Ҷустуҷӯ кунед
Ҷустуҷӯ
20.9 C
Dushanbe
Хона блог саҳифа 452

Хуросонӣ: Волии Панҷшер мардумро ба дод овардааст

Аз ҷониби
amrullokhi
-
0

Абдулҳамид Хуросонӣ, сардори амнияти Толибон дар Панҷшер волии ин вилоятро” ба зулму ситам ва хиёнат” муттаҳам карда, аз раҳбари Толибон хостааст, ки ӯро аз мансаб барканор кунад.

Акс аз ББС

Абдулҳамид Хуросонӣ, сардори амнияти Толибон дар Панҷшер бо нашри як навори видеоӣ, ки бо забони паштӯ сабт шудааст, аз волии Панҷшер ба мулло Ҳиббатуллоҳ Охундзода, раҳбари Толибон шикоят карда, гуфтааст, ки волӣ ва наздиконаш бо беадолатиҳои худ мардумро ба сутӯҳ овардаанд.

Сардори амнияти Толибон дар ин шикояти худ мегӯяд, ки агар сари вақт мулло Ҳиббатуллоҳ Охундзода волии ин вилятро аз қудрат барканор накунад, ба сабаби зулму ситам ва хиёнату ноадолатиҳое, ки дар байтулмол ва ҳаққи мардум анҷом дода мешаванд, байни мардум ва ҳукумат фосила ба вуҷуд меояд.

Пеш аз ин Абдулаҳамид Хуросонӣ борҳо нерӯҳои Ҷабҳаи муқовамати миллии Афғонистон бо раҳбарии Аҳмад Масъуд, писари шаҳид Аҳмадшоҳи Масъудро таҳдид карда, гуфта буд, ки ҳар касе оромӣ ва анимятро дар Аморати Толибон халалдор кунад, ба вай раҳм карда намешавад. Аммо бори аввал аст, ки вай аз волии Толибон шикоят карда, ӯро ба зулму ситам ва хиёнат муттаҳам мекунад.

Гуфтанист, то замоне, ки ин матлаб таҳия мешуд, ҳеч вокунише аз ҷониби Қудратуллоҳ Панҷшерӣ, волии ин вилоят дар хусуси иддаъоҳои Хуросонӣ дар расонаҳо нашр нашуда аст.

Талоши Толибон барои бозгардондани сиёсатмадорони Афғонистон аз хориҷ

Аз ҷониби
AZDA TV
-
0

Давлати Толибон барои бозгардондани чеҳарҳои саршинос ва сиёсии ҳукумати собиқи Афғонистон комиссиюне ташкил карда, то тариқи он битавонад онҳоро барои бозгашт ба кишвар розӣ кунад.

Аммо аксари сиёсатмадорони ҳукумати собиқи Афғонистон ин иқдомро ҷиддӣ қабул накарданд.

Масъуд Андаробӣ, вазири дохилаи ҳукумати Ашраф Ғанӣ дар саҳифаи

Томас Никлассон, Намояндаи вежаи Иттиҳоди Аврупо барои Афғонистон

Толибон дар ҳоле аз бозгардондани чеҳраҳои сиёсӣ мегӯянд, ки хабарҳо аз даргириҳо байни нерӯҳои Толибон бо нерӯҳои Ҷабҳаи муқовимати миллии Афғонистон мерасад. Тоҷиддин Суруш, рӯзноманигори афғонӣ дар Твиттераш навишта, ки даргирӣ байни Толибон ва нерӯҳои муқовимавт дар вулусволии Растоқи вилояти Тахор идома дорад. Ӯ менависад: “Манобеъ мегӯянд, ки ҷанг дар рустои “Деварӣ” миёни Ёрмуҳаммад, яке аз фармондеҳони Ҷабҳа ва Толибон новақти дишаб шуруъ шуд. То ҳанӯз аз талафот иттилое дар даст нест.”

Барқи истеҳсолшуда дар Тоҷикистон куҷо мешавад?

Аз ҷониби
firuzihait
-
0

Дар ду моҳи аввали соли ҷорӣ Тоҷикистон аз интиқоли нерӯи барқ ​​ба кишварҳои ҳамсоя беш аз 5,1 миллион доллар фоида ба даст овард.

Аммо ҳаҷми содироти нерӯи барқ ​​нисбат ба ҳамин давраи соли гузашта 26,6% ё беш аз 1,8 миллион доллар коҳиш ёфтааст.

Дар ин давра дар кишвар беш аз 3,7 миллиард кВт/соат нерӯи барқ ​​истеҳсол шудааст, ки нисбат ба ҳамин давраи соли 2021 9,8 % зиёд мебошад. Аммо дар бештари манотиқи Тоҷикистон сокинон аз набуди барқ ва ҷорӣ шудани лимит шикоян намуда, суол медиҳанд, ки Тоҷикистон ин қадар барқро куҷо мекунад ва чаро ваъдаи Президент Раҳмон дар бораи “афсона” шудани лимити барқ иҷро намешавад?

Қаблан хабар дода шуда буд, ки ҶСК “Барқи тоҷик” бо ширкатҳои Афғонистон ва Узбекистон дар мавриди интиқоли нерӯи барқ ​​ба ин кишварҳо барои соли 2022 қарордод бастааст.

Моҳи феврали соли ҷорӣ раиси ширкати “Барқи тоҷик” Мадумар Асозода ба хабарнигорон гуфта буд, ки Тоҷикистон имсол ба Афғонистон 1,5 миллиард кВт/соат нерӯи барқ ​​содир карданист.

Ба гуфтаи ӯ, дар созишномае, ки бо ширкати “Брешна”-и Афғонистон дар моҳи декабри соли гузашта дар Тошканд имзо шуда буд, нархи як кВт/соат нерӯи барқ ​​барои Афғонистон 4,67 сент муайян шудааст.

Ҳамчунин бар асоси созишномаи дуҷониба, дар соли ҷорӣ 1,4 миллиард кВт/соат нерӯи барқи Тоҷикистон бо қимати 2 сент барои ҳар киловатт ба Узбекистон содир мешавад.

Бино ба иттилои ширкати “Барқи тоҷик” соли гузашта ба Афғонистон ба маблағи 635,9 миллион сомонӣ (бо қурби расмии он замон 56,2 миллион доллар) як миллиарду 275,2 миллион кВт/соат нерӯи барқ ​​содир шудааст.

Ба Узбекистон 1 миллиарду 146,8 миллион кВт/соатро ба маблағи 258,8 миллион сомонӣ (бо қурби расмии он замон 22,9 миллион доллар) барқ содир шудааст.

Ширкати “Барқи тоҷик” яке аз ширкатҳои қарздортарин дар Тоҷикистон ба шумор рафта, қарзҳои кредитории ин ширкат дар соли 2021 наздики 32,3 млрд сомониро ташкил додааст.

Ифтитоҳи 4 иншооти нав дар пойтахт

Аз ҷониби
amrullokhi
-
0

Субҳи имрӯз дар шаҳри Душанбе Президент Эмомалӣ Раҳмон ҳамроҳи писараш як бинои иловагии гимназияи духтараш ва Кохи ҷадиди домодашро ба истифода дод

Акс аз сомони Хадамоти матбуоти Президент

Субҳи имрӯз, 17-уми марти соли 2022 Президент Эмомалӣ Раҳмон ҳамроҳ бо писараш Рустами Эмомал, шаҳрдори Душанбе чор бинои ҷадидеро, ки аз ҷониби соҳибкорони дохилӣ сохта шудаанд, дар пойтахт мавриди баҳрабардорӣ қарор дод.

Ин биноҳо иборат аз Меҳмонхонаи “Румӣ ҳотел энд резиденс” (The Rumi Hotel and Residences) дар ноҳияи Шоҳмансур, боғча ё Муассисаи томактабии хусусии “Закия” дар ноҳияи Фирдавсӣ, бинои иловагии таълимии Гимназияи хусусии “Кафолат” ва толори варзишии “Кохи Олимп” дар ноҳияи Сино мебошанд.

Ба таъкиди Хадамоти матбуоти Президент Эмомалӣ Раҳмон дар маҷмӯъ ин чор биное, ки имрӯз мавриди баҳрабардорӣ қарор дода шуданд, ҳама аз ҷониби соҳибкорон ватанӣ сохта шудаанд.

Гуфта мешавад, аз ҷамъи ин соҳибкорон дасти кам дутои онҳо ба фасоди идорӣ ва ё сӯистифода аз мансаб ва наздик будан ба хонаводаи Президент муттаҳам мешаванд.

Ин ду соҳибкоре, ки ба фасоди идорӣ ва сӯиистифода аз мансаб ва ё қаробат бо Эмомалӣ Раҳмон муттаҳам мешаванд, яке Раиси Дастогоҳи Президенти Тоҷикистон хонум Озода Раҳмон, молики Гимназияи хусусии Кафолат ва дуввумӣ Маҳмадзоир Соҳибов, домоди Прзедент Эмомалӣ Раҳмон ва соҳиби ширкати “Сафед-Дара” ва молики “Кохи Олимп” мебошанд.

Инчунин бархе коршиносони дохилӣ мегӯянд, моликони Муассисаи томактабии хусусии “Закия” ва  Меҳмонхонаи “Румӣ ҳотел энд резиденс”-и пойтахт низ аз наздикони Рустами Эмомалӣ мебошанд.

Гуфта мешавад, ин иншооти ҷадиди пойтахт тавассути афроди наздик ба Эмомалӣ Раҳмон дар замоне сохта шудаанд, ки коронавирус иқтисоди дунёро ба зону дароварда буд ва Тоҷикистон ҳам дар ду соли ахир бо камбуди будҷа дучор шуда буд.

Саҳми ҳукумати Эмомалӣ Раҳмон дар маблағгузорӣ кардан ба онҳо баробар ба сифр аст. Аммо худи Президенти Тоҷикистон ва Раиси Шаҳри Душанбе аз чунин фурсатҳо ба нафъи худ сӯистифодаи таблиғотӣ мекунанд.

Амруллоҳи Низом, махсус барои АЗДО ТВ

Samsung ҳамкорӣ бо Русияро қатъ кард ва ба Украина ваъдаи кумак дод

Аз ҷониби
AZDA TV
-
0

Ширкати бонуфузи электронии Samsung пас аз қатъи фаъолияташ дар бозорҳои Русия ваъда дода, ки ба Украина $6 миллион доллар кумаки башардӯстона ҷудо кардааст.

Jong-Hee Han, муовини ҳайъати мудирони ширкати Samsung

Муовини ҳайъати мудирони ширкати Samsung Ҷонг-Ҳи Ҳан (Jong-Hee Han) рӯзи чоршанбе хабар дод, ки ин ширкат дар натиҷаи буҳрони Украина ирсоли маҳсулоти электронии худро ба бозори Русия қатъ кардааст.

Муовини ин ширкати бонуфузи электронӣ рӯзи чоршанбе дар нишасте бо саҳомони ширкат гуфт, ки бо назардошти вазъи ноором дар Украина ва афзоиши кушташудагону оворагони ин кишвар, “ширкати мо ба ҷомеаи ҷаҳонӣ дар пуштибонӣ аз Украина ҳамроҳ шуда барои кумаки башардӯстона ба ин кишвари ҷангзада 6 миллион доллар ҷудо кард”.

Ҷаноби Ҳан ҳамчунин афзуда, ки масъулони ширкат масъалаи расонидани кумаки башардӯстонаи изофӣ ба украинҳоро баррасӣ доранд.

Пас аз ҳамлаи Русия ба Украина ҷомеаи ҷаҳонӣ хостори таваққуфи ҷанг шуд, аммо Русия иддао дорад то расидан ба аҳдофи худ дар Украина ҷангро идома медиҳад. Кишварҳои ғарбӣ ва Амрико ба хотири пешгирӣ аз идомаи ҷанг алайҳи Русия таҳримҳои шадидеро ҷорӣ карданд, ки дар пасманзари ин таҳримҳо даҳҳо ширкатҳои бузурги ҷаҳонӣ низ аз бозори Русия канор рафтанд.

Ӯзбекистон: “Мо Донетск ва Луганскро ҷумҳуриҳои алоҳида намешиносем”

Аз ҷониби
amrullokhi
-
0

Вазири корҳои хориҷии Ӯзбекистон эълон кард, ки ”Ӯзбекистон истиқлолият, ҳокимият ва тамомияти арзии Украинаро ба расмият мешиносад.”

Бино ба иттилои расонаҳои Ӯзбекистон, Абдулазиз Камилов, вазири корҳои хориҷии ин кишвар гуфтааст, ки Тошканд дар ин шароити вазнин Украинаро дастгирӣ мекунад ва кумакҳои башардӯстонаи худро ба Уркиана идома медиҳад.

Абдулазиз Камилов, Вазири корҳои хориҷии Ӯзбекистон дар як суханронии худ дар парлумон ба вакилони кишвараш гуфтааст: “аз нигоҳи таърихӣ мо бо Русия ва Украина рабитаҳои зиёде дорем ва бар асоси манофеи миллӣ Ӯзбекистон ҳамкориҳои мутақобилан судманди худро бо ҳар ду кишвар идома медиҳад.”

Вазири корҳои хориҷии Ӯзбекистон дар робита ба ду минтақаи истиқлолталаби Украина таъкид кардааст: “Мо Донетск ва Луганскро ҷумҳуриҳои алоҳида эътироф намекунем.”

Дар ҷамъи кишварҳои Осиёси Марказӣ, ки дар гузашта ҳама мустамликаҳои Русия ва увзи кишварҳои собиқ Шӯравӣ буданд ва ҳоло ҳам аз муттаҳидон Крмелин ҳисоб мешаванд, Ӯзбекистон нахустин кишварест, ки ҳамлаҳои Русияро нодида гирифта, бо сароҳат ҳимояти худ аз Украинаро эълон мекунад.

Гуфта мешавад, Владимир Путин, раиси ҷумҳури Русия 22-юми феврали соли 2022 расман “Ҷумҳурии халқии Луганск” ва “Ҷумҳурии халқии Донестк”, ду минатқаи ҷудоиталаби Украинаро дар Донбас ба расмият шинохт ва ба баҳонаи ҳимоят аз рустаборони ин ду минтақа аз “миллигароҳо”-и украинаӣ ва пешгирӣ аз хатари таҳдидҳои эҳтимолӣ субҳи 24-уми феврали соли ҷорӣ ҳамлаҳои худро ба Украина оғоз карда ва инак ҳафтаи сеюм аст, ки ҷанг идома дорад.

Дар давоми ин ҷанге, ки 21 рӯз боз идома дорад, наздик ба 3 миллион нафар аз Украина муҳоҷир шуда, раҳбарони Киев мегӯянд, ки Русия дар асари ҳамлаҳои худ ҳудуди 600 миллиард доллар ба ин кишвар зарар ворид кардааст.

Шикояти кормандони давлатии ВМКБ аз Алишер Мирзонаботов

Аз ҷониби
firuzihait
-
0

Чанеде аз кормандони давлатии Вилояти Мухтори Кӯҳистони Бадахшон ба расонаи “Pamir Daily News” аз раиси ин вилоят Алишер Мирзонаботов шикоят доранд.

Ба иддаои кормандони давлатӣ бо омадани Алишер Мирзонаботов кор барои онҳо рӯз аз рӯз тоқатфарсо мегардад, зеро онҳо маҷбуранд ба корҳое машғул шаванд, ки дар салоҳияташон нест.

“Ба ифтихори ҷашни Наврӯз роҳбарияти вилоят тамоми раёсат ва шуъбаҳои ҳукумати вилоятро маҷбур мекунанд, ки асбобу анҷоми рӯзгор (Мошинҳои ҷомашӯӣ, телевизорҳо, компютерҳо ва ғайра) харидорӣ кунанд. Онҳо мехоҳанд таҷҳизотро дар мусобиқаи гуштии миллӣ, ки маъмурияти ВМКБ баргузор мекунад, ҳамчун туҳфа гузоранд.”- мегӯяд манбаи Pamir Daily News.

Ин кормандон аз он шикоят доранд, ки рӯзгори худро базӯр таъмин карда истодаанд ва маҷбуранд болои ин барои хариди фармудаҳои мақомот аз бонкҳо қарз гиранд.

Онҳо мегӯянд: “Ҳатто бештари кормандони давлатӣ дар Бадахшон дар бораи он фикр мекунанд, ки чӣ гуна ариза навишта, аз кор хориҷ шаванд, аммо ҳоло буҳрон ҳатто дар Русия вуҷуд дорад ва мардум роҳи раҳоӣ надоранд.”

Ба иддаои манобеъ, ин ягона мушкил дар вилоят нест. Ба ғайр аз ин раҳбарияти Бадахшон барои пур кардани артиши кишвар кормандони ҳукуматро маҷбур доранд, ки ҷавонони синни даъватро пайдо карда ба артиш ҷалб кунанд.

Ҳамчунин онҳо аз он шикоят кардаанд, ки “Дар ин моҳҳо мақомот моро маҷбур сохтанд, ки паёмҳои видеоии аблаҳона сабт кунем, моро дар назди мардум шарманда карданд.”

Ҳамсӯҳбатони Pamir Daily News мегӯянд, бо омадани Мирзонаботов ба вазифаи раиси вилоят барномаҳое роҳандозӣ шуда, ки то ҳол дар минтақа чунин набудаст.

Мақомот ин дафъ бародари муассиси ҲНИТ-ро боздошт карданд

Аз ҷониби
AZDA TV
-
0

Мақомоти виояти Хатлон инак нафари сеюм аз хонавода ва наздикони муассиси ҲНИТ ва раиси Комиссияи оштии миллии Тоҷикистон марҳум Саид Абдуллоҳи Нуриро боздошт карданд.

Нуруллоҳ Саидов, бародари марҳум Саид Абдуллоҳи Нурӣ рӯзи душанбе 14 март аз ҷониби мақомоти вилояти Хатлон боздошт шуд. Мақомот сабаби боздошти Саидовро то ҳол шарҳ надодаанд, аммо наздиконаш мегӯянд, ӯ ба дарёфти маблағ аз хориҷа муттаҳам мешавад.

Боздошти Нуруллоҳ Саидов дар ҳолест, ки мақомоти интизомии вилояти Хатлон охири моҳи январ бародарзодаи марҳум Саид Абдуллоҳи Нурӣ, Нусратуллоҳ Саидов ва ҳафтаи пеш бародарзодаи дигараш Муҳибуллоҳ Нуриддиновро боздошт карда буданд.

Пайвандони Нуруллоҳ Саидов мегӯянд, ҳарсе боздоштшудагон бо иттиҳоми яксон, “дарёфти маблағ аз хориҷи кишвар” мутаҳҳам мешаванд. Ба иддаои наздикони боздоштшудагон, дарёфт кардани маблағ аз наздикони дар хориҷбуда ҷиноят маҳсуб намешавад, чун тамоми сокинони кишвар муҳоҷир доранду моҳона маблағе барои рӯзгузаронӣ дарёфт мекунанд.

Мақомот сабаби аслии боздошти пайвандони марҳум Саид Абдуллоҳи Нуриро шарҳ намедиҳанд. Ин боис шуда, ки ҳадсу гумонҳое дар бораи ин ки “мақомот аз пайвандони марҳум Нурӣ қасд гирифтанро оғоз кардааст”, дар ҷомеа бештар шудааст.

Нигаронии сафорати Амрико аз набуди интернет дар Бадахшон

Аз ҷониби
firuzihait
-
0

Сафорати Иёлоти Муттаҳидаи Амрико дар Душанбе рӯзи 16-уми март бо нашри эъломияе аз набудани Интернет дар Вилояти Мухтори Кӯҳистони Бадахшон изҳори нигаронӣ кард.

Дар ин эъломия Сафорати Амрико аз Ҳукумати Тоҷикистон хостааст, ки дастрасии пурраи мардуми Бадахшонро ба Интернет таъмин кунад.

Сафорати Амрико навиштааст, ки “Ин амал имкони дастрасии сокинони вилоятро ба иттилоот, пеш бурдани тиҷорат ва озодии баён таҳти таъсир қарор додааст. Аз Ҳукумати Тоҷикистон даъват мекунем, ки ба озодии бунёдӣ эҳтиром бигузорад.”

Ин бори аввал нест, ки кишварҳои хориҷӣ ва намояндагони созмонҳои ҷаҳонӣ аз набуди Интернет дар ВМКБ изҳори нигаронӣ мекунанд.

Пештар Мишел Бачелет, комиссари олии СММ дар мавриди ҳуқуқи башар низ қатъи Интернетро дар ВМКБ нақзи ошкори ҳуқуқи башар номида буд.

Сокинони шаҳри Хоруғ ва атрофи он аз моҳи ноябри соли 2021, пас аз тазоҳуроти чаҳоррӯзаи мардум дар маркази вилоят то ин дам аз Интернет маҳруманд ва фишори мақомот болои мардуми ин минтақа рӯз аз рӯз бештар шуда истодааст.

Сафари 3 раҳбари кишварҳои Иттиҳоди Аврупо ба Киев

Аз ҷониби
AZDA TV
-
0

Раҳбарони се кишвари Аврупоӣ – Лаҳистон, Чехия ва Словения рӯзи 16-уми март барои дидор бо Зеленский ба Киев сафар карданд.

Тавре Дафтари матбуоти Президенти Украина хабар медиҳад, Владимир Зеленский бо нахуствазири Лаҳистон Матеуш Моравецкий, муовини нахуствазири Лаҳистон Ярослав Качинский, нахуствазири Чехия Петр Фиала ва сарвазири Словения Янез Янша дар Киев мулоқот кард.

Владимир Зеленский аз раҳбарони ин се кишвари аврупоӣ барои пуштибонии кишварҳояшон аз Украина ва ҳамчунин барои шахсан ба Киев сафар карданашон изҳори сипос кард. Ӯ ҳамчунин таъкид карда, ки бо пуштибонии онҳо ва доштани чунин ҳамсояҳои нек мардуми Украина пирӯз хоҳад шуд.

Ин се мақоми баландпояи аврупоӣ дар ҳоле вориди Киев шудаанд, ки дар атрофи ин шаҳр байни нерӯҳои украинӣ ва русӣ задухӯрди шадид ҷараён дорад.

Нахуствазири Лаҳистон Матеуш Моравецкий дар ин мулоқот таъкид карда, ки агар Украина дар ин ҷанг шикаст бихӯрад, Аврупо дигар Аврупои собиқ нахоҳад буд ва таъкид карда, ки Лаҳистон ҳамчун ҳамсояи наздик пуштибони қавии Украина боқӣ хоҳад монд.

Гуфта мешавад, намояндагони ин се кишвари аврупоӣ аз хатарнок будани сафарашон ба Украина воқиф будаанд ва ба ин хотир на бо ҳавопаймо, балки сафарашон бо қатора ба Киев сурат гирифтааст.

1...451452453...748саҳифаи 452 аз 748

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
21.1 ° C
21.1 °
21.1 °
56 %
1kmh
1 %
Fri
20 °
Sat
28 °
Sun
28 °
Mon
26 °
Tue
27 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст