Як киштии боркаши Русия бо гумони дуздӣ ва қочоқи ғалладонаи Украина аз ҷониби нерӯҳои дарёии Туркия боздошта шуд.
Дар ин бора шоми рӯзи якшанбе сафири Украина дар Туркия Василий Боднар ба расонаҳо хабар дод.
Тавре расонаҳо бо такя ба гузориши хабаргузории “Reuters” иттилоъ медиҳанд, Украина қаблан аз мақомоти Туркия талаб карда, то киштии борбари “Жибек Жолӣ”-ро, ки бо парчами Русия ба роҳ баромадааст, боздошт кунад.
Сухангӯи вазорати хориҷаи Украина Олег Николенко бо такя ба иттилои мақомоти дарёии Украина рӯзи ҷумъа ба хабаргузории “Reuters” гуфта, ки киштии “Жибек Жолӣ” дар марҳилаи аввал тақрибан 4500 тонна ғаллаи украиниро аз бандари Бердянск дар ҷануби Украина бор кардааст.
Дар ҳамин ҳол сафири Украина дар Туркия гуфта, ки сарнавишти киштӣ имрӯз душанбе дар нишасти муфаттишон ҳал хоҳад шуд ва Украина умедвор аст, битавонад ғаллаҳои дуздидашударо бозпас гардонад.
“Мо бо ҳамдигар (Туркия ва Украина) ҳамкории ҳамаҷониба дорем. Дар ҳоли ҳозир, киштӣ дар даромадгоҳи бандар аз ҷониби мақомоти гумруки Туркия боздошт шудааст”, – мегӯяд Василий Боднар дар пахши барномаи телевизионӣ.
Украина Русияро дар дуздии ғалладона муттаҳам мекунад. Ба гуфтаи Киев, Русия ҳар шаҳреро тасарруф кунад, ба дуздии ғалладонаи он даст мезанад. Аммо Кремл пайваста ин иттиҳомро рад мекунад.
Кшварҳои Русия ва Украина ҳарду аз бузургтарин тавлидкунандагони гандуму дигар ғалладонаҳо ба шумор мераванд. Ва солона миллонҳо тонна ба кишварҳои ҷаҳон содир мекунанд.
Мушкилии ҷанг ва ноамнӣ дар Украина аксари кишварҳои ҷаҳон, бахусус кишварҳои арабӣ ва африқоиро барои гарон шудани нон ва равғани ношӣ аз ғалладонаҳо ба шиддат нигарон кардааст.
Гуфта мешавад, аз 17-уми январи соли 1995 “Шартнома дар бораи паҳн накардани силоҳи ҳастаӣ дар Ҷумҳурии Тоҷикистон” эътибор пайдо кардааст ва тибқи моддаи III Шартномаи мазкур аз ҳар як давлат-аъзои дорои силоҳиҳастаинабуда талаб карда мешавад, ки бо АБНА созишномаи кафолати ҳамаҷонибабаимзорасонад, то АБНА иҷрои ӯҳдадориҳои худро тибқи Шартномаи мазкур ба ҷо орад.”
Дар асари як ҳамлаи ҳавоии Русия ба истироҳатгоҳе дар шаҳри бандарии Одессаи Украина 19 нафар кушта ва беш аз 38 каси дигар захмӣ шудааст.
ББС ба нақл аз Хадамоти давлатии изтирории Украина (ГСЧС) хабар додааст, бомдоди имрӯз, замоне, ки мардум дар хоб буданд, ҳавопаймоҳои ҷангии Русия ба яке аз минтақаҳои истироҳатӣ дар Одесса се мӯшак партоб карданд.
Ба иттилои манбаъ, яке аз ин мушакҳо як бинои нӯҳошёнаи истиқоматиро қисман хароб кард ва дуи дигар ба марказҳои фароғатии деҳаи Сергеевкаи ноҳияи Белгород-Днестровский, 80-километрии ҷануби Одесса бархӯрданд ва дар натиҷа 19 нафар, аз ҷумла як кӯдак кушта ва 38 нафари дигар ҳам захмӣ шуданд. Дар байни захмиҳо 6 кӯдак ва як зани ҳомила ҳам ба қайд гирифта шудааст.
Мақомоти украинӣ мегӯянд, оморҳои ахир аз он ҳикоят мекунанд, ки аз зери оворҳо 8 нафар, аз ҷумла 3 кӯдак наҷот дода шудааст, бо ин ҳол корҳои наҷотдиҳӣ идома доранд, вале ҳанӯз маълум нест, ки дар зери дигар харобаҳои ба ҷо монда аз ин ҳамла захмиҳо ва ё ҷонбохтагони дигаре низ ҳузур доранд ё на?
Гуфта мешавад, аз замони оғози ҳамлаҳои Русия ба Украина ба рӯзи 24-уми феврали соли ҷорӣ, то кунун ҳазорҳо нафар кушта, даҳҳо ҳазори дигар захмӣ ва беш аз ҳафтуним миллион нафар тарки хонаву дари худ карда, муҳоҷир шудаанд.
Адвокат ва пайвандони Эмомалӣ Холов, ҳамкори пешини Иззат Амон, ки бо дархости мақомоти Тоҷикистон дар Русия боздошт шуда буд, ӯро дар боздоштгоҳ пайдо накарданд.
Имрӯз, 1-уми июли соли 2022, яке аз наздикони Эмомалӣ Холов бо шарти фош нашудани номаш ба Аздо тв гуфт, дирӯз 30-юми июн адвокати Холов барои дидорбинӣ бо ӯ ба боздоштгоҳи муваққатии шаҳри Курск рафта буд, вале Эмомалиро онҷо пайдо накардааст.
Кормандони боздоштгоҳ ба адвокати Эмомалӣ гуфтанд, ки мунтазир бошад, то зерҳимояашро барои мулоқот омода карда, ба наздаш биоранд. Аммо пас аз 4 соати интизорӣ яке аз кормандони боздоштгоҳ дубора танҳо ба назди адвокат баргашта гуфтааст, ки Эмомалӣ дар ин ҷо ҳузур надорад, ӯро аз боздоштгоҳ ҷавоб додаанд.
Сипас адвокат ва пайвандони ӯ ба ҷустуҷӯи оғоз карда, баъд аз талошҳои зиёд наздиконаш муайян кардаанд, ки Эмомалӣ Холовро аз Курск ба Маскав интиқол доданд, то ӯро ба Душанбе истирдод кунанд.
Эмомалӣ Холов, ҳамкори пешини Иззат Амон бо дархости мақомоти Тоҷикистон рӯзи 26-уми майи соли ҷорӣ дар истгоҳи мусофирбарҳо дар Горшеченскийи вилояти Курски Русия аз ҷониби кормандони пулис дастгир шуда буд.
Эмомалӣ Холовро шуъбаи корҳои дохилӣ дар ноҳияи Данғара аз моҳи марти соли 2021 ба гумони “тундгароӣ” дар ҷустуҷӯ қарор дода буд, вале пайвандон ва наздиконаш ин иттиҳомоти мақомотро рад мекунанд.
Гуфта мешавад, бо гузашти беш аз як шабонарӯз аз замони ғайб задани Эмомалӣ Холов, то ҳол маълум нест, ки ӯ дар чӣ ҳолат қарор дорад ва оё ба Тоҷикистон истирдод шудааст ё не? Аммо наздикону пайвандонаш бо нигаронӣ мегӯянд, дар сурати истирдоди ӯ ба Душанбе, Эмомалиро шиканҷа ва ҳукми тӯлонии зиндон таҳдид мекунад.
