Бахши тоҷикии радиои “Садои Хуросон” бо истинод ба пойгоҳи хабарии “tajweek.tj” менависад, ки коршиноси масоили энержӣ Камолиддин Сироҷиддинов ба изҳороти масъулини ширкати “Барқи тоҷик” дар мавриди сабаби лимити барқ дар манотиқи кишвар аз соати 8:00 то 17:00, ки таҷдиди турбинаҳои нерӯгоҳи “Норак” гуфтаанд, эрод гирифта мегӯяд:

“Бо сабаби камбориш омадани имсол, аз 9 турбина дар нерӯгоҳи барқии “Норак” танҳо 3 тоаш кор мекунанд ва турбинаҳои дигар барои сарфаи оби сарбанд барои истифодаи зимистон кор намекунанд”.

Сироҷиддинов афзуд:

“Агар ҳоло оби сарбанди нерӯгоҳи “Норак” истифода шавад, дар зимистон об намемонад, аз ин рӯ масъулини ширкати “Барқи тоҷик” бояд ба мардум ҳақиқатро эълом кунанд ва бигӯянд, ки сабаби асосии лимити барқ дар кишвар ​​мушкилоти фаннӣ ва бозсозии турбинаҳо нест, балки буҳрони камбуди об аст”.

Масъулони ширкати давлатии “Барқи тоҷик” бо пахши гузорише дар бахши ахбори Шабакаи аввали телевизиони Тоҷикистон сабаби ҷорӣ кардани лимити барқ ​​дар аксари манотиқи кишварро идомаи бозсозии турбинаҳои нерӯгоҳи “Нарак” унвон карданд.

Ёдовор мешавем, ки чандест дар аксар манотиқи кишвар мисли солҳои пешин лимити барқ ҷорӣ шудааст. Сокинон аз он шикоят доранд, ки дар як шабонарӯз танҳо аз 10 то 12 соат барқ доранд, ҳатто дар баъзе минтақаҳо аз ин ҳам камтар барқ дода мешавад.

Ин дар ҳолест, ки Эмомалӣ Раҳмон борҳо дар суханрониҳояш гуфта буд, ки дигар лимити барқ аз байн бардошта шудааст ва бебарқиҳои зимистонаро ба афсона ташбеҳ карда буд.

Додситонии шаҳри Сургути Русия хабар дод, ки парвандаи шаҳрванди 23-солаи Тоҷикистонро, ки аз маҳбаси ЛИУ-17 фирор карда буд, ба додгоҳ фиристодааст.

Ҳамчунин гуфта мешавад, ин ҷавони тоҷик ба ҷуз иттиҳоми фирор аз маҳбас боз ба ғоратгарӣ айбдор карда шудааст.

“Ахбор. ком” менависад, ки бино ба иттилои Хадамоти матбуоти додситонии ҳавзаи мухтори Хантию Манси – Югра (ХМАО), “тафтишот муайян кардааст, ки айбдоршаванда, ки моҳи августи соли 2020 барои ғоратгарӣ маҳкум ба зиндон шуда буд, дар маҳбас, вақте донист, ки мақомоти ҳифзи ҳуқуқ боз як парвандаи ҷиноятӣ бар зидди ӯро бо иттиҳоми боз як мавриди ғоратгарӣ тафтиш мекунанд, худсарона аз муассисаи ислоҳӣ фирор кард”.

Маврид ба ёдоварсит, ки рӯзи 24 сентябр ин маҳбус аз зиндони табобатию ислоҳии ЛИУ-17 дар шаҳри Сургут, ки бо ҷурми ғоратгарӣ маҳкумшуда буд, фирор кард.

Баъд аз як рӯз ӯро аз бозори «Аскания» боздошт карданд. Пойгоҳи хабарии маҳаллии «К-Информ» дар он вақт хабар дода буд, ки маҳбуси фирорӣ 23 сол дошта, зодаи Тоҷикистон аст. Дар идома хабар гуфта мешавад, ки ӯро ҳамагӣ ду ҳафта пеш аз фирораш ба ЛИУ-17 интиқол додаанд.

Ба навиштаи пойгоҳи хабарии «К-Информ» ин зиндонӣ ҳангоми сайругашт дар ҳавличаи маҳбас панҷараи оҳанини шифтро канда, болои бом баромадааст ва худашро ба он тарафи девори маҳбас партофта фирор кардааст.

Бино ба иттилои Хадамоти федеролии зиндонҳои Русия (ФСИН), дар зиндонҳои он кишвар ҳудуди 7 ҳазор шаҳрванди Тоҷикистон нигаҳдорӣ мешаванд.

Ҳамчунин беш аз 1200 зодаи дигари Тоҷикистон дар боздоштгоҳҳо қарор доштаанд.  

Дар шаҳри Хуҷанди вилояти Суғд автобусҳои мусофиркшонӣ ба системаи кортӣ-электронӣ гузаштаанд.

Бино ба иттилои хабаргузории “Азия-Плюс” шурӯъ аз 10 ноябри соли ҷорӣ дар автобусҳои мусофиркашонии шаҳри Хуҷанд системаи кортӣ ҷорӣ гардидааст.

Гуфта мешавад, ки ду сол қабл ба шаҳри Хуҷанд беш аз 100 адад автобус ворид шудааст, ки ҳоло қисме аз он дар хатсайри дохилишаҳрӣ ва масири шаҳрҳои канорӣ ҳаракат мекунад.

Дар бораи аз кадом ҷиҳат маблағгузорӣ шудани системаи пардохти электронӣ гуфта мешавад, ки он дар доираи лоиҳаи “Рушди нақлиёти ҷамъиятӣ” дар шаҳри Хуҷанд аз ҷониби Бонки Аврупои таҷдид ва рушд ва ташкилоти молиявии давлати Шветсария -“СЕКО” маблағгузорӣ шуда, ҳаҷми ин тарҳ 5 миллион доллари ИМА-ро дар бар гирифтааст.

Маблағи тарҳи мазкур кумаки бебозгаш гуфта мешавад. Ин низоми нави пардохт дар нақлиёти ҷамъиятиро дар шаҳри Хуҷанд ширкати “Авесто гурӯҳ” роҳандозӣ кардааст, ҳамчуноне, ки ин ширкат низоми кортии нақлиёти ҷамъиятии шаҳри Душанберо зери даст дорад.

Баъд ба вазифаи Раиси шаҳри Душанбе омадани Рустами Эмомалӣ писари бузурги Эмомали Раҳмон аз Туркия автобусҳои нав ба Тоҷикистон ворид карда буданд, ки он замон сухан дар бораи ҷорӣ намудани системаи кортӣ сухан мерафт.

Дар он замон низ воридкунандаи автобусҳои нав ширкати “Авесто гурӯҳ” гуфта мешуд.

Бино ба маълумоти ғайрирасмӣ “Авесто гурӯҳ” ширкати Рустами Эмомалӣ буда, баъд аз раиси шаҳри Душанбе таъин гардиданаш дар ҷомеа шинохта гардид.

Агентии давлатии мубориза бо коррупсияи Ҷумҳури Тоҷикистон аз боздошти мутахассиси Шуъбаи умумӣ, назорат ва муроҷиати шаҳрвандони Дастгоҳи Раиси шаҳри Бохтар хабар дод.

Бино ба иттилои сомонаи Агентӣ, Абдураҳмонов А.А., моҳи феврали соли 2020 бо истифода аз мақоми хизматиаш аз шаҳрванд Сабиров Р.Р. барои барасмият даровардани ҳуҷҷатҳо барои зиёрати Каъба мавсими Ҳаҷ-2020 аз номбурда маблағи 80000 сомонӣ талаб карда гирифта гирифтааст.

Гуфта мешавад, маблағи гирифташударо Абдураҳмонов А.А. ба манфиати худ истифода намуда, асноди шаҳрванд Собиров Р.Р-ро, ки мебоист барои ба Ҳаҷ рафтанаш тартиб медод, омода накардааст.

Агентӣ менависад, ки нисбати Абдураҳмонов А.А. бо моддаи 247 қисми 4 банди “б”-и  Кодекси ҷиноятии Ҷумҳурии Тоҷикистон парвандаиҷиноятӣ оғоз гардида, он бо тасдиқи фикри айбдоркунӣ ба суд фиристода шудааст.