Марҳабои Абдураҳмон, як сокини ноҳияи Ҳамадонии вилояти Хатлон ба президенти кишвар Эмомалӣ Раҳмон ва шаҳрдори Душанбе Рустами Эмомалӣ ҳамчун шаҳрванди соҳибҳуқуқ муроҷиат намуда, мегӯяд, ки ба мушкилоташ расидагӣ намуда, барояш ҳарҷое, ки набошад як хона бидиҳанд, чун аз бехонагӣ солҳост, ки ранҷ мекашад.

Марҳабо дар сӯҳбат бо “Аздо тв” мегӯяд, ки шавҳараш ӯро бо ду фарзанд талоқ дода ва аз баски дар хонаи падарияш ҳамагӣ ду ҳуҷра доранд ва бародаронаш бо фарзандонашон онҷо зиндагӣ мекунанд, маҷбур шудааст, ду писарашро дар назди модар гузошта ба Русия ба умеди кор кардану соҳиби хонае шудан сафар мекунад, то битавонад дар хонаи худ фарзандонашро дуруст тарбият кунад.

Марҳабо меафзояд, ки давоми се сол аст дар шаҳри Маскави Русия дар як сардхона бо маоши 20 ҳазор рубли русӣ косаву табақ мешӯяд.

Ба гуфтаи худи ӯ, аз нисф зиёди ин маблағ сарфи иҷора ва иҷозати корӣ (патент)-у дигар чизҳо мешавад ва ӯ танҳо моҳона аз 5 то 6 ҳазор рубл метавонад ба фарзандонаш бифиристад.

“Мо ҳаррӯз аз соати 6-и субҳ то 11-и шаб кор мекунем. Бо вуҷуди ин қадар сахткорӣ маблағи хеле ночиз мегирем. Баъзан моҳҳо мешавад, ки бо сабаби як дақиқа таъхир кардан аз кор, аз сари маошамон кам мекунанд, ки дигар наметавонам маблағе барои фарзандонам бифиристам”, – мегӯяд ҳамсӯҳбати мо.

Ӯ мегӯяд, дар Маскав сахттарин ранҷу машаққатро мекашад, вале дарди бехонагӣ ранҷи рӯзгор дар ватан ӯро маҷбур сохтааст, ки ин ҳама мушкилотро тоқат кунад. Ӯ ба Президенти кишвар хитоб намуда мегӯяд, “Дарди бехонагӣ афгорам кардааст, илтимос кумакам кунед”.

Ба нақли худи Марҳабо боре ба Дастгоҳи Президенти кишвар нома навишта аз мушкилоти бехонагияш шикоят карда буд, вале як сол гузашт посухе аз нома набуд, сипас маҷбур шуд барои кор ба Русия сафар кунад.

Дар суоли ин ки чаро ба ҷамоати деҳот ва масъулони ноҳияашон муроҷиат накардааст, мегӯяд, “ман медонам, ки онҳо ҳаргиз баҳри рафъи мушкилоти ман коре намекунанд, бефоида аст муроҷиат кардан”.

Аксари сокинони кишвар аз ноилоҷӣ маҷбур мешаванд ба Президенти кишвар ва шаҳрдории Душанбе арзу додашонро бирасонанд. Яке аз ноадолатӣ дигаре аз мушкилоти сахти рӯзгор мегӯяд. Аммо кам дида мешавад, ки ин арзу шикоятҳо посухи мусбат гирифта бошанд.

Чанде пеш зани тоҷире аз шаҳри Хуҷанд дар суҳбат бо “Аздо тв” гуфта буд, ки 22 маротиба ба масъулони баландпоя ва Дастгоҳи Президенти Тоҷикистон аз беадолатиҳо шикоят навиштааст, аммо посухе нест.

Дар чунин ҳолатҳо бештар хайрхоҳоне аз байни худи муҳоҷирон ё тоҷирон пайдо мешаваду дасти чунин муҳотоҷонро мегиранд.

Рӯзи 16-уми декабр дар ҷаласаи навбатии порлумони Тоҷикистон ҳангоми ворид намудани тағйиру иловаҳо ба қонун “Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда”, мавриди баҳсу баррасӣ қарор гирифтааст.

Вакилони Маҷлиси намояндагони Тоҷикистон бо қабули як тарҳ адвокатҳои тоҷикро аз гирифтани иҷозатнома барои мулоқот бо гумонбаршуда, айбдоршаванда ва ё судшаванда, озод намуданд.

Мансур Усмонов, вакили Маҷлиси намояндагон зимни муаррифии ин тарҳ гуфтааст, “лоиҳа барои амалисозии ислоҳоти судӣ, мукаммалсозии қонунгузории мурофиавии ҷиноятӣ ва мутобиқгардонии он бо меъёрҳои байналмилалӣ таҳия шудаст”, вале дар бораи тарҳ ҷузъиёти бештар надодааст.

Пеш аз ин адвокатҳо барои мулоқот бо зерҳимояи худ аз мақомоти тафтишотӣ расман иҷозат мегирифтанд, ки ҳамеша ҳомиёни ҳуқуқ аз ин нигаронӣ мекарданд.

Бино ба иттилои дафтари матбуоти Агнетии давлатии молиявӣ ва мубориза бо корупсияи Ҷумҳурии Тоҷикистон, Ғаюров Таҳмурас Файзидинович корманди ШКВД дар ноҳияи Рӯдакӣ, ки дар вазифаи сардори қисми навбатдорӣ фаъолият мекардааст, бо иттиҳоми гирифтани пора аз ҷониби ин ниҳод боздошт шуд.

Гуфта мешавад, Ғаюров моҳи июли соли 2018 аз шаҳрванд Собирова Х.Б. барои итиқоли фарзандаш аз Донишкадаи ҳарбии Вазорати мудофиаи Ҷумҳурии Тоҷикистон ба Академияи Вазорати корҳои дохилии Ҷумҳурии Тоҷикистон ҳамчун пора 3 ҳазор доллари ИМА талаб намудааст.

Ба навиштаи сомонаи Агентӣ номбурда аз маблағи талабнамудааш 15.000 сомониашро аз худ кардааст.

Нисбати Ғаюров Т.Ф. бо моддаи 247 қисми 3 банди “а” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, он баъди анҷоми тафтиши пешакӣ барои моҳиятан баррасӣ намудан ба суд ирсол карда шудааст.

Раиси ҷамоати шаҳраки Исфараро ба гумони гирифтани пора дар ҳаҷми 4 ҳазор доллар ба хотири ҷудо намудани қитъаи замин ба як шаҳрванд, аз ҷониби додситонӣ боздошт гардидааст.

Хабаргузориҳо аз раиси ҷамоат М.М ном бурданд, ӯ бо ҳамкорӣ ва миёнаравии як корманди кооперативи тиҷоратии “Суфро Боқиева” аз як устои чӯбтарош барои имзову муҳр ва ҷудо намудани қитъаи замин 5 ҳазор доллари амрикоӣ талаб карда, ҳангоми гирифтани 4 ҳазори он дар утоқи корияш дастгир  гардидааст.

Радиои Озодӣ аз манбааш аз додситонии шаҳри Исфара навишт, ки марди 60 сола устои чӯбтарош буда, барои сохтмони корхонаи кордсозӣ, маводи ороишӣ аз чӯбу тахта ва мағоза барои фурӯши маҳсулоти тайёр ниёз ба қитъаи замин доштааст.

Дар идома зикр гардидааст, ки “Бо вуҷуди он, ки устои чӯбтарош аз раиси ҷамоат, бисёр хоҳиш менамояд, ки азбаски писараш дар муҳоҷирати меҳнатӣ аст, имконияти додани 5 ҳазор долларро надорад, балки метавонад 3 ҳазор доллар диҳад, ӯ розӣ намешавад.

Ин дар ҳолест, ки дар Тоҷикистон солҳои 2019-2021 “Соли рушди деҳот, саёҳӣ ва ҳунарҳои мардумӣ” эълон гардидаст, ки борҳо аз ҷониби Ҳукумат таъкид шудааст, ки мақомот барои беҳбудии кори ҳунармандони мардумӣ шароит фароҳам созанд.

Дар идома гуфта мешавад, ки нисбати ин нафар додситонии шаҳри Исфара бо моддаи 319–и Кодекси ҷиноии Тоҷикистон, “гирифтани пора”парванда оғоз кардааст. Вале то ҳол назари дастгиршуда ва наздиконаш дар ин маврид дастрас нест.