкат хоҳад кард ё не.

Энтони Блинкен баъд аз Қазоқистон ба Узбекистон ва Ҳиндустон меравад.

Кишварҳои Қазоқистон, Қирғизистон, Тоҷикистон, Туркманистон, Узбекистон ва ИМА шомили C5+1 буда, он соли 2015 барои баррасии масъалаҳои минтақавӣ дар бахшҳои иқтисод, экология ва амният таъсис ёфтааст.

1...297298299...742саҳифаи 298 аз 742

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
overcast clouds
20.1 ° C
20.1 °
20.1 °
49 %
1kmh
90 %
Tue
19 °
Wed
26 °
Thu
23 °
Fri
19 °
Sat
21 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст