Як сокини шаҳри Турсунзода дар суҳбат ба “Аздо тв” гуфт, ки мехоҳад ба раисҷумҳури Тоҷикистон Эмомалӣ Раҳмон муроҷиат намуда, аз хунукназарии масъулони ин шаҳр дар иҷрои фармони Президент ба ӯ шикоят кунад.

Абдуллоҳ Баев, сокини ш.Турсунзода ҷамоати деҳоти Қаратоғи деҳаи Маданият мегӯяд, бо вуҷуди он ки раисҷмуҳур Эмомалӣ Раҳмон ба мактуби онҳо барои гирифтани замини назди ҳавлигӣ посухи мусбат додааст, мақомоти шаҳри Турсунзода то ҳол ба мушкилии онҳо расидагӣ накардаанд.

Ба гуфтаи ин сокини 32-солаи шаҳри Турсунзода, дар замини шашунимсотиқа 6 нафар бародарон ҳамроҳи модари пир ва 4 келин зиндагӣ доранд. Ба даъвои сокини шаҳри Турсунзода замини онҳо аз 7 ҳуҷра иборат буда, 4 оила дар маҷмӯъ 20 нафар зиндагӣ мекунанд.

Хонаводаи (оила) Баевҳо ду маротиба, як бор соли 2012 ва такроран соли 2014 барои гирифтани замини наздиҳавлигӣ ба Идораи Ҷамоъати Қаратоғ ариза додаанд вале мақомот гуфтаанд, ки дар хонаи шумо 5 нафар кор мекунад ва шумо оилаи камбизоат маҳсуб намешавед, аз ин хотир аз додани замини наздиҳавлигӣ ба оилаи Баевҳо худдорӣ кардаанд.

Абдулло мегӯяд нафароне ҳастанд, ки солҳои 2018 ариза доданд ва ҳоло соҳиби замин ҳастанд. Дар деҳаи маданият ки Абдулло онҷо сукунат мекунад замин гарон буда 10 метри мурабаъи замин онҷо 3000 доллари амрикоӣ нарх доштааст.

Онҳо соли 2015 маҷбур шудаанд ба худи Президент нома бинависанд ва соли 2016 Дастгоҳи Президент ба номаи оилаи Баевҳо посух гуфта аз ҳукумати маҳалии ш.Турсунзода талаб карда, ки шароити зиндагии оилаи Баевҳоро санҷанд ва дар сурати воқеият доштани иддаои шаҳрванд барои онҳо замин ҷудо карда шавад. Аммо ҳангоми расидани нома ба идораи ҳукумати ш.Турсунзода ба онҳо гуфтаанд, ки ҳоло вақти замин тақсимкунӣ набудааст.

Пас аз сипарӣ шудани наздик ба 8 сол ин оила то ҳол соҳиби замин нашудаст. То ин замон ҷамоат бо баҳонаҳои гуногун корро ба таъхир меандохтааст. Ҳоло худи Абдуллоҳ дар Русия қарор дорад ва барои фаҳмидани масъалаи тақсими замин ҳамсараш ба идораи ҷамоъат меравад, аммо масъулон бо ӯ барои доштани рӯсарӣ сӯҳбат намекунанд.

Ба гуфтаи ин сокин намояндагони ҷамоат баҳона пеш овардаанд, ки аксари мардҳои ин оила дар муҳоҷирати меҳнатӣ ҳастанд ва ба ин хотир наметавонистаанд онҳоро ҳамчун оилаи камбизоат номнавис кунанд. Модари хонавода 60 сол дошта 20 сол собиқаи корӣ дар заводи алюминий дорад ва ҳамагӣ 150 сомонӣ ҳаққи бознишастагӣ мегирад.

Абдуллоҳ мегӯяд, худам кайҳо замин харида соҳиби хонаву дар мешудам, муттассифона духтарам, ки 6 сол дорад, аз рӯзи таваллуд аз бемории қалб ранҷ мебарад ва ҳама даромадам сарфи табобати ӯ мегардад. Барои ҷарроҳии духтараш табибони Бемористон Истиқлол наздики 50 то 60 ҳазор сомонӣ талаб кардааанд. Райҳонаро бояд дар 4 солагияш ҷароҳӣ мекарданд аммо аз сабаби надоштани маблағи кофӣ ҷарроҳии ӯ ба таъхир андохта шудааст.

Ӯ мегӯяд дар навбат бояд номнавис кунанд то инки пизишкони эронӣ онҳоро бепул ҷарроҳӣ кунанд, аммо дар ин руйхат танҳо оилаҳои камбизоат номнавис мешудаанд. Дар ҷамоати деҳа оилаи онҳоро камбизот намедонанд.

Намояндагони ҷамоат дар соли 2016 пас аз мактуби Дастгоҳи расиҷумҳур аз хонаи онҳо дидан карда, гуфтанд, ки ҳатман замин ҷудо мекунанд. Абдуллоҳ мегӯяд, тӯли ин солҳо раисони ҷамоат ва шаҳр паи ҳам иваз мешаванд, аммо арзи онҳоро касе дида намебарояд.

Президенти Тоҷикистон Эмомалӣ Раҳмон раиси суди ноҳияи Бобоҷон Ғафурови вилояти Суғдро ба хотири паст задани шаъну шараф аз вазифа озод намуд.

Тибқи иттилои дафтари матбуотии Призидент “Холиқзода Акбар Ризо бинобар содир намудани кирдоре, ки шаъну эътибори судяро паст мезанад, аз вазифаи судяи суди ноҳияи Бобоҷон Ғафурови вилояти Суғд озод карда шавад”.

Вале дар ин хабар гуфта нашудааст, ки Холиқзодаро бо кадом гуноҳ ё иттиҳоме аз вазифа озод кардаанд.

Танҳо ҳамин гуфта мешавад, ки раисҷумҳури Тоҷикистон, Холиқзода Акбар Ризоро бинобар паст задани шаъну эътибори судӣ аз мақом барканор кардааст.

Ин бори аввал нест, ки Эмомалӣ Раҳмон судяҳоро бо чунин фармон аз вазифа озод мекунад. Чанде қабл бо ҳамин шакл, Турсунзода Шараф судяи суди ноҳияи Айнӣ ва Собирзода Зайдулло Фозил судяи суди шаҳри Ҳисорро аз мақомашон барканор карда буд.

Ба назари огаҳони умур, системаи судии Тоҷикистон яке аз системаҳои фасодзадатарин унвон мешавад, ки даҳҳо шаҳрванди Тоҷикистонро бо ҷурмҳои сохтаву бофта, ноадолатона равонаи зиндон мекунанд.

Коршиносони соҳа иллати асосии фасодзада будани бахши саввуми ҳокимиятро ба хариду фурӯш шудани мансабҳои судӣ рабт медиҳанд, ки як судя ба хотри маблағи сарфкардааш ба таври табиӣ даст ба фасод мезанад.

Аз руйи маълумоти ғайрирасмӣ, ки дар хабаргузориҳо нашр мешавад, нишастан бар курсии судя дар Тоҷикистон аз 30 то 40 ҳазор доллари амрикоӣ нарх доштааст. Вале мақомоти Тоҷикистон ҳамеша ин ҳарфҳоро рад мекунанд.

Сироҷиддин Абдураҳмонов, маъруф ба Эшони Сироҷиддин дар ҳабси пешакӣ қарор дорад. Дар ин бора Радиои Озодӣ бо такя ба манбаъи муътамад хабар дод.

Рӯзи 17 ноябр як манбаъ аз низоми додгоҳи ба Радиои Озодӣ гуфтааст, ки Додгоҳи ноҳияи Исмоили Сомонӣ қарори ба ҳабси пешакӣ гирифтани Эшони Сироҷиддинро содир кард. Ин манбаъ бо шарти бурда нашудани номаш гуфта, ки ин қазия махфӣ аст ва ба ин хотир ҳеҷ шарҳе дода намешавад.

Радиои Озодӣ менависад, ки талошҳояш барои ёфтани наздикони Эшони Сироҷиддин бенатиҷа будааст, чун гуфта мешуд макони зисти ӯ дар маҳаллаи Зарафшони шаҳри Душанбе аст, вале ҳамсояҳояш гуфтаанд, ки “рӯҳонӣ бо оилааш аз инҷо кӯчидааст”.

Хабари боздошти Эшони Сироҷиддин бо шумули чанд шогирдаш рӯзи 12 ноябр дар расонаҳо нашр шуд.

Гуфта мешавад дар байни боздоштшудаҳо як блогери тоҷик ҳам аст. Номи блогер то ҳол маълум нест. Ба навиштаи Радиои Озодӣ, вақтҳои охир Эшони Сироҷиддин дар канали ютубии “Садои Умед” дар масоили динӣ суҳбатҳо анҷом медод. Навори охирин дар ин шабака чанд рӯзи пеш нашр шудааст ва масъулони ин шабака ба зангҳои телефонии Радиои Озодӣ ҷавоб надодаанд.

Мақомот Эшони Сироҷиддинро соли 2009 боздошт намуда, бо иттиҳоми узвият дар ҷараёни “Салафият” барои 7 сол равонаи зиндон карда буд, аммо баъд аз сипарӣ кардани 4 сол озод шуд. Баъд аз озод шуданаш аз зиндон равиши гуфтораш пурра ивваз шуд ва вақтҳои ахир бештар ба тавсифи раисҷумҳур ва танқиди ҲНИТ ва мухолифон мепардохт.